Jɔn 12

1Na ŋoot akol kedhetem ke ret, go Yecu lɔ Bethani, te tɔ Ladharo thin, man cii Yecu cɔk jɔt rɔt ne thouic. 2Goki luɔi miɛth thei etɛɛn: ku jɔte Martha; ku Ladharo ee ci nyuc ne kɔc yic kɔc ci nyuc kene yen ne agen thok. 3Go Mari riem de miok nyir, miok piath de weu juec, lar, ku tɔc yen Yecu cok, ku weec cok ne nhim ke enom: ku ci ɣotic thiaŋ ne pol de miok. 4Go Judath Yithkariɔt, ran toŋ de kɔcpiocke, man bi ye nyiɛn, go jam, 5Ye yeŋo cene emiokne ɣɛɛc ne denariɔn thiɛrnyɛny diak, ku yine ke aŋaaŋ gup? 6Aluel ekene, ku kacie kony aŋaaŋ gup; kee ye rueny ku kee tɔ ke bonden, ku yen ka ye tau thin kual, 7Go Yecu jam, Ye pɛlka; nɛke tɛɛu koldien de thiɛk. 8Aŋaaŋ gup aaye tɔ kene week ne nyindhia, ku ɣan cie tɔ wɔne we ne nyindhia.

9Go kɔc juec ke Judai goki nyic ne tɔ eeti: goki bɛn, ku kacie ke de Yecu yetok, aake bɔ bik Ladharo ben ŋem eya, man ci cɔk jɔt rɔt ne thouic. 10Go banydit ke ka ke Nhialic goki roth jaam, bik Ladharo cɔk thou eya; 11ne ke ci kɔc juec ke Judai leu wei ne yen, ku lek Yecu gam.

12Ɣɔn miak ke kɔc juec ci bɛn te de miɛth, te cik kek Yecu piŋ ne ci bɛn Jeruthalem, 13goki ker ke akoot loom, ku leki lorki ku cotki, Yi Kothana: Eewuubi thiɛi tɔ kene yen, yen man bɔ ne rin ke Bɛnydit, ye Meleŋ de Yithrael. 14Na ci Yecu dan akaja yok, ke nyuc e ekɔu; ne gar cene ye gɔɔr, 15Ya duɔna riɔc, nyan de Dhiɔn: ŋem Meleŋdu abɔ ne dan e akaja kɔu. 16Keekake ake ken kɔcpiocke ke kan muk: na ci Yecu jal noom, e ke jɔl kenhiim ciɛt yi keekake ake garke ne yen, ku kaaci luɔi yen keekake. 17Kɔc eke tɔ kene yen ɣɔn cool en Ladharo bei rɛɛŋ cɔk jɔt rɔt ne thouic, aa kɔc lɛk. 18Yenekee cɔk ye loor dun de kɔc eya, ne piŋ cik kek ye piŋ ke ci ekegɛinene loi. 19Go Parithai jam ne roth, Yi ŋɛmka dhal cen we dhal da: piny ebɛn ee lɔ ne yecok.

20Ku kɔc ke Giriki aake tɔ ne keyic, kek kɔc eke ci lɔ duur te de miɛth: 21Goki bɛn enɔŋ Pilip, ran de Bethaida de Galili, ku thiecki, jamki, Yi Bɛny, wɔ nɔŋ piɔth ŋem de Yecu. 22Go Pilip lɔ lɛk Andereya: ku berki lɛk Yecu, kek yi Andereya kene Pilip. 23Go Yecu dhuɔk keek jiɛm, Ye thaa ee bɛn, bene Wen de raan noom. 24We ya yɔɔk neyic, Ya te cii nyin de raau ya loony tiɔɔp, ku thou, e ke reer abac: ku na ye thou, e ke luɔk ke ye nom dit. 25Ran ye weike nhiar, abi weike wuɔc; ku ran ye weike maan ne yepinye nom abi weike ya muk agut piir athɛɛr. 26Na ye raan a luɔi, ke ne ye ɣa biɔth; ku te yan tɔ, abi awundie aben ya tɔ eya: na ye raan a luɔi, e kabi Awa ya yiɛn rieu. 27An dhiau piɔu emane; ku ba jam yade? Awa, luak ɣɛn ne yethane. Ku yekene yenekee bii ɣɛn aɣet yethane. 28Awa, nom rinku. Go ror bɛn nhial jiɛm, Ye kaca noom, ku kaba bɛɛr ya noom. 29Go kɔc kaac piŋ en, goki jam yi kee mar e deŋ: ku dhuk kɔk, Yi kee malaika e jam ke ye. 30Go Yecu dhuk jiɛm, Ye yerore ee ce bɔ ne ɣɛn, ee bɔ ne week. 31Luŋ de yepinye nom atɔ emane: ku emane bɛny de yepinye nom abi nyaai. 32Ku ɣɛn, na bi a jat nhial piiny, ke ɣan bi raan ebɛn ya bɛi enɔŋ ɣɛn. 33Ee jam yela, ee nyooth thon ben thou. 34Go kɔc dhuɔk en, Yi kacuk piŋ ne looŋ yic ya Kritho abi ya tɔ athɛɛr: ku yeŋo luel yin en, Wu Wen de raan abi dhiɛl jat nhial? Yeŋa ye Wen de raan? 35Go Yecu ke yɔɔk, Ye ɣɛɛr ee yuul ne weyic. Yaka cath, te tɔ ɣɛɛr ke we, kɛlke cuɔl bi we cooth: ran ye cath ne cuɔlic ee te yen lɔ kuc. 36Te tɔ ɣɛɛr ke week, ke we yaka ɣɛɛr gam, bak ya wɛɛt ke ɣɛɛr.

Yecu ee luel keekake, ku jiɛl, ku le rɔt thian ne keek. 37Ku nee cak kajuec gɛi kek loi ne keyic, e kaadhiac ke cik gam: 38bi wɛt de Yithaya nebi bi ya yic, wɛt e ci luel,

Ye Bɛnydit, ŋa ci lekda gam?

Ku ci koŋ de Bɛnydit nyuɔth ŋa?

39Ku cik leu ne gam ne ekene, ne wɛt ci Yithaya bɛɛr luel,

40Ye kaacike cɔɔr, ku yin ke piɔth akak;

Kɛlke bik ya ŋem ne kenyin, ku mukki ne kepiɔth,

Ku bik roth wel,

Ku cak ke dem.

41Yithaya ee luel keekake ne ŋem cen nuɔmde ŋem; a kee jam ne yen. 42Go kɔc juec goki ya gam agut bany eya; ku cik gamden ye ɣɛɛt bei ne ke de Parithai, kɛlke ke bi ya ciɛc biyic ɣon de gueer: 43ne ke ye ke lɛc de kɔc cɔk wɛr lɛc de Nhialic ne kepiɔth.

44Go Yecu coot ku jiɛm, Ye ran ye ɣa gam, acie ɣan e ye gam, ee yen man ci a tuɔc. 45Ku ran ye ɣa ŋem, ee yen man ci a tuɔc e ye ŋem. 46An ci bɛn ke ɣan ye ɣɛɛr de piny nom, bi ran ye ɣa gam bi ya ciɛk tɔ tecol. 47Na ye raan welcie piŋ, ku cii ke ye muk, e kacaa luk: an ee ce bɔ ba kɔc ke piny nom ben luk; an ee bɔ ba kɔc ke piny nom ben luɔk. 48Ran ye ɣa jai ku cii welcie ye gam anɔŋ toŋ ye ye luk: yewɛt ca luele yeneka bi ye luk ne kol ciɛn. 49An ce jam ne ke de guɔpdie; ee Awa man ci a tuɔc yenekee ɣa yiɛn loŋ, ba ya luel ku ban ya jam. 50An ye loŋde nyic ke ye piir athɛɛr: yen ka ya luel aaka ye Awa ke lɛk ɣɛn, keeka yake luel.

Currently Selected:

Jɔn 12: LEKJOT

Highlight

Copy