Dutuuc 5

1Ku ran cɔl Anania kene tiŋden cɔl Thapeire ee ke tɔ ke ye ɣaac, 2ku both biak dɛ de ka eke ɣɛɛcke, ku kee nyic tiŋde, ku leer kake ku tɛɛu ke piny ne dutuuc nhiim. 3Go Petero jam, Ye Anania, yeŋo nyuuce Catan ne yipiɔu ba lueth tɔr Jɔŋdiit Lajik, ku ba biak toŋ de ka eke ɣɔcke ne dom both? 4Waar ŋoot en ke tɔ ke yi, ne cie kedu? ku te cin e ɣaac, ke weu cie kaku eya? Yeŋo take ekene ne yipiɔu? acie kɔc kek cake tɔr lueth, ee Nhialic. 5Na ci Anania keewelke piŋ, go yuik ku thook. 6Go rorthi roth jɔt, ku kuathki ne alath ku ketki biyic lek thiɔk.

7Na cit cin ye thaa diak ye leer, ke tiŋde bɔ, ku kuc luɔi ci loi. 8Go Petero yɔɔk, Ye lɛkne ɣa lan e ɣɛɛc we dom ne keeweuke. Go gam, Ye keeka. 9Go Petero jam, Ye yeŋo e mɛt we ne them we Jɔŋdiit de Nhialic? ŋem, kɔc eke thiak monydu aatɔ ɣot thok, aabi yi bɛr ket. 10Ku go guɔ yuik e enom thook. Go rorthi goki bɛn, goki yok ne ci thou, goki kɛt biyic lek thiɔk ne monyde lɔɔm. 11Go kanitha riɔc areet ebɛn, ku kɔc kedhia kɔc ci keekake piŋ.

12Ku ciit juec ku kagɛieke kaa loi ne kɔc nyin ne dutuuc cin. Goki ya gueer etok kedhia ne akuanh de Tholomonic. 13Ku alɛi acin ran toŋ ci ŋeeny ci mat ke ke, ku lec keek ne kɔc. 14Ku kɔc ci gam aa juak yic ne dun diit de roor ku diar, 15agut te koom kek kɔc bec ne dhɔl yic ku kɛneke ne athin nhiim ku ageen bi tiɛp de Petero ke yen bar te teek en. 16Go dun dit gueer eya ne bɛi yuil Jeruthalem biiki kɔc bec ku kɔc ci dɔm ne jak rac, go ke cɔk dem kedhia.

17Go bɛnydiit de ka ke Nhialic go rɔt jɔt kene kɔc tɔ kene yen, yi Thadokai, go tiɛl ke thiɔŋ yic. 18Goki dutuuc dɔm, ku tɛɛuike ɣon de dom. 19Go malaika de Bɛnydit go ɣot liep thok ne wɛɛric, ku bii ke bei ku jiɛm, 20Ye lak kaacka yekalu, ku lɛkka kɔc ne wel kedhia ke Yepiire. 21Ɣɔn yi cik ye piŋ, goki lɔ yekalu aci piny run lek weet. Go bɛnydiit de ka ke Nhialic go bɛn kene kɔc tɔ kene yen, ku tuc buluuk ku roordit kedhia ke kɔc ke Yithrael, ku thɔn keek, bi ke lɔ bɛi ɣon de dom. 22Go atoc lɔ goki ke lɔ yok ne liu, goki dhuk ku jamki, 23Yi ɣon de dom acuk lɔ yok ne thiɛk, ku dutiit aakaac ɣot thok, goku wu liepku ɣot, ke cin raan thin. 24Ku na ci bɛny de yekalu ku banydit ke ka ke Nhialic keewelke piŋ, goki nhiim mum ne keek yi bi yekene cil ne ŋo. 25Go ran tok bɛn ku yook ke, Ye piɛŋka, kɔc cak taau ɣon de dom aakaac ne yekalu aaweet kɔc. 26Go bɛny lɔ ke kɔcke dic ke, ku cik ke muk areet, aariɔc ne kɔc duɔeke bi biɔk ne kur. 27Ɣɔn yi cik ke bɛi, e ke tɛɛueke ne buluuk nhiim. Go bɛnydiit de ka ke Nhialic ke yɔɔk, 28Ye we cuk yɔɔk wu cak kɔc pioc ne keerinke, ku ŋɛmka, we ci Jeruthalem thiɔŋic ne piocduɔn, ku naŋka piɔth bak riɛm de yerane dhuɔk wɔ. 29Go Petero ku dutuuc kɔk goki bɛr jam, Yi wɔ bi wel ke Nhialic dhiil ne muk tueŋ ne wel ke kɔc. 30Nhialiny de kuarkuɔ ee Yecu cɔk jɔt rɔt, man cak nɔk, ku nɔkka ne tim nom. 31Yeneka cii Nhialic ye jat ne ciɛn cuecde bi ya Bɛnydit ku ye Duluɛk, bi kɔc ke Yithrael yiɛn wel de kepiɔth ku nyiɛi de karɛcken. 32Ku wɔ ye duleek ke kaake, ku Jɔŋdiit Lajik eya, man cii Nhialic yiɛn kɔc gam welke.

33Ɣɔn yi piŋki keewelke, e ke gut wel kepiɔth, ku nɔŋki piɔth bik ke nɔk bik thou. 34Go ran tok kɔɔc ne buluuk ciɛl yic, muɔny Paritha cɔl Gamaliɛl, ye ran nyic looŋ, ci riɛu ne kɔc kedhia, ku yook kɔc bik ke cɔk lɔ biyic emaath, 35ku yook buluuk yela, Ye we kɔc ke Yithrael, ŋɛmka roth apiath ne luɔi bak loi enɔŋ keekɔcke. 36Ɣɔn Theuda ee rɔt jɔt, ku luel ye ye bɛny dit. Go dun de kɔc, yin ya thiɛrnyɛny ŋuan, go mat kene yen. Go nɔk a thou. Ku kɔc kedhia kɔc ci welke gam, aa thiɛi wei, ku cik beer tɔ. 37Na re ke Judath de Galili ke beer rɔt jɔt ne akol eke gɛɛreke rin ke kɔc. Go kɔc bɛr thɛl enɔŋ en, go bɛr thou. Ku kɔc kedhia, kɔc ci welke gam, kaa thiɛi wei. 38Yen emane we ya yɔɔk, ya pɛɛnka roth wei ne keekɔcke ku pɛlekeek. Na ye keewelke ku yeluɔine yeki ka ke kɔc, e kaabi riak. 39Ku na ye ke de Nhialic, e kacuk bi leu ne riɔk, duɔke we bi yen yok ne ɣɛɛt wene Nhialic. 40Goki gam, ku cɔlki dutuuc ku duiike ku yookki ke, Yi duɔka ber jam ne rin ke Yecu, ku pɛlike. 41Goki jaal ne buluuk nhiim e ke mit piɔth ne ke cii Nhialic ke cɔk gum ne keeRinke. 42Goki dhiac e ke ye pioc ku yiki kɔc wɛɛt ne nyindhia ne yekalu ku ne bɛi yic yi Yecu kee Kritho.

Currently Selected:

Dutuuc 5: LEKJOT

Highlight

Copy