Dutuuc 4

1Ku te jiɛm kek kene kɔc, ke bany ke ka ke Nhialic ku bɛny de yekalu ku Thadokai e ke bɔ teden, 2e ke dhiau piɔth ne pioc pioc kek kɔc ku ne nyuuth nyuuth kek kɔc ne Yecu ne jon bii kɔc roth bɛɛr jɔt ne thouic. 3Goki ke dɔm ku tɛɛueke ɣon de dom wen cii akɔl dɛr cuɔl ku tite ke miak. 4Ku kɔc juec ci wɛt piŋ aa gam, ciin de kɔc ci gam ee thiɛrnyɛny thiɛrdhiec.

5Ɣɔn miak ɣɔn akol ke bany ku roordit ku dugɛɛr e ke gueer Jeruthalem, 6ku tɔ Anath bɛnydiit de ka ke Nhialic, ku Kaiapath ku Jɔn, ku Alekandaro, ku kɔc juec kaar kene bɛnydiit de ka ke Nhialic. 7Goki ke taau e keciɛl yic ku thiecki ke, Yi cak yekene loi ne riɛro ku ne rin ko? 8Go Petero go nyuɔc ne Jɔŋdiit Lajik, ku yook ke, Ye week we bany ke kɔc ku roordit, 9na carka wɔɔk ekole ne luɔi piɛth ci loi ne ran ci ŋɔl, ku ne ŋo cii yerane guɔp pial, 10ke muɔkka ne wenhiim, wene kɔc ke Yithrael wedhia, yeran kaac e wenhiime ci guɔp pial ne rin ke Yecu Kritho de Nadhareth, wen cak piat, cii Nhialic cɔk jɔt rɔt ne thouic, yeneke. 11Yenekee ya kuur ci kuany wei ne kɔc loi ɣot, ku kee bɛɛr taau ne ŋem de ɣot nom. 12Ku kacin kuny de dɛ, ku kacin rin kɔk ne piny thar bɔ bei ne kɔc thook bik wɔ luɔk.

13Ɣɔn yi kɔc yi ŋemki riɛr de Petero ku Jɔn de kepiɔth ku nyicki ke e kee ye kɔc kuc kaŋ, e kee gɛi, goki tak ne canh e yi kek cath kene Yecu. 14Ku yi ŋemki ran wen ci dɛm ne kaac kene keek, ke cin ke beerki tɛɛr. 15Goki ke yɔɔk yi lek biyic ne lukic, ku thiecki roth kepɛc yila, 16Yi buk ŋo loi enɔŋ keekɔcke? Kegɛiye cii loi aŋem kɔc ke Jeruthalem kedhia ne kenyin, acuk bi leu ne jiɛi. 17Nyinukue jam cik kek ber jam kene kɔc ne keerinke, duɔeke bi bɛɛr thiɛi ne kɔc piɔth. 18Ku cɔleke ku yookki ke, Yi duɔka ber jam ku duɔka kɔc ber piɔc ne rin ke Yecu. 19Go Petero ku Jɔn dhuk, Yi takka lan piɛth en ne Nhialic nyin buk we gam ka buk Nhialic gam. 20Wɔ ce cuɔk jam bi leu ne ka cukke ŋem ku piŋukue. 21Goki ke bɛɛr peen ku lonyeke. Acin ke cik yok enɔŋ keek bik kek ke nɔk, ariɔc ne kɔc ke baai. Kɔc kedhia aalec Nhialic ne ke cik loi. 22Run awɛr thiɛrŋuan run ke ran cii kegɛiye cɔk dem.

23Na cik ke lony, e ke lɔ ne kɔcken yic ku lekki ke kaŋ kedhia ka cike lɛk ke ne bany ke ka ke Nhialic ku roordit. 24Ɣɔn aci kɔcken ke piŋ, goki kerot jɔt etok, ku jamki, Yi Bɛnydit, Yin Ducɛŋ nhial ku piny ku bar ku kaŋ kedhia ka ye tɔ ne keyic: 25ee ca luel ne Jɔŋdiit Lajik ne Dabid thok awada ku ye awundu wula,

Wu yeŋo cii Juurkɔk ɣok,

Ku takki ka ke ciɛlic ne kenhiim?

26Meleek ke piny nom aarec rɛmken,

Ku kuut bany kenhiim,

Bik ɣeet kene Bɛnydit ku Keden Citɔc:

27ee yic yepane Kerod ku Pontio Pilato ku juur kɔk ku juur ke Yithrael, aake mɛt enɔŋ Yecu Awundun lajik, kedun ca tɔc, 28bik kaŋ loi kedhia ka ci piɔndu ke kan luel wu bi ke loi. 29Emane, Bɛnydit, ŋem nyiin cik kek wɔ nyiɛn, cɔk awuutku luel wɛtdu ne piɔth rir. 30Ku thiu yiciin ba kɔc cɔk dem, ku cɔk ciit ku kagɛieke cɔk loi ne rin ke Yecu Awundun lajik. 31Ɣɔn ye lɔŋ ye thook, go te cik kek gueer thin go met, go ke nyuɔc ne Jɔŋdiit Lajik kedhia, goki wɛt de Nhialic jal ya luel ne piɔth rir.

32Ku dun de kɔc ci gam ee piɔu mat, ku mɛt tipken, ku cin ran toŋ jam ye ye weu kake, aacik maat nhiim tetok. 33Ku dutuuc aa kɔc ya lɛk ne riɛr dit ne jon cii Yecu rɔt jɔt: ku tɔ athiɛi dit kene keek kedhia. 34Acin ran dak de keek. Kɔc nɔŋ duum ku ɣoot aacikke ɣaac, ku biiki ka eke ɣɔcike, 35ku teeuike piny ne dutuuc nhiim. Goki ke tɛk raan ebɛn kɔc dak kaŋ ke.

36Ku Jothep, ran e cii dutuuc cak cɔkki ye Baranaba (te wele ye ne thoŋda, ke ye, Wen de weet de kɔc), ye muɔny Lebi, ran de pan e Kupurio, 37nɔŋ dom go ɣaac, ku bii weu, ku tɛɛu ke piny ne dutuuc nhiim.

Currently Selected:

Dutuuc 4: LEKJOT

Highlight

Copy