Dutuuc 15

1Go kɔc bɛn ne Judaya lek mɛɛthken wɛɛt, jamki, Yi na ce we ber cɔk ye aŋuɛlɛɛi ci luɔi de Mothe, ke we ce leu ne luak. 2Go Paulo ku Baranaba goki teer kene keek thiecike, go mɛɛthken goki Paulo lɔc ku Baranaba, ku kɔc kɔk, bik lɔ Jeruthalem enɔŋ dutuuc ku roordit, bik lɔ thiɛc ke yejame. 3Goki lɔ, ku ruɛce ke ne kɔc ke kanitha, lek teek Poinike ku Thamaria, lekki kɔc wel cii Juurkɔk roth wel: go mɛɛthken piɔth miɛt areet kedhia. 4Ɣɔn ayi cik ɣet Jeruthalem, e ke lor keek ne kanitha ku dutuuc ku roordit, ku lekki ke kaŋ kedhia ka ci Nhialic ke luɔi ke. 5Go kɔc ke dhien de Parithai ci gam, goki roth jɔt, ku jamki, Yi kaabi dhiil ne cɔk ye aŋuɛlɛɛi, ku yookki ke bik looŋ ke Mothe ya muk.

6Go dutuuc ku roordit goki gueer tetok bik yewɛte ciɛt. 7Ana ye kɔc yi teerki, go Petero rɔt jɔt, ku yook ke,

Ye wathii, anyiɛcka ɣɔn cii Nhialic ɣa lɔc ne weyic, bi Juurkɔk welpiath piŋ ne athok, ku bik ke ya gam. 8Ku gam keek ne Nhialic, man nyic piɔth kedhia, ne miɔc cen yiɛn Jɔŋdiit Lajik, ci man e miɔc en wɔɔk; 9ku cii ke week wei ne wɔyic ne wɛk cen ke waak piɔth ne gam. 10Yeŋo thɛmka Nhialic, tɛɛu we kethiek ne kɔcpiocke yeth, kethiek kene wurkuɔ leu ne jot ku wɔɔk? 11Agamku wɔ bi luɔk ne athiɛi de Yecu Bɛnydit, ci man de keek.

12Go kɔc mim kedhia; ku piŋki wel cir Baranaba keek ku Paulo, ciir kek ciit ku kagɛieke ci Nhialic ke luɔi ke ne Juurkɔk yic. 13Ɣɔn yi cik thook thok, ke Jakob beer jam,

Ye wathii, piɛŋka ɣa. 14Thimeon ee wɔ ciɛr ne nɛm ci Nhialic Juurkɔk kan neem, bi kɔc bɛi bei ne keyic, kɔc bi cɔɔl ne rinke. 15Ku wel ke nebii athoŋ kene ekene, wel cikke gɔɔr yila,

16Yi na re ke an bi rɔt dhuk,

Ku akema de Dabid ci yuik aba bɛr loi;

Ku ka kee ci riak aabake bɛr loi,

Ku cak ke kaac:

17Bi kɔc kɔk kedhia bik Bɛnydit ya kɔɔr,

Ku Juurkɔk kedhia cike cɔɔl ne rincie,

18Yenekee luel Bɛnydit, man ye wɔ nyuɔth keekake agut thɛɛr ɣɔn.

19Yen luŋdie eka, dukku kɔc yɔŋ, kɔc ke Juurkɔk ci roth wɛl Nhialic; 20gɛrukueek arabac, bik roth ya pɛn luɔi rɛɛc de eidool, ku bɛɛl, ku ke dɛc, ku riɛm. 21Mothe anɔŋ kɔc agut kuan ɣɔn, kɔc cir welke ne bɛi yic kedhia, aayeke luel ne luek yic ne thabaath kedhia.

22Go dutuuc ku roordit, kene kanitha ebɛn, goki cɔɔl yi piɛth bik kɔc lɔc bei ne keyic, ku toocike Antiokia kene Paulo ku Baranaba; yi Judath ci cɔɔl Barthaba, ku Thila, e ke ye kɔc dit ke kɔc yic: 23ku gɛre ke thon, Yi dutuuc ku roordit aathiec week we mɛɛthkuɔk ke Juurkɔk tɔ ne Antiokia, ku Thuria, ku Kilikia: 24Acuk piŋ enɔŋ kɔc waar jiɛl ne wɔyic yi ci we liap nhiim ne wel, diaŋki tipkuɔn; acie wɔ eke lek e ke; 25na cuk mat, e kacɔlku wuu piɛth buk kɔc lɔc bei, ku toocukue enɔŋ week kene Baranaba ku Paulo, 26kek kɔc ci roth dɛr cɔk thou ne rin ke Yecu Kritho Bɛnydiitda. 27Yen wɔ toc Judath ku Thila, kɔc bi we bɛr lɛk keewelke ne kethook. 28Apiath enɔŋ Jɔŋdiit Lajik ku wɔɔk buk keeka bak ya dhiil ne luɔike taau ne wekɔth kepɛc; 29bak roth ya pɛn ka ye nak eidool, ku riɛm, ku ka ye dec, ku bɛɛl; na yaka roth muɔk wei ne keyic, e kabi piath enɔŋ week. Dɔŋka.

30Ɣɔn ya ci ke tooc, e ke lɔ Antiokia; ana yi kɔc yi cik gueer, e ke gɛm thon. 31Goki ŋemic, goki piɔth miɛt ne ka ci ke duut piɔth. 32Go Judath ku Thila, ye nebii, goki mɛɛthken tuer ne wel juec, ku cɔkeke rir. 33Ɣɔn yi cik akol juec thol etɛɛn, e ke tooc mɛɛthken ke ciɛn ne dɔɔr bik dhuk enɔŋ kɔc eke tuuc ke. 34Go Thila cɔɔl ne yepiɔu ye piɛth bi ceŋ thin. 35Ku dhiac Paulo ke Baranaba e ke ceŋ Antiokia, weetki kɔc piocike ne wɛt de Bɛnydit, kene kɔc juec kɔk eya.

36Na wen ci akol juec lɔ, ke Paulo yook Baranaba, Ye jɔlku dhuk lɔ nemku mɛɛthkuɔ ne bɛi yic kedhia, bɛi eke cii wɔ ke wɛt de Bɛnydit luel thin, ku buk ke caar ne luɔi loi kek. 37Go Baranaba piɔu naŋ bi Jɔn laar, man ci cɔɔl Mak. 38Go Paulo cɔɔl ye cii piath bi raan laar, ran ci jaal ne keyic ɣɔn ne Pampulia, ku ken ɣet kene keek ne luɔiic. 39Goki teer, ku tekki roth puɔkki, leer Baranaba Mak, ku kɛɛc riɛi leer Kupurio; 40ku lɔc Paulo Thila, ku loony dhol, ku thiei ne mɛɛthke bi athiɛi de Benydit ya tɔ ke ye. 41Go lɔ teek ne yi Thuria ku Kilikia, cɔk en kanitha rir.

Currently Selected:

Dutuuc 15: LEKJOT

Highlight

Copy