TIBIRIK 29
29
Jacob Ndŭg Ramin Laban
1Jacob pijuu pimanu-i ka di ka tarun tana tura ka Timor. 2Gŭgŭh ka ayŭh dapŭd ndi prigi di tarun ka agi taruh kaban biri guring maning prigi anŭ. Dāng dāng anŭ dog nggen nok so prigi anŭ adi agi tibande tŭtŭp batuh dieh. 3Kan sopŭrŭg kaban dāng kudip mbŭh tikuruk diginŭ, bara pingingat-biri sigen batuh anŭ ka nggen nok di dāng dāng anŭ. Komŭnŭ ngara sigen batuh anŭ pari ka yŭn-i.
4Jacob siken bara pingingat-biri anŭ, “Dingan, so ki angān?”
Ngara nam, “So Haran.”
5Ayŭh siken, “Puan ngan kah Laban sukuh Nahor?”
“Puan.”
6Ayŭh siken, “Sanang kah ayŭh?”
Ngara nam, “Sanang ayŭh.” “Tingga, no anak dayung-i Rachel taban dāng dāng-i.”
7Jacob nang, “San andu gibabŭ jawa, ka gibayuh gŭh jam adi ngga kaban dāng kudip dog pibŭrŭt, mani angān dŭh nggen nok di dāng anŭ, ka taban ngara pari ka tarun tana kupai?”
8Ngara nam, “Kieh dŭh bisa ndai simŭnŭ ndŭg ka sopŭrŭg dāng mbŭh tikuruk digiti ka batuh anŭ muko dog sigen so baba prigi; ripas anŭ nŭ kieh bisa nggen nok di kaban dāng.”
9Atan Jacob gibabŭ minyu ngga ngara, Rachel mandŭg gŭh taban kaban dāng-i. 10Kan Jacob kiris Rachel ngga kaban dāng sama-i Laban, ayŭh di ka prigi anŭ, sigen batuh so baba prigi ka nggen nok di biri biri. 11Komŭnŭ ayŭh sium Rachel buang sien amai gaŭn. 12Jacob kidaan di Rachel, “Aku ati madis sama mu, anak Rebecca.”
Rachel bikaduh di kidaan di sama-i; 13ka kan ayŭh dingah pasar Jacob adi anak jurud-i, ayŭh bikaduh di tudu ayŭh, dakŭp ka sium ayŭh, ka taban ayŭh ka ramin-i. Kan Jacob muko kidaan di Laban sopŭrŭg kayuh adi mbŭh jadi, 14Laban nang, “Sawŭ inŭh kuu isin ngga deya adŭp ku.”
Jacob rŭŭ diginŭ ripuan buran.
Jacob Nyiraja tagŭ Laban yŭn Rachel ngga Leah
15Laban nang di Jacob, “Kuu dŭh patut nyiraja braŭn yŭn ku sitagar kuu madis ku. Kiang-ki gaji raan mu?” 16Laban biyŭn duwŭh madis anak dayung; adi tuuh dŭn Leah, ka adi mara Rachel. 17Leah ramus#29.17 ramus; puan kah: ramah. batŭh-i, pak Rachel piayong buang ramus.
18Jacob awang Rachel, ngapŭi ayŭh nang, “Singadu aku nyiraja yŭn mai ju sawa kambŭi kaam raan bada aku sawŭn Rachel.”
19Laban nam, “Raan dŭ aku nggen ayŭh di kuu so aku nggen di daya bŭkŭn; rŭŭ digiti ngga aku.” 20Jacob nyiraja ju sawa ramŭn gŭh raan dapŭd Rachel, pak tipuh anŭ di ayŭh nyam adi kudu kudu andu adŭ, amai ayŭh awang Rachel.
21Komŭnŭ Jacob nang di Laban, “Tipuh-i mbŭh mandŭg; bada meh aku sawŭn anak mai.” 22Jadi Laban ndai gawai sawan ka bagan barang naan daya. 23Pak ngarŭm anŭ Laban ton Leah ka yŭn Jacob, dŭh Rachel, ka Jacob nyibŭŭs ngga Leah. ( 24Laban nggen ndi urun dayung adi dŭn Zilpah di Leah da jadi pinguses-i.) 25Kan andu mbŭh jawa, Jacob rada nang anŭ Leah. Ayŭh di ka yŭn Laban ka nang, “Mani kaam simuti ngga aku? Aku mbŭh nyiraja amai raan dapu Rachel. Mani kaam nipu aku?”
26Laban nam, “Nanyam adat digiti dŭh nŭŭh bisa bada anak dayung adi sude diŭ banan so kaka-i. 27Kajŭn ndŭg tipuh gawai sawan ati adi ndi minggu mbŭh ripuan nŭ ka aku nggen Rachel di kuu, kambŭi kuu raan nyiraja yŭn ku dŭm ju sawa dinge.”
28Jacob situju, ka kan gawai sawan anŭ mbŭh ripuan Laban nggen Rachel di Jacob da jadi sawŭn-i. ( 29Laban nggen ndi urun dayung-i dŭn Bilhah di Rachel da jadi pinguses-i.) 30Jacob nyibŭŭs gŭh ngga Rachel, ka ayŭh rindu Rachel rabis dŭ so Leah. Ka ayŭh nyiraja yŭn Laban ju sawa dinge.
Bara Anak Jacob
31Kan TUHAN kiris pinyirindu di Leah kurang dŭ so di Rachel, Ayŭh bada Leah mira biranak, pak Rachel gibabŭ dŭh. 32Leah bite ka biranak ndi anak dari. Ayŭh nang, “TUHAN mbŭh kiris pinyusah ku, jadi madin banŭh ku re rindu aku.” Ka-i kadŭn anak anŭ Reuben.#29.32 Reuben: Dŭn ati sak piminyu Hebrew adi nang “Kiris, anak dari” ka “mbŭh kiris pinyusah kuu.” 33Ayŭh bite dinge ka biranak ndi anak dari dinge. Ayŭh nang, “TUHAN mbŭh nggen anak ati di aku gŭh, amai Ayŭh mbŭh dingah aku dŭh dog rindu”; ka-i kadŭn anak anŭ Simeon.#29.33 Simeon: Dŭn ati sak piminyu Hebrew adi nang “dingah”. 34Ka ayŭh bite dinge ka biranak ndi anak dari dinge. Ayŭh nang, “Madin banŭh ku re rabis rakat di aku amai aku mbŭh biranak yŭn-i taruh madis anak dari.” Ka-i kadŭn anak anŭ Levi.#29.34 Levi: Dŭn ati sak piminyu Hebrew adi nang “ngabŭt”. 35Komŭnŭ ayŭh bite dinge ka biranak ndi anak dari dinge. Ka-i nang, “Kari ati aku re muji TUHAN;” Ka-i kadŭn anak dari-i anŭ Judah.#29.35 Judah: Dŭn ati sak piminyu Hebrew adi nang “muji”. Ripas anŭ ayŭh dŭh tia biranak.
Currently Selected:
TIBIRIK 29: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
