ESTHER 5
5
Esther Bagan Raja ngga Haman ka Gawai
1Di andu adi taruh darŭm bipusa Esther nēn piraka rani-i; ayŭh di ka mijog di badag adi tura ka darŭm istana, nura birit takta. Raja agi diginŭ, guru di takta, nura tiban buwang. 2Kan raja kiris Rani Esther mijog di sapa, ayŭh raru gaŭn kiris ayŭh, ka rasu tiju ayŭh ngga sikud-pinyipritah mas-i. Ayŭh mŭrŭt ka tama tŭbŭn sikud anŭ. 3“Ani agah, Rani Esther?” raja siken. “Kidaan di aku ani raan mu, ka kuu re dapŭd-i — sunggu bait kani pimite mu anŭ sitangah utung tarun tana empaya ku.”
4Esther nam, “Kambŭi-i kana di pikir Tuan Raja, aku mite kuu ngga Haman jadi pingabang ku ngarŭm ati di gawai adi aku mbŭh sidia yŭn mu.”
5Raja rasu nggen ukum bada daya bagan Haman da rikas mandŭg, isa ngara dapŭd samah trima pinyibagan Esther ka gawai anŭ. Jadi raja ngga Haman di ka gawai Esther. 6Darŭm ngara nok wain raja siken di Esther, “Kidaan di aku ani raan mu, ka aku bisa nggen-i di kuu. Ani ani pimite mu aku re nggen, bait-i sitangah utung tarun tana empaya ku.”
7Esther nam, 8“Kambŭi Tuan Raja tŭk sawŭ an nggen pimite ku, aku raan kuu ngga Haman jadi pingabang ku di gawai adi aku mbŭh sidia yŭn mu di andu sipagi ani. Nganŭ aku re kidaan di kuu kayuh adi aku raan.”
Haman Bipekat an Siŭ Mordecai
9Kan Haman bu so gawai anŭ ayŭh mbŭh raru gaŭn. Pak kan ayŭh kiris Mordecai di tiban istana, ka kan Mordecai dŭh makat ka nggen stabi di ayŭh adi aŭn murah, Haman raru baji di ayŭh. 10Pak ayŭh dŭh ndai urah-i diginŭ; ayŭh radus maad. Komŭnŭ ayŭh bagan bara dingan-i ka ramin-i ka bada sawŭn-i Zeresh sua guru ngga ngara. 11Ayŭh mingangŭn pasar kaya raja-i di sirung jawin ngara, kudu madis anak dari-i, munki raja paad pangkat-i, ka munki masam biguna ayŭh so bara pinurung raja adi bŭkŭn. 12“Adi rabis so anŭ,” Haman pijuu minyu, “Rani Esther ndai gawai dŭh yŭn daya bŭkŭn pak yŭn kieh duwŭh raja, ka kieh duwŭh re dog bagan dinge sipagi. 13Pak kayuh anŭ dŭh biyŭn rati di aku kambŭi aku babŭ kiris Mordecai guru di tiban istana.”
14Jadi sawŭn-i ngga sopŭrŭg dingan-i nang, “Mani kuu dŭh pijog ndi tiang yŭn tangid daya, adi duwŭh puru mita bigatung? Isan isan andu sipagi kuu bisa mite raja nggen ukum bada Mordecai dog tangid dieh, ka ripas anŭ kuu bisa di ka gawai ngga atin gaŭn.”
Haman pikir anŭ atur adi kana, jadi ayŭh bada tiang adi yŭn tangid daya dog pijog.
Currently Selected:
ESTHER 5: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.