San Juan 9

Sandaꞌa Jesús iin ra kuaa

1Ra ichi nuu yaꞌa Jesús kuaꞌan ra kan, nduꞌu iin tiaa ra kaku kuaa. 2Ra saa ndindakatuꞌun ndia itaꞌan xiꞌin Jesús kachi ndia saa:

―Tata Maestro, ¿nichuun ke kaku kuaa tiaa yoꞌo? ¿A mii ra kuvi ra iyoo kuachi? ¿A xaꞌa kuachi na iva siꞌi va ra ke? ―kachi ndia.

3Saa ndakuiin Jesús kachi ra saa xiꞌin ndia:

―Süvi xaꞌa kuachi mii ra ke, ra nii süvi tu xaꞌa kuachi na iva siꞌi ra kuvi ña nindoꞌo ra saa, chi xaꞌa ña vaꞌa na kuni yuvi ña iyoo ndiee Ndioxi ña sandaꞌa va ra ra kuvi ña. 4Ra yoo, ra xiniñuꞌu sa va yo chiñu ra tiꞌvi yuꞌu vaxi yu, ña kuu ka ña kaꞌñu, saa chi ta xa na kuu ñuu ra ndia nii ka yuvi küvi sachiñu vi. 5Ra ña íin ka yu nuu ña yuuvi yoꞌo, ra ñuꞌu ña tuun nuu na yuuvi kuvi va yu ―kachi Jesús xiꞌin ndia.

6Ra te ndiꞌi ndikaꞌan ra tuꞌun yoꞌo xiꞌin ndia, ra saa koꞌni ra tiasiꞌi ra nuu ñuꞌu, ra xavaꞌa ra loꞌo ndiaꞌyu, ra ndikuꞌni ra ña nduchi nuu ra kuaa kan. 7Ra ndikaꞌan ra xiꞌin ra kachi ra saa:

―Kuaꞌan ndakatia kun nuu kun ini pozo ña nani Siloé ―kachi ra xiꞌin ra. ―Ra tuꞌun Siloé yoꞌo, ra tiakuii ra ndixaꞌan na kiꞌin na xaa xiꞌin chichi va kuvi ra ―kachi ña.

Ra saa ndakiꞌin ra kuaa kan ndixaꞌan ra ndakatia ra nuu ra, ra te nandiko ra xaa ra, saa ra xa vaꞌa va ndakutoꞌni ra. 8Ra yuvi na ndee yachin xiꞌin tiaa kan, xiꞌin na ^xini ña kuu ra, ra kuaa, ra xaꞌa na ndakatuꞌun na kachi na saa:

―¿A su ra yoꞌo kuvi ra xinduꞌu ndindakan? ―kachi na.

9Ra sava tu na kaꞌan kachi saa:

―Suvi kuvi va ra ―kachi na.

Ra inka tu na kaꞌan kachi saa:

―Takaa ra kan ke kaa va ra, ndi su süvi vi ra ―kachi na.

Ra saa ndakuiin mii tiaa kan kachi ra saa:

―Suvi kuvi va yu ―kachi ra.

10Ra saa ndikaꞌan na xiꞌin ra kachi na saa:

―¿Ni ke xa kun ña vaꞌa ndanuña nuu kun? ―kachi na.

11Ra saa ndakuiin ra yuꞌu na kachi ra saa:

―Tiaa ra nani Jesús va kuvi ra xavaꞌa ndiaꞌyu, ra ndikuꞌni ra ña nuu yu, ra te ndiꞌi ra saa ndikaꞌan ra xiꞌin yu kachi ra saa: “Kuaꞌan, ra ndakatia kun nuu kun ini pozo ña nani Siloé”, kachi ra xiꞌin yu. Ra saa ndixaꞌan yu ndakatia yu nuu yu, saa ra ndanuña va ña ra vaꞌa va ndakutoꞌni yu ―kachi ra xiꞌin na.

12Ra saa ndikaꞌan na xiꞌin ra kachi na saa:

―¿Ndia chi íin tiaa kan vichin? ―kachi na.

Ra saa ndakuiin ra kachi ra saa xiꞌin na:

―Xïni yu ―kachi ra.

Ndakatuꞌun ndia fariseo ra kuaa ra nduvaꞌa nuu kan

13Ra saa ndiaka na ra ndixiyo kuaa kan ndixaꞌan na xiꞌin ra nuu na fariseo. 14Ra ta xavaꞌa Jesús ndiaꞌyu ña sandaꞌa ra nuu ra kuaa kan, ra kii yii ña ndakindee va na ke. 15Ra saa nindakatuꞌun tuku ndia fariseo tiaa kan, ni ke xa ra ña vaꞌa nduvaꞌa nuu ra kachi ndia xiꞌin ra. Ra saa ndikaꞌan ra xiꞌin ndia kachi ra saa:

―Ndiaꞌyu va ke ndikuꞌni Jesús nuu yu, ra saa ndixaꞌan yu ndakatia yu ña, saa ra vaꞌa va ndakutoꞌni yu vichin ―kachi ra xiꞌin ndia.

16Ra saa ndikaꞌan sava ndia fariseo kan kachi ndia saa:

―Tiaa ra xa saa kan ra süvi kuenda Ndioxi kuvi ra, saa chi xä toꞌo ra kii yii ña ndakindiee yo ―kachi ndia.

Ndi su inka tu na kaꞌan kachi suꞌva va:

―¿Ni ke sa ra, ña vaꞌa sa ra ña xituꞌun, tu iin tiaa ra iyoo kuachi va kuvi ra? ―kachi na.

Saa ra iin sana suꞌva va ini ndia saa chi nii nindakitäꞌan tuꞌun ndia. 17Ra saa nindakatuꞌun tuku va ndia ra ndixiyo kuaa kan kachi ndia saa:

―¿Ndia tiaa kuvi ra sandaꞌa nuu kun tuvi kun? ―kachi ndia xiꞌin ra. Ra saa ndakuiin ra kachi ra saa xiꞌin ndia:

―Iin ra kaꞌan ndoso tuꞌun yuꞌu Ndioxi va kuvi ra tuvi yu ―kachi ra xiꞌin ndia.

18Ndi su ndia judío, ra ndikandïxa vi ndia tiaa kan ña xikuu ra ra kuaa, ra ndanuña nuu ra, ra saa ndixaꞌan ndia kiꞌin ndia, na iva siꞌi ra nduvaꞌa nuu kan xaa na. 19Ra nindakatuꞌun ndia na kachi ndia saa:

―¿A seꞌe ndoꞌo kuvi ra yoꞌo? ¿Ra a ra yoꞌo kuvi ra kuaa ta kaku ra kachi ndo? ¿Ra ndixaa ke iyoo ña, ña vaꞌa tu ixtoꞌni ra vichin? ―*kachi ndia.

20Ra saa ndakuiin na iva siꞌi ra kachi na saa:

―Ña ndixa ke seꞌe ndi kuvi va ra, ra ña ndixa ke kuaa va tu ra ta kaku ra. 21Ndi su kundäa ini ndi nichuun vaꞌa ndakutoꞌni ra vichin, ra nii kundäa tu ini ndi yoo kuvi na sandaꞌa nuu va ra. Ra na ndakatuꞌun ndo mii va ra, ra na ndatuꞌun ra xiꞌin ndo, saa chi xa ra chee va kuvi ra, ra na ndakuiin ra xaꞌa mii va ra ―kachi na xiꞌin ndia.

22Ra xaꞌa ña ndiyuꞌvi va na iva siꞌi ra nuu ndia judío kan ke kachi na saa, saa chi xa ndikataꞌan va ndia judío kan ña tava ndia ndia ndia ka yuvi ini veꞌe ñuꞌu, tu na kaꞌan na ña kuu Jesús ra tiꞌvi Ndioxi xaa sakaku na yuuvi. 23Xaꞌa ña kan va ke ndikaꞌan iva siꞌi ra kachi na saa: “Ndakatuꞌun ndo mii ra, chi xa ra chee va kuvi ra”, kachi na. 24Saa ndakana tuku va ndia judío ra ndixiyo kuaa kan, ra ndikaꞌan ndia xiꞌin ra kachi ndia saa:

―Chunaꞌa Ndioxi tu ndixa ña ndaa kuvi ña ndatuꞌun kun xiꞌin ndi; saa chi nduꞌu, ra kundaa va ini ndi ña kuu ra iin tiaa ra iyoo kuachi ―kachi ndia xiꞌin ra.

25Ra saa ndakuiin ra kachi ra saa xiꞌin ndia:

―Kundäa ini yu a iyoo kuachi ra, a köo va tu ña, chi ña kundaa ini yu ke xikuu yu ra kuaa va, ndi su vichin ra xa vaꞌa ndakutoꞌni yu ―kachi ra xiꞌin ndia.

26Ra saa ndikaꞌan tuku ndia xiꞌin ra kachi ndia saa:

―¿Ni ke xa ra xiꞌin kun? ¿Ndia kuꞌva ke xa ra ña vaꞌa sandakutoꞌni ra yoꞌo? ―kachi ndia xiꞌin ra.

27Saa ndakuiin ra yuꞌu ndia kachi ra saa:

―Xa ndikaꞌan va yu xiꞌin ndo, ndi su xïin ndo kandixa ndo yuꞌu; ¿ra nichuun ke kuni ndo kaꞌan tuku yu ña xiꞌin ndo? ¿Ra a kuni tu ndoꞌo va kundikun ndo ra? ―kachi ra xiꞌin ndia.

28Ra saa ndikaꞌan ndivaꞌa ndia xiꞌin ra, kachi ndia saa:

―Yoꞌo va kuvi ra ndikun sata tiaa ñaa, ndi su nduꞌu, ra ra Moisés va kuvi ra ndikun ndi. 29Saa chi kundaa va ini ndi ña ndikaꞌan Ndioxi xiꞌin ra kan, ndi su ra ñaa ra kundäa ini ndi xaꞌa ra, ndia mii ke kee ra ―kachi ndia.

30Saa ndakuiin ra ndixiyo kuaa kan kachi ra saa xiꞌin ndia:

―¡Ña yoꞌo ke ndakanda ini yo xiꞌin va! Saa chi ndoꞌo, ra xïni ndo ndia mii ke kee ra, ra sandaꞌa va tu ra nuu yuꞌu. 31Ra xa kundaa va ini yo chi Ndioxi, ra tiäa soꞌo vi ra tuꞌun ña kaꞌan yuvi kuachi xiꞌin ra, ndi su xini va tu soꞌo ra ña kaꞌan na ndasakaꞌnu kivi ra xiꞌin na xa ña kuni ra. 32Ra ndia nii ichi täan kundaa ini yo, xaꞌa iin tiaa ña sandaꞌa ra nuu iin yuvi na kaku kuaa, ra vaꞌa ndakutoꞌni na. 33Ra tu süvi Ndioxi nditiꞌvi tiaa yoꞌo kixi ra, saa ra ndia nii ña ke kuchüun ra sa vi ra ―kachi ra nduvaꞌa nuu kan xiꞌin ndia.

34Ra saa ndikaꞌan ndia kachi ndia saa xiꞌin ra:

―¿A yoꞌo, ra kaku xiꞌin kuachi vi kuvi ra xaa sañaꞌa nduꞌu? ―kachi ndia xiꞌin ra.

Ra saa tava ndia ra ini veꞌe ñuꞌu kan, kuaꞌan va ra.

Yuvi na vaꞌa xitoꞌni, ra na kuaa va kuvi nuu Ndioxi

35Ra ta kundaa ini Jesús ña tava va ndia tiaa kan veꞌe ñuꞌu, ra saa ndixaꞌan Jesús nanduku ra ra, ra te ndaniꞌi ra ra, ra ndikaꞌan ra xiꞌin ra kachi ra saa:

―¿A kandixa kun ra kuu Seꞌe Ndioxi? ―kachi ra xiꞌin ra.

36Ra saa ndakuiin tiaa kan kachi ra saa:

―Tata, ndatuꞌun xiꞌin yu ra kundaa ini yu yoo kuvi ra, ra vaꞌa kandixa yu ra ―kachi ra xiꞌin Jesús.

37Ra saa ndakuiin Jesús kachi ra saa xiꞌin ra:

―Xa xini va kun ra, chi yuꞌu ra kaꞌan xiꞌin kun yoꞌo va kuvi ra ―kachi ra xiꞌin ra.

38Saa ndakuiin tiaa kan kachi ra saa xiꞌin Jesús:

―Kandixa va yu yoꞌo, Tata, ―kachi ra.

Ra saa ndakusiti ra ra ndasakaꞌnu ra Jesús.

39Ra saa ndikaꞌan Jesús kachi ra saa:

―Ña xaa yu ña yuuvi yoꞌo, ra kuachi yuvi va ke xaa yu sandaku yu; saa chi na kuaa, ra vaꞌa va ndakutoꞌni na sa yu, ra na vaꞌa ixtoꞌni kuu kuaa va tu ―kachi ra.

40Ra te xini soꞌo sava ndia fariseo ndia ndita yachin xiꞌin ra, tuꞌun ña ndikaꞌan ra, ra saa ndikaꞌan ndia xiꞌin ra kachi ndia saa:

―¿A ndia kuaa ku tu nduꞌu va tuvi kun, ña kan ke kachi kun saa? ―kachi ndia xiꞌin ra.

41Ra saa ndakuiin Jesús kachi ra saa xiꞌin ndia:

―Tu ndia kuaa ndixiyo ndo, saa ra köo vi kuachi ndo, ndi su vichin ra vaꞌa va nuu ndo, kachi ndo, ra ña kan ke iyoo va kuachi ndo ―kachi Jesús xiꞌin ndia.

Currently Selected:

San Juan 9: mxvNT

Highlight

Copy