San Juan 10

Tuꞌun Ndichi xaꞌa korra ndikachi vali

1Ra saa ndikaꞌan Jesús kachi ra saa:

―Ña ndixa ke kaꞌan yu xiꞌin ndo, saa chi tiaa ra ndaa chi nuu korra nuu ndoꞌni ndikachi vali, ra kïꞌvi ra chi yeꞌe korra nu ñuꞌu ri, ra ra kan, ra ra kuiꞌna va kuvi ra, saa chi xakuiꞌna ra ri xiꞌin ña uꞌvi. 2Ra tiaa ra kiꞌvi chi yeꞌe korra, ra ra kan ra ndixa va paxto ra ndiaa ri kuvi ra. 3Ra te ^ndakuña ra ndiaa yeꞌe korra kan, ña ^kiꞌvi ra ndixa kuu paxto ra ndiaa ri, saa ra ndikun ndakuni va ndikachi vali sana ra tachi ra, ra saa xaꞌa ra kaꞌan ra kivi ta iin ta iin ri, ra saa kee ri korra kan kuaꞌan va ri. 4Ra te ndiꞌi tava ra takundiꞌi ndikachi vali sana ra chi keꞌe, saa ra ndakunuu ra nuu ri kuaꞌan va ra, ra vaꞌa ka vi ndakundikun ri sata ra kuaꞌan ri, saa chi xini va ri tachi ra kuu ixtoꞌo ri. 5Ndi su iin tiaa ra xïni ri, ra ndïkun tu mii vi ri sata ra kan, chi ri xinu ka va kuvi ri nuu ra, saa chi xïni ri tachi ra.

6Ra xiꞌin tuꞌun ndichi yoꞌo ke ndikaꞌan Jesús xiꞌin na, ndi su ndikundäa ini na, ni ke kuni kachi ña.

Jesús kuvi Paxto ra vaꞌa

7Ra saa ndikaꞌan tuku Jesús xiꞌin na kachi ra saa:

―Ra na kundaa ini ndo ña ndaa: Saa chi yuꞌu va kuvi ra kuu yeꞌe nuu kiꞌvi ndikachi vali. 8Ra takundiꞌi na xinuu kixi ta yachi nuu yuꞌu, ra na kuiꞌna va xikuu na kan, ña kan ke nditiäa soꞌo vi ndikachi vali tachi na. 9Ra yuꞌu va kuvi ra kuu yeꞌe, ra yuvi na ^kiꞌvi yeꞌe yoꞌo, ra kaku va na. Ra koo na ta kuꞌva iyoo ndikachi vali ri ñuꞌu ini korra, ra ^kee ri, ra ndéé va tu ri, ra iin ndisaa kii va iyoo itia kuii xixi ri.

10’Ra ra kuiꞌna, ra ra vaxi sakuiꞌna va kuvi ra kan, yuvi na iyoo ta kuꞌva iyoo ndikachi vali, ra kaꞌni ra na, ra sandiꞌi tu xaꞌa va na; ndi su yuꞌu, ra ra xaa taxi ña kutiaku va na kuvi yu, ra viꞌi ni kii kuiya taxi yu kutiaku na. 11Saa chi yuꞌu kuvi ra kuu paxto ra vaꞌa ni ndiaa ndikachi vali. Ra ra kuu paxto ra vaꞌa ra ndataxi va ra mii ra, ña kuvi ra xaꞌa ndikachi vali sana ra. 12Ndi su iin tiaa ra kiꞌin xuꞌun, ña ndiaa tatu ra ndikachi vali, ra te xini ra vaxi ndivaꞌyu, saa ra ndakoo ndaꞌa va ra ri, ra xinu ra kuaꞌan va ra, saa chi süvi sana ra kuvi ri, ña kan ke ndakoo va ra ri, ra xaa ndivaꞌyu kan ra kanitaꞌan ri xiꞌin va ri, saa ra taxi ndiꞌi ri ri kuaꞌan va ri. 13Ra xinu va tiaa kan, saa chi takua xaꞌa xuꞌun va ke xachiñu ra, ña kan ke ndïꞌi tu ini mii ra xaꞌa vi ndikachi vali kan.

14’Ra na kundaa ini ndo chi yuꞌu kuvi ra kuu paxto ra vaꞌa ni ndiaa ndikachi vali. Ra xini va yu ndikachi vali sana yu, ra xini tu ri kan va yuꞌu, 15ta kuꞌva iyoo Tata yu Ndioxi ña xini ra yuꞌu, ra xini tu yuꞌu ra kan va, ra saa ke iyoo tu yuꞌu va xiꞌin ndikachi vali sana yu, saa chi ^ndataxi yu mii yu ña kuvi yu xaꞌa ri. 16Ra iyoo ka va ndikachi vali sana yu, ri köo ñuꞌu korra yoꞌo, ra xiniñuꞌu kuꞌun yu ndakiꞌin tu yu ri kan va, ra kandixa va ri yuꞌu, ra ndakutaꞌan ri xiꞌin ri xa ñuꞌu korra, ra iin nduu va ri, ra iin kuu tu paxto, ra kondiaa va ri.

17’Ra kuꞌvi ni va ini Tata yu xini ra yuꞌu, saa chi ^taxi yu mii yu ña kuvi yu, ra te xa na ndiꞌi, saa ra ndatiaku tuku va yu. 18Ra ndia nii na kuchüun kaꞌni yuꞌu, ra ña kuni mii va yu ke ^ndataxi yu mii yu ña kuvi yu. Saa chi iyoo ndiayu ndaꞌa yu ña kuvi yu, ra iyoo tu ndiayu ndaꞌa yu ña ndatiaku tuku va yu. Saa chi ña yoꞌo kuvi chiñu ña xaꞌndia Tata yu nuu va yu ―kachi Jesús xiꞌin na.

19Ra te xini soꞌo na judío ña kachi Jesús saa, saa ra nindakitäꞌan tuku va tuꞌun na, saa chi xa siin xa siin kaꞌan va na. 20Ra sava tu na ndikaꞌan kachi na saa:

―Tiäa soꞌo ndo ña kaꞌan ra, saa chi ra yaꞌa xini va kuvi ra, ra tachi ndivaꞌa va ke kuu mii ra ―*kachi na. 21Ra inka tu na ndikaꞌan, kachi saa:

―Ndia nii na kuu mii tachi ndivaꞌa, ra käꞌan na, taꞌan tuꞌun ña kaꞌan ra yoꞌo. ¿Ra a kuchuun iin na kuu mii tachi ndivaꞌa ña sandaꞌa na nuu iin ra kuaa? ―*kachi na.

Ndia chiñu kunaꞌnu nuu na judío ra kundasi taꞌan va ndia xiꞌin Jesús

22Ra saa kuu, ra nditiandiaa va yoo ña vixin ni, ra suvi tu mii tiempo kan ke ndatava na judío viko veꞌe ñuꞌu kaꞌnu ñuu Jerusalén va. 23Saa ndixaa Jesús xika ra nuu keꞌe veꞌe ñuꞌu kaꞌnu kan, yachin nuu nani yeꞌe kaꞌnu ña xavaꞌa ra Salomón, 24ra saa iin xinunduu ndia judío kan ra, ra ndindakatuꞌun ndia ra kachi ndia saa:

―¿Ama vi ke kaꞌan kun ña ndaa xiꞌin ndi ra kundaa ini ndi? Chi tu ndixa yoꞌo kuvi ra tiꞌvi Ndioxi xaa sakaku na yuuvi yoꞌo, saa ra kaxi kaxi va na kaꞌan kun xiꞌin ndi ra kundaa ini ndi ―kachi ndia xiꞌin ra.

25Ra saa ndakuiin Jesús kachi ra saa xiꞌin ndia:

―Xa ndikaꞌan va yu xiꞌin ndo, ra xïin ndo kandixa ndo yuꞌu. Ra takundiꞌi chiñu ña ^xa yu xiꞌin ndiayu Tata yu, ra ña kan kuvi ña ndakuiin xaꞌa yu ña ndixa ke kuu yu seꞌe va ra. 26Ndi su ndoꞌo ra xïin ndo kandixa ndo yuꞌu, saa chi süvi ndikachi vali sana yu kuvi ndo, xa ta kachi yu xiꞌin va ndo. 27Ra ndikachi vali sana yu, ra xini va soꞌo ri ña kaꞌan yu xiꞌin ri, ra xini tu mii va yu ri, ra ndikun tu ri yuꞌu va. 28Ra ^taxi yu ña kutiaku ri ndia ndikaa ndikuꞌun, ra ndia nii kii ndïꞌi xaꞌa ri, ra ndia nii tu na kuchüun kindiaa ri ndaꞌa va yu. 29Saa chi Tata yu, ra taxi ri ndaꞌa yu, kuvi ra kaꞌnu nuu takundiꞌi va na, ña kan ke ndia nii na kuchüun kindiaa ri ndaꞌa ra. 30Ra Yuꞌu, xiꞌin Tata yu, ra indaa mituꞌun va kuvi ndi ―kachi Jesús xiꞌin ndia.

31Ra saa kiꞌin tuku va ndia judío kan yuu, ña kuni ndia kakin ndia Jesús. 32Ra saa ndikaꞌan ra xiꞌin ndia kachi ra saa:

―Ña vaꞌa va kuvi ña kuaꞌa ni xa yu xini ndo, xiꞌin ndiee Tata yu; ¿ra ndia iin ña kuvi ña kakin ndo yuu yuꞌu xaꞌa? ―kachi ra xiꞌin ndia.

33Saa ndakuiin ndia judío kan kachi ndia saa xiꞌin ra:

―Süvi xaꞌa chiñu vaꞌa ña xa kun ke kakin ndi yuu yoꞌo, chi xaꞌa ña ndaa yuꞌu kun Ndioxi va ke kakin ndi ña yoꞌo. Saa chi tiaa yuuvi yoꞌo va kuvi kun, ra kaꞌan kun ña kuu kun Ndioxi ―kachi ndia xiꞌin ra.

34Saa ndakuiin Jesús kachi ra saa xiꞌin ndia:

―¿A su nuu ndiayu Ndioxi ña niꞌi va ndo ke ndikaꞌyu tuꞌun ña kachi suꞌva: “Mii yu kuvi va ra kaꞌan ña kuu ndo ndioxi”, kachi Ndioxi, ndikaꞌan ra kachi ña? 35Ra xa kundaa va ini yo, chi tuꞌun ña ndikaꞌyu nuu ndiayu Ndioxi, ra küvi kanduu yo ña; saa chi mii Ndioxi va kuvi ra ndikaꞌan kachi ra saa xiꞌin na ndakiꞌin ndiayu ra ta yachi, ña kuu na ndioxi. 36Ra Ndioxi va kuvi ra ndikaxin yuꞌu, ra tiꞌvi ra yuꞌu xaa yu ña yuuvi yoꞌo vichin, ra kaꞌan yu ña kuu yu seꞌe ra, ra ña kan ke kaꞌan ndo, ña ndaa yuꞌu yu ra. 37Ra tu xä yu chiñu ña ^xa Tata yu, saa ra na kandïxa ndo yuꞌu va. 38Ra tu ^xa va tu yu ña, saa ra vaꞌa ni na kandïxa va ndo yuꞌu, ndi su na kandixa va ndo chiñu ña xini ndo ^xa yu, ra saa ke vaꞌa na kundaa ini ndo ra kandixa ndo ña iyoo Tata yu Ndioxi xiꞌin yu, ra yuꞌu, tu iyoo xiꞌin ra kan va ―kachi ra xiꞌin ndia.

39Ra saa kuni tuku va ndia tiin ndia Jesús, ndi su ndikuchüun ndia, chi ndisaña va ra ndaꞌa ndia. 40Ra saa ndakiꞌin ra kuaꞌan chi nuu kanata ñuꞌù, ra kee ra itia Jordán ra ndixaa ra ndixikoo ra chi nuu ndixiyo ra Juan ra sakuchi yuvi te yachi. 41Ra kuaꞌa ka vi yuvi ndixaꞌan nuu iin Jesús, ra ndikaꞌan na xiꞌin taꞌan na kachi na saa:

―Vaꞌa ni ña ndixa ke köo va ña xituꞌun ndixa ra Juan, ndi su takundiꞌi ña ndikaꞌan ra xaꞌa tiaa yoꞌo, ra ña ndixa va kuvi ña ―kachi na. 42Ra kuaꞌa ni yuvi na ndee yachin kan, ndakundikun sata Jesús.

Currently Selected:

San Juan 10: mxvNT

Highlight

Copy