San Juan 12

Ko̱sondiee iin ñaꞌa ndutia xaꞌan tami xini Jesús

1Ra i̱ñu̱ ka kii ke kumani koo viko pascua, ra saa kee Jesús kuaꞌan ra chi ñuu Betania ñuu ra Lázaro ra ndixiꞌi, ra ndasatiaku Jesús ra. 2Ra ikan xavii na ña xixini ra xaꞌa ña xatoꞌo na ra, ra ña Marta kuvi ña chikaa koꞌo kata ña nuu ndia, ra ra Lázaro kuvi ra xinduꞌu nuu mesa xixi ra xiꞌin Jesús. 3Ra saa xaa tu ña María va, ra niꞌi ña iin yuyu loꞌo ña ñuꞌu ndutia xaꞌan tami, ra kuvaꞌa xiꞌin niña iku nardo, ra tiaa ni yaꞌvi ra, ra koso ndiee ña ra xaꞌa Jesús, ra te ndiꞌi saa ndakuꞌva ña xaꞌa ra xiꞌin ixi xini ña, ra iin chitu ndaa ini veꞌe kan, xiꞌin xiko ndutia xaꞌan tami kan. 4Ra saa ndikaꞌan iin ra itaꞌan xiꞌin Jesús, ra nani Judas Iscariote ra seꞌe Simón, ra ndataxi Jesús ndaꞌa na sáa̱ ini te na ndiꞌi, kachi ra saa:

5―¿A väꞌa ndikiyaꞌvi ndutia xaꞌan tami yoꞌo, uni ciento denario, ra chindiee taꞌan yo xiꞌin na ndaꞌvi? ―*kachi ra.

6Ndi su süvi ndixa xaꞌa na ndaꞌvi ke ndiꞌi ini ra ña ndikaꞌan ra tuꞌun yoꞌo; saa chi xaꞌa ña kuni ra xuꞌun va ke kachi ra saa; chi ra kan kuvi ra xindiso xuꞌun, ra ikan tava seꞌe ra loꞌo ña, ña kan ke kachi ra saa. 7Ra saa ndikaꞌan Jesús xiꞌin ra kachi ra saa:

―Koo yaa kun xiꞌin ña, chi ña vaꞌa va ke ^xa ña xiꞌin yu, saa chi chuvaꞌa va ña ndutia yoꞌo, ra chikaa ña ra sata yu vichin, ña vaꞌa xa na koo nduvi yu kii te na nduxin na yuꞌu. 8Ra na ndaꞌvi, ra iin takundiꞌi va kii ke kundee na kan xiꞌin ndo; ndi su yuꞌu, ra süvi iin takundiꞌi kii ke kuiin yu xiꞌin ndo ―*kachi ra.

Nduku na kuꞌva ña kaꞌni seꞌé na ra Lázaro

9Ra saa kuu, ra kuaꞌa ni na judío kundaa ini ña íin Jesús ñuu Betania, ra saa ndakiꞌin na ndixaꞌan na xini na ra, ra süvi takua ra kan kuvi ra ndixaꞌan na kuni na, chi ndixaꞌan tu na xini na ra Lázaro ra ndixiꞌi, ra ndasatiaku Jesús ta yachi va. 10Ra saa ndakutaꞌan ndia xikuaꞌa nuu ndia sutu, ra ndikataꞌan ndia ña kaꞌni tu ndia ra Lázaro va, 11saa chi xaꞌa ra yoꞌo ke, kuaꞌa ni na judío ra ndakoo va na ndia sutu kunaꞌnu kan, ra ndakundikun na sata Jesús va.

Ndasakaꞌnu ni na Jesús te ndikiꞌvi ra ñuu Jerusalén

12Ra saa kuu inka kii, ra saa ndakiꞌin Jesús kuaꞌan ra chi ñuu Jerusalén, ra kii kan ra ndee kuaꞌa tu yuvi na xaa ña iyoo viko pascua va, ra ta kundaa ini na ña xaa Jesús ñuu kan, 13ra saa kee na, ra xaꞌndia na ñuu ndaꞌa itun ñuu, ra ndixaꞌan na ndakiꞌin na Jesús, ra iin siso, siso ndaꞌyu na kachi na saa:

―¡Ra kaꞌnu kuvi Ndioxi! ¡Ra ra kaꞌnu kuu tu ra tiꞌvi va ra! ¡Kaꞌnu ni ra tiꞌvi ra, saa chin Rey na ñuu Israel kuvi ra! ―kachi na.

14Ra saa taxi na iin burru loꞌo ndaꞌa Jesús ra nandaa ra sata ri. Ra suꞌva va ke kuu ña vaꞌa ndixinu nuu tuꞌun Ndioxi, ña ndikaꞌyu xinaꞌa, ña kachi suꞌva:

15Kuayüꞌvi ndoꞌo, na ñuu Jerusalén;

na kundaa ini ndo, chi xa vaxi va ra kuu rey ndo,

ra yoso ra iin burru loꞌo vaxi ra,

^kachi ña.

16Ra ndia itaꞌan xiꞌin Jesús, ra ndikundäa vi ini ndia xiꞌin tuꞌun kan, ra ndia te ndatiaku Jesús kuanuꞌu ra chi ndivi vi ke, ndakaꞌan ndia ña ndikaꞌyu tuꞌun kan xaꞌa Jesús, ra iin ta kachi tuꞌun kan ña ndakani ña, ra iin saa ke kuu va.

17Ra yuvi na ndixaꞌan xini te kana Jesús ra Lázaro ini yavi ña sandatiaku ra ra, ra ndatuꞌun na xiꞌin yuvi xaꞌa ña xini na xa ra. 18Ra xaꞌa ña kan ke kee yuvi kan ndakiꞌin na Jesús, chi kundaa va ini na xaꞌa ña xituꞌun xa ra. 19Ra saa ndikaꞌan ndia fariseo kan xiꞌin taꞌan ndia kachi ndia saa:

―*Xi̱nì ndo chin ña uun va ke kuu yo saa xika yo, saa chi sata ra kaa, ndakundikun takundiꞌi va na ―kachi ndia.

Xika sava na griego nanduku na Jesús

20Ra ñúꞌu tu sava na griego va tiañu yuvi na ndixaa ndasakaꞌnu viko pascua ñuu Jerusalén kan. 21Ra saa kuyachin na griego kan nuu iin ra Felipe ra kee ñuu Betsaida, ña ndikun ndiaa chi Galilea, ra xakundaꞌvi na nuu ra kachi na saa:

―Tata, kuni ndi kuni ndi Jesús ―*kachi na.

22Ra saa kee ra Felipe ra ndixaꞌan ra ndikaꞌan ra xiꞌin ra Andrés, ra saa ndakutaꞌan uvi saa ndia ra ndixaꞌan ndia ndatuꞌun ndia xiꞌin Jesús. 23Ra saa ndikaꞌan Jesús kachi ra saa xiꞌin ndia:

―Xa kuyachin ni kii ña taxi Ndioxi ña kundaa ini yuvi, ña kaꞌnu ni yuꞌu, ra xaa yoꞌo. 24Ra xa kundaa va ini ndo, chi tu na ndakäva nuni trigo nuu ñuꞌu, saa ra köo mii kuiꞌi taxi vi ña, ra tu na ndakava ña nuu ñuꞌu, ra kuvi ña, saa ra, kuaꞌa ni va kuiꞌi taxi ña. 25Ra yuvi na kuꞌvi ni ini xini mii, ra na ndiꞌi xaꞌa va kuvi na; ndi su yuvi na kuë kuꞌvi ini xini mii, ra na kan kuvi na niꞌi kutiaku ndia ndikaa ndikuꞌun va. 26Ra tu ndia na xiin sachiñu ndaꞌvi nuu yu, ra xiniñuꞌu na kundikun na yuꞌu va, ra nuu koo yu ke koo tu na xachiñu ndaꞌvi nuu va yu, ra ndia ndia ka na ^xachiñu ndaꞌvi nuu yu, ra satoꞌo va Tata yu na.

Kaꞌan Jesús ndia kuꞌva ke kuvi ra

27’Ra vichin ra tiaa ni ndiꞌi ini yu. ¿Ra ni ke vaꞌa kachi yu? ¿A vaꞌa tu na kaꞌan yu xiꞌin Tata yu ña sayaꞌa ra yuꞌu nuu tundoꞌo ña vaxi nuu yu? Küvi, saa chi xaꞌa ña yoꞌo ke xaa va yu ―kachi ra. 28Ra saa ndikaꞌan ka Jesús xiꞌin Ndioxi kachi ra saa:

―Tata, na taxi kun kundaa ini yuvi, ña kaꞌnu ni kun ―kachi ra.

Ra saa tiaku ndikaꞌan iin tachi chi ndivi kachi ña saa xiꞌin ra:

―Xa taxi va yu ña kundaa ini na, ña kaꞌnu ni yu, ra taxi tuku va yu ña na kundaa ini na, ña kaꞌnu ni yu ―kachi ña.

29Ra ta xini soꞌo yuvi na ndee xiꞌin Jesús tuꞌun ña ndikaꞌan tachi kan, ra saa ndikaꞌan na kachi na saa:

―Savi va kuvi ra nindaꞌyu ―kachi na.

Ra sava tu na ndikaꞌan kachi saa:

―Tatun Ndioxi va kuvi ra ndikaꞌan xiꞌin Jesús ―kachi na.

30Ra saa ndikaꞌan Jesús kachi ra saa xiꞌin na:

―Tachi yoꞌo, ra süvi xaꞌa yuꞌu ke ndikaꞌan ña, chi xaꞌa ndoꞌo va ke ndikaꞌan ña. 31Ra vichin ke ndixaa kii ña kundaku kuachi xiꞌin na yuuvi yoꞌo; ra vichin ke ndixaa tu kii ña kita tachi ndivaꞌa ña xaꞌndia chiñu nuu ña yuuvi yoꞌo va, kuꞌun ña. 32Ra te xa na ndoniꞌi sukun na yuꞌu, ra ña sa yu ke sakanda yu nima yuvi ra nanduku takundiꞌi va na yuꞌu ―kachi Jesús xiꞌin na.

33Ra ña kachi Jesús suꞌva, ra xaꞌa ña katakaa na ra ndika cruz, va ke kachi ra saa. 34Ra saa ndakuiin yuvi kan kachi na saa xiꞌin ra:

―Nduꞌu, ra te ^xini soꞌo ndi ña kaꞌvi na tuꞌun Ndioxi ra suꞌva va kachi ña, Cristo ra iin takundiꞌi tiempo va ke kutiaku ra kan, kachi ña. ¿Ra nichuun ke kaꞌan tu yoꞌo ña ndakuita tiaa ra xaa yoꞌo? ¿Ra yoo kuvi tiaa ra xaa ñaa? ―*kachi na.

35Ra saa ndikaꞌan tuku Jesús, kachi ra saa xiꞌin na:

―Vichin, ra iyoo ka va ñùꞌù xiꞌin ndo, ndi su saloꞌo ni va tiempo iyoo ña xiꞌin ndo. Ra ña iyoo ñùꞌù xiꞌin ndo vichin, ra na kaka va ndo, chi koto iin kama suꞌva xaa ña ñaa niꞌi ña ndoꞌo, chi yuvi na xika nuu ñaa, ra kundäa ini na ndia mii ku nuu kuaꞌan vi na. 36Ra na kandixa ndo ñùꞌù ña iyoo ña xiꞌin ndo vichin, ra saa ke niꞌi ndo, kuu ndo seꞌe ña ―kachi ra.

Ra te ndiꞌi ndikaꞌan ra tuꞌun yoꞌo, ndia saa ra ndakiꞌin ra ndixaꞌan ra ndiseꞌe ra nuu va na.

Ña ndixïin na judío kandixa na Jesús ra ña vaꞌa na xinu nuu tuꞌun Ndioxi va ke

37Ra vaꞌa ni kuaꞌa ni va ña xituꞌun xa Jesús nuu na, ndi su ndikandïxa vi na ra. 38Ra ña kuu ña yoꞌo, ra ña vaꞌa na xinu nuu tuꞌun ña tiaa ra Isaías, ra ndikaꞌan tuꞌun yuꞌu Ndioxi xinaꞌa va kuvi ña, ta kachi ra suꞌva:

Tata, ndia nii na xïin kandixa tuꞌun ña kaꞌan ndi

Ra ndia nii tu na xïin kandixa xaꞌa ña ^xini na ña kaꞌnu ni ndiee va kun,

kachi ra. 39Ra ndikaꞌan tu ra Isaías kachi ra suꞌva va:

40Ndioxi kuvi ra ndasi nuu na, ra ndasatieꞌe ra nima na,

ña vaꞌa na küni na xiꞌin nduchi nuu na,

ra nii na kuïin na kandixa na xiꞌin ndinuni nima na,

ra nii na nandïko na nuu yu, ña sandaꞌa yu na,

kachi ra. 41Ra suꞌva ke kachi ra Isaías xaꞌa Jesús te yachi, saa chi xa xini nuu va ra ña kaꞌnu kuu mii Jesús.

42Ra vaꞌa ni saa va, ndi su kuaꞌa ni va na judío na kunaꞌnu xaꞌndia chiñu ra kandixa va na ña ndikaꞌan Jesús, ndi su ndixïin na ndatuꞌun na xiꞌin yuvi saa chi ndiyuꞌvi va na, ña tava ndia fariseo na veꞌe ñuꞌu kan. 43Saa chi kuni ka va na, ña na kaꞌan vaꞌa ni na yuuvi yoꞌo xaꞌa na, nuu ña kaꞌan vaꞌa Ndioxi xaꞌa na.

Tuꞌun ña ndikaꞌan Jesús va ke sandaku kuachi xiꞌin yuvi

44Ra saa ndiee ka vi ndikaꞌan Jesús xiꞌin na kachi ra saa:

―Yuvi na kandixa yuꞌu, ra süvi takua yuꞌu kuvi ra kandixa na, chi Tata yu, ra tiꞌvi yuꞌu vaxi va yu kuvi ra kandixa na. 45Ra yuvi na ^xíní yuꞌu, ra ra tiꞌvi yuꞌu vaxi va yu kuvi ra ^xíní na. 46Yuꞌu, ra kuu ñùꞌù, ra ña xaa yu ña yuuvi yoꞌo, ra ña vaꞌa na kundëe na kandixa yuꞌu, nuu ñaa va kuvi ña. 47Ra tu ndia na ^xini soꞌo tuꞌun yu, ra xïin na kandixa na ña, ra süvi yuꞌu kuvi ra sayukun kuachi xiꞌin na, saa chi ndixäa yu, ña sayukun yu kuachi xiꞌin na yuuvi yoꞌo, chi na xaa yu sakaku va yu kuvi na. 48Ra yuvi na kundasi yuꞌu, ra xïin na kandixa na yuꞌu, ra iyoo va ña sayukun kuachi xiꞌin na, saa chi tuꞌun ña ndikaꞌan va yu ke sayukun kuachi xiꞌin na kii ña vaxi. 49Saa chi yuꞌu, ra süvi ña kuni mii yu ke kaꞌan yu; chi Tata yu ra tiꞌvi yuꞌu va kuvi ra xaꞌndia chiñu nuu yu, ndia ña ke xiniñuꞌu kaꞌan yu, ra ndia ña ke xiniñuꞌu sañaꞌa yu ndoꞌo. 50Ra xa kundaa va ini yu, chi ndiayu ña xaꞌndia Tata yu, ra ña taxi kutiaku yuvi ndiaa ndikaa ndikuꞌun va kuvi ña. Ña kan ke, ña xaꞌndia Tata yu nuu yu ke kaꞌan tu yu xiꞌin ndoꞌo va ―kachi Jesús xiꞌin na.

Currently Selected:

San Juan 12: mxvNT

Highlight

Copy