San Juan 13

^Ndakatia Jesús xaꞌa ndia itaꞌan xiꞌin ra

1Ra ndia saloꞌo ni va kumani ña koo viko pascua, ra xa ^kundaa va ini Jesús ña xa ndixaa kii ña ndakoo ra ña yuuvi yoꞌo, ra nandiko ra kunuꞌu ra chi nuu nduꞌu Iva ra. Ra kuꞌvi ka vi ini ra xini ra na ndikun sata ra, na iyoo nuu ña yuuvi yoꞌo, ra ña kuꞌvi ni ini ra xini ra na, ra ndiakua ndataxi ra mii ra ña ndixiꞌi ra xaꞌa na.

2Ra saa kuu, ra ndakunduꞌu Jesús xiꞌin ndia itaꞌan xiꞌin ra ña kuxini ndia, ra xa chikaa yuꞌu va timiaꞌa ra Judas Iscariote, seꞌe ra Simón, ña ndataxi ra Jesús ndaꞌa na saa ini. 3Ndi su xa ^kundaa va ini Jesús ña taxi Iva ra Ndioxi takundiꞌi ndiayu ndaꞌa ra, saa chi nuu mii Ndioxi ke kee va ra, ra nuu mii Ndioxi ke nandiko tu ra kunuꞌu va ra. 4Ra saa kuu ndia ndee ndia xixini ndia, ra saa ndakundichi Jesús, ra kiꞌin ra tikoto ña isukun ra chinduꞌu ra kan, ra saa kiꞌin ra iin tikoto kani ra chikuꞌni ra ña toko ra. 5Ra te ndiꞌi saa chikaa ra tiakuii ini iin xikoꞌo, ra xaꞌa ra ndakatia ra xaꞌa ndia itaꞌan xiꞌin ra, ra te ndiꞌi saa sandachi ra ña xiꞌin tikoto ña nuꞌni toko ra.

6Ra ta kuyachin Jesús ña ndakatia ra xaꞌa ra Simón Pedro, ra saa ndikaꞌan ra Simón Pedro kachi ra saa xiꞌin ra:

―Tata, väꞌa kita ña ndakatia kun xaꞌa yu ―kachi ra.

7Saa ndakuiin Jesús kachi ra saa xiꞌin ra:

―Ña ^xa yu ra kundäa vi ini kun xiꞌin ña vichin, ndi su vaxi kii ra kundaa va ini kun xiꞌin ña ―kachi ra.

8Ra saa ndikaꞌan ka ra Pedro kachi ra saa:

―Tata, ndia nii kii täxi yu ndakatia kun xaꞌa yu ―kachi ra.

Ra saa ndakuiin Jesús kachi ra saa xiꞌin ra:

―Tu na ndakätia yu xaꞌa kun, saa ra küvi kutaꞌan kun xiꞌin yu ―kachi ra.

9Ra saa ndakuiin ra Simón Pedro kachi ra saa:

―Tata, tu saa, ra süvi takua xaꞌa yu ke ndakatia kun, chi na ndakatia tu kun ndaꞌa yu, xiꞌin xini va yu ―kachi ra.

10Saa ndikaꞌan Jesús kachi ra saa xiꞌin ra:

―Yuvi na xa chichi ra ndia takua xaꞌa va na kan ke xiniñuꞌu ndoo, saa chi yäkua ka na. Ra ndoꞌo tu, ra xa ndo nduyaa va kuvi ndo, saa chi yäkua ka ndo, ndi su süvi takundiꞌi tu ndo ninduyaa ―kachi ra.

11Saa chi ^xa kundaa va ini Jesús xaꞌa tiaa ra ndataxi ñaꞌa ndaꞌa na saa ini, ña kan ke ndikaꞌan ra, ña süvi takundiꞌi ndia kuvi ndia ninduyaa.

12Ra te ndiꞌi ndakatia ra xaꞌa ndia, saa ndakusukun ra tikoto ña isukun ra, ra saa ndakunduꞌu tuku ra nuu mesa va, ra ndikaꞌan ra xiꞌin ndia kachi ra saa:

―¿A ^kundaa ini ndo ni ke kuni kachi ña xa yu yoꞌo? 13Ndoꞌo, ra Tata Maestro kachi ndo xiꞌin yu, ra vaꞌa kaꞌan va ndo, saa chi suvi kuvi va yu. 14Ra tu yuꞌu, ra kuu yu Tata Maestro ndo, ra ndakatia tu yu xaꞌa va ndo, saa ra, xiniñuꞌu ndakatia tu ndoꞌo va xaꞌa na taꞌan ndo. 15Ra ña yoꞌo ke ^xa yu ña sakuaꞌa yu ndoꞌo, ra ta kuꞌva xa yu xi̱nì ndo ke na sa tu ndoꞌo va. 16Ra ña ndixa ke kaꞌan yu xiꞌin va ndo, saa chi ndia nii na xachiñu tatu, ra küvi sa chee na nuu ra kuu xitoꞌo na, ra nii yuvi na kuaꞌan chiñu küvi sa chee tu nuu na tiꞌvi ñaꞌa va. 17Ra tu na kundaa ini ndo xiꞌin ña yoꞌo, ra sa ndo ña, saa ra vaꞌa ni va kee ndo.

18’Ra süvi xaꞌa takundiꞌi ndo ke kaꞌan yu, chi xa kundaa va ini yu ni ke iyoo nima ta iin iin ndoꞌo, ndia ndikaxin yu. Ndi su ña xiniñuꞌu va ke na xinu nuu tuꞌun Ndioxi ña kaꞌan kachi suꞌva: “Ra xixi xiꞌin va yu kuvi ra ndukuiin kanitaꞌan xiꞌin yu”, kachi ña. 19Ra ña vaꞌa na kundaa ini ndo xaꞌa ña kuu, ña kan ke xa yachi va kaꞌan yu ña yoꞌo xiꞌin ndo, ra te xa na kuu ña, saa ra na kandixa va ndo, ña kuu yu tiaa ra kuu va yu. 20Ra ña ndixa ke kaꞌan yu xiꞌin ndo, saa chi yuvi na ndakiꞌin mani yuvi na ^tiꞌvi yu kuꞌun, ra yuꞌu va kuvi ra ndakiꞌin mani na; ra na ndakiꞌin mani yuꞌu, ra ra tiꞌvi yuꞌu xaa va yu kuvi ra ndakiꞌin mani na ―kachi Jesús xiꞌin ndia.

Kaꞌan Jesús xaꞌa ña xikotaꞌan ra Judas xiꞌin ra

21Ra te ndiꞌi ndikaꞌan Jesús tuꞌun yoꞌo xiꞌin ndia, saa ra kusuchi ka vi ini ra, ra saa ndikaꞌan tieꞌe ra xiꞌin va ndia kachi ra saa:

―Ña ndixa ke kaꞌan yu xiꞌin ndo, saa chi iin ndoꞌo ndia ndee yoꞌo va kuvi ndia ndataxi yuꞌu ndaꞌa na saa ini xini yuꞌu ―kachi ra. 22Ra saa xaꞌa ndia itaꞌan xiꞌin ra xitoꞌni ndia nuu taꞌan ndia, ra ^ndakani ini ndia yoo xaꞌa ke ndikaꞌan ra. 23Ra saa kuu ndia ndee ndia xixini ndia, ra yachin xiꞌin mii Jesús va nduꞌu iin ra itaꞌan xiꞌin ra, ra ^kuꞌvi ni ini ra xini ra. 24Ra saa ndixika ndaꞌa ra Simón Pedro nuu ra ña na ndakatuꞌun ra Jesús, ra vaꞌa kundaa ini ndia yoo xaꞌa ke ndikaꞌan ra. 25Saa nduyachin vaꞌa ka va ra xiin Jesús, ra ndindakatuꞌun ra ra, kachi ra saa:

―Tata, ¿yoo kuvi ra sa saa? ―kachi ra.

26Ra saa ndakuiin Jesús kachi ra saa xiꞌin ra:

―Ra chindaxi yu ixta taxi yu ndaꞌa kuvi ra ―kachi ra.

Ra saa chindaxi Jesús ixta, ra taxi ra ña ndaꞌa ra Judas Iscariote, seꞌe ra Simón. 27Saa kiꞌin ra Judas ixta kan xixi ra, ra saa kuu ndia ndee ndia, saa ra ndikiꞌvi va timiaꞌa ini ra. Ra saa ndikaꞌan Jesús xiꞌin ra kachi ra saa:

―Chiñu ña kuni kun sa kun, ra kama ni ka na sa va kun ña ―kachi ra.

28Ndi su ndia nii ndia ndee nuu mesa kan ndikundäa ini, nichuun ke kachi Jesús saa xiꞌin ra. 29Ra sava ndia ndakani ini, ña kuꞌun ra Judas kan sata ra ñaꞌa ña kuniñuꞌu ndia viko, a ñaꞌa, ña saniꞌi ndia na ndaꞌvi va tu, saa chi mii ra kan kuvi ra ndiso xuꞌun va. 30Ra te ndiꞌi xixi ra Judas ixta kan, saa ra ndakundichi ra kuaꞌan va ra. Ra xa ñuu va kuvi ña.

Ndiayu xaa ña taxi Jesús

31Ra te kanata ra Judas kuaꞌan ra, ra saa ndikaꞌan Jesús kachi ra saa:

―Vichin ke ^kuni takundiꞌi yuvi yuꞌu ra xaa yoꞌo, ña kuu yu ra kaꞌnu, ra kundaa tu ini na ña kaꞌnu ni tu Tata yu Ndioxi va, xaꞌa chiñu ña ^xa yu. 32Ra tu xiꞌin chiñu ña ^xa yu ke kundaa ini na ña kaꞌnu ni Ndioxi, saa ra ndasakaꞌnu ni tu mii va ra yuꞌu, ra xa numi ni va sa ra ña. 33Ndoꞌo, ndia kuu seꞌe mii yu, ra na kundaa ini ndo, saa chi saloꞌo ni va kii íin yu xiꞌin ndo, ra xa ta kachi yu xiꞌin na judío ke ^kachi tu yu xiꞌin ndoꞌo va: Saa chi nanduku ni va ndo yuꞌu, ndi su kuchüun vi ndo xaa ndo nuu kuꞌun yu. 34Ra ndiayu xaa ña ^ndakoo yu ndaꞌa ndo ke yoꞌo: na kuꞌvi ni ini ndo kuni taꞌan ndo. Ra ta kuꞌva ^kuꞌvi ini yuꞌu xini yu ndoꞌo, saa ke na sa tu ndoꞌo va, ña kuꞌvi ni ini ndo kuni taꞌan ndo. 35Ra tu saa na sa ndo, ña kuꞌvi ni ini ndo kuni taꞌan ndo, saa ra kundaa ini takundiꞌi va yuvi ña kuu ndo ndia itaꞌan xiꞌin yu ―kachi Jesús xiꞌin ndia.

Kaꞌan Jesús ña tiseꞌe tuꞌun ra Pedro xaꞌa ra

36Ra saa ndindakatuꞌun ra Simón Pedro Jesús kachi ra saa:

―Tata, ¿ndia mii ke kuꞌun kun? ―kachi ra.

Ra saa ndakuiin Jesús kachi ra saa:

―Nuu kuꞌun yu, ra küvi vi kuꞌun kun xiꞌin yu vichin, ndi su kundikun va kun xaa kun te xa na ndiꞌi ―kachi ra.

37Ra saa ndikaꞌan ra Pedro xiꞌin ra kachi ra saa:

―Tata, ¿nichuun ke küvi kuꞌun yu xiꞌin kun vichin? Chi yuꞌu, ra xa iyoo nduvi va yu ña kuvi yu xaꞌa kun ―kachi ra.

38Saa ndakuiin Jesús kachi ra saa xiꞌin ra:

―¿A ndixa iyoo nduvi kun ña kuvi kun xaꞌa yu? Na kundani kun chi mii ña ndaa, ra ñuu vichin, ra xa uni va ichi tiseꞌe tuꞌun kun xaꞌa yu, ra saa kana chele ―kachi Jesús xiꞌin ra.

Currently Selected:

San Juan 13: mxvNT

Highlight

Copy