MATIYU 17

1Dabsa ayoobu ŋɔn daa ti gaari, Yisa daa zaŋŋi Piita ni Gyeemsi ni u tunzɔ Gyɔni n‑zi ba n‑gaari tooni n‑kyaŋŋi n‑du zɔtitaari zugu ka ba daa ti bɛ ba kɔkɔa. 2Ban daa gɔsiri maa, ba daa ti nya ka Yisa takki ni, ka u nindaa daa ti nya'asiri hoo wuntaŋŋa la, ka u neema daa pɛligi nyain! 3Dinsaha u nyaandɔliba ata maa daa nya ka Musa ni anabi Ilaygya daa bɛ ni ka ban ni ŋɔn daa sɔsira. 4Ka Piita daa yɛli Yisa, ni, “Ti Dugma, ti kpa wa beesigu veela! I yi boori lala, n nin ti suga ata, i dinni yinni, ni Musa dinni, ni Ilaygya mun dinni!” 5Ka Piita noori ŋɔn na bu lu tiŋŋa, sangbampeelli daa ligi ba na, ka kukɔri daa tɔ'asiri sangbaŋŋu maa ni n‑yɛtti, ni, “M bii maa nŋɔa, ka n wuri u: n nini tigi u pam: ya wumma u yɛligu!” 6Yisa nyaandɔliba maa ŋɔn daa wum lala maa, dabeem daa gbaai ba. Ba daa sunni tiŋŋa dabeem maa zugu. 7Ka Yisa daa kyɛ na nti siisi ba ka yɛli ba, “Ya yisigma! Yan di zɔri dabeem.” 8Ba daa wukki ba zugri saazugu, amaa ba daa bu nya sɔa; kulla Yisa kɔkɔ n daa zɛya.

9Ka ban daa ti yi zoori maa zugu n‑sigri na, Yisa daa kpaamni ba n‑yɛli, ni, “Ya di yɛli sɔ yan nya seem wa, halli ka man Ninsaala Biiya ti doaai kum ni.” 10Ka u nyaandɔliba maa daa boosi Yisa, ni, “Wula zugu ka ti karimbadima yɛtti, ni, Ilaygya nin daŋŋi n‑kyɛ na pɔi, ka Masiiya naayi paai na?” 11Ka u daa labsi n‑yɛli ba, “Ilaygya n siri ya n‑kyɛ na n‑sɛ'asi buna kam zaa. 12Man mun yɛtti ya wa, ni, Ilaygya pun kyɛ na ka ba daa bu baŋŋi u, ka daa niŋi u ban daa boori seem. Lala ka man Ninsaala Bii gba ya n‑di wahala ba nuu ni.” 13Di saha maa ka u nyaandɔliba maa daa ti baŋŋi, ni, Gyɔni Kɔsuura maa yɛla ka u tɔ'asiri ba maa.

14Yisa ni u nyaandɔliba ata wa daa sigi na nti paai daadam saani na. Ka zama maa puuni dɔsɔ daa kyɛ Yisa saani na nti sɔmni u tooni 15n‑yɛli, ni, “N daana, zɔm n bidibga wa namboo! Kpisinkpiiri ŋɔn mari u n‑namsiri u pam. Di kur lusiri u bugum ni, bee, koom ni sahakam. 16Ka n mari u n‑kyɛ i nyaandɔliba wa saani na, ka ba bu nyaŋŋi n‑tibi u.” 17Ka Yisa gyɛrigi n‑yɛli, “Ah! Ya zuna niriba wa n kur nyɛ bungɔlima ka ku sakki yɛdda niŋbu! N ya yuui la wula ya saani? Bee man nin di sugru ya saani ka di yuui wula? Tɔ, yan mari bii maa n‑kyɛ kpa na!” 18Ka Yisa daa tasi arizimbeoo maa, ka u zɔ ka kyɛ bii maa, ka bii maa di kpaŋŋi zaa. 19Tɔ; ka di nyaaŋŋa Yisa nyaandɔliba maa daa kyɛ u saani na nti sɔ'ai n‑yɛli u, ni, “Bɔ n niŋi ka tirima guui arizimbeoo maa karibu?” 20-21Ka u yɛli ba, “Di nyɛ la ya yɛdda poorim zugu. Yɛlimaŋni ka n yɛtti ya wa, ni, ya yi da mari yɛdda ka di sa'ai zinzam beelli, ya naa n‑toaai n‑yɛli zoori wa, ni, ka doaai m‑bakki n‑kyaŋŋi bɛni sa, ka ka niŋi lala. Halli sɛseelli ku kɔŋŋi niŋbu ya saani.”

22Ban daa goori n‑gyinni Galilii tingbaŋŋu ni sahanseaa, Yisa daa yɛli ba, ni, “Ba nin zaŋŋi man Ninsaala Bii n‑ti ninvugseeba nuusi ni, 23ka ba nin ku ma. Ka Ninsaala Bii maa kum maa nyaaŋŋa di nin paai dabsa ata ka u nin laa n‑doaai.” Ka ba sufu daa sa'am pam di zugu.

24Ban daa paai Kapirinyum tiŋŋa sahanseaa, ninvugseeba daa kyɛ ba saani na ni ba ti toosi Gyɛrusalɛm Gyeeŋŋu Yiri lampoo ligri maa. Ba daa yɛli Piita, ni, “Ammi, ya karimba bu yoori ti lampoo la?” 25Ka u labsi n‑yɛli ba, ni, “Ay! U yoori, walla!” Ka ban daa ti paai yiri maa ni, Yisa daa yɛli Piita, ni, “N zɔ Saimoon, i teesi la wula? - Duniya wa nadima maa, bandima saani ka ba deaari lampoo ni piini? Ba timbiisi saani, bee, tinzundima saani?” 26Ka ŋɔn daa labsi n‑yɛli, ni, tinzundima maa saani, Yisa daa yɛli u, ni, dizugu timbiisi ka samni. 27Ni, “Amaa ti bu boori ni ti daamni ba sufu, ka dizugu kur kyɛma mɔ'ari ni n‑lɔbi zingoaa; i yi daŋŋi n‑gbaai zinseaa, zaŋŋma u n‑yaam u noori ka i nin nya lampoo buyi la'afu: kana ka i nin zaŋŋi n‑yɔ man ni nyin samni.”

Currently Selected:

MATIYU 17: maw

Highlight

Copy