MATIYU 18

1Di saha maa ka Yisa nyaandɔliba maa daa kyɛ u saani na ka boosi u, ni, “Ŋɔni n nyɛ ninvugtitaari n‑gaari zaa Arizana naam maa ni?” 2Ka u daa booli bii yinni n‑zaali ba tooni, 3ka yɛli ba, “Yɛlimaŋni ka n yɛtti ya wa, sɔ yi bu takki n‑leebi hoo bibila ŋɔn bɛ seem, u ku toaai n‑kpɛ Arizana naam maa ni. 4Sɔ ŋɔn sigsi u maŋŋa ka ŋmanni bibila wa - ŋɔna n nyɛ ŋɔn galisi n‑gaari sɔkam zaa Arizana naam ni. 5Sɔ yi gyaari bibila wa taabu man yuuri zugu, mani ka di daama n gyaari.”

6Ni, “Amaa sɔ yi yɔmsi bibisi wa yinni ka kyɛ ka u bu laa n‑niŋi ma yɛdda ka za'asi ma, lala nira nin ti nya ka ba yi da zaŋŋi nɛtitaari n‑lɔ u nangoori ni ka zaŋŋi u n‑lɔsi mɔ'azuliŋŋu ni, di naa n‑sɔ u beesigu. 7Sufusa'aŋŋu m bɛ duniya wa ni, yɔmsigu zugu, ni yɛdda kɔŋŋsim zugu. Soori ka ni ka yɔmsigu ku kyɛ na, amaa sufusa'aŋŋu m bɛ ni n‑ti ninvugsɔ ŋɔn yɔmsira ka kyɛ ka niriba kyɛ ba yɛdda niŋbu! 8Dizugu i nuu, bee, i gbari, yi yɔmsiri i ka kyɛ ka i kɔŋŋi yɛdda, nyin ŋmaam ka m‑basi. I yi mari nuu yinni, bee, gbari yinni, ka mari nyɔvuri, di sɔ i mari nuusi ayi, bee, gbaya ayi, ka kpɛ bugum bun bu kpiiri halli sahakam maa ni. 9I nimbiri yi yɔmsiri i ka kyɛ ka i kɔŋŋi yɛdda, nyin lukkma ka n‑lɔbi. I yi mari nimbiri yinni n‑kpɛ nyɔvuri ni, di sɔ i mari nini ayi ka kpɛ bugum wahala ni.”

10-11Ka u daa laa n‑yɛli ba, ni, “Nyama! Yan di zeem bibisi wa yinni yɛla. N yɛtti ya, ni, ba malaakadima m bɛ arizana ni n‑gyeemni m Ba Naawunni.” 12Ni, “Ya teesi la wula? - Dɔsɔ yi mari u peesi kɔbga ka yinni ti bɔrigi, u bu ya bɔ u ziiya? Ay! - u nin kyɛ u peesi kɔbga‑yinni‑ka la ka ba kpalim m‑bɛ zoori zugu, ka kyaŋŋi nti bɔ yinni maa ziiya. 13Ka u yi ti nya u, n yɛtti ya wa, ni, u sufu nin maai peoo yinni maa zugu n‑gaari peesi kɔbga‑yinni‑ka ban bu bɔrigi la. 14Lala n nyɛ di ya Ba saani arizana ni: u gba bu boori u bibisi wa yinni basi yɔri.”

15Ka u daa yɛli, “I mabii yi tum i taalli, kur kyɛma nti nya u, nyin ni ŋɔn kɔkɔa, n‑wulisi u u taalli ŋɔn nyɛ seem. U yi ti wum n‑ti i, i labsi u n‑lɔ mabiitiri nangbanyinni yaasa. 16Amaa u yi ku sakki n‑wum n‑ti i, zaŋŋma ninvugyinni, bee, babayi m‑paasi i maŋŋa zugu ka ya kyaŋŋi nti tɔ'asi n‑ti u. Lala ka ya nin kyɛ ka ‘sɛhara dima ayi-ata noori ni ka yɛttɔ'a yɛlimaŋni nin yi paalu’. 17Ka u yi ku sakki n‑wum n‑ti ya yaasa, ya kyɛ ka ya mabiisi zaa la'am n‑wumna. U yi ku sakki n‑wum la'aŋŋu maa noori, ya gɔsima u hoo ŋɔn pa la Naawunni nira, bee, ŋɔn nyɛ lampodeaara.”

18Ni, “N yɛtti ya ni, ni, yan lɔ bunseelli duniya wa ni, dina n lɔ Arizana ni gba; yan mun lɔrigi bunseelli duniya wa ni, dina n lɔrigi Arizana ni gba. 19Ka n yɛtti ya yaasa, ni, niriba ayi yi gbaai seelli duniya wa ni ka susi Naawunni di zugu, dina ka m Ba sɔ ŋɔn bɛ arizana ni nin ti niŋi n‑ti ba. 20Niriba ayi-ata yi ti la'am taaba man yuuri maa zugu, n nin bɛ ba saani.”

21Ka Piita daa kyɛ Yisa saani na nti boosi u, ni, “N dugma, m mabii yi ti tum ma taalli, napɔmbula ka n nin kyɛ u taalli m‑pɛŋŋi u? Napɔmbuyɔpɔi, bee?” 22Ka Yisa daa yɛli u, “Pa la napɔmbuyɔpɔi, amaa napɔŋŋu pisiyɔpɔi zii buyɔpɔi.”

23Ka Yisa daa yɛli, ni, “Dama arizana naam yɛla ŋmanni la nŋɔa#:- Nasɔ n daa bɛ ni, ka u daa yɛ gɔsi u kpamma ŋɔn mari u ligri n‑tumni seem. 24U daa piili lala laasaabu, ka ba daa zi sɔ n‑kpɛ na, ka u daa di Naa maa samni salima ligri tusatusa. 25Ka doo maa daa bu nyaŋŋi n‑yɔ lala samni maa, ka Naaba daa yɛli, ni, ba koosima u ni u pɔ'a ni u biisi ni u marigu zaa n‑yɔa. 26Ka doo maa daa gbaanni Naa maa tooni ka bɛlimni u, ni, u dim sugru ka u nin yɔ samni maa zaa. 27Ka Naaba maa sufu daa sa'am pam ka u daa zɔ u namboo ka kyɛ u samni zaa m‑pɛŋŋi u. 28Tɔ; ka Naaba kpeema wa daa yi n‑kyɛnna, nti paai u kpeemtaraansɔ ŋɔn daa nyɛ u sandaana, amaa u samni daa bu zoaai. Ka u daa gbaai di daama n‑diisi u nangoori n‑yɛli u, ni, u yooma u samni maa zaa. 29Ka doo maa daa gbaanni u tooni ka bɛlimni u, ni, u dim sugru ka u nin yɔ samni maa zaa. 30Amaa u daa za'asi ka zaŋŋi u n‑taasi dansarika ni, halli ka u ti yɔ samni maa. 31Ka ba taaba maa ŋɔn daa nya ka u niŋi u seem maa, di daa dam ba sufu ka ba daa kyaŋŋi nti pooti n‑ti Naaba ŋɔn tum seem maa. 32Ka Naa maa daa booli u na n‑yɛli u, ‘Nyini ninvugyɔri wa! N da kyɛ i samni zaa m‑pɛŋŋi i, nyin da susi ma zugu. 33Ka dizugu di bu sumsi ni i zɔ i taraana namboo? - kaman man zɔ i namboo seem maa.’ 34Ka Naaba maa sufu daa yisigi m‑basi doo maa, ka ba daa zaŋŋi u n‑kpari dansarika duu ni halli ni u ti yɔ u samni maa. 35Tɔ: ka lala ka m Ba ŋɔn bɛ arizana ni gba nin niŋi ya, ya sɔkam yi ku siri zaŋŋi u sufu n‑kyɛ u mabii taalli zaa m‑pɛŋŋi u.”

Currently Selected:

MATIYU 18: maw

Highlight

Copy