Marcos 16

Palabras de l anjo sentado na sepultura

(Mateus 28,1–8; Lucas 24,1–12; Juan 20,1–10)

1Apuis de passar l sábado, Marie Madalena i Marie, mai de Tiago i Salomé, mercórun unguientos para lo ir a ambalsamar. 2Lhougo a la purmanhana cedo, a soutordie apuis de l sábado, fúrun-se a la sepultura, yá al nacer de l sol. 3Dezien-le ũas a las outras: «Quien mos bai a arrunsar la piedra de la boca de la sepultura?» 4Mas mal apenas mirórun, bírun la piedra tirada; i eilha era mesmo mui grande. 5Apuis antrórun na sepultura i bírun un rapaç sentado a la mano dreita, bestido cun ũa túnica branca, i quedórun mui assustadas. 6El dixo-le a eilhas: «Nun bos assústedes.» Andais a saber de Jasus de Nazaré que fui curceficado? Rucecitou, nun stá eiqui; mirai l sítio adonde lo habien puosto. 7Ide-bos i dezi-le als sous deciplos i a Pedro: «Chegarei delantre de bós a la Galileia. Ende l bereis, tal i qual cumo el bos dixo.»

8Eilhas salírun de la sepultura i botórun-se a fugir, puis habien quedado chenas de miedo i a tembrar, mas nun se l dezírun a naide, pus tenien miedo.

Apariçones de Cristo rucecitado

9Habendo rucecitado a la purmanhana cedo, a soutordie a seguir al sábado, apareciu-le purmeiro a Marie Madalena, puis habie botado deilha para fuora a siete demonhos. 10Eilha fui-se-lo a anunciar als que habien bibido cun el, achando-los mui tristes i a chorar. 11Quando eilhes oubírun dezir que staba bibo i que eilha lo habie bisto, nun acraditórun.

12Adepuis tamien le apareciu, nũa outra forma, a dous deilhes que íban por un camino pa l campo. 13Eilhes lhougo fugírun a dezir-se-lo als outros, mas tamien nun acraditórun neilhes.

14Mais tarde, apareciu-le als onze quando stában sentados a la mesa i renhiu cun eilhes por nun acraditáren i tenéren l coraçon duro, porque nun habien acraditado naqueilhes que lo habien bido rucecitado. 15I dixo-le: «Ide por to l mundo i pregai l Eibangeilho a toda la criatura. 16Quien acraditar i fur batizado, salbará-se; mas quien nun acraditar, cundanará-se. 17Ls que acraditáren seran acumpanhados por estas seinhas: an miu nome botaran ls demonhos pa la rue, falaran lhénguas nuobas, 18agarraran las serpientes i, se buíren algo cun beneno, nun le fazerá mal, poneran las manos porriba ls malos i quedaran sanos.»

19Apuis de haber falado cun eilhes, l Senhor Jasus fui lhebado pa l cielo i sentou-se a la mano dreita de Dius. 20Anton, eilhes fúrun-se a pregar an todo l lhado, ajudando-los l Senhor i apoiando la palabra deilhes culs milagres que fazien.

Currently Selected:

Marcos 16: EM14

Highlight

Copy