Tio 24

Uvaʼs talt quBʼaal Jesuus uvaʼ, tetxhal laʼich jinpul el u tostiuxh

Kuxh 13.1-2; Luk 21.5-6

1Eletz vet ul Jesuus tu nimla atibʼal tuulbʼal u tostiuxh, tul aalich vet ibʼen Jesuus. Yaʼne tal inqʼa nikich itxhus tibʼ kʼatz Jesuus s-te uvaʼ kaebʼalxh aanima tilix u tostiuxh.

2Tul ech tal Jesuus s-eche: —Nuqxh toq val sete: Jankʼalxh uvaʼ nik motx etil te u tostiuxh, tan tira yeʼl vet inpaqt laʼ etil invaʼtoʼq sivan. Pet tetxhal laʼ motx jinpeʼl jankʼal inqʼa nik motx etileʼ, —xeʼt Jesuus.#Danieel 9.27; 11.31; 12.11; Tio 24.15; Kuxh 13.14{*}#24.2 Danieel 9.27; 11.31; 12.11; Tio 24.15; Kuxh 13.14. ¿Kam talax u yol uvaʼ?: —Jankʼalxh uvaʼ nik motx etil te u tostiuxh, tan tira yeʼl vet inpaqt laʼ etil invaʼtoʼq sivan. Pet tetxhal laʼ motx jinpeʼl jankʼal inqʼa nik motx etileʼ, —xeʼt quBʼaal Jesuus. Aʼ ibʼaxabʼsa quBʼaal Jesuus talax val uvaʼ laʼich utxh tuulbʼal u tostiuxh uvaʼ tira kantxhaq laʼich bʼanaxi, atz eesabʼ tetz iqʼij quBʼaal Tiuxh uvaʼ laʼich utxhi. Tul elaʼpetzxh uvaʼ ibʼaxabʼsa quBʼaal Jesuus talaxeʼ, tan antxh ibʼanvat tu yaʼbʼ 70 m.t.J. Tul opoon inqʼa sol, inqʼa aj Rooma, tul ex tokebʼe u tenam Jerusaleen. Tul mam yeʼbʼaʼn ex ibʼan inqʼa sol tuulbʼal u tenam. Tul ex teesa inqʼa sol iqʼij u tuulbʼal u tostiuxh. Tan ex iyatzʼ inqʼa txoo viʼ u natxhkʼuulabʼal, uvaʼ alel taʼn Moisees uvaʼ yeʼ laʼ utxh ibʼanbʼeleʼ. Tul ex itzʼeʼsa inqʼa sol inqʼa uʼ tal uvaʼ tzʼibʼamich viyolbʼal quBʼaal Tiuxh s-tuul, inqʼa bʼalqʼumiche, tul kolelich tu tostiuxh. Tul mamala inqʼa kam uvaʼ nikich itxakun tuul u tostiuxh telqʼa bʼen inqʼa sol. Tul nima vatzlenich kuxh tiqleʼm inqʼa laq atich tuul u tostiuxh, atz nima vatzlenich kuxh ichʼijeʼ. Tan atichaq uvaʼ ooro tiqleʼm, atz atich plaata tiqleʼm, atz atich vroonse tiqleʼm. Tul atich viqbʼal tetz u tostiuxh uvaʼ ooroich tiqleʼm. Tul itzʼeʼsa vet inqʼa sol u tostiuxh tiʼ teluʼl inqʼa ooro inqʼa atich ok vatz bʼitzʼ, atz inqʼa atich ok tuul okaʼp vitxhiʼoʼl u bʼitzʼ. Echetz imotx kuule inqʼa ooro, tul motx tiqʼo vet inqʼa sol. Tul tira motx itilpu kuʼl inqʼa sol u tostiuxh. Pet taʼn kuxh kaj vet vixeʼ u tostiuxh uvaʼ atich bʼen t-txʼavaʼ. Aʼetz u ‹txoqebʼal kʼuulla txumbʼale laʼich bʼanaxi› uvaʼ ibʼaxabʼsa quBʼaal Jesuus talaxeʼ. Tul tiqʼo tzaan quBʼaal Jesuus viyol Danieel tiʼ talaxeʼ.

Uvaʼs talt quBʼaal Jesuus kam laʼ utxhi uvaʼs yeʼnaq uloq u kʼaxkʼo tiibʼa u tenam Jerusaleen

Kuxh 13.3-23; Luk 21.7-24

3Aqʼbʼetz vet Jesuus tu vitz Inqʼa Oliivo, tul kʼuqeʼv vet Jesuus tzitzi. Yaʼne ijetxhaq vet ok tibʼ inqʼa nikich itxhus tibʼ kʼatz Jesuus. Tul ijunalaq kuxh motx tabʼi kaʼl u yol te Jesuus. Pet niim atilich el inqʼa xaol.

Tul ech u yol motx tabʼi te Jesuus s-eche: —Al s-qe, ¿jatuetz laʼ ibʼan u yol uvaʼ nik aal tiʼ u tostiuxh? Atz ¿kam tetxhlal laʼ ilixi, yaʼne laʼ ul axh? Atz ¿kam laʼ ibʼan timotxebʼal tanul inqʼa yaʼbʼ s-txheel? —xeʼtaq te Jesuus.

4Tul ech tal Jesuus s-eche: —Poro xeevaqxh etibʼ, tul yeʼxhal laʼ eesan ex t-bʼey. 5Tan at inqʼa laʼ uli uvaʼ laʼ kʼamon vinbʼij. Tul ech laʼ motx tal junun s-eche: «Ine u Kriisto,» chaq tul junun. Tul mamala xaol laʼ teesa t-bʼey. 6Tul laʼ motx etabʼi uvaʼ mamala txhʼaʼo sebʼte. Atz: «Il txhʼaʼo nik tutxh tzitzi,» chaq eʼl ex.

Poro yeʼl ex laʼ motx xoʼv ex, tan echxh laʼ ibʼane. Poro yeʼxnaqetz opoonnaʼqle viqʼiil vimotxebʼal u qʼij saq.{*}#24.6 ¿Kam talax inqʼa yol ‹viqʼiil vimotxebʼal› nik tal tu versiikulo uvaʼa? Aʼ nik ex tal tiʼ u qʼij uvaʼs laʼ taqʼt kuʼ quBʼaal Tiuxh inqʼa yol tinuqul tiibʼa jankʼal inqʼa tenam s-kaqaayil. 7Atz laʼ itxhʼaʼoi tibʼ inqʼa nimla tenam s-vatzaq. Tul laʼat motx itxhʼaʼoi tibʼ inqʼa mam iqʼesal s-vatzaqil. Atz mamala vaʼy, atz mam yaabʼil laʼ ul t-inqʼa tenam. Atz laʼ pal kabʼnaano tuulbʼalaq inqʼa tenam.

8Jankʼaletzxh inqʼae, tan aʼetz kuxh vixeʼtebʼal u mam kʼaxkʼoe uvaʼ laʼ utxh tuulbʼal uvaʼs yeʼnaq uloq in inpaqte vatz u txʼavaʼ. Tan ech laʼ ixeʼt, eche ixeʼt itxhoʼm invaʼq u ixoq uvaʼ toqnaʼq tala vet u tal.

9Yaʼne laʼ oksal ex vatz u kʼaxkʼo. Tul mamala xaol laʼ txhiʼan setiʼ. Tul laʼ motx yatzʼax el ex. Atz tiʼ kuxh vinnimaleʼ, tul laʼ motx palk ex t-inqʼa kʼaxkʼo.#Tio 10.22 10Tul laʼ motx tzʼeqx kʼuqlebʼal ikʼuul inqʼa xaol s-viʼ. Atz laʼ motx ixotxh tibʼ inqʼa xaol s-vatzaqil. Atz laʼ motx itxhiʼkʼuula tibʼ xaol s-vatzaq. 11Tul at inqʼa laʼ tal tibʼ s-qʼexsan tetz viyol quBʼaal Tiuxh. Tul laʼ teesa inqʼa xaol t-bʼey. 12Tiʼetz uvaʼ laʼ motx yakʼin vet u yeʼbʼaʼn tzitza vatz u txʼavaʼ, tul mamala xaol laʼ tanbʼan vet isaʼt tibʼ tuchʼ inqʼa imol s-vatzaqil.

13Pet jaʼl ex, uvaʼ tira kʼayimal etaanima s-viʼ, tul yeʼ laʼ etanbʼa ka vinnimaleʼ tetxhal topoon vitzoqpebʼal u qʼij esaq, aʼetz exe uvaʼ at qʼij esaq sinkʼatza laʼ ibʼana. 14Tan tetxhal laʼ nal paxsal inuqul inqʼa bʼaʼnla txhaq yol tiʼ vibʼant quBʼaal Tiuxh viqʼesalil t-taanima inqʼa xaol tuulbʼal jankʼal inqʼa tenam. Maʼtetz ipaxsal vet inuqul inqʼa bʼaʼnla txhaq yol tuulbʼal inqʼa tenam, yaʼne laʼ opoon vet viqʼiil vimotxebʼal.

Uvaʼs taqʼt jaʼp quBʼaal Jesuus u yol tetz kʼaxbʼichil uvaʼ laʼich ul tiibʼa inqʼa xaol t-Jerusaleen

15Echetz nik valte sete, oq laʼ etil ibʼanax vet u txoqebʼal kʼuulla txumbʼal uvaʼ txumlebʼal laʼ ibʼanax vet tuul okaʼp u Tiuxhla Atibʼal tuulbʼal u tostiuxh, tul aʼetz vet u yole uvaʼ itzʼibʼa ka Danieel, u qʼexsanich tetz viyol quBʼaal Tiuxh eyaʼp veteʼ. (In Tio nik alon uvaʼ bʼenoq u yol sete, ex, uvaʼ laʼ sikʼlen.)#Danieel 9.27; 11.31; 12.11 16Jankʼaletzxh ex, inqʼa at ex tuulbʼal Judeea, tan tzʼeqo ibʼ laʼ motx ebʼan veteʼ uvaʼs laʼ etilt ibʼanax vet u yaabʼla txumbʼal uvaʼ txumlebʼal laʼ tilixeʼ. 17Atz jaʼl ex, uvaʼ een at jaʼp ex viʼ etotzotz, tul jitoq laʼ kuʼl ex tetotzotz tiʼ tiqʼol eluʼl invaʼq kam etetz.

18Atz jaʼl ex, uvaʼ een ex t-vitz, tul yeʼl ex laʼ qʼaʼv ex tu tenam tiʼ tiqʼol invaʼq etoksaʼm.#Luk 17.31 19Atz ¡txumlebʼalxh inqʼa ixoq, inqʼa oybʼalte, atz tuchʼ inqʼa yaʼn ineʼ nik itxhʼuʼuneʼ, tuulbʼal inqʼa qʼij inqʼa yaʼn tuleʼ! 20Pet abʼivaq te quBʼaal Tiuxh uvaʼ jit koq tiqʼiil txun txheʼv, atz jit koq tuulbʼal viqʼiil u xeem qʼij saavado laʼ emuqvat etibʼ vatz u mam kʼaxkʼo. 21Tan mam kʼaxkʼo laʼ ibʼan tuulbʼal inqʼa qʼij inqʼae, val u kʼaxkʼo uvaʼ yeʼx paqxoʼq utxhi uvaʼs ixeʼt tzaan u qʼij saq. Tul yeʼl inpaqt laʼ ilix invaʼtoʼq kʼaxkʼo, eche uvaʼ laʼ ul tuulbʼal inqʼa qʼij, inqʼa yaʼn tuleʼ.#Deuteronoomio 12.1; Apokaliipsis 7.14 22Oqetz yeʼxhabʼil invaʼq laʼ yaʼsan u mam kʼaxkʼo uvaʼe, tul yeʼxhabʼil invaʼq xaol laʼ oleʼv tiʼ ikolt tibʼ. Pet tira laʼ motx kam s-kaqaayil. Pet tiʼ ikolt quBʼaal Tiuxh inqʼa chʼexel vet taʼn, tul laʼ iyaʼsa u mam kʼaxkʼo uvaʼe.

Uvaʼs talt quBʼaal Jesuus te inqʼa nikich itxhus tibʼ s-kʼatza, tiʼ uvaʼ yeʼ laʼ inima inqʼa txhulim yol uvaʼ laʼ alax tiʼ u tulebʼal Jesuus inpaqte

23Poro oq ech laʼ tal invaʼq u xaol sete s-eche: «Il u Kriisto ile uya,» atz «Il naq ile at tzitzi,» chaq eʼl ex, poro yeʼ laʼ enima u yol. 24Tan antxh laʼ txhejk inqʼa xaol sexoʼl uvaʼ laʼ tzʼeqon tzij. Tul: «Ine u Kriisto,» chaqe. Atz laʼ tal tibʼ s-qʼexsan tetz viyol quBʼaal Tiuxh. Tul laʼ motx ikʼutxhtxha inqʼa mam etxhlal, atz inqʼa mam yol tilix sevatz laʼ ibʼana tiʼ tetxhbʼul eteesal t-bʼey, ex inqʼa chʼexel vet ex taʼn quBʼaal Tiuxh. 25Poro ile qat inbʼaxabʼsal talax sete tiʼ inqʼa qʼij, inqʼa yaʼn tuleʼ. 26Tul yeʼ laʼ enima invaʼq u yol oq ech laʼ alax sete s-eche: «¡Il u Kriisto ile at tu txʼavaʼ uvaʼ yeʼl xaol jeqlel s-tuul!» atz «¡Ile at t-val u otzotz uvaʼ yeʼ kuxh naʼl tatineʼ!» chaq eʼl ex.

Poro yeʼ laʼ enima. 27Tan veqlelxh u vulebʼal laʼ ibʼana. Tan ech u tetxhlal laʼ ibʼan, eche vilitzʼun tzaan u kotzʼinebʼ xeʼ amlikaʼ, uvaʼ nik ilitzʼun tzaan tu tzaebʼ qʼij, tul nik topoon tu bʼenabʼ qʼij. Echetz u vulebʼale laʼ ibʼana, in, u Kʼaola uvaʼ qat bʼen s-alam aanima.#Luk 17.23-24

28Atz veqlelxh u vulebʼal. Tan ech u tetxhlal laʼ ibʼan eche tilix imolt tibʼ quʼs t-amlikaʼ tiʼ invaʼq kamnaʼq.#Luk 17.37

Uvaʼs talt quBʼaal Jesuus iqʼaʼv vatz u txʼavaʼ inpaqte

Kuxh 13.24-37; Luk 21.25-36; 17.25-36; 12.41-48

29Poro taʼn kuxh laʼ pal u mam kʼaxkʼo tuulbʼal inqʼa qʼij inqʼae, tul:

Laʼ tokbʼix ivatz u qʼij.

Atz yeʼ laʼ txiqun vet u ichʼ.

Tul laʼ motx el tzaan

inqʼa txʼumil vatz amlikaʼ.

Atz jankʼalxh uvaʼ

at vatz amlikaʼ

laʼ motx jalp tatin

s-kaqaayil

taʼn quBʼaal Tiuxh.#Isaiias 13.10; Eeksodo 32.7; Joeel 2.31; Apokaliipsis 6.12-13

30Yaʼne laʼ ilix vet tetxhlal u vulebʼal inpaqte vatz u amlikaʼ, in, u Kʼaola uvaʼ bʼen s-alam aanima. Tul mam oqʼel laʼ motx ibʼan jankʼal inqʼa xaol uvaʼ at t-inqʼa tenam tuulbʼal u vatz txʼavaʼ, uvaʼs laʼ tilt vul tuchʼ u viqleʼm, atz tuchʼ u nimla vatineʼ viʼ suʼtzʼ tu amlikaʼ.#Danieel 7.13; Luk 9.11; Apokaliipsis 1.7

31Tul laʼ intxhaq tzaan inqʼa inaanxel tiʼ toqʼsal val u trompeeta, sikʼlebʼ tetz inqʼa xaol. Tul laʼ imol tzaan inqʼa xaol, inqʼa chʼexel vet vaʼn, jankʼalxh inqʼa at tuulbʼal u vatz txʼavaʼ s-kaqaayil. 32Eloq kuxh etxumbʼal tiʼ tzeʼ u iigo. Tan etootzaqle uvaʼ, aʼ vet u saqʼie toq eloq, oq nik ixeʼt vet inqʼa ixaq tzeʼ chʼexpoq. 33Echatetze u vulebʼal, tan oq laʼ etil vet tutxh inqʼa yol, inqʼa nik val sete, tul echetz laʼ ibʼene sete uvaʼ, aʼ vet u vulebʼale nik inaqbʼixeʼ, eche taqʼbʼ invaʼq xaol vatz jubʼal. 34Tul nuqxh toq val sete uvaʼ: Yeʼxnaq kamoq inqʼa xaol, inqʼa itzʼlel t-inqʼa qʼij inqʼae, tul laʼ utxh inqʼa kam uvaʼ nik val sete. 35Tan jankʼalxh inqʼa inyol uvaʼ nik valeʼ, tan yeʼl paqul laʼ pali. Pet u vatz txʼavaʼ, atz u vatz amlikaʼ, tan laʼ pali.

Uvaʼs talt quBʼaal Jesuus te inqʼa nikich itxhus tibʼ s-kʼatza uvaʼ natxhnotxh tatin laʼ ibʼan tiʼ u tulebʼal quBʼaal Jesuus inpaqte

36Poro yeʼxhabʼil invaʼq ootzaqin tetz kam qʼij, atz kam oora u vulebʼal. Atz jitoq inqʼa aanxel uvaʼ een t-amlikaʼ ootzaqin tetz, [atz jitoq u Kʼaola.] Pet taʼn kuxh u quBʼaal Tiuxh ootzaqin tetz.

37Poro ech u vulebʼal inpaqte, in, u Kʼaola uvaʼ qat bʼen s-alam aanima, eche uvaʼ ibʼan tuulbʼal inqʼa qʼij uvaʼs atich Noee vatz u txʼavaʼ.#Jeenesis 6.5-8 38Tan tuulbʼal inqʼa qʼij uvaʼs yeʼnaqich uloq u mam jabʼal vatz u txʼavaʼ, tul yeʼxhkam nikich motx titzʼa inqʼa xaol. Tan eenich kuxh taanima tiʼ itxʼaʼoneʼ, atz tiʼ tukʼ aʼ, atz tiʼ tzʼaloʼm, atz tiʼ itzʼaloneʼ. Opoonetz vet vaʼl u qʼij, tul pal vet ok Noee tuul u vaarko. 39Poro yeʼl bʼeeq nikich ibʼen te inqʼa xaol tiʼ u mam jabʼal saʼich ul s-tiibʼa. Pet yaʼn ibʼen vet s-te uvaʼs tilt vet tul u mam jabʼal s-tiibʼa. Tul tira motx kam inqʼa xaol s-kaqaayil taʼn u aʼ.

Echatetz yeʼ laʼ ibʼene u vulebʼal te inqʼa xaol, inqʼa jit niman vetz, in, u Kʼaola uvaʼ qat bʼen s-alam aanima. Tan yekl vet u xaol tu kamchil vatz quBʼaal Tiuxh laʼ ibʼana.#Jeenesis 7.6-24; 10.22 40Tul kaʼvaʼl vinaq sebʼt taqʼonv t-vitz laʼ ibʼana uvaʼs laʼ vul inpaqte. Aʼetz laʼ bʼen s-viʼ u niman vetz. Pet uvaʼ yeʼ laʼ niman in, tan aʼetz uvaʼe laʼ kai.

41Atz kaʼvaʼl ixoq sebʼt icheʼeneʼ. Aʼetz laʼ bʼen s-viʼ u niman vetz. Pet uvaʼ yeʼ laʼ niman in, tan aʼetz uvaʼe, laʼ kai.

42Echetz xeevaqxh etibʼ, tan yeʼ etootzaqle kam oora laʼ ul in. 43Pet bʼanoq kuxh tutxh etaanima vatz u quBʼaal Tiuxh. Ech laʼ ebʼan eche invaʼq bʼaal otzotz uvaʼ xeemal u totzotz taʼn tiʼ yeʼ ipaloʼk elqʼom. Tan oq bʼanel tutxheʼ uvaʼs laʼ tul u elqʼom, tul bʼane saʼ koq ikuy ipaloʼk u elqʼom tu totzotz.#Luk 12.39-40 44Echetz nik valte sete uvaʼ natxhnotxhoq etatineʼ, tan kamal aʼ laʼ vuleʼ, in u Kʼaola uvaʼ bʼen s-alam aanima, uvaʼs yeʼxhkam kuxh nik motx etitzʼa.

Uvaʼs talt quBʼaal Jesuus te inqʼa nikich itxhus tibʼ s-kʼatza uvaʼ, aʼ laʼ ibʼan inqʼa bʼaʼnla txumbʼal

45Tan eche tatin vaʼq u aqʼonvil uvaʼ jikxh itxumbʼal, atz kʼuqlebʼxh kʼuul, aʼetz u aqʼonvile uvaʼ laʼ toksa ka u aj etz aqʼon tiʼ tilix u taqʼon, atz tiʼ ikʼuulal jolt inqʼa imol s-aqʼonvil. Tul laʼ bʼen u aj etz aqʼon s-naatxh. 46Chiibʼebʼaletzxh u aqʼonvil laʼ ibʼana oq sebʼt tiʼ ibʼanax u aqʼon uvaʼs laʼ tul u aj etz aqʼon. 47Nuqetzxh toq val sete uvaʼ: Aʼ vet u aqʼonvil uvaʼe laʼ oksal vet ka siqʼesal taʼn u aj etz aqʼon. Tul laʼ toksa vet kaj u aj etz aqʼon jankʼal inqʼa kamaq tetz s-kaqaayil tiqʼabʼ u aqʼonvil.

48Pet jitxh ikʼulel, oq ech laʼ tal u aqʼonvil t-taanima s-eche: «Maʼtetz vet naqe vinqʼesal. ¿Jatuebʼ kuxh laʼ ul vet naq?» oq chaq u aqʼonvil. 49Tul laʼ xeʼt vet tiʼ iqʼosox inqʼa imol s-aqʼonvil. Atz laʼ xeʼt tiʼ imolot tibʼ tuchʼ inqʼa qʼabʼareel. Atz laʼ txʼaʼon vet s-tuchʼ, tul laʼ xeʼt vet qʼabʼan. 50Laʼetz ul vet u aj etz aqʼon t-val u qʼij uvaʼ yeʼ tootzaql u aqʼonvil, atz tuulbʼal val u oora uvaʼ yeʼl s-kʼuul, 51tul laʼ ul kʼaxbʼisaloq vet u aqʼonvil taʼn u aj etz aqʼon. Tul laʼ aqʼax vet bʼen u aqʼonvil kʼatz inqʼa xaol uvaʼ bʼan vatz kuxh nik motx ibʼaneʼ, tal uvaʼ laʼ utxhk mam oqʼel. Tul tzitzi laʼ ikʼuxivat tibʼ tej viʼ txhoʼm.

Currently Selected:

Tio 24: ixlC

Highlight

Copy