Tio 25

Uvaʼs txumbʼalimal itxhusun quBʼaal Jesuus, tul tiqʼo tzaan laval inqʼa qʼopo ixvaak tuulbʼal viyol

1Tan eela vibʼant quBʼaal Tiuxh iqʼesalil xoʼl inqʼa xaol, eche uvaʼ ibʼan laval inqʼa qʼopo ixvaak, inqʼa iqʼomich itxiqubʼal taʼn, tiʼ itxʼebʼex tul val u vinaq uvaʼ toqnaʼqich tzʼalonoq.#Luk 12.35{*}#25.1 Luk 12.35. ¿Kam nik ikʼutxh u yol uvaʼ txumbʼalimal talt quBʼaal Jesuus tiʼ u aj tzʼaloʼm tuchʼ inqʼa qʼopo ixvaak? Aʼ nik ikʼutxh kam nik ibʼan quBʼaal Tiuxh tiʼ ibʼant iqʼesalil tzitza vatz txʼavaʼ. Tan yeʼ kuxh taqla laʼ tal quBʼaal Tiuxh u tulebʼal viKʼaol tzitza vatz txʼavaʼ tiʼ taqʼax kuʼ yol tinuqul tiibʼa inqʼa xaol s-kaqaayil. Echetz telaʼpune uvaʼ yeʼ kuxh taqla ul u aj tzʼaloʼm uvaʼ nik tal tzitza tu versiikulo. Atz aʼ vaʼt nik ikʼutxheʼ uvaʼ, taʼn inqʼa niman tetz Jesuus laʼ ikʼula, inqʼa nik txʼebʼon u tulebʼal quBʼaal Jesuus. Tan ech uvaʼe alel ka taʼn quBʼaal Tiuxh tiʼ telaʼpun. Aʼetz nik elkaʼpun oʼvaʼl inqʼa ixvaake inqʼa iqʼomich itxiqubʼal taʼn, atz iqʼomich iaseeite taʼn, tul bʼanich kuxh tutxheʼ uvaʼs tul u aj tzʼaloʼm. Atz aʼ vaʼt nik ikʼutxheʼ uvaʼ yeʼ laʼ ikʼul quBʼaal Jesuus inqʼa yeʼ nik txʼebʼon u tulebʼal quBʼaal Jesuus. Aʼetz nik elkaʼpun oʼvaʼl inqʼa ixvaake, inqʼa iqʼomich itxiqubʼal qʼaoq taʼn, pet yeʼl iaseeite iqʼomich taʼn, atz yeʼxhkam bʼanich tutxheʼ uvaʼs tul u aj tzʼaloʼm. Aʼetz kaʼoxvaʼl inqʼa yole nik kʼutxhun kam laʼ ibʼan quBʼaal Tiuxh tiʼ ibʼant viqʼesalil vatz txʼavaʼ. 2Oʼvaʼl inqʼa qʼopo ixvaak motx titzʼa tibʼ. Oʼvaʼt inqʼa yeʼ motx titzʼa tibʼ, 3tan taʼnxh tiqʼo inqʼa itxiqubʼal. Tul yeʼl iaseeite tetz vitxiqubʼal motx tiqʼo. 4Pet koq oʼvaʼt inqʼa ixvaak, inqʼa itzʼamichxh tibʼ, tan tiqʼoaq vitxiqubʼal, atz tiqʼoaq iaseeite tuulaq tatibʼal. 5Poro yeʼxh nikich tul u aj tzʼaloʼm. Tul qʼoon motx tzaj vet ivataʼm inqʼa ixvaak. Tul vataq veteʼ.

6Aʼetzxh vet itxhaqʼaan aqʼbʼal, tul abʼil val u qul uvaʼ ech tal s-eche: «¡Nal ul ekʼul vet u aj tzʼaloʼm, tan il vete tuleʼ!» xeʼt u qul.{*}#25.6 ¿Kam talax inqʼa yol ‹viqʼiil vimotxebʼal› nik tal tu versiikulo uvaʼa? Aʼ nik ex tal tiʼ u qʼij uvaʼs laʼ taqʼt kuʼ quBʼaal Tiuxh inqʼa yol tinuqul tiibʼa jankʼal inqʼa tenam s-kaqaayil.

7Yaʼne lakp vet inqʼa qʼopo ixvaak s-laval. Tul xeʼtaq vet tiʼ ibʼanax tutxh inqʼa itxiqubʼal. 8Tul ech motx tal oʼvaʼl inqʼa qʼopo ixvaak, inqʼa yeʼ itzʼamich tibʼ, te oʼvaʼt inqʼa itzʼamichxh tibʼ s-eche: «Aqʼvaq inbʼeeq quaseeite sexeʼ, tan il vet inqʼa qutxiqubʼal toq motx tzaoq,» xeʼtaqe.

9Yaʼne ech tal oʼvaʼt inqʼa qʼopo ixvaak, inqʼa itzʼamichxh tibʼ s-eche: «Yeʼle. Yeʼ laʼ qaqʼa. Tan toqat motxoqeʼe u qetz; atz toqat motxoqeʼe vetetz, kʼuxh toqxh qaqʼ etetz. Pet bʼaʼn uvaʼ aʼl bʼen eloqʼ etetz xeʼ inqʼa kʼayin tetz,» xeʼtaqe.#Tio 10.22

10Ayaʼletz s-tuul bʼen vet inqʼa qʼopo ixvaak tiʼ iloqʼox iaseeite, tul ul vet u aj tzʼaloʼm. Motxetz pal vet ok inqʼa ixvaak, inqʼa itzʼamichxh tibʼ, tiʼ u aj tzʼaloʼm, tul juptxʼ vet u otzotz. 11Bʼiiletzxh vet s-tuul, tul aqʼbʼ vet inqʼa ixvaak, inqʼa yeʼ itzʼamich tibʼ. Tul ech motx tal okaʼp s-eche: «¡Iqʼesal, iqʼesal, bʼan bʼaʼnil s-qe, jaqoʼk oʼ!» chichichaq kuxh vet inqʼa ixvaak.#Luk 13.25

12Yaʼne ech tal eluʼl u aj tzʼaloʼm s-eche: «Nuqxh toq val sete uvaʼ tira yeʼ vootzaql ex,» xeʼte. 13Echetz nik valte sete uvaʼ xeevaqxh etibʼ, tan yeʼ etootzaqle kam qʼiil, atz kam oora laʼ ul in inpaqte, in, u Kʼaola uvaʼ qat bʼen s-alam aanima.

Uvaʼs txumbʼalimal ibʼant quBʼaal Jesuus eela u tulebʼal tuchʼ val u vinaq uvaʼ taqʼ ka vipuaq te oxvaʼl inqʼa taqʼonvil

Luk 19.11-27

14Tan eela vibʼant quBʼaal Tiuxh iqʼesalil xoʼl inqʼa xaol, eche uvaʼ ibʼan val u vinaq uvaʼ bʼen s-naatxh. Pet bʼaxa motx isaʼ tzaan inqʼa taqʼonvil, yaʼne taqʼ ka vipuaq te inqʼa taqʼonvil.{*}#25.14 Eche u yol nik tal tzitza, tiʼ u vinaq uvaʼ bʼen s-naatxh, tan aʼ nik tal tiʼ vibʼen quBʼaal Jesuus t-amlikaʼ. Pet eche tiʼ oxvaʼl u taqʼonvil u vinaq, tan aʼ nik ibʼan eela tuchʼ inqʼa apoostol, atz tuchʼ inqʼa niman tetz Jesuus. Pet eche tiʼ inqʼa puaq uvaʼ ikʼul ka inqʼa aqʼonvil, tan aʼ nik ibʼan eela tuchʼ inqʼa iqleʼm uvaʼ taqʼ quBʼaal Jesuus te inqʼa iapoostol. Tan at iqleʼm taqʼ quBʼaal Jesuus xoʼl inqʼa niman tetz. Tul aʼetz uvaʼe, tetxhal laʼ ibʼan inqʼa niman tetz Jesuus tuchʼ u tiqleʼm tuulbʼal uvaʼ een quBʼaal Jesuus tu amlikaʼ. Echetze kaʼvaʼl inqʼa vinaq uvaʼ motx itxʼol isutxhqʼ tuchʼ u puaq uvaʼ aqʼax ka s-te, tan aʼetz nik ibʼan eela tuchʼ inqʼa niman tetz Jesuus, inqʼa nik motx itxʼol isutxhqʼ tuchʼ u aqʼon uvaʼ nik taqʼ viTiuxhil Tiuxh s-te. Pet vaʼt u vinaq, tan yeʼ itxʼol isutxhqʼ tuchʼ u puaq, aʼetz uvaʼe, nik ibʼan eela tuchʼ inqʼa niman tetz Jesuus, inqʼa yeʼ nik motx itxʼol isutxhqʼ tuchʼ kam u aqʼon uvaʼ nik taqʼ viTiuxhil Tiuxh s-te. 15Vaʼletz u taqʼonvil, laval toxkʼal mil (50,000) taqʼ ka s-te. Vaʼt u taqʼonvil, viinqil mil (20,000) taqʼ ka s-te. Atz vaʼt u taqʼonvil, laval mil (10,000) taqʼ ka s-te. Jankʼaletz u puaq uvaʼ laʼich itxʼol junun inqʼa aqʼonvil taqʼonvaleʼ, tul ayaʼletz inqʼae motx aqʼax kaj s-te.

Yaʼne bʼen vet u vinaq s-naatxh t-invaʼt tenam. 16Bʼenetz vet u aqʼonvil uvaʼ laval toxkʼal mil (50,000) aqʼax ka s-te, tul xeʼt vet aqʼonvoq tuchʼ u puaq. Tul lavatetz toxkʼal mil (50,000) itxʼak s-tuchʼ. 17Atz echatetz kuxh ibʼan u aqʼonvile uvaʼ aqʼax viinqil mil (20,000) s-te, tan viinqit mil (20,000) itxʼak s-tuchʼ. 18Petetz koq u aqʼonvil uvaʼ laval mil (10,000) aqʼax s-te, tan yeʼ aqʼonv tuchʼ u puaq. Pet aʼl ex ikʼot val u jul. Tul imuq vipuaq u aj etz puaq s-tuul.

19Eletz vet s-qʼij, tul ul vet u vinaq, u aj puaq, tiʼ tabʼil tatxhul tal vipuaq te inqʼa taqʼonvil. 20Aqʼbʼetz vet u aqʼonvil uvaʼ laval toxkʼal mil (50,000) aqʼax ka s-te, tul tikʼ iqʼomich vet lavat toxkʼal mil (50,000) tal u puaq taʼn. Tul ech tal u aqʼonvil te u aj puaq s-eche: «Inqʼesal, il laval toxkʼal mil (50,000) u puaq ila uvaʼ aaqʼ ka s-ve. Tul iletz lavat toxkʼal mil (50,000) uvaʼ qat intxʼak s-tuchʼ ila,» xeʼte.

21Yaʼne ech tal u aj puaq s-eche: «Bʼaʼnxh uvaʼ qat abʼana, tan axh invaʼl jikla aqʼonvil. Tan jikxh axh qat abʼan tiʼ ibʼanbʼel bʼiil u puaq uvaʼ vaqʼ ka see. Echetz s-tiʼile aʼl niim vet toq vaqʼ see. Pet avuk vet ul sinkʼatza tiʼ tilix u chiibʼichil uvaʼ toq inbʼaneʼ,» xeʼt u aj puaq.

22Yaʼne aqʼbʼ vet u aqʼonvil uvaʼ viinqil mil (20,000) aqʼax ka s-te. Tul ech tal te u aj puaq s-eche: «Inqʼesal, il viinqil mil (20,000) u puaq ila uvaʼ aaqʼ ka s-ve. Tul il viinqit mil (20,000) uvaʼ qat intxʼak s-tuchʼ ila,» xeʼte.

23Yaʼne ech tal u aj puaq s-eche: «Bʼaʼnxh uvaʼ qat abʼana, tan axh invaʼl jikla aqʼonvil. Tan jikxh axh qat abʼan tiʼ ibʼanbʼel bʼiil u puaq uvaʼ vaqʼ ka see. Echetz s-tiʼile aʼl niim vet toq vaqʼ see. Pet avuk vet ul sinkʼatza tiʼ tilix u chiibʼichil uvaʼ toq inbʼaneʼ,» xeʼt u aj puaq.

24Yaʼne aqʼbʼ vet u aqʼonvil uvaʼ laval mil (10,000) aqʼax ka s-te. Tul ech tal te u aj puaq s-eche: «Inqʼesal, vootzaqle uvaʼ mij kuybʼal saxeʼ. Tan nik kuxh amol vet ivatz inqʼa txhiko kʼuxh jit axh nik aqʼonvan. Tan ajt kuxh nik ex eeqʼo vet uvaʼ vaʼlen nik bʼanon tutxheʼ. 25Echetz inxoʼve see, tul ex inmuq vapuaq jaqʼ txʼavaʼ. Pet iletz vapuaq ila,» xeʼte.

26Yaʼne ech tal u aj puaq s-eche: «¡Yaabʼla aqʼonvil! ¡Tiraetz kol kuxh yeʼ nik tel avaanima s-tiʼ! Tan oq ootzaqle uvaʼ nik inmol ivatz inqʼa txhiko uvaʼ jit in nik aqʼonvan, atz oq ootzaqle uvaʼ ajt kuxh nik ex viqʼo vet uvaʼ vaʼlen nik bʼanon tutxheʼ, 27tul aaletz koq ex aaqʼ ka vinpuaq tu kʼambʼal puaq. Ajtetz qat ul vet in, tul qat ul viqʼo vet vinpuaq tuchʼ tal,» xeʼt u aj puaq.

28Yaʼne ech tal u aj puaq te jolt inqʼa taqʼonvil s-eche: «Majvaq el laval mil (10,000) vinpuaq te u aqʼonvil uvaʼe. Tul antxh etaqʼvat te uvaʼ oʼkʼalx vet mil (100,000) tetz ati. 29Tan jaʼl uvaʼ laʼ txhabʼan ibʼanbʼel uvaʼ laʼ aqʼax s-te, tul aʼl tel laʼ taqʼax s-te. Pet jaʼl uvaʼ yeʼ laʼ txhabʼan ibʼanbʼel uvaʼ laʼ aqʼax s-te, tul aaletz laʼ imaax s-te. 30Pet palsavaq el u aqʼonvil uvaʼ yeʼxhkam isaʼ. Tul aqʼvaq elaʼp tu mam tokto, tal uvaʼ laʼ utxhk mam oqʼel. Tul tzitzi laʼ ikʼuxivat tibʼ tej viʼ txhoʼm,» xeʼt u vinaq u aj puaq.

Uvaʼs laʼ ul taqʼt kuʼ quBʼaal Jesuus yol tinuqul tiʼ inqʼa tenam s-kaqaayil

31Echatetz laʼ ibʼane uvaʼs laʼ vul inpaqte tuchʼ u nimla vatineʼ, atz tuchʼ jankʼal inqʼa inaanxel, in, u Kʼaola uvaʼ qat bʼen s-alam aanima, tan laʼ kʼuqeʼv in t-vinkʼuqeʼvbʼal tetz iqleʼm tu nimla tatineʼ.#Tio 19.28 32Yaʼne laʼ molox tzaan jankʼal inqʼa tenam sinvatz. Tul junun laʼ veesat vet el inqʼa xaol, inqʼa laʼ qeon in, xoʼl inqʼa yeʼ laʼ qeon in. Tan ech laʼ inbʼan eche nik ibʼan u xeen karneʼl tiʼ teesal el inqʼa karneʼl xoʼl inqʼa tzentun. 33Tan jaʼletz u xaol uvaʼ laʼ qeon in, tul aʼ laʼ vaqʼvat tinsebʼal, eche nik ibʼan u xeen karneʼl tiʼ taqʼt inqʼa karneʼl tisebʼal. Pet inqʼa xaol uvaʼ yeʼ laʼ qeon in, tan een laʼ vaqʼvat tinmax, eche nik ibʼan u xeen karneʼl tiʼ taqʼt inqʼa tzentun timax.

34Yaʼne laʼ yolon in te inqʼa xaol uvaʼ tinsebʼal, in u mam iqʼesal. Tul ech laʼ motx val s-te s-eche: «Etulvaq sinkʼatza, ex inqʼa tetz vinBʼaal uvaʼ chiibʼebʼalxh vet ex. Tul kʼulvaq vet u mam bʼaʼnil setetz, u mam bʼaʼnil uvaʼ bʼanelxh vet tutxh setetz taʼn vinBʼaal uvaʼs ixeʼt tzaan u qʼij saq.{*}#25.34 ¿Jaʼletze u mam iqʼesal laʼ yolon xoʼl inqʼa xaol nik tal tzitza? QuBʼaal Jesuuse u mam iqʼesal. Aʼ nik tal, tiʼ uvaʼs laʼ tul quBʼaal Jesuus inpaqte tiʼ taqʼax kuʼ yol tinuqul tiibʼa inqʼa xaol s-kaqaayil. Tan aʼ laʼ ibʼanvat t-vimotxtebʼal vet u qʼij saq vatz u txʼavaʼ. 35Tan etaqʼ intxʼix uvaʼs kamyichxh in t-vaʼy. Atz etaqʼ vajaʼ uvaʼs kamyichxh in t-tzaqa tziʼil. Atz yeʼxh tal laʼich vatk in, tul etaqʼ invatbʼal. 36Atz yeʼlich voksaʼm, tul etaqʼ voksaʼm. Atz oybʼalich in, tul ex esoli in. Atz atich kuʼ in t-tzeʼ, tul ex ekʼuula in,» chaq in te inqʼa xaol uvaʼ tinsebʼal.

37Yaʼne ech laʼ motx tal inqʼa jikla txhaq xaol s-eche: «¿Jatutetzebʼa, inBʼaal, uvaʼ kamyich axh t-vaʼy? Tul ¿jatutetz qaqʼ atxʼix; atz qaqʼ avajaʼ, uvaʼ kamyichxh axh t-tzaqa tziʼil? 38Atz ¿jatutetz qaqʼ avatbʼal uvaʼs yeʼxh tal laʼich vatk axh? Atz ¿jatutetz qaqʼ avoksaʼm uvaʼs yeʼlich avoksaʼm? 39Atz ¿jatutetz qusoli axh uvaʼs atich kuʼ axh t-yaabʼil; atzoq ex qil axh uvaʼs atich kuʼ axh t-tzeʼ nik aaleʼ?» chaq inqʼa xaol s-ve.

40Yaʼne laʼ intzaqʼbʼe inqʼa xaol uvaʼ tinsebʼal, in u mam iqʼesal. Tul ech laʼ val s-te s-eche: «Nuqxh toq val sete: Jankʼalxh u lotxhoʼm uvaʼ qat motx ebʼan te invaʼq inqʼa xaol inqʼae, poro s-vejetze qat motx ebʼanvat,» chaq in.

41Pet ech laʼ val te inqʼa xaol, inqʼa een tinmax, s-eche: «Paloqvaq el ex sinvatz, ex inqʼa palsanaq yol. Tul yekl ex tu xamal uvaʼ yeʼl iyaʼebʼal imotxebʼal, u xamal uvaʼ bʼanel vet tutxh s-tetz u diaavlo tuchʼ inqʼa iaanxel. 42Tan kamyichxh in t-vaʼy, tul yeʼ etaqʼ intxʼix. Atz kamyichxh in t-tzaqa tziʼil, tul yeʼ etaqʼ vajaʼ. 43Atz yeʼxh tal laʼich vatk in, tul yeʼ etaqʼ invatbʼal. Atz yeʼlich voksaʼm, tul yeʼ etaqʼ voksaʼm. Atz atich kuʼ in t-yaabʼil, tul yeʼ ex esoli in. Atz atich kuʼ in t-tzeʼ, tul yeʼ ex ekʼuula in,» chaq in.

44Yaʼne ech laʼ motx tal inqʼa xaol s-ve, inqʼa een tinmax, s-eche: «InBʼaal, ¿jatut qil axh, uvaʼ kamyich axh t-vaʼy, tul yeʼ qaqʼ atxʼix? Atzoq ¿kamyich axh t-tzaqa tziʼil, tul yeʼ qaqʼ avajaʼ? Atz ¿jatut qil axh, uvaʼ nikich kuxh axaoneʼ, tul yeʼlich avatbʼal? ¿Atzoq yeʼlich avoksaʼm, atzoq oybʼalich axh, atzoq atich kuʼ axh t-tzeʼ, tul yeʼ qulotxh axh?» chaq inqʼa xaol s-ve.

45Yaʼne ech laʼ val te inqʼa xaol, inqʼa tinmax, s-eche: «Toq val sete, oq yeʼ qat motx ebʼan u bʼaʼnil te invaʼq inqʼa xaol inqʼae, poro s-vejetze yeʼ qat motx ebʼanvat,» chaq in te inqʼa xaol. 46Echetz yekl vet inqʼa xaol, inqʼa yeʼ laʼ motx qeon in, tu mam kʼaxkʼo uvaʼ yeʼl iyaʼebʼal imotxebʼal. Pet inqʼa xaol, inqʼa laʼ qeon in, tan yeʼl iyaʼebʼal imotxebʼal qʼij isaq, —xeʼt Jesuus te inqʼa nikich itxhus tibʼ s-kʼatza.

Currently Selected:

Tio 25: ixlC

Highlight

Copy