Luk 21
21
Uvaʼs taqʼt val u txakay ixoq kaʼvaʼl vatz ipuaq vatz quBʼaal Tiuxh
Kuxh 12.41-44
1Nikich kuxh isaqin Jesuus tiʼ taqʼt ka inqʼa xaol vipuaq uvaʼ nikich pal toya ka tuul u molbʼal puaq tu tostiuxh. Tul til Jesuus taqʼt ka inqʼa txʼiol iqʼij vipuaq. 2Atz tilat Jesuus taqʼt valatz txakay ixoq kaʼvaʼl vatz isen tu molbʼal puaq. Tul meebʼaʼ kuxh tatineʼ.
3Yaʼne ech tal vet Jesuus te inqʼa nikich itxhus tibʼ s-kʼatza s-eche: —Toq val sete, eche u txakay ixoq vatziʼ meebʼaʼxhtuʼ, tan sibʼxhte uvaʼ qat pal taqʼ ka viʼ jolt inqʼa qat motx pal aqʼon ka. 4Tan jankʼal inqʼa xaol uvaʼ sibʼxh puaq qat pal taqʼ ka, tan aʼ kuxh nik pal taqʼ ka jankʼal u puaq s-oya uvaʼ nik motx iyalan s-xeʼ. Pet koq u txakay ixoq uvaʼ meebʼaʼxhtuʼ, tan taʼnxh vatz isene uvaʼ qat pal taqʼ ka. Vatzetz quBʼaal Tiuxh tan, aʼetz uvaʼe, niimxh qat taqʼ viʼ inqʼa txʼiol iqʼij. Tan aʼ qat taqʼ uvaʼ saʼ ibʼanbʼe s-loqʼbʼal tetxhbʼubʼal, —xeʼt Jesuus te inqʼa nikich itxhus tibʼ s-kʼatza.
Uvaʼs talt quBʼaal Jesuus uvaʼ tetxhal laʼich jinpul el u tostiuxh
Tio 24.1-2; Kuxh 13.1-2
5Sebʼtichetz iyolt kaʼl inqʼa nikich itxhus tibʼ kʼatz Jesuus uvaʼ josqʼilichxh inqʼa sivan, inqʼa atich ok tiʼ inqʼa otzotz tuulbʼal u tostiuxh. Atz josqʼilichxh inqʼa viqbʼal uvaʼ motx toya inqʼa xaol.
6Tul ech tal Jesuus s-eche: —Jankʼal eche inqʼa sivan, inqʼa atoʼk tiʼ inqʼa otzotz tuulbʼal u tostiuxh uvaʼ nik motx etil s-txheel, tan topoon invaʼl qʼij uvaʼ tetxhal laʼ motx jinpeʼl. Tul tira yeʼl invaʼtoʼq sivan laʼ kaj tiibʼa imol, —xeʼt Jesuus.{*}#21.6 Kʼuxh ‹sivan› chich u versiikulo uvaʼa, pet aʼ nik tal inqʼa mamaʼ txhaq sivan uvaʼ nikich isejex tiʼ, tiʼ ibʼanax tutxheʼ taʼn inqʼa tij imam Israeel. Tul nikich motx taqʼ bʼen s-nimla sivan tiʼ ibʼen s-kaj xojbʼal, eche inqʼa vlook uvaʼ nik qil s-txheel. Aloq nikich motx taqʼ bʼen s-nimla sivan uvaʼ kajvaʼl bʼaara toq, tul vaʼlich bʼaara tuchʼ nikʼa ivatz, atz oxvaʼl bʼaara atil jaʼ. Tan nikich ibʼan s-kaj xojbʼal echetz jikxh nikich ikʼult tibʼe inqʼa sivan s-vatzaq. Tan jit tira tiila sivanich koqxhtuʼ; pet poq sivanich kuxhtuʼ.
Uvaʼs talt quBʼaal Jesuus kam laʼ utxhi uvaʼs yeʼnaq uloq u kʼaxkʼo tiibʼa u tenam Jerusaleen
Tio 24.3-28; Kuxh 13.3-23
7Tul ech tal inqʼa nikich itxhus tibʼ kʼatz Jesuus s-eche: —Txhusul qetz, ¿jatuetz laʼ ibʼan inqʼa nik aaleʼ? Atz ¿kam tetxhlal laʼ qil s-bʼaxa uvaʼs toqnaʼq utxhoq veteʼ? —xeʼtaq te Jesuus.
8Tul ech tal Jesuus s-eche: —Yeʼxh jankʼat qʼij, tul toq utxhoq. Pet xeevaqxh etibʼ, tul yeʼxhal kuxh laʼ eesan ex t-bʼey. Tan at inqʼa laʼ uli uvaʼ laʼ kʼamon vinbʼij. Tul ech laʼ motx tal junun s-eche: «Ine u Kriisto,» chaq tul junun. Tul echat laʼ motx tal s-eche: «Aʼ vet u qʼije uvaʼ toq ibʼan vet quBʼaal Tiuxh iqʼesalil,» chaq tul junun. Pet yeʼ laʼ bʼen eviʼ, tiʼ uvaʼ laʼ motx ul taleʼ.
9Atz kʼuxh laʼ motx etabʼi tutxh mamala txhʼaʼo, atz kʼuxh laʼ etabʼi ilakt tibʼ xaol, tul yeʼl ex, laʼ motx xoʼv ex. Tan echxh laʼ ibʼane. Poro yeʼxnaqetz opoonnaʼqle viqʼiil vimotxebʼal. 10Atz laʼ itxhʼaʼoi tibʼ inqʼa mam tenam s-vatzaq. Tul laʼat motx itxhʼaʼoi tibʼ inqʼa mam iqʼesal s-vatzaqil. 11Atz talaq kuxh vet tenam laʼ motx palk mam kabʼnaano tuchʼ mamala vaʼy, atz tuchʼ mamala yaabʼil. Tul mam xoʼval laʼ motx ibʼan vet inqʼa tenam. Tan mamala kaebʼal aanima laʼ ikʼutxh tibʼ vatz amlikaʼ.
12Yeʼnaʼqetz uloq inqʼa kʼaxkʼo inqʼae, tul yeʼ kuxh laʼ kaj utxhchil setiʼ, tiʼ ekʼaxbʼisaleʼ. Atz laʼ txeyp ex tiʼ innimaleʼ. Tul laʼ oksal ex vatz inqʼa aqʼol kuʼ yol tinuqul t-inqʼa kʼulbʼal ibʼ. Tul laʼ aqʼax jaʼ ex t-tzeʼ. Atz laʼ oksal ex vatz inqʼa iqʼesal inqʼa mam tenam, atz vatz inqʼa mam iqʼesal. Tiʼetz kuxh uvaʼ, ex niman vetz, tul laʼ motx pal ex t-inqʼa itzaʼlal. 13Aloq tzitzietz laʼ utxhk vet etalt inqʼa bʼaʼnla txhaq yol s-viʼ te inqʼa iqʼesal. 14Pet yeʼl ex laʼ el etaanima tiʼ kam laʼ etal tiʼ ekolt etibʼ vatz inqʼa iqʼesal, 15tan in laʼ aqʼon etxumbʼal tiʼ kam uvaʼ laʼ etala. Echetz yeʼ laʼ toleʼve inqʼa nik itxhiʼan setiʼ, tiʼ emaqaxeʼ. Atz yeʼ laʼ txhej vet iyol setiʼ. 16Tul laʼ oksal ex tiqʼabʼ inqʼa laʼ txhiʼan setiʼ, tiʼ uvaʼ, ex niman vetz. Tul laʼ yatzʼax el ex. Tan antxh etxutx ebʼaal laʼ oksan ex tiqʼabʼ, atzoq antxh etatzik atzoq etitzʼin, atz ant kuxh vaʼtoʼq emol, atz kʼuxh etamiʼk laʼ oksan ok ex tiqʼabʼ. 17Tul mamala xaol laʼ txhiʼan setiʼ. Poro, tiʼ uvaʼ, ex niman vetz, tul laʼ motx pal ex t-inqʼa itzaʼlal. 18Poro yeʼ laʼ motx oleʼv tiʼ isotzeʼl u qʼij esaq kʼatz quBʼaal Tiuxh. 19Pet jaʼl ex, uvaʼ laʼ enuq txakbʼa etibʼ sinkʼatza, tul aʼetz ibʼaʼnil toq etileʼ, uvaʼ yeʼl iyaʼebʼal imotxebʼal qʼij isaq vetaanxelal toq ibʼaneʼ.
Uvaʼs talt quBʼaal Jesuus te inqʼa nikich itxhus tibʼ s-kʼatza tiʼ kam inqʼa laʼ motx utxhi tuulbʼal uvaʼs yeʼnaq uloq quBʼaal Jesuus inpaqte vatz u txʼavaʼ
20Taʼnetz kuxh vet laʼ etil isutil tiʼ u tenam Jerusaleen taʼn sol, tul nal kuxh laʼ ibʼen sete uvaʼ opoony vet viqʼiil isotzeʼl u tenam. 21Jaʼletz ex, uvaʼ een ex tuulbʼal Judeea, tul nal kuxh laʼ bʼen emuq etibʼ t-inqʼa vitz. Atz kʼuxh ex, inqʼa at ex tu tenam Jerusaleen, tan laʼat eleʼl ex t-vetenam. Atz jaʼl ex inqʼa eenaq ex t-vitz, yeʼl ex laʼ motx qʼaʼvoʼk ex tu Jerusaleen tiʼ tiqʼol invaʼq kam etetz. 22Tan aʼetz vet inqʼa kʼaxkʼoe uvaʼ laʼ ikuy quBʼaal Tiuxh ibʼanax tiibʼa u tenam tiʼ telaʼpun kam inqʼa tzʼibʼamal ka. 23¡Txumlebʼaletzxh ivatz inqʼa ixoq, inqʼa oybʼalte, atz tuchʼ inqʼa yaʼn ineʼ nik itxhʼuʼuneʼ, tan yeʼ laʼ motx itxʼol itzʼeqt tibʼ tuulbʼal inqʼa qʼij inqʼae! Tan mam txumlebʼal laʼ ibʼan vatz u txʼavaʼ. Tul tetxhal kuxh laʼ ul u kʼaxkʼo tiibʼa u tenam Jerusaleen. 24Tul mamala xaol laʼ yatzʼax tuchʼ espaada. Atz mamala xaol laʼ iqʼol s-pereexhoil t-joltaq tenam taʼn inqʼa jit tij imam Israeel. Atz laʼ ul kʼaxbʼisaloq inqʼa tij imam Israeel taʼn inqʼa jit tij imam Israeel. Pet laʼ nal tal vet quBʼaal Tiuxh itzoqp ibʼant inqʼa jit tij imam Israeel iqʼesalil tiibʼa inqʼa tij imam Israeel, yaʼne laʼ yaʼ u kʼaxkʼo.
Uvaʼs talt quBʼaal Jesuus iqʼaʼv vatz u txʼavaʼ inpaqte
Tio 24.29-35, 42-44; Kuxh 13.24-37
25Tul kaebʼal aanima laʼ tilix vet u qʼij, atz u ichʼ, atz inqʼa txʼumil. Tul aʼ inqʼa etxhlale uvaʼ mam vet txumlebʼal laʼ palk inqʼa tenam vatz u txʼavaʼ. Tul tira laʼ motx sotz vet ikʼuul inqʼa tenam t-mam xoʼval taʼn ivulun ibʼalqʼut eluʼl tibʼ u maar. 26Tul tira laʼ uql inqʼa xaol taʼn mam xoʼval, atz taʼn inqʼa yol uvaʼ laʼ motx ul vet vatz u txʼavaʼ. Tan jankʼalxh uvaʼ at vatz amlikaʼ laʼ motx xeʼt vet tiʼnoq s-kaqaayil.
27Yaʼnetze laʼ motx til inqʼa tenam vul inpaqte viʼ suʼtzʼ tu amlikaʼ tuchʼ u nimla vatineʼ, atz tuchʼ u viqleʼm, in, u Kʼaola uvaʼ qat bʼen s-alam aanima. 28Taʼnetz laʼ etil vet ixeʼt inqʼa yol, inqʼa nik motx val sete, tul laʼ motx ebʼan tial. Atz laʼ ekʼuqbʼa ekʼuul tiʼ quBʼaal Tiuxh. Tan aʼetz vet u qʼije naqbʼixiya uvaʼ laʼ ichit ex quBʼaal Tiuxh vatz inqʼa itzaʼlal tzitza vatz txʼavaʼ, —xeʼt Jesuus.
29Yaʼne txumbʼalimal talt Jesuus vaʼt u txhusbʼal tiʼ u tulebʼal inpaqte. Tul ech tal Jesuus s-eche: —Bʼenoq kuxh sete tiʼ tzeʼ u iigo, atz tiʼ inqʼa tzeʼ s-kaqaayil. 30Tan etootzaqle uvaʼ, aʼ vet u saqʼie toq eloq oq uvaʼ nik ixeʼt vet inqʼa ixaq tzeʼ chʼexpoq. 31Echatetz laʼ ibʼane u vulebʼal inpaqte. Tan oq laʼ etil vet tutxh inqʼa yol, inqʼa nik val sete, echetz laʼ ibʼen vete sete uvaʼ naql vet vibʼant quBʼaal Tiuxh iqʼesalil tiibʼa inqʼa tenam s-kaqaayil. 32Pet nuqxh toq val sete uvaʼ: Yeʼnaq kamoq ex sekaqaayil, ex, inqʼa itzʼlel ex s-txheel, uvaʼs laʼ motx ibʼant jankʼal inqʼa yol, inqʼa nik val sete s-txheel. 33Tan jankʼalxh inqʼa inyol uvaʼ nik valeʼ, tan tetxhal kuxh laʼ elaʼpun. Pet u vatz txʼavaʼ, atz u vatz amlikaʼ, tan tetxhal laʼ pali, atz laʼ jalpi.#Apokaliipsis 21.1
34Pet xeevaqxh etibʼ. Tul yeʼ laʼ ekuy tok jiqʼal tetaanima. Atz jitoq laʼ bʼen etaanima tiʼ qʼabʼaʼm. Atz jitoq laʼ el etaanima tiʼ titzʼal kam inqʼa nik tutxh tzitza vatz u txʼavaʼ. Tul jitetz kuxh aʼ, uvaʼe, laʼ bʼen ekʼuul s-tiʼ. Tan laʼ opoon vaʼl qʼij uvaʼ yeʼ kuxh taqla laʼ ul in inpaqte. 35Tul yeʼat kuxh taqla laʼ ul in tiibʼa jankʼal inqʼa tenam vatz txʼavaʼ, eche ikuʼ iqvil tiviʼ invaʼq txoo laʼ vul s-tiibʼa.
36Echetz nik valte sete uvaʼ xeevaqxh etibʼ tiʼ etxʼeʼbʼoneʼ. Tul natxhvaq Tiuxh, tiʼ uvaʼ tij koq ekʼuul vatz inqʼa mam kʼaxkʼo uvaʼ toq uloq. Echetz bʼaʼn toq etatin sinvatz laʼ ibʼana uvaʼs toq vul inpaqte, in, u Kʼaola uvaʼ qat bʼen in s-alam aanima, —xeʼt Jesuus.
37Tuulbʼaletz inqʼa qʼij inqʼae, tan qʼiil nikich itxhusun Jesuus tu nimla atibʼal tuulbʼal u tostiuxh tu tenam Jerusaleen. Pet tu qʼeqxeʼm, tan een nikich bʼenk Jesuus tu vitz Inqʼa Oliivo tuchʼ inqʼa nikich itxhus tibʼ s-kʼatza. 38Tul mamala xaol nikich tul jun qʼalaʼm tu nimla atibʼal tuulbʼal u tostiuxh tiʼ tabʼil inqʼa yol uvaʼ nikich tal Jesuus.
Currently Selected:
Luk 21: ixlC
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
