Mákò 15

À mú Yèésù lɔ fú Kpìlátò

(Màtéwò 27:1-2,11-14; Lúkà 23:1-5; Yòhánà 18:28-38)

1Ilɛ̀ má, náàwúrɔ̀ kùtùkùtù, tsí onùgbó-atsɛbɔ-Ɔ̀ɖáyé† ŋa kpàɖé bá onùgbó-ìlú ŋa, akɔ́nɛ nɛ́kpa-Ɔ̀ɖáyé† ŋa òŋu ɔ̀nyà-àtíbɔ̀ ŋa yèé wà nɛ́gbɛ́-àkpɛ̀dzɔ́-ɔma-Ìyúɖà ŋa†#á, tsí à dzokó si ńǹtá-Yèésù. Tsí à múu, tsí ɖèé, tsí gbɛ̃́ɛ̃ lɔ káà bɔwɔ́-Kpìlátò†, kɔ̀màɖã́ã̀-ìlú#ɛ́.

2Ńbɛ̀ɛ́, Kpìlátò wà bèrèé ní: Òŋu ní dzɛ́ ólú-ɔma-Ìyúɖà† ŋa#áà?

Tsí Yèésù ní: Nárũ tòŋu ká‐ɛ̀ ní ó bɔ́ ti#ɛ́.

3Onùgbó-atsɛbɔ-Ɔ̀ɖáyé ŋa wà mú afɔ̀ kpíkpɔ̀ kpíkpɔ̀ báa, 4tsí Kpìlátò sɛ̃̀ wà wí fúu ró ní: Kàkó wíìnyɛ̀-kã̀ã̀? Ó ɖi, kò wà rí kíbí à wà mú afɔ̀ ŋa báa tó#ɛ́ɛ̀?

5Tsí Yèésù kò dzɔ́ŋù-kã̀ kpókpó títí Kpìlátò kí dzã̀maa.

Kpìlátò nya ɔwɔ́ nára-Yèésù ní ká kpaá nóòkú

(Màtéwò 27:15-26; Lúkà 23:13-25; Yòhánà 18:38–19:15)

6Ńǹwèrè nyɛ̀ŋɛ̀#ɛ́, ɔma-Ìyúɖà† ŋa, bí à bàkó dzɛ ɔɖɔ̃́-Àɖádzɔ̀ɔ́† kã̀kã̀#á, kɔ̀màɖã́ã̀-ìlú#ɛ́ náa tsí abèŋà-kã̀ nɛ́ɛ̀ŋà fú ŋa. Ɛnɛ yèé ìlú#ɛ́ wà bèrè ní kó tsí#ɛ́ ní náa tsí#ɛ́. 7Náàsòkò nyɛ̀ŋɛ̀#ɛ́, ɔ̀nyà-kã̀ wà nɛ́ɛ̀ŋà si, tsí à náa kpèé ní Bàràbá. Bàràbá#á wà nɛ́gbɛ́-kã̀, tsí ɛgbɛ́#ɛ́ sɔ́ ɔ̀nyà-ìlú-ŋa ní ká kɔ afɔ̀-ìdzɔba títí à kpa ɔ̀nyà-kã̀ nóòkú.

8Ńbɛ̀ɛ́, ìlú#ɛ́ kpó ǹɖe lɔ ńlé-Kpìlátò†, tsí káà bèrèé ní kó tsí ɔ̀nyà-kã̀ fú àŋa kíbí náa ti tseé#ɛ́. 9Tsí ó wà bèrè ŋá ní: À wà wò ní òŋu kó kɔ ólú-ɔma-Ìyúɖà ŋa dzɔ̀ɔ́ fú ŋaà?

10Iŋɛ́ yèé tse tsí ó bèrè ŋá bɛ́ɛ̀#ɛ́, ó rí mà rere ní onùgbó-atsɛbɔ-Ɔ̀ɖáyé† ŋa wà bínɔ́-Yèésù, ńnɛ̀ ní à múu wáa bɔwɔ́-òŋu#ɛ́. 11Ńbɛ̀ɛ́, onùgbó-atsɛbɔ-Ɔ̀ɖáyé ŋa wà téle ìlú#ɛ́ kpó ní ká fɔ̀ ní kó kɔ Bàràbá dzɔ̀ɔ́ fú àŋa.

12Tsí Kpìlátò sɛ̃̀ gba afɔ̀ ró, tsí wà bèrè ŋá ní: Tsí ɛnɛ yèé àŋa ká-ŋa, à wà kpè ní ólú-ɔma-Ìyúɖà ŋa#á fee, kí à wà wò ní òŋu kó tse báa?

13Tsí à ɖúgbe fúu ní: Kã̀ã́ si ńǹtá-egi-ìɖáàgàlàdzà†!

14Tsí ó sɛ̃̀ wà bèrè ŋá ró ní: Íbàɖí mɛ̀ɛ́ ó tse ná?

Tsí à ɖúgbe kũkũ máa ró ní: Kã̀ã́ si ńǹtá-egi-ìɖáàgàlàdzà!

15Ńbɛ̀ɛ́, Kpìlátò wà wo kó tse, tsí kó dzɔdzú-ŋa, tsí ó kɔ Bàràbá dzɔ̀ɔ́ fú ŋa. Tsí ó fɔ̀, tsí à tsɔ Yèésù náàtàmì. Kíbí à tsɔ̀ɔ́ náàtàmì tã́#á, ó múu fú sɔ́dzà ŋa ní ká káà kã̀ã́ si ńǹtá-egi-ìɖáàgàlàdzà.

Sɔ́dzà ŋa wà mú Yèésù tsiwɛwɛ́

(Màtéwò 27:27-31; Yòhánà 19:2-3)

16Tsí sɔ́dzà ŋa gbɛ̃́ɛ̃ lɔ ńkpàtá-ilé-kɔ̀màɖã́ã̀. À malé, tsí ń sɔgbà wérí kpàtá#á kpó. Kíbí à tó ńkpàtá#á, sɔ́dzà ŋa#á kpe ɛgbɛ́-sɔ́dzà ŋa#á kpó lɔ bɛ̀. 17Tsí à wà múu tsiwɛwɛ́, tsí wà furuú. À mú ìwɔ̀ra kpikpa-kã̀ wɔ̀ fúu kíbí ólú ŋa náa wɔ̀ɔ́#ɛ́. Tsí à mú akpá-egi-agúgú kã̀ŋa gbo, tsí ń ŋɔ òkúkú-kã̀ kíbí òkúkú-ólú ŋa bɛ́, tsí ń ɖé fúu. 18Tsí à wà kíi ní: Ólú-ɔma-Ìyúɖà† ŋa, kɔ́ɔkpɔ! Kɔ́ɔkpɔ títí!

19Tsí à kɛ́ ɔ̀kpá-ìtɛ̀lɛ̀-kã̀, tsí wà ń kpaá néwo. Tsí à wà titɔ́ ɖà bòó, tsí wà kálɛ̀ nábɛ́‐ɛ̀, tsí wà mú erí kãlɛ̀ fúu. 20Kíbí à múu tsiwɛwɛ́ bɛ́ɛ̀ tã́#á, à bɔ́ ìwɔ̀ra kpikpa#á ǹɖe nára‐ɛ̀, tsí kɛ́ ìwɔ̀ra tòŋu ká‐ɛ̀ ŋa wɔ̀ fúu, tsí à gbɛ̃́ɛ̃ fùɖá, tsí ká káà kã̀ã́ si ńǹtá-egi-ìɖáàgàlàdzà†.

À kã Yèésù si ńǹtá-egi-ìɖáàgàlàdzà

(Màtéwò 27:32-44; Lúkà 23:26-43; Yòhánà 19:16-27)

21Kíbí à làkóò#ɛ́, à káà kpàɖé ɔ̀nyà-kã̀ nɔ́ɔ̀nà, tsí ó bɔ̀ ti nóko bàa. Tsí à múu, tsí kɛ́ egi-ìɖáàgàlàdzà†-Yèésù fúu ní kó rùú wá ká lɔ. Ɔma-ìlú-Sìrɛ́nì ŋa ní ó dzɛ́#ɛ́, tsí à náa kpèé ní Sìmɔ́nì. Ó dzɛ́ boba-Àlɛ̀kìsã́nɖè òŋu Rùfú. 22Tsí à gbɛ̃́ Yèésù lɔ káà tó ńǹɖì-kã̀. À náa kpe ibɛ̀ ní Gɔ̀gɔ̀ta. Òkpì‐ɛ̀ ní dzɛ́: Ìɖì-korogbo-éwo#ɛ́. 23Kíbí à tó ńbɛ̀#ɛ́, à mú ewé-kã̀ yèé à náa kpè ní mírì#ɛ́#15:23 Mírì#ɛ́, à ní náa tse tsí à náa gbàgbé iŋɛ́ ɖíɖɔ̃̀ yèé wà tsenɛ#ɛ́. ɖà nɔ́tí si, tsí à ń fú Yèésù ní kó mɔ. Tsí ó kɔ̀. Kò mɔɔ́. 24Tsí à kã̀ã́ si ńǹtá-egi-ìɖáàgàlàdzà#á. Ńbɛ̀ɛ́, sɔ́dzà ŋa wà wò ní àŋa kó kpɛ̃́ ìwɔ̀ra‐ɛ̀ ŋa náàŋírĩ-ara-ŋa, tsí à ɖìbò‐ɛ̀, tsí ká ma yèé kṹnukṹ nákó kɛ́#ɛ́. 25Ńǹyálɛ̀-àwúrɔ̀ ní à kã Yèésù si ńǹtá-egi-ìɖáàgàlàdzà#á. 26Àtsùgbée ká ma àbi yèé ó dzɛ, tsí à kpaá#á, à kã ɔkpɔ̃́-kã̀ si ńǹgbèrí-éwo‐ɛ̀, tsí à kɔ si ńnɛ̀ ní: Ólú-ɔma-Ìyúɖà† ŋa ní. 27Tsí à kã olè-íbàɖí méèdzì gbo si ńǹtá-egi-ìɖáàgàlàdzà kã̀kã̀ gbèé. À kã ɔ̀nyà-kã̀ si nákpálà-àwóòtã́‐ɛ̀, tsí kã ɔ̀nyà-kã̀ gbo si nákpálà-àwóòsì‐ɛ̀. [ 28Ńbɛ̀ɛ́, afɔ̀ yèé à kɔ si ńǸwé-Ɔ̀ɖáyé#ɛ́ tsɛ. À kɔ si ní: “À nákó múu má ɔ̀nyà-íbàɖí ŋa.”] 29Ɛnɛ yèé ŋa wà gbà ńbɛ̀#ɛ́, à náa wà ɖɔ̃́ gɛ̀gɛ̀wúlɛ̀ fúu, tsí wà búu, tsí wà wí fúu ní: Rí gé! Òŋu yèé ní òŋu nákó fɔ́ ilé-Ɔ̀ɖáyé†#ɛ́, tsí sɛ̃̀ mú ɔdzɔ́ mɛ́ɛta, tsí ń maá#á ńnɛ̀ɛ́ɛ̀? 30Òŋu ká‐ɛ̀ kó gba ara‐ɛ̀ là, tsí kó tì ti ńǹtá-egi-ìɖáàgàlàdzà#á wá káyí!

31Bɛ́ɛ̀ ké ní onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa gbo náa wà rã́ã̀rĩ́ fúu#ɛ́ ńnɛ̀ɛ́. Tsí à náa wà fɔ̀ náàŋírĩ-ara-ŋa ní: Ó gba olòmírɛ̃̀ ŋa là nɔ̀, tsí kàkó nyáa gba ara‐ɛ̀ làà? 32Kò tsi òŋu ní dzɛ́ Kírísítò, ólú-ɔma-Ìsàràyɛ́lì† ŋa áà? Kó tì ńǹtá-egi-ìɖáàgàlàdzà#á wá ńǹkɛ̀ɛ́. Tsí bí àŋa gbo, àŋa rí bɛ́ɛ̀ ná, ni àŋa kó gbàá gbɔ́.

Tsí ɔ̀nyà méèdzì yèé à kã̀ gbèé si ŋa#á, àŋa gbo, à wà búu.

Yèésù kú

(Màtéwò 27:45-56; Lúkà 23:44-49; Yòhánà 19:28-30)

33Nóòsã́ gãgã tóɖóɖóó#ɛ́, òkùkù lákṹ-kã̀ kù kpìrìm ńbɛ̀ kpó títí fú odzúùrɔ̃̀-alɛ́. 34Tsí nódzúùrɔ̃̀-alɛ́#ɛ́, Yèésù ɖúgbe kũkũ ní: Èlòyí, Èlòyí, làmá sàbàkìtánì? Òkpì‐ɛ̀ ní dzɛ́ ní: “Ɔ̀ɖáyé-mi, Ɔ̀ɖáyé-mi, kí tse tsí ò kɔ̀ mí dzɔ̀ɔ́ ná?”#15:34 Ìwé-Orĩ ŋa 22:2 (Psaumes 22:2)

35Ńbɛ̀ɛ́, ɔ̀nyà kã̀ŋa náàŋírĩ-ɛnɛ yèé wà bɛ̀ ŋa#á, à gbɔ́ kíbí ó wà ɖúgbe#ɛ́, tsí à ní: Ká gbɔ́ gé! Ó wà kpe Èlíyà†.

36Tsí ɔ̀nyà-kã̀ sáré náàŋírĩ-ŋa, tsí mú ɔ̀gbɔ̀gbɔ́, tsí ń bɔ̀ nɔ́tí kíkã, tsí ń kã̀ nɔ́ɔ̀kpá-kã̀, tsí nàá fú Yèésù ní kó kpèé mɔ, tsí wà fɔ̀ ní: Àŋa kó ɖóro, tsí ká rí káyí ní Èlíyà nákó wáa tìí ńǹtá-egi-ìɖáàgàlàdzà†#áà? 37Ńbɛ̀ɛ́, Yèésù ɖúgbe kũkũ gé, tsí mímí‐ɛ̀ dzilɛ̀. 38Ńbɛ̀ gbòkã́ gé#ɛ́, atsɔ-ìbònà#15:38 Atsɔ#ɛ́ ɖá ilé-Ɔ̀ɖáyé#ɛ́ méèdzì náàkpàtá òŋu ìɖòɖò si ni.-ilé-Ɔ̀ɖáyé#ɛ́ ya méèdzì gbàragbàra wáa kãlɛ̀.

39Ɔ̀gã́-sɔ́dzà-ɛnɛ-Rómà† ŋa-kã̀ ɖóro ńwádzú‐ɛ̀ si, tsí ó rí kíbí ó kú gbà#á, tsí ó ní: Ɛnɛ yèé bɛ́ ni Ɔma bíbí-Ɔ̀ɖáyé ìɖéǹɖè ni.

40Ńǹwèrè nyɛ̀ŋɛ̀#ɛ́, ɔnɔbɛ̃̀ɛ̃ kã̀ŋa gbo wà bɛ̀. Tsí à káà ɖóro nóòtèrè si, tsí wà wòrã. Màríyà† ti ìlú-Màɖàlá òŋu Sàlòmɛ́ má nára-Màríyà† ìnà-Yàkúbù tsígíɖí òŋu Yòsé, àŋa gbo, à wà náàŋírĩ-ŋa. 41Àŋa ní náa wà tɛ̀ náànyì-Yèésù ńǹwèrè yèé ó wà nérè-Gàlìlé#ɛ́, tsí à náa wà mɔ́wɔ́ gbè fúu ńtsɛ́-ɔnɔbɛ̃̀ɛ̃ ŋa tsítse#ɛ́. Tsí ɔnɔbɛ̃̀ɛ̃ kpíkpɔ̀ òmírɛ̃̀ kã̀ŋa gbo wà bɛ̀, tsí àŋa gbo, à tɛ̀ náànyì‐ɛ̀ wá ńYèrúsàlɛ́mì.

À ri Yèésù

(Màtéwò 27:57-61; Lúkà 23:50-56; Yòhánà 19:38-42)

42Ńbɛ̀ɛ́, alɛ́lɛ́ wáa lɛ́. Ɔdzɔ́#ɛ́ wà dzɛ́ ɔdzɔ́-kpíkpaɖí fú ɔdzɔ́-ìmíra† ni.#15:42 Ńɖi-ɔma-Ìyúɖà ŋa#á, bí ó bɔ ilɛ̀ má, tsí ká dzɛ ɔdzɔ́-ìmíra#á, à náa kpée ti ńmúmù-odzúùrɔ̃̀-ɔdzɔ́ nyɛ̀ŋɛ̀ ké ni. Ti náàsòkò nyɛ̀ŋɛ̀#ɛ́, à kà tsitsɛ́-kã̀ kpókpó ró. Ńnɛ̀ ní ó kpã́dzú ní ká ri Yèésù tã́ná odzúùrɔ̃̀ kò mù#ɛ́. 43Tsí ɔ̀nyà-kã̀ wáa tó. À náa kpèé ní Yòsɛ́fù†. Ɔma-ìlú-Àrìmàté ŋa ni. Tsí ó dzɛ́ ɔ̀nyà lákṹ-kã̀ nɛ́gbɛ́-àkpɛ̀dzɔ́-ɔma-Ìyúɖà ŋa†. Òŋu gbo wà ɖóro ɖe ìwèrè yèé Ɔ̀ɖáyé nákó wáa dzoyè#ɛ́. Ńbɛ̀ɛ́, ó mú ɛ̀ɖɔ̃̀ kã ara‐ɛ̀, tsí lɔ ńɖi-Kpìlátò†, tsí káà wí fúu ní: Kó fú òŋu nɔ́ɔ̀nà, tsí òŋu kó kɛ́ òkú-Yèésù lɔ káà rì.

44Kíbí Kpìlátò gbɔ́ ní Yèésù ti kú#ɛ́, kò yáa gbà si ńǹtá‐ɛ̀. Tsí ó kpe ɔ̀gã́-sɔ́dzà ŋa#á, tsí wà bèrèé ní: Yèésù ti kú ó dzɛ̃̀ɛ̃̀?

45Kíbí ɔ̀gã́-sɔ́dzà ŋa#á dzɛ́ fúu ní ɛ̃ɛ̃#ɛ́, ó dzɛ́ fú Yòsɛ́fù ní kó káà kɛ́ òkú#ɛ́ lɔ káà rì.

46Ńbɛ̀ɛ́, Yòsɛ́fù lɔ káà ɖá àlà, tsí wáa lɔ káà ti òkú#ɛ́ ńǹtá-egi-ìɖáàgàlàdzà†#á, tsí mú àlà#á wée, tsí kɛ́ɛ lɔ káà ń tɛ́ néèkpò-kã̀. Èkpò#ɛ́, ńnɔ́-òkúta ní à ɖɛ̃ɛ̃́ si#ɛ́. Tsí ó rí òkúta lákṹ-kã̀ ɖí arũ-ifò#ɛ́. 47Tsí Màríyà† ti ìlú-Màɖàlá òŋu Màríyà† ìnà-Yòsé, à rí ńbí ó wà rìí#ɛ́.

Currently Selected:

Mákò 15: ngl

Highlight

Copy