Màtéwò 26

À mú arũ ɖé si ńǹtá-Yèésù

(Mákò 14:1-2; Lúkà 22:1-2; Yòhánà 11:45-53)

1Yèésù tsɛ̀kɔ́ tã́, tsí ó fɔ̀ fú ɔmatsɛ́‐ɛ̀ ŋa ní: 2Nɔ́dzɔ́ méèdzì bɛ́, à nákó dzɛ ɔɖɔ̃́-Àɖádzɔ̀ɔ́†, à mà bɛ́ɛ̀ nɔ̀! À nákó mú òŋu, Ɛnɛ yèé ɔ̀nyà bí#ɛ́† fú, tsí ká kã òŋu si ńǹtá-egi-ìɖáàgàlàdzà†.

3Ńbɛ̀ɛ́, onùgbó-atsɛbɔ-Ɔ̀ɖáyé† ŋa òŋu onùgbó-ìlú#ɛ́ ŋa kpàɖé bá ara-ŋa ńlé-Kàyáfà, ɔ̀gã́-atsɛbɔ-Ɔ̀ɖáyé ŋa†. 4À dzɔ́ fɔ̀ɔ́ ní àŋa kó ɖɔ́gbɔ̃́, tsí mú Yèésù, tsí kpaá nóòkú. 5Tsí à ní: Àŋa kàkó nyáa múu ńǹwèrè yèé à wà dzɛ ɔɖɔ̃́#ɛ́. Bí kò tsi bɛ́ɛ̀#ɛ́, ìlú#ɛ́ nákó rò.

Ɔnɔbɛ̃̀ɛ̃-kã̀ kɛ́ àɖɛ̃́, tsí tseé ɖà néwo fú Yèésù

(Mákò 14:3-9; Yòhánà 12:1-8)

6Yèésù wà ńǹlú-Bètàní si, tsí lɔ ńkpáfɛ-ɔ̀nyà-kã̀, tsí kó káà dzɛŋɛ́. À náa kpe ɛnɛ nyɛ̀ŋɛ̀ ní Sìmɔ́nì, tsí ó ɖɔ́ɔ̀tɛ̀ wáa lɔ dzɔ̀ɔ́. 7Ńǹwèrè yèé à wà nóòkpì-dzídzɛ si#ɛ́, ɔnɔbɛ̃̀ɛ̃-kã̀ sɔ́ tìmá Yèésù, tsí ó banɛ́ àɖɛ̃́ rṹrũ̀ fĩ́rĩ́fĩ́rĩ́ nágbè-kã̀ si. Àɖɛ̃́#ɛ́ gbowó héŋú. Tsí agbè#ɛ́ gbo gbowó. Òkúta-ìrɔ́-kã̀ ní à ń gbɛ̃́ɛ̃#ɛ́, tsí à náa kpe òkúta#á ní àlàbásítà. Tsí ɔnɔbɛ̃̀ɛ̃#ɛ́ kɛ́ àɖɛ̃́#ɛ́, tsí tseé ɖà néwo fúu. 8Kíbí ɔmatsɛ́-Yèésù† ŋa rí bɛ́ɛ̀#ɛ́, ó dzà ŋá nára títí à wà fɔ̀ ní: Kí tse tsí ó wà bàdzɛ́ àɖɛ̃́#ɛ́ bɛ́ɛ̀ ná? 9À má nyáa tà àɖɛ̃́ nyɛ̀ŋɛ̀ nówó geregere, tsí mú owó‐ɛ̀ kpɛ̃́ fú adzìyàkú ŋa nɔ̀!

10Yèésù mà, tsí ó fɔ̀ fú ŋa ní: Kí tse tsí à wà ɖɔ́kpɔ fú ɔnɔbɛ̃̀ɛ̃ ɛ́? Ó ɖi, iŋɛ́-ire ní ó tse fú òŋu#ɛ́. 11Ó ɖi fee, adzìyàkú ŋa òŋu, à wà bá ŋa si nɔ́dzɔ́ kɔ́dzɔ́. Ó ɖi òŋu, òŋu kàkó wà bá ŋa si títí lɔ. 12Tsí ó mú àɖɛ̃́ yèé kpã́ ara fú òŋu, àtsùgbée kó tɔ́tse òŋu si fú rírì-òŋu ni. 13Ó ɖi, òŋu wà wí fú ŋa ní fee, ńǹɖì ɔ̀kã̀lɔ́ɔ̀kã̀ kpó yèé à nákó dzíkɔ̀ ɖíɖɔ̃̀ yèé bɛ́ náàdzàkáyé#ɛ́, à nákó kpɛ̀rɔ́-iŋɛ́ yèé ɔnɔbɛ̃̀ɛ̃ yèé tse#ɛ́, tsí wà ń tédzú‐ɛ̀.

Yúɖà ta Yèésù kpɔ̀rɔ̀ fú onùgbó-atsɛbɔ-Ɔ̀ɖáyé ŋa

(Mákò 14:10-11; Lúkà 22:3-6)

14Yúɖà Sìkàrìyɔ́tì, òŋu gbo wà náàŋírĩ-ɔmatsɛ́-Yèésù† máàméèdzì ŋa#á. Tsí ó wáa ǹɖe náànyìwà, tsí lɔ ńɖi-onùgbó-atsɛbɔ-Ɔ̀ɖáyé† ŋa, 15tsí káà bèrè ŋá ní: Bí òŋu ta Yèésù fú ŋa fe, kí à nákó fú òŋu? Tsí onùgbó-atsɛbɔ-Ɔ̀ɖáyé ŋa kã owó-ɛyɔ ɔgbã̀wó bɔwɔ́‐ɛ̀. 16Tsí ti náàsòkò nyɛ̀ŋɛ̀#ɛ́, ó wà wo ìwèrè yèé nákó sã̀, tsí kó mú Yèésù bɔwɔ́-ŋa#á.

Yèésù wà dzɛ dzídzɛ-ɔɖɔ̃́-Àɖádzɔ̀ɔ́ bá ɔmatsɛ́‐ɛ̀ ŋa

(Mákò 14:12-21; Lúkà 22:7-13,21-23; Yòhánà 13:21-30)

17Ɔdzɔ́-àtsɛ̃̀tsɛ̃̀-ɔɖɔ̃́-Kpɔ̃́nɔ́ àrìkɛ́† tó, tsí ɔmatsɛ́-Yèésù† ŋa tìmá‐ɛ̀, tsí wà bèrèé ní: Ńbisí ó wà wò ní àŋa kó kpaɖí dzídzɛ-ɔɖɔ̃́-Àɖádzɔ̀ɔ́†#ɛ́ fúu?

18Tsí Yèésù dzɔ́ŋù fú ŋa ní: Ká wɔ̀ ńǹlú#ɛ́ ńɖi-anámarĩ́ bɛ́, tsí ká rɔ́ fúu ní: Akɔ́nɛ ní ìwèrè-òŋu tó. Ó ɖi, ńɖɔ̀‐ɛ̀ ní òŋu ɔmatsɛ́-òŋu ŋa bàkó dzɛ ɔɖɔ̃́-Àɖádzɔ̀ɔ́#ɛ́.

19Tsí ɔmatsɛ́ ŋa#á tse si ńǹtá-afɔ̀ yèé Yèésù fɔ̀ fú ŋa#á, tsí à lɔ káà kpaɖí dzídzɛ-ɔɖɔ̃́-Àɖádzɔ̀ɔ́#ɛ́.

20Kíbí alɛ́lɛ́ lɛ́ ńǹkɛ̀ɛ́#ɛ́, Yèésù òŋu ɔmatsɛ́‐ɛ̀ máàméèdzì ŋa#á lɔ káà dzokó nóòkpì-ìdzɛ#ɛ́. 21Tsí ńǹwèrè yèé à wà dzɛŋɛ́#ɛ́, ó wà wí fú ŋa ní: Òŋu wà wí fú ŋa ní fee, ɛnɛ yèé bàkó ta òŋu#ɛ́ wà náàŋírĩ-ŋa bí.

22Afɔ̀#ɛ́ mú ara kú ɔmatsɛ́‐ɛ̀ ŋa kpíkpɔ̀, tsí ɛnɛ kṹnukṹ kpé bíbèrè ní: Ɔ̀gá! Kò tsi èmi ni nɛ́? Kò tsi èmi ni nɛ́?

23Tsí Yèésù dzɔ́ŋù fú ŋa ní: Ɛnɛ yèé bàkó ta òŋu#ɛ́, ɛnɛ nyɛ̀ŋɛ̀ wà mɔ́wɔ́ bɔ̀ náàwò ɔ̀kã̀ntso bá òŋu bí. 24Ó ɖi òŋu, Ɛnɛ yèé ɔ̀nyà bí#ɛ́†, òŋu kɛ́ tòŋu làkóò, kíbí à ti kɔɔ́ si ti nára-òŋu#ɛ́. Ó ɖi, ɛnɛ yèé nákó ta òŋu, Ɛnɛ yèé ɔ̀nyà bí#ɛ́, èhée fú ɛnɛ nyɛ̀ŋɛ̀. À kàá bí ɛnɛ nyɛ̀ŋɛ̀ gìɖì, ó má sã̀ fúu lárè.

25Tsí Yúɖà yèé wà tàá#á gbo gboŋù, tsí wà bèrèé ní: Akɔ́nɛ! Kò tsi èmi ni nɛ́?

Tsí Yèésù dzɔ́ŋù fúu ní: Nárũ tòŋu ká‐ɛ̀ ní ó bɔ́ ti ɛ́.

Yèésù wà dzɛ dzídzɛ-ìkã́ã̀nyì bá adzítsɛ́‐ɛ̀ ŋa

(Mákò 14:22-25; Lúkà 22:14-20; 1 Kòríntì ŋa 11:23-25)

26Tsí kíbí à wà dzɛŋɛ́#ɛ́ làkóò#ɛ́, Yèésù kɛ́ kpɔ̃́nɔ́ banɛ́, tsí bere kùsɛ̀ɛ̀-Ɔ̀ɖáyé. Tsí ó tsɛ́ɛ, tsí ń bɔwɔ́-ɔmatsɛ́‐ɛ̀ ŋa, tsí wà fɔ̀ fú ŋa ní: Ara-òŋu ní, ká gbà, tsí ká dzɛ. 27Tsí ó kɛ́ ɔtí ńkɔ̃́ŋúkɔ̃́ŋú-kã̀ banɛ́, tsí ɖɔ́kpɛ́ fú Ɔ̀ɖáyé. Tsí ó kɛ́ɛ fú ŋa, tsí ní: Kṹnukṹ kó mɔɔ́. 28Àmbara-òŋu ni. Àmbara yèé Ɔ̀ɖáyé ń tse ìmɔ̀lɛ̀ bá ŋa#á ńnɛ̀ɛ́. Àmbara#á ní ɖà ńlɛ̀, tsí à ń tsɛbɔ néwo-ɔ̀nyà ɛ̀gbɛ̀lɛ́ɛ̀gbɛ̀-kã̀#á, àtsùgbée Ɔ̀ɖáyé kó mú àbi-ŋa tɔrɛ fú ŋa#á.

29Ó ɖi òŋu, òŋu wà wí fú ŋa ní fee, ti nɔ́mbɛ́#ɛ́, òŋu kàkó mɔ ɔtí ró títí fú ɔdzɔ́ yèé Boba-òŋu nákó dzoyè#ɛ́. Ńǹwèrè nyɛ̀ŋɛ̀ ní òŋu nákó sɛ̃̀ mɔ ɔtí titɔ̃ bá ŋa#á.

Yèésù fɔ̀ ní Òkúta nákó sɛ̃́ ní òŋu kò ma òŋu

(Mákò 14:26-31; Lúkà 22:31-34; Yòhánà 13:36-38)

30Tsí à kpé orĩ-ɔɖɔ̃́ ŋa kíkɔ̃. Kíbí à kɔ̃rĩ tã́#á, à fùɖá, tsí wáa lɔ nóòkè-Òlífì†. 31Tsí Yèésù wà fɔ̀ fú ŋa ní: Nóoru yèé bɛ́ gìɖì#ɛ́, iŋɛ́ yèé bàkó bá òŋu#ɛ́, nákó tse tsí àŋa kpó, à nákó sá kɔ òŋu dzɔ̀ɔ́. Iŋɛ́ yèé tse#ɛ́, à kɔɔ́ si ńǸwé-Ɔ̀ɖáyé† ní: “Màa kpa aró-àgùɖã̀#á, tsí àgùɖã̀-agbo#ɛ́ ŋa nákó túùnkã́ wérí.”#26:31 Ìwé-Sàkàríyà 13:7 (Zacharie 13:7)

32Ó ɖi, bí òŋu sɛ̃̀ dzí ti náàŋírĩ-òkú ŋa wá náyé tã́, òŋu nákó tsúwádzú-ŋa lɔ nérè-Gàlìlé.

33Tsí Òkúta gboŋù, tsí fɔ̀ fú Yèésù ní: Bí ó dzɛ́ gìɖì ní ɛnɛ yèé bɔ̀ ŋa#á kpó nákó sá kɔ̀ɔ́ dzɔ̀ɔ́ náàtsùgbé-iŋɛ́ yèé bàkó báa#á fee, òŋu, òŋu kàkó sá kɔ̀ɔ́ dzɔ̀ɔ́ láyé.

34Tsí Yèésù fɔ̀ fúu ní: Òŋu wà wí fúu ní fee, nóoru yèé bɛ́ gìɖì, tã́ná àkìkɔ kó kɔ, nákó sɛ̃́ gbà mɛ́ɛta ní láyé òŋu kò tì mà òŋu.

35Tsí Òkúta fɔ̀ fúu ní: Bí ó dzɛ́ ní òŋu nákó kú báa gìɖì gbo, òŋu kàkó sɛ̃́ láyé ní òŋu kò màá.

Tsí ɔmatsɛ́-Yèésù†-àtíbɔ̀ ŋa#á gbo kpó fɔ̀ bɛ́ɛ̀ ké.

Yèésù lɔ káà wúùre ńGètsèmàné

(Mákò 14:32-42; Lúkà 22:39-46)

36Yèésù òŋu ɔmatsɛ́‐ɛ̀ ŋa lɔ káà tó ńǹɖì-kã̀. À náa kpe ibɛ̀ ní Gètsèmàné. Tsí ó rɔ́ fú ŋa ní: Ká dzokó si bí, tsí òŋu kó lɔ ńwádzú-bɛ̀, tsí káà wúùre. 37Tsí ó gbɛ̃́ Òkúta òŋu ɔma-Sèbèɖé méèdzì ŋa#á tɛ̀ náànyì. Ó ɖi, ara kpée kúkú, tsí ó wà ɖíìhã̀ŋù gbo tó bɛ́ɛ̀.

38Tsí ó wà fɔ̀ fú ŋa ńǹkɛ̀ɛ́ ní: Ara yèé wà kú òŋu bɛ́#ɛ́ bàkó kpa òŋu. Ó ɖi, ká gbé bí, tsí wà nódzúfò si bá òŋu.

39Tsí ó sɔ́ lɔ ńwádzú oɖé, tsí káà kálɛ̀ gìrì, tsí wà wúùre fú Ɔ̀ɖáyé ní: Boba-mi! Bí nákó nyáa sɔ́ òfò#ɛ́ lɔ ni, kó sɔ́ɔ lɔ fú òŋu ɖé. Ó ɖi, kó máa tseé ńǹrɔ́-kíbí òŋu wà wòó gbà#á, kó tseé kíbí òŋu-ká‐ɛ̀ wà wòó gbà#á.

40Kíbí ó wúùre tã́#á, ó sɛ̃̀ wá ńɖi-ɔmatsɛ́‐ɛ̀ ŋa#á, tsí ó wáa bá ŋa, tsí à sɔ̃rũ lɔ si. Tsí ó fɔ̀ fú Òkúta ní: À kàkó nyáa gbé nódzúfò bá òŋu tó aŋgo ɔ̀kã̀ntso gìɖì gboò? 41Ká gbé nódzúfò si, tsí wà wúùre, àtsùgbée ká máa dzì náàɖã́wò. Odzú wo ire kó tse, àmí ní kò tó#ɛ́.

42Tsí ó sɛ̃̀ sɔ́ lɔ ńwádzú nóláànkéèdzì‐ɛ̀ ró, tsí lɔ káà wúùre ní: Boba-mi! Bí ó dzɛ́ ní kàkó nyáa sɔ́ òfò yèé lɔ fú òŋu, tsí ó wà ní òŋu kó kpàɖé‐ɛ̀ ná ni awù‐ɛ̀ kó tsɛ.

43Tsí ó tɔ́ sɛ̃̀ wá ńɖi-ɔmatsɛ́‐ɛ̀ ŋa#á ró, tsí ó wáa bá ŋa, tsí à sɔ̃rũ lɔ si. Odzú-ŋa wówo si gbegbé, à kàkó nyáa gbé nódzúfò. 44Tsí Yèésù sɛ̃̀ sɔ́ lɔ ńwádzú nóláànkɛ́ɛta‐ɛ̀, tsí lɔ káà wúùre, tsí wà ɖɔ̃́ òŋu-afɔ̀ ɔ̀kã̀ntso#ɛ́ ké. 45Tsí ó tɔ́ sɛ̃̀ wá ńɖi-ɔmatsɛ́‐ɛ̀ ŋa ró, tsí wà fɔ̀ fú ŋa ní: Hũ̀ũ̀! Ká sɔ̃rũ rere, ká míra fú ara-ŋa! Báàyí#ɛ́, àsòkò tó, tsí ká mú òŋu, Ɛnɛ yèé ɔ̀nyà bí#ɛ́†, tsí ń bɔwɔ́-ɔ̀nyà-íbàɖí ŋa. 46Ká ǹɖe, tsí àŋa kó lɔ. Ká rí gé! Ɛnɛ yèé wà ta òŋu#ɛ́ wáa tó.

À mú Yèésù

(Mákò 14:43-52; Lúkà 22:47-53; Yòhánà 18:3-11)

47Oŋù-Yèésù kò tì dzilɛ̀ wòná, tsí Yúɖà wáa tó. Òŋu gbo wà náàŋírĩ-ɔmatsɛ́-Yèésù† máàméèdzì ŋa#á, tsí ó gbɛ̃́ ɔ̀nyà ɛ̀gbɛ̀lɛ́ɛ̀gbɛ̀-kã̀ tɛ̀ náànyì, tsí à banɛ́ tàsú ŋa òŋu ɔ̀kpá ŋa. Onùgbó-atsɛbɔ-Ɔ̀ɖáyé† ŋa òŋu onùgbó-ìlú#ɛ́ ŋa ní bɛ̀ ŋá tɛ̀ náànyì‐ɛ̀#ɛ́. 48Atanɛ nyɛ̀ŋɛ̀#ɛ́, ó ti ɖíre iŋɛ́ yèé nákó tse, tsí à nákó nyáa ma Yèésù#ɛ́ fú ŋa. Ó ní: Ɛnɛ yèé òŋu nákó rɔlɛ̀ kí#ɛ́ ní dzɛ́ ɛnɛ yèé à wà wò#ɛ́. Ó ɖi, ká múu.

49Ńbɛ̀ɛ́, Yúɖà tìmá Yèésù gbòkã́, tsí fɔ̀ ní: Akɔ́nɛ, ǹ kíɛ.

Tsí ó rɔlɛ̀ kíi.

50Tsí Yèésù fɔ̀ fúu ní: Ídzà-mi! Iŋɛ́ yèé ò bàkó wáa tse#ɛ́, tseé.

Tsí ɛnɛ-àtíbɔ̀ ŋa tìmá Yèésù ńǹkɛ̀ɛ́, tsí dzìí, tsí múu. 51Tsí gbòkã́ gé#ɛ́, ɔ̀nyà-kã̀ náàŋírĩ-ɛnɛ yèé wà bá Yèésù ŋa#á kpɔ tàsú‐ɛ̀ fùɖá, tsí ń tsá ɔ̀nyà-kã̀ náàŋírĩ-ŋa, tsí fá etí‐ɛ̀ ǹɖe. Ɛnɛ yèé à fa etí‐ɛ̀ nyɛ̀ŋɛ̀#ɛ́, arú-ɔ̀gã́-atsɛbɔ-Ɔ̀ɖáyé ŋa† ní ó dzɛ́#ɛ́.

52Tsí Yèésù fɔ̀ fúu ní: Kó sɛ̃ tàsú‐ɛ̀ si ńǹɖì‐ɛ̀. Iŋɛ́ yèé tse#ɛ́, ɔ̀nyà kpó yèé nákó kpanɛ òŋu tàsú#ɛ́ nákó kú ikú-tàsú. 53Ó ɖédzú òŋu kàkó nyáa kpe Boba-òŋu, tsí kó wáa mɔ́wɔ́ gbè fú òŋu niì? Tsí nákó sì bɛ ɛgbɛ́-adzítsɛ́-ɔ̀rɔ̃† yèé náa dzogu ŋa#á lákṹ lákṹ máàméèdzì wá gbòkã́. 54Tsí bí ó dzɛ́ ní à gba òŋu dzɔ̀ɔ́ bɛ́ɛ̀ fe, afɔ̀ yèé à kɔ si ńǸwé-Ɔ̀ɖáyé† ní iŋɛ́ ŋa#á kó tse bɛ́ɛ̀#ɛ́, bí nákó tse fáà, tsí tsɛ ńǹkɛ̀ɛ́ ná?

55Náàsòkò nyɛ̀ŋɛ̀#ɛ́, Yèésù fɔ̀ fú èrò#ɛ́ ní: Nɔ́dzɔ́ kɔ́dzɔ́, òŋu náa dzokó si ńlé-Ɔ̀ɖáyé, tsí wà tsɛ̀kɔ́ fú ŋa, tsí à kò sì mú òŋu wòrí. Tsí ó ɖi nóoru yèé bɛ́, tsí à bàkó wáa mú òŋu, tsí à ɖì gìrìdzàà wáa tó, tàsú ŋa òŋu ɔ̀kpá ŋa nɔ́wɔ́, kíbí à bàkó wáa mú olè-íbàɖí bɛ́ yí. 56Ó ɖi, bɛ́ɛ̀ ní ó wà ní iŋɛ́ ŋa#á kó lɔ gbà#á ńnɛ̀ɛ́, àtsùgbée iŋɛ́ yèé agbáfɔ̀-Ɔ̀ɖáyé fɔ̀† ŋa kɔ si ti nára-òŋu#ɛ́, iŋɛ́ ŋa#á kó tsɛ.

Tsí ɔmatsɛ́‐ɛ̀ ŋa kpó sá kɔ̀ɔ́ dzɔ̀ɔ́ lɔ.

À gbɛ̃́ Yèésù lɔ fú ɛgbɛ́-àkpɛ̀dzɔ́-ɔma-Ìyúɖà ŋa

(Mákò 14:53-65; Lúkà 22:4-5,63-71; Yòhánà 18:13-14,19-24)

57Ɛnɛ yèé ŋa mú Yèésù#ɛ́ gbɛ̃́ɛ̃ lɔ ńlé-Kàyáfà, ɔ̀gã́-atsɛbɔ-Ɔ̀ɖáyé ŋa†. Akɔ́nɛ nɛ́kpa-Ɔ̀ɖáyé† ŋa òŋu onùgbó-ìlú#ɛ́ ŋa gbo kpérí si bɛ̀.

58Ó ɖi, Òkúta òŋu, ó wà tɛ̀ náànyì-Yèésù làkóò náàrìmáa sɔ́má-ŋa títí káà tó ńlé-ɔ̀gã́-atsɛbɔ-Ɔ̀ɖáyé ŋa#á. Ó wɔ̀ ńkpàtá#á lɔ, tsí káà dzokó bá àɖèlé-ilé#ɛ́ ŋa, tsí kó rí kíbí iŋɛ́ ŋa#á nákó tã́ gbà#á.

59Ńbɛ̀ɛ́, onùgbó-atsɛbɔ-Ɔ̀ɖáyé† ŋa òŋu ɛgbɛ́-àkpɛ̀dzɔ́-ɔma-Ìyúɖà ŋa†#á kpó wà wo ká bu òɖòbò-kã̀ má Yèésù, tsí ká nyáa ń kpaá nóòkú. 60Ɔ̀nyà kpíkpɔ̀ wáa bu òɖòbò máa. Ó ɖi, afɔ̀-arũ-ŋa kò dzɛ́ ɔ̀kã̀ntso. Ńbɛ̀ɛ́, à kò rí afɔ̀ yèé ká nyáa ń ɖáàbi fúu#ɛ́. Ńǹtã̀ntã́‐ɛ̀#ɛ́, ɔ̀nyà méèdzì sɔ́ ɖóro, 61tsí fɔ̀ ní: Ɛnɛ yèé ní fɔ̀ ní òŋu nákó nyáa fɔ́ ilé-Ɔ̀ɖáyé†#ɛ́, tsí mú ɔdzɔ́ mɛ́ɛta, tsí sɛ̃̀ ń maá#á.

62Tsí ɔ̀gã́-atsɛbɔ-Ɔ̀ɖáyé ŋa ǹɖe, tsí fɔ̀ fú Yèésù ní: Afɔ̀ yèé ɛnɛ nyɛ̀ŋɛ̀ ŋa wà fɔ̀ ti nára‐ɛ̀#ɛ́ fe, kò nɛ́ afɔ̀-kã̀ kpókpó, tsí kó fɔ̀ɔ̀?

63Tsí Yèésù tsikó si kpíríkpírí. Tsí ɔ̀gã́-atsɛbɔ-Ɔ̀ɖáyé ŋa wà fɔ̀ fúu ní: Àŋa wà nódzú-Ɔ̀ɖáyé Oláàyɛ̀ si ni. Bí ó dzɛ́ ní òŋu ní dzɛ́ Kírísítò, Ɔma bíbí-Ɔ̀ɖáyé#ɛ́ ni kó fɔ̀ɔ́ fú àŋa.

64Tsí Yèésù dzɔ́ŋù fúu ní: Nárũ tòŋu ká‐ɛ̀ ní ó bɔ́ ti#ɛ́. Ó ɖi, òŋu wà wí fú ŋa ní fee, ti náàsòkò yèé bɛ́#ɛ́, àŋa kpó, à nákó rí òŋu, Ɛnɛ yèé ɔ̀nyà bí#ɛ́†, tsí òŋu nákó dzokó náàwóòtã́-Ɔ̀ɖáyé Olíkpá, tsí à nákó rí òŋu, tsí òŋu nákó bɔ́ ti ńǹgbèrí ńnɔ́-irì-kã̀ gbo wá.#26:64 È káà kã Ìwé-Orĩ ŋa 110:1, Ìwé-Ɖànìyɛ́lì 7:13 (Psaumes 110:1, Daniel 7:13).

65Tsí kíbí ó wí bɛ́ɛ̀#ɛ́, ó dza ɔ̀gã́-atsɛbɔ-Ɔ̀ɖáyé ŋa#á nára, tsí ó fa ìwɔ̀ra tòŋu ká‐ɛ̀ ya,#26:65 Dzɔ̀ɔ́ dzɔ̀ɔ́#ɛ́, bí àtsubi-kã̀ wá nàmí bí ikú kpa nàmí bí àrɔ̃̀-kã̀ wá nàmí bí ɔ̀nyà-kã̀ gbɛ̃ɛ̃́rĩ́ ɛ́kɔ-Ɔ̀ɖáyé ní ɔma-Ìsàràyɛ́lì ŋa náa fa ìwɔ̀ra yèé à wɔ̀ si#ɛ́ ya#á. tsí wà fɔ̀ ní: Ó gbɛ̃ɛ̃́rĩ́ ɛ́kɔ-Ɔ̀ɖáyé. Ó ɖi, àŋa kpó, à gbɔ́ kíbí ó gbɛ̃ɛ̃́rĩ́ ɛ́kɔ-Ɔ̀ɖáyé#ɛ́ nɔ̀. Ó tã́. Àyídzá-kã̀ kò lárè bɛ́ɛ̀ ró. 66Tsí bí à wà tsèsérè fáà?

Tsí à dzɔ́ŋù fúu ní: Ikú nákó kpaá ni.

67Tsí à titɔ́ ɖà nódzú fúu, tsí gúu náàkɔ̃́, tsí ɔ̀nyà kã̀ŋa gbo kpa ìgbètí fúu, 68tsí wà fɔ̀ fúu ní: Kírísítò! Ɛnɛ yèé kpaá#á, kó màá, tsí fɔ̀ɔ́ fú àŋa káyí.

Òkúta wà sɛ̃́ ní òŋu kò ma Yèésù

(Mákò 14:66-72; Lúkà 22:55-62; Yòhánà 18:15-18,25-27)

69Òkúta dzokó si nóòɖe ńkpàtá#á, tsí èkíɖã-kã̀ tìmá‐ɛ̀. Èkíɖã#á náa tsitsɛ́ ńkpàtá#á ni. Tsí ó wà fɔ̀ fú Òkúta ní: Òŋu gbo, ó wà bá Yèésù ɛnɛ-ɔwɔ́-Gàlìlé ŋa#á! 70Tsí Òkúta sɛ̃́ nódzú-ɔ̀nyà kpó ní: Òŋu kò ma iŋɛ́ yèé ó wà fɔ̀#ɛ́. 71Tsí kíbí ó ǹɖe ńkpàtá#á, tsí làkóò nárũ-èkũ̀-kpàtá#á, èkíɖã-òmírɛ̃̀-kã̀ ríi, tsí wà fɔ̀ fú ɛnɛ yèé wà bɛ̀ ŋa#á ní: Ɛnɛ yèé bɛ́ wà bá Yèésù ti Nàsàrɛ́tì#ɛ́.

72Tsí Òkúta tɔ́ sɛ̃́ ró, tsí kpe iŋɛ́ si ńǹtá‐ɛ̀ ní: Òŋu kò ma ɛnɛ#ɛ́ náa.

73Títí kó bɔ oɖé#ɛ́, ɛnɛ yèé wà bɛ̀ ŋa#á sɔ́ tìmá‐ɛ̀, tsí wà fɔ̀ fúu ní: Ìɖéǹɖè ni, òŋu gbo wà náàŋírĩ-ŋa. Tsí kíbí ó wà wíìnyɛ̀ gbà#á gìɖì gbo wà nya ńbí ó ti#ɛ́ ɖíre.

74Tsí Òkúta kpé fífɔ̀ ní: Òŋu kpe iŋɛ́-kã̀ si ńǹtá‐ɛ̀ ní òŋu kò ma ɛnɛ nyɛ̀ŋɛ̀. Ó ɖi, èhée fú òŋu bí ó dzɛ́ ní òŋu wà tsòɖòbò.

Tsí ńǹɖì-bɛ̀ gbòkã́#á, àkìkɔ kɔ. 75Tsí Òkúta tédzú afɔ̀ yèé Yèésù ti fɔ̀ fúu ní: Àkìkɔ kàkó kɔ tã́ná nákó sɛ̃́ gbà mɛ́ɛta ní òŋu kò ma òŋu#ɛ́. Tsí ó ǹɖe fùɖá ńkpàtá#á, tsí ó ɖi àbámà fúu, tsí ó wà sɔkṹ hɛ̃̀hɛ̃̀hɛ̃̀.

Currently Selected:

Màtéwò 26: ngl

Highlight

Copy