Màtéwò 27

À gbɛ̃́ Yèésù lɔ fú Kpìlátò

(Mákò 15:1-2; Lúkà 23:1-2; Yòhánà 18:28-32)

1Ó ɖi náàwúrɔ̀ kùtùkùtù, tsí onùgbó-atsɛbɔ-Ɔ̀ɖáyé† ŋa kpó òŋu onùgbó-ìlú#ɛ́ ŋa káà kpe ara-ŋa kpàɖé si ńǹtá-Yèésù, tsí dzɔ́ fɔ̀ ní àŋa kó kpaá nóòkú. 2Tsí à múu, tsí ɖèé, tsí gbɛ̃́ɛ̃ lɔ káà bɔwɔ́-Kpìlátò†. Òŋu ní dzɛ́ kɔ̀màɖã́ã̀-ìlú#ɛ́.

Yúɖà kú

(Itsɛ́ 1:18-19)

3Yúɖà yèé ta Yèésù#ɛ́ rí ní onùgbó-atsɛbɔ-Ɔ̀ɖáyé† ŋa òŋu onùgbó-ìlú#ɛ́ ŋa fɔ̀ ní ká kpa Yèésù nóòkú, tsí ó ɖi àbámà fúu, tsí ó sɛ̃ owó-ɛyɔ ɛyɔ ɔgbã̀wó#ɛ́ lɔ fú ŋa, 4tsí fɔ̀ fú ŋa ní: Òŋu dzàbi. Òŋu sɔ́ ɛnɛ yèé kò tse iŋɛ́-kã̀#á fú ikú.

Tsí à dzɔ́ŋù fúu ní: Kò tsɛdzɔ́-àŋa, afɔ̀-ara‐ɛ̀ ni. 5Tsí Yúɖà kɛ́ owó#ɛ́ ɖà ńlé-Ɔ̀ɖáyé#ɛ́, tsí ǹɖe bɛ̀, tsí lɔ káà so okù.

6Tsí onùgbó-atsɛbɔ-Ɔ̀ɖáyé ŋa kɛ́ owó#ɛ́, tsí à ní: Ɛkpa-Mɔ̀ɔ́sè† kò fú ɔ̀nà ní àŋa kó kɛ́ɛ ɖà má owó-ilé-Ɔ̀ɖáyé† ŋa. Iŋɛ́ yèé tse#ɛ́, owó-àmbara-ɔ̀nyà ni.

7Ó ɖi, àŋa kpó à dzɛ́ ní àŋa kó mú owó#ɛ́ ra oko-kã̀. À náa kpe oko#ɛ́ ní oko-amàkòkò. À ní àŋa kó ràá, tsí ń tse ìtɛ́ si fú àledzò ŋa. 8Iŋɛ́ yèé tse tsí títí wáa fú òní#ɛ́, à wà kpe oko#ɛ́ ní ilɛ̀-àmbara#á ńnɛ̀ɛ́.#27:8 È káà kã Ìwé-Itsɛ́ 1:19. 9Ńbɛ̀ɛ́, iŋɛ́ yèé Yèrèmíyà†, agbáfɔ̀-Ɔ̀ɖáyé fɔ̀† fɔ̀ si ńǸwé-Ɔ̀ɖáyé†#ɛ́ tsɛ. Ó fɔ̀ ní:

“À gba owó-ɛyɔ ɛyɔ ɔgbã̀wó. Owó yèé ɔma-Ìsàràyɛ́lì† ŋa ɖá si nára‐ɛ̀#ɛ́ ńnɛ̀ɛ́.

10Tsí ńǹrɔ́-kíbí Ɔlɔ́dzɔ́ fɔ̀ si fú mi gbà#á, à kɛ́ɛ, tsí ń ra oko-amàkòkò#ɛ́.”#27:10 Ìwé-Sàkàríyà 11:12-13, Ìwé-Yèrèmíyà 18:2-3, 19:1-2, 32:6-15 (Zacharie 11:12-13, Jérémie 18:2-3, 19:1-2, 32:6-15)

Kpìlátò bere Yèésù náfɔ̀

(Mákò 15:2-5; Lúkà 23:3-5; Yòhánà 18:33-38)

11À gbɛ̃́ Yèésù lɔ káà ɖóro ńwádzú-Kpìlátò†, kɔ̀màɖã́ã̀-ìlú#ɛ́. Tsí Kpìlátò wà bèrèé ní: Òŋu ní dzɛ́ ólú-ɔma-Ìyúɖà† ŋa áà?

Tsí Yèésù fɔ̀ fúu ní: Nárũ tòŋu ká‐ɛ̀ ní ó bɔ́ ti#ɛ́.

12Ó ɖi, kíbí onùgbó-atsɛbɔ-Ɔ̀ɖáyé† ŋa òŋu onùgbó-ìlú#ɛ́ ŋa wà mú afɔ̀ báa#á, kò dzɔ́ŋù-afɔ̀-kã̀ kpókpó fú ŋa. 13Tsí Kpìlátò wà bèrèé ní: Kò wà gbɔ́ afɔ̀ yèé ŋa à wà ń báa#á niì?

14Tsí kò dzɔ́ŋù afɔ̀-kã̀ kpókpó fúu ró, títí kɔ̀màɖã́ã̀-ìlú#ɛ́ kí dzã̀maa gìɖì héŋú.

Kpìlátò nya ɔwɔ́ nára-Yèésù ní ká kpaá nóòkú

(Mákò 15:6-15; Lúkà 23:13-25; Yòhánà 18:38–19:15)

15Ńǹwèrè nyɛ̀ŋɛ̀#ɛ́, ɔma-Ìyúɖà† ŋa, bí à bàkó dzɛ ɔɖɔ̃́-Àɖádzɔ̀ɔ́† kã̀kã̀#á, kɔ̀màɖã́ã̀-ìlú#ɛ́ náa tsí abèŋà-kã̀ nɛ́ɛ̀ŋà fú ŋa. Ɛnɛ yèé ìlú#ɛ́ wà wò#ɛ́ ní náa tsí#ɛ́. 16Ńbɛ̀ɛ́, à mú ɔ̀nyà-kã̀ yèé ìlú kpó mà#á sé si. À náa kpèé ní Bàràbá.#27:16 Ìwé kã̀ŋa kpèé ní Yèésù Bàràbá. Bɛ́ɛ̀ ké ní ó wà fú ɔma kíkã̀ 17 gbo#ɛ́. 17Ɔ̀nyà ŋa kpérí si kpìtìì, tsí Kpìlátò† wà bèrè ŋá ní: Náàŋírĩ-Bàràbá òŋu Yèésù yèé à náa kpè ní Kírísítò#ɛ́ fe, nɛ̀ɛ́ à wò ní òŋu kó tsí fú ŋa?

18Ó ɖi, ó sì mà si rere ní à bínɔ́-Yèésù, ńnɛ̀ ní à múu wáa bɔwɔ́-òŋu#ɛ́.

19Ó dzokó náàntã̀ yèé náa dzokó, tsí kpɛdzɔ́#ɛ́. Tsí kíbí ó dzokó si#ɛ́, aya‐ɛ̀ bɛ ikɔ̀ wá fúu ní: Kó máa tarũ bɔ̀ náfɔ̀-atsòtítɔ́ nyɛ̀ŋɛ̀. Iŋɛ́ yèé tse#ɛ́, òŋu láàlá ríi nóoru-ɔ̀ná, tsí ńnɔ́-àlá#á, òŋu kò tì réré bɔ̀.

20Onùgbó-atsɛbɔ-Ɔ̀ɖáyé† ŋa òŋu onùgbó-ìlú#ɛ́ ŋa òŋu wà sɔ́ èrò#ɛ́ ní ká bèrè, tsí ká tsí Bàràbá, tsí ká kpa Yèésù nóòkú.

21Tsí Kpìlátò, kɔ̀màɖã́ã̀-ìlú#ɛ́ sɛ̃̀ gba afɔ̀ ró, tsí wà bèrè ní: Náàŋírĩ-àŋa méèdzì#ɛ́ fe, nɛ̀ɛ́ à wò ní òŋu kó tsí fú ŋa?

Tsí à dzɔ́ŋù fúu ní: Bàràbá! 22Tsí ó tɔ́ wà bèrè ŋá ró ní: Tsí Yèésù yèé à wà kpè ní Kírísítò#ɛ́ fe, kí à wà wò ní òŋu kó tse báa?

Tsí àŋa kpó à dzɔ́ŋù fúu ní: Kã̀ã́ si ńǹtá-egi-ìɖáàgàlàdzà†!

23Tsí Kpìlátò sɛ̃̀ wà bèrè ró ní: Íbàɖí mɛ̀ɛ́ ó tse ná?

Tsí à ɖúgbe kũkũ máa ró ní: Kã̀ã́ si ńǹtá-egi-ìɖáàgàlàdzà!

24Ńbɛ̀ɛ́, Kpìlátò rí ní kò wà ní àŋa kó wà fàá làkóò. Kà kàa bɛ́ɛ̀, ó tse tsí ìlú#ɛ́ wà rò máa ni. Tsí ó tsomi, tsí wɛ ɔwɔ́‐ɛ̀ ŋa nódzú-èrò#ɛ́, tsí ń gbákpá gbɛ́sɛ̀ náfɔ̀#ɛ́, tsí wà fɔ̀ fú ŋa ní: Ikú-idza yèé bɛ́ kò ti ńɖɔ-òŋu fòò. Ó ɖi, ńɖi-ŋa ní ó ti#ɛ́.

25Tsí ìlú#ɛ́ kpó gbàá fúu ní: Ikú‐ɛ̀ tsɛdzɔ́-àŋa, tsí tsɛdzɔ́-ɔmalɔ́ma-àŋa ŋa gbo.

26Ńbɛ̀ɛ́, ó tsí Bàràbá fú ŋa, tsí fɔ̀, tsí à tsɔ Yèésù náàtàmì. Kíbí à tsɔ̀ɔ́ náàtàmì tã́#á, ó múu fú sɔ́dzà ŋa ní ká káà kã̀ã́ si ńǹtá-egi-ìɖáàgàlàdzà.

Sɔ́dzà ŋa wà mú Yèésù tsiwɛwɛ́

(Mákò 15:16-20; Yòhánà 19:2-3)

27Sɔ́dzà-kɔ̀màɖã́ã̀ ŋa gbɛ̃́ Yèésù lɔ ńkpàtá-kɔ̀màɖã́ã̀, tsí ɛgbɛ́-sɔ́dzà ŋa#á kpó sú wérí‐ɛ̀. 28Tsí à bɔ́ iŋɛ́‐ɛ̀ ŋa nára‐ɛ̀, tsí à mú ìwɔ̀ra kpikpa#27:28 Àwù kpikpa ní ólú ŋa náa wɔ̀#ɛ́. tséŋútséŋú-kã̀ wɔ̀ fúu. 29Tsí à mú akpá-egi-agúgú kã̀ŋa gbo, tsí ń ŋɔ òkúkú-kã̀ kíbí òkúkú-ólú ŋa bɛ́, tsí ń ɖé fúu, tsí mú ɔ̀kpá-ìtɛ̀lɛ̀-kã̀ gbo bɔ̀ nɔ́wɔ́-àwóòtã́‐ɛ̀. Tsí à kálɛ̀ ńwádzú‐ɛ̀ si, tsí wà múu tsiwɛwɛ́, tsí wà kíi ní: Ólú-ɔma-Ìyúɖà† ŋa, kɔ́ɔkpɔ! Kɔ́ɔkpɔ títí! 30Tsí à titɔ́ ɖà bòó, tsí gba ɔ̀kpá-ìtɛ̀lɛ̀#ɛ́ nɔ́wɔ́‐ɛ̀, tsí ń kpaá néwo. 31Kíbí à múu tsiwɛwɛ́ bɛ́ɛ̀ tã́#á, à bɔ́ ìwɔ̀ra#ɛ́ ǹɖe nára‐ɛ̀, tsí mú ìwɔ̀ra tòŋu ká‐ɛ̀ ŋa wɔ̀ fúu, tsí gbɛ̃́ɛ̃ lɔ ká káà kã̀ã́ si ńǹtá-egi-ìɖáàgàlàdzà†.

À kã Yèésù si ńǹtá-egi-ìɖáàgàlàdzà

(Mákò 15:21-32; Lúkà 23:26-43; Yòhánà 19:16-27)

32Ńǹwèrè yèé à wà fùɖá ńǹlú#ɛ́, à kpàɖé ɔ̀nyà-kã̀ nɔ́ɔ̀nà. À náa kpèé ní Sìmɔ́nì. Ɔma-ìlú-Sìrɛ́nì ŋa ní ó dzɛ́#ɛ́. Tsí sɔ́dzà ŋa múu, tsí kɛ́ egi-ìɖáàgàlàdzà†-Yèésù rùú. 33Tsí à ǹɖe, tsí gbɛ̃́ Yèésù lɔ káà tó ńǹɖì-kã̀. À náa kpe ibɛ̀ ní Gɔ̀gɔ̀ta. Òkpì‐ɛ̀ ní dzɛ́: Ìɖì-korogbo-éwo#ɛ́. 34Kíbí à tó ńbɛ̀#ɛ́, à mú ewé kíkorò-kã̀ ɖà nɔ́tí si, tsí à ń fú Yèésù ní kó mɔ. Tsí ó tɔ́ɔrí, tsí kɔ̀ ní òŋu kàkó mɔ. 35Tsí à kã̀ã́ si ńǹtá-egi-ìɖáàgàlàdzà. Tsí náànyì-bɛ́ɛ̀#ɛ́, à wà wò ní àŋa kó kpɛ̃́ ìwɔ̀ra‐ɛ̀ ŋa náàŋírĩ-ara-ŋa, tsí à ɖìbò‐ɛ̀, tsí ká ma yèé kṹnukṹ nákó kɛ́#ɛ́.#27:35 Ìwé-Orĩ ŋa 22:19 (Psaumes 22:19) 36Tsí à dzokó ńbɛ̀ si, tsí wà ɖèé. 37Tsí àbi yèé ó dzɛ, tsí à kpaá#á, à kɔɔ́ si ńǹtá-ɔkpɔ̃́-kã̀, tsí kã̀ã́ si ńǹgbèrí-éwo‐ɛ̀. À kɔɔ́ si ńǹtá-ɔkpɔ̃́#ɛ́ ní: Ɛnɛ yèé ní dzɛ́ Yèésù, ólú-ɔma-Ìyúɖà† ŋa#á. 38Tsí à kã olè-íbàɖí méèdzì gbo si ńǹtá-egi-ìɖáàgàlàdzà kã̀kã̀ gbèé. À kã ɔ̀nyà-kã̀ si nákpálà-àwóòtã́‐ɛ̀, tsí kã ɔ̀nyà-kã̀ gbo si nákpálà-àwóòsì‐ɛ̀. 39Tsí ɛnɛ yèé ŋa wà gbà ńbɛ̀#ɛ́, à náa wà ɖɔ̃́ gɛ̀gɛ̀wúlɛ̀ fúu, tsí wà búu, 40tsí wà wí fúu ní: Òŋu yèé ní òŋu nákó fɔ́ ilé-Ɔ̀ɖáyé†#ɛ́, tsí sɛ̃̀ mú ɔdzɔ́ mɛ́ɛta, tsí ń maá#á ńnɛ̀ɛ́ɛ̀? Bí ó dzɛ́ Ɔma bíbí-Ɔ̀ɖáyé bɛ́ɛ̀ ìɖéǹɖè ni òŋu ká‐ɛ̀ kó gba ara‐ɛ̀ là, tsí kó tì ti ńǹtá-egi-ìɖáàgàlàdzà#á wá káyí. 41Bɛ́ɛ̀ ké ní akɔ́nɛ nɛ́kpa-Ɔ̀ɖáyé† ŋa òŋu onùgbó-ìlú#ɛ́ ŋa má nára-onùgbó-atsɛbɔ-Ɔ̀ɖáyé† ŋa gbo náa wà rã́ã̀rĩ́ fúu#ɛ́ ńnɛ̀ɛ́. 42Tsí à náa wà fɔ̀ ní: Ó gba olòmírɛ̃̀ ŋa là nɔ̀, tsí kàkó nyáa gba ara‐ɛ̀ làà? Kò tsi ó dzɛ́ ólú-ɔma-Ìsàràyɛ́lì† ŋaà? Kó tì ńǹtá-egi-ìɖáàgàlàdzà#á wá ńǹkɛ̀ɛ́, tsí àŋa kó gbàá gbɔ́. 43Ó kɔ ara‐ɛ̀ dzɔ̀ɔ́ fú Ɔ̀ɖáyé, tsí ó fɔ̀ ní: Òŋu dzɛ́ Ɔma bíbí-Ɔ̀ɖáyé. Báàyí#ɛ́, bí Ɔ̀ɖáyé dzáfɔ̀‐ɛ̀ ni kó gbàá là.#27:43 Ìwé-Orĩ ŋa 22:9 (Psaumes 22:9) 44Tsí olè-íbàɖí méèdzì yèé à kã̀ gbèé si ŋa#á gbo wà búu bɛ́ɛ̀ ké.

Yèésù kú

(Mákò 15:33-41; Lúkà 23:44-49; Yòhánà 19:28-30)

45Nóòsã́ gãgã tóɖóɖóó#ɛ́, òkùkù lákṹ-kã̀ kù kpìrìm ńbɛ̀#27:45 Ìwé kã̀ŋa fɔ̀ bí ní: “ńǹlú-Ìsàràyɛ́lì#ɛ́”. kpó títí fú odzúùrɔ̃̀-alɛ́. 46Tsí ńǹwèrè-odzúùrɔ̃̀-alɛ́#ɛ́, Yèésù ɖúgbe kũkũ ní: Èlòyí, Èlòyí, làmá sàbàkìtánì? Òkpì‐ɛ̀ ní dzɛ́ ní: “Ɔ̀ɖáyé-mi, Ɔ̀ɖáyé-mi, kí tse tsí ò kɔ̀ mí dzɔ̀ɔ́ ná?”#27:46 Ìwé-Orĩ ŋa 22:2 (Psaumes 22:2)

47Ńbɛ̀ɛ́, ɔ̀nyà kã̀ŋa náàŋírĩ-ɛnɛ yèé wà bɛ̀ ŋa#á gbɔ́ kíbí ó wà ɖúgbe#ɛ́, tsí à ní: Ó wà kpe Èlíyà†. 48Gbòkã́ gé#ɛ́, ɔ̀nyà-kã̀ sáré náàŋírĩ-ŋa, tsí kɛ́ ɔ̀gbɔ̀gbɔ́-kã̀, tsí ń bɔ̀ nɔ́tí kíkã, tsí ń kã̀ nɔ́ɔ̀kpá-kã̀, tsí nàá fú Yèésù ní kó kpèé mɔ. 49Tsí ɛnɛ-àtíbɔ̀ ŋa ní: Àŋa kó ɖóro, tsí àŋa kó rí káyí ní Èlíyà nákó wáa gbàá làà? 50Tsí Yèésù tɔ́ ɖúgbe kũkũ ró gé, tsí mímí‐ɛ̀ dzilɛ̀.

51Tsí náàsòkò nyɛ̀ŋɛ̀ gbòkã́#á, atsɔ-ìbònà#27:51 Atsɔ#ɛ́ ɖá ilé-Ɔ̀ɖáyé#ɛ́ méèdzì náàkpàtá òŋu ìɖòɖò si ni.-ilé-Ɔ̀ɖáyé#ɛ́ ya méèdzì gbàragbàra wáa kãlɛ̀. Ilɛ̀ mì, tsí òkúta ŋa gbo là. 52Ifò-òkúta#27:52 Ifò-òkúta ŋa#á, érì ŋa ni. ŋa gbo tsí dzɔ̀ɔ́, tsí kpíkpɔ̀-ɛnɛ yèé ŋa dzɛ́ ti Ɔ̀ɖáyé, tsí ti kú lɔ ŋa#á sɛ̃̀ dzí wá náyé. 53Tsí náànyìwà#á, kíbí Yèésù sɛ̃̀ dzí ti náàŋírĩ-òkú ŋa wá náyé#ɛ́, à fùɖá ńfò-òkú ŋa, tsí wɔ̀ lɔ ńYèrúsàlɛ́mì, ìlú-Ɔ̀ɖáyé#ɛ́, tsí ɔ̀nyà kpíkpɔ̀ rí ŋa.

54Ɔ̀gã́-sɔ́dzà-ɛnɛ-Rómà† ŋa#á òŋu sɔ́dzà àtíbɔ̀ yèé wà ɖe Yèésù báa ŋa#á rí kíbí ilɛ̀ mì#ɛ́, tsí rí iŋɛ́ yèé tse ŋa#á gbo. Kíbí à rí bɛ́ɛ̀#ɛ́, dzidzi mú ŋa, tsí à wà fɔ̀ ní: Ɛnɛ yèé bɛ́ ni Ɔma bíbí-Ɔ̀ɖáyé ìɖéǹɖè ni.

55Ńǹwèrè nyɛ̀ŋɛ̀#ɛ́, ɔnɔbɛ̃̀ɛ̃ kpíkpɔ̀ gbo wà bɛ̀. À ti wà tɛ̀ náànyì-Yèésù, tsí wà dzítsɛ́ fúu títí ti nérè-Gàlìlé. Tsí à káà ɖóro si nóòtèrè si, tsí wà wòrã. 56Màríyà† ti ìlú-Màɖàlá òŋu Màríyà† ìnà-Yàkúbù òŋu Yòsɛ́fù† má nára-ìnà-ɔma-Sèbèɖé ŋa gbo wà náàŋírĩ-ɔnɔbɛ̃̀ɛ̃ ŋa#á.

À ri Yèésù

(Mákò 15:42-47; Lúkà 23:50-56; Yòhánà 19:38-42)

57Alɛ́lɛ́ lɛ́, tsí olówó-ìlú-Àrìmàté-kã̀ wáa tó. À náa kpèé ní Yòsɛ́fù†. Òŋu gìɖì gbo ti ɖi atɛ̀náànyì-Yèésù si. 58Tsí ó lɔ ńɖi-Kpìlátò†, tsí káà wí fúu ní: Kó fú òŋu nɔ́ɔ̀nà, tsí òŋu kó kɛ́ òkú-Yèésù lɔ káà rì.

Tsí Kpìlátò nya oŋù ní ká káà kɛ́ɛ fúu. 59Tsí kíbí Yòsɛ́fù gba òkú#ɛ́, ó mú àlà fũfũ pílípílí-kã̀ wée, 60tsí kɛ́ɛ lɔ káà ń tɛ́ néèkpò-kã̀. Yòsɛ́fù ní fɔ̀, tsí à ɖɛ̃ èkpò#ɛ́ si ńnɔ́-òkúta#á, tsí ká wáa ń ri òŋu ká‐ɛ̀#ɛ́. Ó ɖi, à kò mú ɔ̀nyà-kã̀ kpókpó tɛ́ ńnɛ̀ wòrí. Tsí ó rí òkúta lákṹ tɛ̀rɛ̀ɛ̀-kã̀ ɖí arũ-ɛ̀, tsí ǹɖe lɔ. 61Màríyà† ti ìlú-Màɖàlá òŋu Màríyà†-èkéèdzì gbo wà bɛ̀, tsí à dzɔ́ dzokó ńwádzú-érì#ɛ́ si.

Sɔ́dzà ŋa ɖe èkpò-Yèésù

62Ɔdzɔ́ yèé à náa ń kpaɖí si fú ɔdzɔ́-ìmíra†#á wáa lɔ, tsí ó ɖi ńlɛ̀má‐ɛ̀, tsí onùgbó-atsɛbɔ-Ɔ̀ɖáyé† ŋa òŋu ɔma-ɛgbɛ́-Fàrísì† ŋa, à dzɔ́ lɔ ńɖi-Kpìlátò†, 63tsí wà fɔ̀ fúu ní: Ɔ̀gã́! Àŋa wà tédzú ní ńǹwèrè yèé olóòɖòbò nyɛ̀ŋɛ̀ wà náàyɛ̀ si#ɛ́, ó fɔ̀ si ní òŋu nákó sɛ̃̀ dzí ti náàŋírĩ-òkú ŋa wá náyé nɔ́dzɔ́-ɛ̀kɛ́ɛta‐ɛ̀. 64Ó ɖi, kó nya oŋù, tsí ká lɔ káà ɖe èkpò‐ɛ̀ títí fú ɔdzɔ́ mɛ́ɛta#á, àtsùgbée ɔmatsɛ́‐ɛ̀ ŋa kó máa lɔ káà tsole òkú#ɛ́, tsí fɔ̀ fú ìlú#ɛ́ ní ó dzí ti náàŋírĩ-òkú ŋa wá náyé. Tsí òɖòbò yèé bɛ́ nákó láre ti dzɔ̀ɔ́.

65Tsí Kpìlátò fɔ̀ fú ŋa ní: Ká gbà! Sɔ́dzà ŋa ńnɛ̀ɛ́, kíbí à mà ní àŋa nákó nyáa ɖe èkpò#ɛ́ gbà gé#ɛ́, ká lɔ káà ɖèé.

66Tsí à lɔ káà ɖe èkpò#ɛ́. À kɛ́ òkúta tɛ̀rɛ̀ɛ̀ yèé wà nárũ-èkpò#ɛ́, tsí ń ta arũ-ɛ̀ ɖí, tsí ɖíìsèdzè‐ɛ̀, àtsùgbée bí à tsíi ni ká mà. Tsí à mú sɔ́dzà ŋa si nóòkpì‐ɛ̀, tsí ká wà ɖèé.

Currently Selected:

Màtéwò 27: ngl

Highlight

Copy