Màtéwò 25

Yèésù mú èkíɖã maá kã̀ŋa kpòwe

1Yèésù wà wíìnyɛ̀ làkóò, tsí ó ní ńǹwèrè yèé Ɔ̀ɖáyé nákó wáa dzoyè#ɛ́ wà kíbí òwe-kã̀ yèé à mú èkíɖã maá kã̀ŋa kpa#á. Èkíɖã ŋa#á tɔ́ kãnɖé-òsùmà banɛ́, tsí lɔ káà ɖóro ɖe ɔkɔláya-kã̀. 2Náàŋírĩ-èkíɖã ŋa#á, mɛ́ɛrú kò dziná. Ó ɖi, mɛ́ɛrú nɛ́ ifɛ̀ɛ́nɔ́. 3Èkíɖã yèé kò dziná ŋa#á kɛ́ kãnɖé-òsùmà-ŋa banɛ́ náàrì tse àɖɛ̃́ banɛ́. 4Ó ɖi, èkíɖã yèé nɛ́ ifɛ̀ɛ́nɔ́ ŋa#á òŋu tse àɖɛ̃́ ɖà nágbè banɛ́ má kãnɖé-òsùmà-ŋà ŋa. 5Ɔkɔláya#á kã́ã̀nyì, kò yaà wá, tsí orũ kũ àŋa kpó, tsí à sɔ̃rũ lɔ.

6Ó wáa ɖi ńǹŋàáŋà ńǹkɛ̀ɛ́, tsí à gbɔ́ igbe-kã̀ ní: Ɔkɔláya#á bàa, ká fùɖá lɔ káà kpàɖé‐ɛ̀ ooò.

7Tsí èkíɖã ŋa#á kpó ɖádzí, tsí kṹnukṹ wà tɔ́tse kãnɖé‐ɛ̀. 8Tsí èkíɖã yèé kò dziná ŋa#á wà fɔ̀ fú yèé nɛ́ ifɛ̀ɛ́nɔ́ ŋa#á ní: Kãnɖé-àŋa bàkó kú. Ó ɖi, ká fú àŋa náàɖɛ̃́ oɖé.

9Tsí èkíɖã yèé nɛ́ ifɛ̀ɛ́nɔ́ ŋa#á gbo dzɔ́ŋù ní: Kpɛ́rɛ́! Àɖɛ̃́#ɛ́ kàkó tó fú àŋa kpó. Ó ɖi, ká tédzú lɔ ńɖi-atàɖɛ̃́ ŋa káà sú àɖɛ̃́ fú ara-ŋa.

10Kòdziná ŋa#á lɔ náàɖɛ̃́#ɛ́ súsú si, tsí ɔkɔláya#á wáa tó. Tsí èkíɖã olí-ifɛ̀ɛ́nɔ́ yèé kpaɖí si ŋa#á wɔ̀ lɔ báa ńkpáfɛ yèé à wà gbɛ̃́ àbitɔ̃#ɛ́, tsí à mú èkũ̀ kã̀. 11Náànyìwà ńǹkɛ̀ɛ́, èkíɖã àtíbɔ̀ ŋa gbo wáa tó, tsí wà ɖúgbe ní: Ɔ̀gá! Ɔ̀gá! Kó wáa tsí èkũ̀ fú àŋa.

12Tsí ɔkɔláya#á gbo wà dzɔ́ŋù fú ŋa ní: Òŋu wà wí òtítɔ́ fú ŋa ní fee, òŋu kò mà ŋá.

13Tsí Yèésù fɔ̀ má ɛ̀rɔ́#ɛ́ ní: Ó ɖi, ká kpaɖí si. Iŋɛ́ yèé tse#ɛ́, à kò ma ɔdzɔ́#ɛ́, tsí à kò ma ìwèrè#ɛ́ gbo.

Yèésù mú àtsìtsɛ́ mɛ́ɛta kã̀ŋa kpòwe

(Lúkà 19:11-27)

14Yèésù wà kpòwe-kã̀ fú ŋa ró. Ó ní: Kíbí Ɔ̀ɖáyé nákó wáa dzoyè gbà#á wà kíbí ɛ̀rɔ́-kã̀ yèé à kpa ti nára-olílé-kã̀#á. Olílé#ɛ́ bàkó lɔ nɔ́ɔ̀nà, tsí ó kpe àtsìtsɛ́‐ɛ̀ ŋa, tsí mú ŋa si nárũ-iŋɛ́‐ɛ̀ ŋa. 15Ó mú ìmarũ yèé kṹnukṹ nákó nyáa tɔ́dzú#ɛ́ bɔwɔ́‐ɛ̀. Ó mú owó-ɛyɔ ɛyɔ ɔ̀kɛ́ kíkɔ̃́ mɛ́ɛrú bɔwɔ́-àtsìtsɛ́-kã̀, tsí ó mú kíkɔ̃́ méèdzì bɔwɔ́-enìkéèdzì gbo, tsí mú kíkɔ̃́-kã̀ bɔwɔ́-ɛnɛ-ɛ̀kɛ́ɛta gbo. Tsí ó ǹɖe lɔ nɔ́ɔ̀nà si. 16Àtsìtsɛ́ yèé gba owó-ɛyɔ ɛyɔ ɔ̀kɛ́ kíkɔ̃́ mɛ́ɛrú#ɛ́ lɔ káà múu tsòwò gbòkã́, tsí ó bí owó-ɛyɔ ɛyɔ ɔ̀kɛ́ kíkɔ̃́ mɛ́ɛrú òmírɛ̃̀ máa fúu. 17Bɛ́ɛ̀ ké ní àtsìtsɛ́ yèé gbo gba ɔ̀kɛ́ kíkɔ̃́ méèdzì#ɛ́ gbo lo tɛ̀ɛ̀#ɛ́ ńnɛ̀ɛ́, tsí ó bí ɔ̀kɛ́ kíkɔ̃́ méèdzì òmírɛ̃̀ máa fú òŋu gbo. 18Ó ɖi, àtsìtsɛ́ yèé gba ɔ̀kɛ́ kíkɔ̃́ ɔ̀kã̀ntso#ɛ́ lɔ káà ɖɛ̃lɛ̀, tsí mú owó-ɔ̀gá‐ɛ̀ rì ńnɛ̀. 19À wà si bɛ́ɛ̀ títí ó wáa ɖi nɔ́dzɔ́-kã̀ ńǹkɛ̀ɛ́, tsí ɔ̀gá#á bɔ̀ wá. Kíbí ó bɔ̀ wá#á, ó wà bèrè ní kí à mú owó-òŋu tse si fú òŋu.

20Ńbɛ̀ɛ́, àtsìtsɛ́ yèé gba owó-ɛyɔ ɛyɔ ɔ̀kɛ́ kíkɔ̃́ mɛ́ɛrú#ɛ́ wá, tsí banɛ́ owó-ɛyɔ ɛyɔ ɔ̀kɛ́ kíkɔ̃́ mɛ́ɛrú òmírɛ̃̀ máa wá, tsí wà fɔ̀ ní: Ɔ̀gá! Ó mú owó-ɛyɔ ɛyɔ ɔ̀kɛ́ kíkɔ̃́ mɛ́ɛrú si ńɖɔ̀-òŋu. Ó ɖi, òŋu rí ɔ̀kɛ́ kíkɔ̃́ mɛ́ɛrú òmírɛ̃̀ si ńǹtá‐ɛ̀, àŋa ní.

21Tsí ɔ̀gá‐ɛ̀ fɔ̀ fúu ní: Ǹbó tɔ̀ɔ̀! Àtsìtsɛ́-ire ní ó dzɛ́#ɛ́. Ó ɖi, kíbí ó tse òtítɔ́ bɛ́ɛ̀ ńŋɛ́ tsígíɖí yèé òŋu kɛ́ fúu#ɛ́, òŋu nákó múu si nárũ-òlárèbɛ́ɛ̀. Kó wáa táyè bá òŋu.

22Àtsìtsɛ́ yèé gba owó-ɛyɔ ɛyɔ ɔ̀kɛ́ kíkɔ̃́ méèdzì#ɛ́ gbo wáa tó, tsí ní: Ɔ̀gá! Ó mú owó-ɛyɔ ɛyɔ ɔ̀kɛ́ kíkɔ̃́ méèdzì si ńɖɔ̀-òŋu. Òŋu rí ɔ̀kɛ́ kíkɔ̃́ méèdzì òmírɛ̃̀ si ńǹtá‐ɛ̀, àŋa ní.

23Tsí ɔ̀gá‐ɛ̀ fɔ̀ fúu ní: Ǹbó tɔ̀ɔ̀! Àtsìtsɛ́-ire ní ó dzɛ́#ɛ́. Kíbí ó tse òtítɔ́ ńŋɛ́ tsígíɖí yèé òŋu kɛ́ fúu#ɛ́, òŋu nákó múu si nárũ-òlárèbɛ́ɛ̀. Kó wáa táyè bá òŋu.

24Àtsìtsɛ́ yèé gba owó-ɛyɔ ɛyɔ ɔ̀kɛ́ kíkɔ̃́ ɔ̀kã̀ntso#ɛ́ gbo wáa tó, tsí ní: Ɔ̀gá! Òŋu mà ní ìlò‐ɛ̀ le. Dzídzɛ yèé kò gbɛ̃̀#ɛ́ ní náa káà kpaɖí#ɛ́, tsí egi yèé kò lɛ́ gbo#ɛ́, èso‐ɛ̀ ní náa se#ɛ́. 25Ńnɛ̀ ní òŋu sá fúu, tsí òŋu káà ɖɛ̃lɛ̀, tsí mú owó‐ɛ̀ rì ńnɛ̀#ɛ́. Ó ɖi, òŋu ní, kó gba iŋɛ́‐ɛ̀.

26Tsí ɔ̀gá‐ɛ̀ wà dzɔ́ŋù fúu ní: Àtsìtsɛ́-íbàɖí ní ó dzɛ́#ɛ́, tsí ó dzɛ́ ɔ̀gɛ̃lɔ́ɔ̀gɛ̃-kã̀ gbo. Ó ɖi, kò tsi ó mà ní dzídzɛ yèé òŋu kò gbɛ̃̀#ɛ́ ní òŋu náa kpaɖí#ɛ́, tsí egi yèé òŋu kò lɛ́ gbo#ɛ́, èso‐ɛ̀ ní òŋu náa se#ɛ́ɛ̀? 27Ó má mú owó-òŋu si ńɖi-atsàréè-owó ŋa ńǹkɛ̀ɛ́ nɔ̀! Tsí kíbí òŋu bɔ̀ wá#á, owó-òŋu má bí si ńǹtá‐ɛ̀, tsí òŋu má káà gba iŋɛ́-òŋu òŋu èrè‐ɛ̀.

28Tsí ó fɔ̀ máa ní: Ká gba owó-ɛyɔ ɛyɔ ɔ̀kɛ́ kíkɔ̃́-kã̀#á nɔ́wɔ́‐ɛ̀, tsí ká ń máa fú ɛnɛ yèé nɛ́ maá#á. 29Iŋɛ́ yèé tse#ɛ́, ɛnɛ yèé nɛ́#ɛ́, à nákó fúu máa títí nákó tsɔ̀ɔ́ kũ̀. Ó ɖi, ɛnɛ yèé kò nɛ́#ɛ́, oɖé tsígíɖí yèé gìɖì wà fúu#ɛ́, à nákó gbàá nɔ́wɔ́‐ɛ̀. 30Ó ɖi, ti nára-àtsìtsɛ́ yèé kò wà nɔ́ɔ̀kã̀ nyɛ̀ŋɛ̀#ɛ́, ká lée lɔ nóòɖe nóòkùkù sã́ŋú sã́ŋú. Ńbɛ̀ ní nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á.

Ɛnɛ yèé ɔ̀nyà bí#ɛ́ nákó wáa kpɛdzɔ́ ńǹtã̀ntã́-ayé#ɛ́

31Ńǹwèrè yèé òŋu, Ɛnɛ yèé ɔ̀nyà bí#ɛ́†, òŋu nákó wá ńnɔ́-iyì-òŋu òŋu adzítsɛ́-ɔ̀rɔ̃†-òŋu ŋa#á, òŋu nákó dzokó náàntã̀-oyè-òŋu si òŋu iyì. 32Tsí ìlú ŋa kpó ńǹtalɛ̀#ɛ́ nákó wáa ɖóro ńwádzú-òŋu, tsí òŋu nákó nya ɔ̀nyà ŋa si níìkã̀ fú enìkéèdzì-ŋa ńǹrɔ́-kíbí aró-àgùɖã̀ náa nya àgùɖã̀ ŋa si níìkã̀ fú abó ŋa#á. 33Òŋu nákó mú àgùɖã̀ ŋa si náàwóòtã́-òŋu, tsí mú abó ŋa si náàwóòsì-òŋu. 34Tsí òŋu ólú, òŋu nákó fɔ̀ fú ɛnɛ yèé wà náàwóòtã́-òŋu ŋa#á ní: Àŋa ní Boba-òŋu tu kùsɛ̀ɛ̀ fú#ɛ́. Ó ɖi, ká wá, tsí Boba-òŋu kó dzoyè si ńǹtá-ŋa ńbí ó ti tɔ́tse si fú ŋa títí ńǹɖònɖálɛ̀-ayé#ɛ́. 35Iŋɛ́ yèé tse#ɛ́, ebi kpa òŋu, tsí à fú òŋu, tsí òŋu dzɛ. Àŋgbɛ̃ gbɛ̃ òŋu, tsí à fú òŋu, tsí òŋu mɔ. Òŋu sɔ̀ ŋá náàledzò, tsí à gba òŋu. 36Òŋu wà néèwò, tsí à fú òŋu néèbò-ara. Òŋu wà rɔ̃̀, tsí à tɔ́dzú-òŋu. Tsí òŋu wà nɛ́ɛ̀ŋà si gbo, tsí à kpalɛwo òŋu.

37Ńbɛ̀ɛ́, atsòtítɔ́-Ɔ̀ɖáyé ŋa#á nákó dzɔ́ŋù ní: Ɔ̀gá! Ńǹwèrè yèésí àŋa ríi, tsí ebi wà kpaá, tsí àŋa fúu, tsí ó dzɛ nàmí ńǹwèrè yèésí àŋa ríi, tsí àŋgbɛ̃ wà gbɛ̃ɛ̃́, tsí àŋa fúu, tsí ó mɔ? 38Ńǹwèrè yèésí àŋa ríi, tsí ó sɔ àŋa náàledzò, tsí àŋa gbàá nàmí ńǹwèrè yèésí àŋa ríi, tsí ó wà néèwò si, tsí àŋa fúu néèbò-ara? 39Ńǹwèrè yèésí ró àŋa ríi, tsí ó wà rɔ̃̀ nàmí ńǹwèrè yèésí ó wà nɛ́ɛ̀ŋà si, tsí àŋa wáa kpalɛ̀wòó?

40Tsí òŋu ólú, òŋu nákó dzɔ́ŋù fú ŋa ní: Òŋu wà wí fú ŋa ní fee, ńǹwèrè yèé à wà tse bɛ́ɛ̀ fú ɔ̀kã̀-atɛ̀náànyì-òŋu ŋa yèé à kò wà kã̀ si náàŋírĩ-ɔ̀nyà ŋa#á, òŋu ní à wà tseé fú#ɛ́.

41Tsí òŋu nákó fɔ̀ fú ɛnɛ yèé wà náàwóòsì-òŋu ŋa#á ní: Ɔ̀ɖáyé ré fú ŋa! Ká ǹɖe ńɖɔ̀-òŋu bí, tsí ká sɔ́ lɔ sã́ŋú sã́ŋú, tsí ká lɔ ńná-àrìtã́ yèé Ɔ̀ɖáyé tɔ́tse si fú Ètsù† òŋu adzítsɛ́‐ɛ̀ ŋa#á. 42Iŋɛ́ yèé tse#ɛ́, ebi kpa òŋu, tsí à kò fú òŋu, tsí òŋu kó dzɛ. Àŋgbɛ̃ gbɛ̃ òŋu, tsí à kò fú òŋu, tsí òŋu kó mɔ. 43Òŋu sɔ̀ ŋá náàledzò, tsí à kò gba òŋu. Òŋu wà néèwò si, tsí à kò fú òŋu néèbò-ara. Òŋu wà rɔ̃̀, tsí à mú òŋu si nɛ́ɛ̀ŋà gbo, tsí à kò kpalɛwo òŋu. 44Tsí àŋa gbo à nákó dzɔ́ŋù ńǹkɛ̀ɛ́ ní: Ɔ̀gá! Ńǹwèrè yèésí àŋa ríi, tsí ebi wà kpaá nàmí àŋgbɛ̃ wà gbɛ̃ɛ̃́ nàmí ó sɔ àŋa náàledzò nàmí ó wà néèwò si nàmí ó wà rɔ̃̀ nàmí ó wà nɛ́ɛ̀ŋà si, tsí àŋa kò mɔ́wɔ́ gbè fúu?

45Tsí òŋu ólú, òŋu nákó dzɔ́ŋù fú ŋa ní: Òŋu wà wí fú ŋa ní fee, ńǹwèrè yèé à kò wà tse bɛ́ɛ̀ fú ɛnɛ yèé ŋa à kò wà kã̀ si náàŋírĩ-ɔ̀nyà ŋa#á, òŋu ní à kò tseé fú#ɛ́. 46Tsí à nákó fɛtí fú ŋa títí lɔ náàrìtã́. Ó ɖi, ɛnɛ-àtíbɔ̀ ŋa yèé tse awù-Ɔ̀ɖáyé#ɛ́ nákó rí àyɛ̀-àrìtã́.

Currently Selected:

Màtéwò 25: ngl

Highlight

Copy