Màtéwò 24

Yèésù wà fɔ̀ ní ilé-Ɔ̀ɖáyé nákó wáa fɔ́ kpó

(Mákò 13:1-2; Lúkà 21:5-6)

1Yèésù fùɖá nɔ́gbà-ilé-Ɔ̀ɖáyé#ɛ́, tsí làkóò. Kíbí ó làkóò#ɛ́, ɔmatsɛ́‐ɛ̀ ŋa tìmá‐ɛ̀, tsí wà mú kíbí à malé-Ɔ̀ɖáyé†#ɛ́ tó gbà#á kpó ɖíre fúu. 2Tsí Yèésù tsí arũ, tsí wà fɔ̀ fú ŋa ní: Kò tsi à wà rí iŋɛ́ nyɛ̀ŋɛ̀ ŋa kpóò? Ó ɖi, òŋu wà wí fú ŋa ní fee, à nákó wáa fɔ́ ŋa kpó títí kàkó bɔ élè-kã̀ gìɖì bí ró.

Yèésù wà fɔ iŋɛ́ yèé ŋa nákó wáa tse ńǹtã̀ntã́-ayé#ɛ́

(Mákò 13:3-13; Lúkà 21:8-19)

3Yèésù káà dzokó ńǹtá-òkè-Òlífì† si. Kíbí ó dzokó si#ɛ́, ɔmatsɛ́‐ɛ̀ ŋa sɔ̃́ŋú gé tìmá‐ɛ̀, tsí wà bèrèé ní: Ńǹwèrè yèésí iŋɛ́ nyɛ̀ŋɛ̀ ŋa nákó wáa tse? Tsí kí àŋa nákó rí, tsí nákó nyà ɖíre fú àŋa ní wíwá‐ɛ̀ òŋu ìtã̀ntã́-ayé#ɛ́ tó? Kó fɔ̀ɔ́ fú àŋa.

4Tsí Yèésù dzɔ́ŋù fú ŋa ní: Ká tsɔ́ éwo-ara-ŋa rere, tsí ɔ̀nyà-kã̀ kpókpó kó máa rú ŋa. 5Iŋɛ́ yèé tse#ɛ́, ɔ̀nyà kpíkpɔ̀ nákó wáa wá, tsí ɛnɛ kṹnukṹ nákó kɛ́ ɛ́kɔ-òŋu, tsí wà fɔ̀ ní òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á. Tsí à nákó rú ɔ̀nyà kpíkpɔ̀. 6À nákó wà gbɔ́ ìdzã̀mà-ogu nàmí à nákó wà gbɔ́ ní à bàkó dzogu. Ó ɖi, odzo kó máa tse ŋá. Iŋɛ́ yèé tse#ɛ́, ó wà ní iŋɛ́ nyɛ̀ŋɛ̀ ŋa kó tse. Ó ɖi, ìtã̀ntã́-ayé#ɛ́ kò sì tó wòná. 7Ìlú ŋa nákó ǹɖe, tsí wà dzà bá ara-ŋa, tsí ìdzɔba ŋa gbo nákó ǹɖe, tsí wà dzà bá ara-ŋa.#24:7 Ìwé-Yèsáyà 19:2 (Ésaïe 19:2) Tsí ebi nákó wà dzà, tsí ilɛ̀ gbo nákó wà mì ńǹɖì ńǹɖì ŋa. 8Tsí iŋɛ́ nyɛ̀ŋɛ̀ ŋa kpó wà kíbí, bí ɔnɔbɛ̃̀ɛ̃ bàkó bíma ni inɔ́ náa tseé náàtsɛ̃̀tsɛ̃̀ tã́ná kó mú ɔma#á ɖà#á ni.

9Náàsòkò nyɛ̀ŋɛ̀#ɛ́, à nákó mú ŋa fú, tsí ká tsoró bá ŋa, tsí kpa ŋá nóòkú. Ìlú kpó nákó nyà ŋá kãdzú náàtsùgbé-òŋu. 10Àtsùgbée bɛ́ɛ̀ ní kpíkpɔ̀-ŋa kàkó karalé si ńǹtá-òŋu ró, tsí à nákó wà mú ara-ŋa fú, tsí nya ara-ŋa kãdzú gbo#ɛ́ ńnɛ̀ɛ́. 11Atsìké-agbáfɔ̀-Ɔ̀ɖáyé fɔ̀ kpíkpɔ̀ nákó wáa wá, tsí mú ɔ̀nyà kpíkpɔ̀ nɔ̀. 12Tsí kíbí íbàɖí tsítse nákó wà kpɔ̀ máa tó gbà#á, àmúɖɔ̃̀-ɔ̀nyà kpíkpɔ̀ nákó wà nyà bɔ̀. 13Ó ɖi, ɛnɛ yèé nákó sì gbódzú títí lɔ ńǹtã̀ntã́#á, Ɔ̀ɖáyé nákó gbàá là. 14À nákó dzíkɔ̀ ɖíɖɔ̃̀ yèé bɛ́ ti nára-kíbí Ɔ̀ɖáyé nákó dzoyè gbà náyé gbaŋgba#á kpó, àtsùgbée ká nya àyídzá‐ɛ̀ fú ìlú kpó. Tsí ayé yèé bɛ́ nákó tã́ ńǹkɛ̀ɛ́.

Yèésù wà fɔ iŋɛ́ tsítsìíra yèé bàa ŋa#á

(Mákò 13:14-23; Lúkà 21:20-24)

15À nákó rí iŋɛ́ tsítsìíra yèé láre arũ fúnɛ#ɛ́, tsí nákó káà gbé náàkpàtá-ilé-Ɔ̀ɖáyé† si.#24:15 Ìwé-Ɖànìyɛ́lì 9:27, 11:31, 12:11 (Daniel 9:27, 11:31, 12:11) Iŋɛ́ nyɛ̀ŋɛ̀#ɛ́, Ɖànìyɛ́lì, agbáfɔ̀-Ɔ̀ɖáyé fɔ̀†, ti fɔ afɔ̀ kã̀ã́ si. Tsí ɛnɛ yèé wà kã ìwé yèé bɛ́#ɛ́, kó gbɔ́ òkpì‐ɛ̀ rere. Tsí bí à rí bɛ́ɛ̀ ná, 16ɛnɛ yèé ŋa wà nérè-Yùɖéyà#á, ká sá gu òkè ŋa lɔ. 17Tsí ɛnɛ yèé wà ńkpàtá si#ɛ́, kó máa wɔ̀ lɔ ńnɔ́-ilé‐ɛ̀ ní òŋu kó káà kɛ́ iŋɛ́-òŋu ŋa. 18Tsí ɛnɛ yèé gbo wà nóko si#ɛ́, òŋu gbo kó máa bɔ̀ wá ńlé ró ní òŋu bàkó wáa kɛ́ ìwɔ̀ra-otútù-òŋu. 19Ó ɖi, nɔ́dzɔ́ nyɛ̀ŋɛ̀#ɛ́, abefũ̀ ŋa òŋu ìnà-olɔ́ma tsígíɖí ŋa, ɛ̀rá rá ŋa! 20Ńbɛ̀ɛ́, ká wà wúùre, tsí kó máa dzɛ́ ńǹwèrè-òdzò òŋu otútù nàmí nɔ́dzɔ́-ìmíra† ní à wà sá wérí#ɛ́. 21Nɔ́dzɔ́-ɔdzɔ́ nyɛ̀ŋɛ̀#ɛ́, ɔ̀nyà ŋa nákó tse òfò kpíkpɔ̀. Ti títí ńǹkpìnkpìlɛ̀-ayé#ɛ́ títí wáa fú òníbɛ́#ɛ́, à kò rí òfò-ìrɔ́ nyɛ̀ŋɛ̀ wòrí. Tsí ti nɔ́dzɔ́ nyɛ̀ŋɛ̀ gbo#ɛ́, à kàkó rí ìrɔ́-bɛ́ɛ̀ gbo láyé ró. 22Ó má dzɛ́ ní Ɔlɔ́dzɔ́ kò ɖá ìwèrè-kã̀ si fú òfò#ɛ́ ní kó máa tse lárè bɛ́ɛ̀#ɛ́, ɔ̀nyà-kã̀ kpókpó kàá gbé náàyɛ̀. Ó ɖi, ó ɖá ìwèrè-kã̀ si fú òfò#ɛ́, àtsùgbée ɛnɛ yèé ó tsã̀ si ŋa#á ká máa tsɛ̀rá.

23Ńbɛ̀ɛ́, bí ɔ̀nyà-kã̀ fɔ̀ fú ŋa ní: Ká rí gé! Kírísítò Agbanɛlà wà ńbíbɛ́ nàmí ó wà ńbɛ̀, ká máa gbàá gbɔ́. 24Ó ɖi fee, ɔ̀nyà kã̀ŋa nákó wà wá, tsí wà tsòɖòbò ní àŋa ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, tsí ɔ̀nyà kã̀ŋa òŋu nákó dzɛ́ atsìké-agbáfɔ̀-Ɔ̀ɖáyé fɔ̀ ŋa. Àŋa kpó, à nákó wà tse iŋɛ́-àwùsì lákṹ lákṹ ŋa ńǹrɔ́ǹrɔ́, tsí wà ń rú ɔ̀nyà ŋa. À má bàkó nyáa rú ɛnɛ yèé Ɔ̀ɖáyé tsã̀ si ŋa#á gbo, à má rú ŋa. 25Ká rɛ̃tígbè! Òŋu ti fɔ̀ɔ́ si fú ŋa tsúwádzú ná.

26Ńbɛ̀ɛ́, bí à fɔ̀ fú ŋa ní: Ká rí gé! Ó wà nɔ́ɔ̀ɖã̀ si, ká máa lɔ. Nàmí bí à fɔ̀ fú ŋa ní: Ó ɖúkù si ńbí, ká máa gbàá gbɔ́. 27Ó ɖi, ńǹrɔ́-kíbí màmà náa bù ńǹgbèrí, tsí náa má ti négo-kã̀ wáa lɔ káà kpa négo-èkéèdzì‐ɛ̀#ɛ́, bɛ́ɛ̀ ké ní òŋu, Ɛnɛ yèé ɔ̀nyà bí#ɛ́† gbo, òŋu nákó wá gbà#á. 28Ńbí òkú-iŋɛ́-kã̀ wà gé#ɛ́, ńbɛ̀ ní igú ŋa gbo náa kpérí si#ɛ́.

Yèésù ní òŋu, Ɛnɛ yèé ɔ̀nyà bí#ɛ́, òŋu nákó wá

(Mákò 13:24-27; Lúkà 21:25-28)

29Nɔ́dzɔ́ nyɛ̀ŋɛ̀ ŋa gbòkã́#á, bí ìwèrè-òfò#ɛ́ wáa lɔ tã́#á, òkùkù nákó mú odzúùrɔ̃̀ mì, tsí òtsùkpá gbo kàkó rã̀ ró. Tsí àrã̀wo ŋa gbo nákó tsubú ti ńǹgbèrí wá ńlɛ̀, tsí odzúùrɔ̃̀ gbo, òtsùkpá gbo, àrã̀wo ŋa gbo, àŋa kpó, à nákó mì kpó dzìgìdzìgì. 30Tsí à nákó rí, tsí iŋɛ́-kã̀ nákó ɖíìsàmì fú ŋa ńǹgbèrí ti nára-òŋu, Ɛnɛ yèé ɔ̀nyà bí#ɛ́† ńǹkɛ̀ɛ́, tsí ìlú kpó ńǹtalɛ̀ bí nákó wà rã́ã̀bo, tsí à nákó rí òŋu, tsí òŋu nákó ti nɔ́ɔ̀rɔ̃ bàa ńnɔ́-irì. Òŋu nákó wá òŋu ikpá lákṹ-kã̀ òŋu iyì lákṹ-kã̀ gbo. 31Ikpè lákṹ-kã̀ nákó ɖɔ̃́, tsí òŋu, Ɛnɛ yèé ɔ̀nyà bí#ɛ́, òŋu nákó bɛ adzítsɛ́-ɔ̀rɔ̃†-òŋu ŋa lɔ náàdzàkáyé#ɛ́ kpó, lɔ nóòtã́, lɔ nóòsì, lɔ ńwádzú, lɔ náànyì, tsí ɔ̀nyà yèé Ɔ̀ɖáyé tsã̀ si ŋa kpó#ɛ́, ká kpè ŋá kpàɖé kpó, ti négo-ayé#ɛ́-kã̀ káà kpa négo-èkéèdzì.

Yèésù ní ɛ̀kɔ́ yèé egi-òrì ŋa wà tse fú ŋa#á, kó wà yé ŋa rere

(Mákò 13:28-31; Lúkà 21:29-33)

32Ɛ̀kɔ́ yèé egi-òrì ŋa wà tse fú ŋa#á, kó yé ŋa rere. Bí egi-òrì ŋa kpé rúrú#ɛ́, à náa mà ní ìwèrè-òdzò ní sɔ́má#á. 33Bɛ́ɛ̀ ké ní bí à wà rí iŋɛ́ nyɛ̀ŋɛ̀ ŋa kpó#ɛ́, àŋa gbo ká mà ní ìwèrè sɔ́má, tsí òŋu, Ɛnɛ yèé ɔ̀nyà bí#ɛ́†, òŋu kó dzoyè. Òŋu ti tó náànkpã̀nàkũ̀ ná. 34Òŋu wà wí òtítɔ́ fú ŋa ní fee, ɔma-ìsɛ̃̀ɛ̃́ ŋa kàkó kú tã́ kpó tã́ná iŋɛ́ nyɛ̀ŋɛ̀ ŋa kpó nákó tse. 35Ilɛ̀ gbo, ìgbèrí gbo, àŋa kpó, à nákó wáa nɔ̀ ǹɖe. Ó ɖi, afɔ̀ tòŋu ŋa nákó wà si títí lɔ.

Ɔ̀ɖáyé òŋu níìkã̀ntso gé ní ma ɔdzɔ́-ìtã̀ntã́-ayé#ɛ́

(Mákò 13:32-37; Lúkà 21:34-38)

36Ó ɖi, ɔ̀nyà-kã̀ kpókpó kò ma ɔdzɔ́-wíwá-òŋu nàmí ńǹwèrè yèé òŋu nákó wá#á. Adzítsɛ́-ɔ̀rɔ̃† ŋa gìɖì gbo kò màá, tsí Ɔma bíbí-Ɔ̀ɖáyé gìɖì gbo kò màá. Ó ɖi, Ɔ̀ɖáyé Boba, òŋu níìkã̀ntso gé ní màá#á. 37Ó ɖi òŋu, Ɛnɛ yèé ɔ̀nyà bí#ɛ́†, nɔ́dzɔ́ yèé òŋu nákó wá#á, ɔdzɔ́ nyɛ̀ŋɛ̀ nákó wà kíbí ìwèrè-Nòwá† gbo bɛ́ ni. 38Ńǹwèrè-Nòwá#á, ɔ̀nyà ŋa wà dzɛ, tsí wà mɔ. Tsí olí-aya wà nɛ́, tsí à wà mú ɔma gbo fú ɔkɔ títí fú ɔdzɔ́ yèé Nòwá ǹɖe, tsí wɔ̀ nɔ́kɔ̃̀-odzómi#ɛ́. Tsí òdzò lákṹ-kã̀ rɔ̀ títí omi kɔ̃́ ìtalɛ̀#ɛ́ kpó rɔ̃gbɔ̃gbɔ̃ɔ̃, tsí gbɔ̃́ ɛnɛ yèé bɔ̀ ńǹtalɛ̀ ŋa#á kpó lɔ. 39Tã́ná omi kó wáa gbɔ̃́ ŋa lɔ kpó#ɛ́, à kò tì mà ní iŋɛ́-kã̀ wà tse títí káà fú ìwèrè nyɛ̀ŋɛ̀. Ó ɖi, ńǹwèrè yèé òŋu, Ɛnɛ yèé ɔ̀nyà bí#ɛ́ gbo nákó wá#á, bɛ́ɛ̀ ké ní ɔ̀nyà ŋa nákó wà tse#ɛ́ ńnɛ̀ɛ́. 40Nɔ́dzɔ́ nyɛ̀ŋɛ̀#ɛ́, bí ɔ̀nyà méèdzì dzɔ́ wà nóko si, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. 41Tsí bí ɔnɔbɛ̃̀ɛ̃ méèdzì gbo wà lɔ ɔkà nɔ́lɔ, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. 42Ńbɛ̀ɛ́, ká wà nódzúfò si. Iŋɛ́ yèé tse#ɛ́, à kò ma nɔ́dzɔ́ yèé ɔ̀gá-ŋa nákó wá#á.

43Ká mà si ní fee, bí ó dzɛ́ ní olílé-kã̀ ma ńǹwèrè yèé olè nákó wáa tsolèé nóoru#ɛ́, nákó ɖe òɖe, kàkó dzɛ́ ní olè#ɛ́ kó wɔlé-òŋu gìɖì. 44Náàtóoríi bɛ́ɛ̀#ɛ́, àŋa gbo, ká kpaɖí si, iŋɛ́ yèé tse#ɛ́, òŋu, Ɛnɛ yèé ɔ̀nyà bí#ɛ́, òŋu nákó wá ńǹwèrè yèé à kò módzúlé#ɛ́ ni.

Àtsìtsɛ́ yèé náa tse òtítɔ́#ɛ́ òŋu àtsìtsɛ́ yèé yàábàɖí#ɛ́

(Lúkà 12:42-48)

45Ká fɔ̀ ní àtsìtsɛ́-kã̀ wà, tsí náa tse òtítɔ́, tsí ó nɛ́ ìrã̀ã́mà gbo, tsí ɔ̀gá‐ɛ̀ kɛ́ɛ si nárũ-àtsìtsɛ́‐ɛ̀ àtíbɔ̀ ŋa ní kó wà fú ŋa ńdzídzɛ si ńǹwèrè. 46Àtsìtsɛ́ nyɛ̀ŋɛ̀#ɛ́, bí ɔ̀gá#á wáa báa, tsí ó wà tsitsɛ́#ɛ́ si ńǹɖì‐ɛ̀#ɛ́, ó wɛ éwo-ire. 47Tsí òŋu wà wí fú ŋa ní fee, ɔ̀gá#á nákó mú àtsìtsɛ́ nyɛ̀ŋɛ̀#ɛ́, tsí ń si nárũ-iŋɛ́‐ɛ̀ ŋa kpó, tsí kó wà rí ìtá-ŋa. 48Ó ɖi, bí àtsìtsɛ́#ɛ́ yàábàɖí, nákó wà fɔ̀ ńnɔ́-ara‐ɛ̀ ní ɔ̀gá-òŋu kò sɛ̃̀ bàa kóyá, 49tsí nákó kpé enìkéèdzì‐ɛ̀ yèé à dzɔ́ wà tsitsɛ́ ŋa#á kpíkpa, tsí wà dzɛ, tsí wà mɔ gbo bá àmɔ̀tíŋɔ́ ŋa. 50Bí ó dzɛ́ ní ó wà tse bɛ́ɛ̀, ɔ̀gá‐ɛ̀#ɛ́ nákó wáa wá nɔ́dzɔ́ yèé kàkó mà si#ɛ́. Náàsòkò yèé kàkó módzúlé si gìɖì#ɛ́ ní nákó wá#á. 51Tsí nákó kĩ́rĩ iŋɛ́ báa, tsí nákó tse gbo, tsí nákó dzɛ èrè yèé wà ń ká tsendzɔdzú#ɛ́. Ńbɛ̀ ní nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á.

Currently Selected:

Màtéwò 24: ngl

Highlight

Copy