Màtéwò 23

Yèésù wà fɔ̀ ní ká máa wére akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa

(Mákò 12:37-40; Lúkà 11:39-52; 20:45-47)

1Náànyì-bɛ́ɛ̀#ɛ́, Yèésù wà wíìnyɛ̀ fú ɔmatsɛ́‐ɛ̀ ŋa òŋu èrò#ɛ́. 2Ó ní: Akɔ́nɛ nɛ́kpa-Ɔ̀ɖáyé† ŋa òŋu ɔma-ɛgbɛ́-Fàrísì† ŋa kparɔ arũ-Mɔ̀ɔ́sè†, tsí wà nya òkpì-ɛkpa-Ɔ̀ɖáyé† ŋa fú ɔ̀nyà ŋa. 3Ńnɛ̀ ní ó wà ní ká tse si ńǹtá-afɔ̀-ŋa, tsí tse iŋɛ́ kpó yèé à wà fɔ̀ fú ŋa#á ńnɛ̀ɛ́. Ó ɖi, ká máa wérè ŋá. Iŋɛ́ yèé tse#ɛ́, à kà wà tse si ńǹtá-ɛ̀kɔ́ yèé àŋa ká-ŋa wà tse fúnɛ#ɛ́. 4À náa ɖi arù wíwówo ŋa fú ɔ̀nyà ŋa ní ká rù. Ó ɖi, àŋa ká-ŋa, à kà wò ní ɔmalɔ́wɔ́-àŋa gìɖì bɛ́ kó kã arù#ɛ́, tsí ń mɔ́wɔ́ gbè fú ɔ̀nyà ŋa.

5Tsí iŋɛ́ ɔ̀kã̀lɔ́ɔ̀kã̀ yèé à náa tse#ɛ́, à náa wà tseé ní ɔ̀nyà ŋa kó wà rí àŋa. Agolo yèé à náa kɔ afɔ̀-Ɔ̀ɖáyé si ńnɛ̀#ɛ́, tiŋa òŋu náa lákṹ láre ti ɔ̀nyà ŋa. Tsí à náa sɔ etí-ìwɔ̀ra-ŋa gbo ɖi gúgù máa. 6Bí à wà nóòkpì-dzídzɛ-ɔɖɔ̃́, à náa wo ìɖì-onùgbó, tsí bí à lɔ ńlé-ìkpàɖé-ɔma-Ìyúɖà ŋa†, à náa wo ká dzokó ńwádzú. 7À náa wò gbo ní ɔ̀nyà ŋa kó wà rɔlɛ̀ kí àŋa náàbɔ̀ɔ́mɛ̀ ŋa, tsí ká wà kpè ŋá ní akɔ́nɛ gbo! 8Ó ɖi, àŋa òŋu ká máa dzɛ́, tsí ká kpè ŋá ní Akɔ́nɛ! Iŋɛ́ yèé tse#ɛ́, ìnàbí ní àŋa kpó à dzɛ́#ɛ́. Tsí akɔ́nɛ ɔ̀kã̀ntso gé ní wà fú ŋa#á. 9Ká máa kpe ɔ̀nyà-kã̀ kpókpó ńǹtalɛ̀ bí ní Boba-àŋa. Iŋɛ́ yèé tse#ɛ́, Boba ɔ̀kã̀ntso gé ní wà fú ŋa#á, tsí òŋu ní wà nɔ́ɔ̀rɔ̃#ɛ́. 10Ká máa dzɛ́, tsí ká kpè ŋá gbo ní Ɔ̀gá! Iŋɛ́ yèé tse#ɛ́, Ɔ̀gá ɔ̀kã̀ntso gé ní wà fú ŋa#á, Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á ni. 11Tsí ɛnɛ yèé dzɛ́ Ɔ̀gá náàŋírĩ-ŋa#á, ó wà ní kó sɔ ara‐ɛ̀ ɖi àtsìtsɛ́ fú ɛnɛ-àtíbɔ̀ ŋa. 12Tsí ɔ̀nyà kpó yèé wà kɛ́ ara‐ɛ̀#ɛ́, à nákó ɖɛ̀ɛ́, tsí ɛnɛ yèé wà tɛ ara‐ɛ̀ bɔlɛ̀#ɛ́, à nákó nyɛ̀ɛ́.

Yèésù wà ɖáàbi fú akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa

13Yèésù fɔ̀ fú ŋa ní: Akɔ́nɛ nɛ́kpa-Ɔ̀ɖáyé† ŋa òŋu ɔma-ɛgbɛ́-Fàrísì† ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è wà ɖí ɔ̀nà-kíbí Ɔ̀ɖáyé nákó dzoyè gbà#á fú ɔ̀nyà ŋa. Ɛ̀ŋɛ ká-ŋɛ́, è kè wà wɔ̀ lɔ nóyè-Ɔ̀ɖáyé†#ɛ́, tsí è kò sì wà kɔ ɛnɛ yèé ŋa wà wo ká wɔ̀ lɔ ńnɛ̀#ɛ́ gbo dzɔ̀ɔ́. [ 14Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa kpàkpàtì iŋɛ́ yèé ŋa wà nɔ́wɔ́-okpó ŋa#á kpó nɔ́wɔ́-ŋa, tsí è náa wà wúùre kpíkpɛ̃́, àtsùgbée ɔ̀nyà ŋa kó rí ní è dzɛ́ atsòtítɔ́ ŋa. Ńnɛ̀ ní Ɔ̀ɖáyé nákó fɛtí fú ŋɛ́ líle líle lárè#ɛ́].

15Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa lɔ ńǹɖìkíìɖì kpó náàdzàkáyé#ɛ́, àtsùgbée e fa ɔ̀nyà ɔ̀kã̀ntso gé, tsí kó sɛ̃ Ɔ̀ɖáyé ńǹrɔ́-kíbí ɛ̀ŋɛ gbo è wà sɛ̃̀ɛ̃́#ɛ́, tsí bí è fàá wɔ̀ ńnɛ̀ ńǹkɛ̀ɛ́ ná, ɛ̀ŋɛ ká-ŋɛ́ ké náa sɔ́ ɛnɛ nyɛ̀ŋɛ̀, tsí ńǹrɔ́-kíbí Ɔ̀ɖáyé nákó wáa fɛtí fú ŋɛ́ ńná-àrìtã́ gbà#á, ti ɛnɛ nyɛ̀ŋɛ̀ nákó wáa láre tiŋɛ́ ɔ̀nà méèdzì. 16Ɛ̀rá rá ŋɛ́! Agbɛ̃́nɛ yèé fɔ́ odzú si ŋa#á. È náa wà fɔ̀ ní: Bí ɔ̀nyà-kã̀ kpe ilé-Ɔ̀ɖáyé† si ńǹtá-iŋɛ́-kã̀ ni, kò sí ńnɛ̀. Ó ɖi, bí ɔ̀nyà-kã̀ kpe siká yèé wà ńlé-Ɔ̀ɖáyé#ɛ́ si ńǹtá-iŋɛ́-kã̀ ni, ó wà ní kó tse si ńǹtá‐ɛ̀. 17È rí àɖàlɛ̀ òŋu afɔ́dzú yèé ŋa nyí gé! Náàŋírĩ-siká#á òŋu ilé-Ɔ̀ɖáyé yèé wà sɔ siká#á ɖi mímá#á fe, yèésí kpã́dzú lárè? 18È náa wà fɔ̀ gbo ní: Bí ɔ̀nyà-kã̀ kpe ìdzɛ̀bɔ si ńǹtá-iŋɛ́-kã̀ ni, kò sí ńnɛ̀. Ó ɖi, bí ɔ̀nyà-kã̀ kpe iŋɛ́ yèé à wà ń tsɛbɔ, tsí wà ńǹtá-ìdzɛ̀bɔ#ɛ́ si ńǹtá-iŋɛ́-kã̀ ni, ó wà ní kó tse si ńǹtá‐ɛ̀. 19È rí afɔ́dzú yèé ŋa nyí gé! Náàŋírĩ-iŋɛ́ yèé à wà ń tsɛbɔ#ɛ́ òŋu ìdzɛ̀bɔ yèé wà sɔ ɛbɔ#ɛ́ ɖi mímá#á fe, yèésí kpã́dzú lárè?

20Ńbɛ̀ɛ́, ɛnɛ yèé wà kpe ìdzɛ̀bɔ si ńǹtá-iŋɛ́-kã̀#á, ó kpe ìdzɛ̀bɔ#ɛ́ òŋu ká‐ɛ̀, tsí kpe iŋɛ́ ɔ̀kã̀lɔ́ɔ̀kã̀ kpó yèé wà ńǹtá‐ɛ̀, tsí à wà ń tsɛbɔ#ɛ́ gbo ni. 21Tsí ɛnɛ yèé gbo wà kpe ilé-Ɔ̀ɖáyé si ńǹtá-iŋɛ́-kã̀#á, ó kpe ilé-Ɔ̀ɖáyé#ɛ́ òŋu ká‐ɛ̀, tsí kpe Ɔ̀ɖáyé yèé wà ńnɔ́-ilé#ɛ́ gbo ni. 22Tsí ɛnɛ yèé gbo wà kpe ɔ̀rɔ̃ si ńǹtá-iŋɛ́-kã̀#á, ó kpe àntã̀-oyè-Ɔ̀ɖáyé òŋu ká‐ɛ̀, tsí kpe Ɔ̀ɖáyé yèé dzokó si ńǹtá‐ɛ̀#ɛ́ gbo ni.

23Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa fú Ɔ̀ɖáyé nákpálà-ɛ̀kɛ́ɛwá-iŋɛ́ rṹrũ̀ ŋa, tsí è náa gbàgbé iŋɛ́ yèé gìɖì kpã́dzú lárè nɛ́kpa-Ɔ̀ɖáyé ŋa#á. È kà wà tse òtítɔ́, tsí è kà wà rí ànyínɔ́ fúnɛ gbo. È kà wà tse iŋɛ́ yèé Ɔ̀ɖáyé wà bèrè#ɛ́ gbo. Iŋɛ́ yèé ŋa nyí ní sì kpã́dzú ní ká wà tse#ɛ́. Ó ɖi, kò tsi ǹ ní ká máa tse àtíbɔ̀ ŋa ni. 24Agbɛ̃́nɛ yèé fɔ́ odzú si ŋa#á! È náa sɛ̃́ ɔtí, tsí nya etsĩtsĩ ǹɖe tã́ná mɔɔ́. Tsí è náa sì mi atsĩ-kã̀ lɔ.

25Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa wɛ ànyì-kɔ̃́ŋúkɔ̃́ŋú ŋa òŋu ànyì-àwò ŋa si, tsí kɔ inɔ́-ŋa dzɔ̀ɔ́. Ó ɖi, iŋɛ́ yèé è tsolè ŋa#á òŋu iŋɛ́-íbàɖí yèé náa wù ŋɛ́ ŋa#á ní sì kɔ̃́ inɔ́-ŋa si#ɛ́. 26Ɔma-ɛgbɛ́-Fàrísì ŋa, afɔ́dzú ŋa! È wɛ inɔ́-kɔ̃́ŋúkɔ̃́ŋú òŋu inɔ́-àwò ŋa tã́ná, àtsùgbée ànyì-ŋa gbo kó ɖi mímá.

27Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è wà kíbí érì yèé ŋa à kũ̀ ń fũfũ si kpó#ɛ́. À ɖíirí nódzú. Ó ɖi, tsàwó-ɔ̀nyà òŋu iŋɛ́ tsítsìíra ɔ̀kã̀lɔ́ɔ̀kã̀ kpó kɔ̃́ inɔ́-ŋa si. 28Bɛ́ɛ̀ ké ní ɛ̀ŋɛ gbo è náa tse tsí ɔ̀nyà kpó kó rí ní è dzɛ́ atsòtítɔ́ ŋa#á ńnɛ̀ɛ́. Ó ɖi, e dzɔdzú-ɔ̀nyà ŋa òŋu e tse íbàɖí gbo ní kɔ̃́ ìsérè si fú ŋɛ́#ɛ́.

29Akɔ́nɛ nɛ́kpa-Ɔ̀ɖáyé ŋa òŋu ɔma-ɛgbɛ́-Fàrísì ŋa, ɔ̀nyà-atsendzɔdzú yèé ŋa è dzɛ́ si#ɛ́, ɛ̀rá rá ŋɛ́! Iŋɛ́ yèé tse#ɛ́, è náa wà ma érì-agbáfɔ̀-Ɔ̀ɖáyé fɔ̀† ŋa, tsí wà ɖéèlè gbo fú érì-atsòtítɔ́ ŋa. 30Tsí è náa wà fɔ̀ ní: Àŋa má gbé ńǹwèrè-gbágbóǹgbàgbò ŋa ni àŋa kàá mú arũ ɖé bá ŋa, tsí kpa agbáfɔ̀-Ɔ̀ɖáyé fɔ̀ ŋa nóòkú. 31È wà ɖáàbi fú ara-ŋɛ́ ńnɛ̀ɛ́ ní ɔmalɔ́ma-ɛnɛ yèé kpa agbáfɔ̀-Ɔ̀ɖáyé fɔ̀ ŋa nóòkú#ɛ́ ní àŋa dzɛ́#ɛ́. 32Ó ɖi fee, iŋɛ́ yèé gbágbóǹgbàgbò-ŋɛ́ ŋa tse gbè nɔ́ɔ̀nà si#ɛ́, è tseé dzá. 33Edzò, ɔká lákṹ ŋa! Bí è nákó nyáa bɔ́ náfɔ̀-iná-àrìtã́ gbà fáà? 34Àtsùgbée bɛ́ɛ̀, è rí gé! Ǹ wà bɛ agbáfɔ̀-Ɔ̀ɖáyé fɔ̀ ŋa òŋu olí-ifɛ̀ɛ́nɔ́ ŋa má nára-akɔ́nɛ nɛ́kpa-Ɔ̀ɖáyé ŋa bàa fú ŋɛ́. Tsí náàŋírĩ-ŋa#á, è nákó kpa ɔ̀kã̀ ŋa nóòkú, tsí kã ɔ̀kã̀ ŋa si ńǹtá-egi-ìɖáàgàlàdzà†, tsí tsɔ ɔ̀kã̀ ŋa gbo náàtàmì ńlé-ìkpàɖé-ɔma-Ìyúɖà ŋa, tsí wà lé ŋa ti ńǹlú-kã̀ lɔ káà bɔ́ ńǹlú-èkéèdzì. 35Tsí ɛ̀ŋɛ ní Ɔ̀ɖáyé nákó fɛtí fú#ɛ́, àtsùgbée atsòtítɔ́ yèé ŋa à wà kpa nóòkú ti ńǹtá-Àbɛ́lì†, atsòtítɔ́#ɛ́, títí wáa tó ńǹtá-Sàkàríyà agbáfɔ̀-Ɔ̀ɖáyé fɔ̀, ɔma-Bàrákì yèé è kpa nóòkú ńkpàtá-ilé-Ɔ̀ɖáyé náàŋírĩ-ilé#ɛ́ òŋu ìdzɛ̀bɔ#ɛ́. 36Ó ɖi, ǹ wà wí fú ŋɛ́ ní fee, Ɔ̀ɖáyé nákó wáa fɛtí fú ɔma-ìsɛ̃̀ɛ̃́ ŋa, àtsùgbée iŋɛ́ nyɛ̀ŋɛ̀ ŋa kpó.

Yèésù rã́ã̀bo fú ɛnɛ-Yèrúsàlɛ́mì ŋa

(Lúkà 13:34-35)

37Tsí ó wà wí fú ŋa ró ní: Óò! Ɛnɛ-Yèrúsàlɛ́mì ŋa! È náa kpa agbáfɔ̀-Ɔ̀ɖáyé fɔ̀† ŋa nóòkú, tsí è náa ta ɛnɛ yèé ŋa Ɔ̀ɖáyé náa bɛ̀ wá fú ŋɛ́#ɛ́ gbo nóòkúta kpa. Ó ɖi, ǹ wò ní n kpè ŋɛ́ kpaɖí ńǹrɔ́-kíbí aɖɛ̀ɛ náa kpe ɔma‐ɛ̀ ŋa kpaɖí nábɛ́‐ɛ̀, tsí mú iká bò ŋá bɛ́#ɛ́ ni. Tsí è sì kɔ̀. 38È rí gé! Ɔ̀ɖáyé nákó tsí kɔ ilé-ŋɛ́ dzɔ̀ɔ́ fú ŋɛ́, tsí nákó kí nákpo. 39Ó ɖi, ǹ wà wí fú ŋɛ́ ní ti nɔ́mbɛ́#ɛ́, è kàkó rí mi ró títí fú àsòkò yèé ɛ̀ŋɛ ká-ŋɛ́ è nákó wà fɔ̀ ní: “Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́.”#23:39 Ìwé-Orĩ ŋa 118:26 (Psaumes 118:26)

Currently Selected:

Màtéwò 23: ngl

Highlight

Copy