Màtéwò 22
22
Yèésù mú ɛnɛ yèé ŋa à kpè fú ɔɖɔ̃́-aya nínɛ́#ɛ́ kpòwe
(Lúkà 14:15-24)
1Yèésù tɔ́ wà kpòwe ró, tsí wà ń wíìnyɛ̀ fú ɔ̀nyà ŋa. Ó wà wí fú ŋa ní: 2Ká rí kíbí Ɔ̀ɖáyé nákó dzoyè gbà#á gé!
Ólú-kã̀ wà, tsí ɔma‐ɛ̀ wà náya, tsí ó fɔ̀, tsí à se dzídzɛ fú ɔɖɔ̃́-aya nínɛ́#ɛ́. 3Tsí ó bɛ arú‐ɛ̀ ŋa lɔ fú ɛnɛ yèé ŋa ó ti kpè si fú ɔɖɔ̃́#ɛ́ ní ká kpè ŋá wá. Tsí ɛnɛ nyɛ̀ŋɛ̀ ŋa kɔ̀ ní àŋa kò bàa. 4Tsí ó bɛ arú‐ɛ̀ òmírɛ̃̀ ŋa lɔ, tsí fɔ̀ fú ŋa ní: Ká fɔ̀ fú ɛnɛ yèé ŋa òŋu kpè si#ɛ́ ní báàyí#ɛ́, òŋu tse tã́ kpó. Òŋu kpa lalá, tsí kpa ɛrã-òŋu yèé kɔ̃́ ara si ŋa#á. Ó ɖi, ká wá nóòkpì-ìdzɛ#ɛ́.
5Ɛnɛ yèé ŋa ó kpè si#ɛ́ kò kɛ́ ɔ̀kã̀ ńnɛ̀ fúu, tsí kṹnukṹ lɔ ń tɛ̀ɛ̀. Ɛnɛ yèé kó lɔ nóko lɔ nóko, ɛnɛ yèé kó lɔ nádzà lɔ nádzà. 6Tsí ɛnɛ-àtíbɔ̀ ŋa tsoró bá arú ŋa#á, tsí kpa ŋá nóòkú. 7Tsí ólú#ɛ́ bínɔ́, tsí bɛ sɔ́dzà‐ɛ̀ ŋa lɔ fú ŋa, tsí à lɔ káà ra akpanɛ ŋa#á, tsí tãná gú ìlú-ŋa.
8Tsí ó fɔ̀ fú arú‐ɛ̀ òmírɛ̃̀ ŋa ńǹkɛ̀ɛ́ ní: Ìdzɛ-ɔɖɔ̃́#ɛ́ dziná. Ó ɖi, ɛnɛ yèé ŋa òŋu kpè si#ɛ́, kò dzɔ ká kpè ŋá. 9Ká tédzú lɔ nɔ́ɔ̀nà yèé ŋa ɔ̀nyà kpíkpɔ̀ wà fà#á, tsí ɛnɛ yèé à rí gé ká kpèé ní kó wáa dzɛŋɛ́. 10Tsí arú ŋa#á lɔ nɔ́ɔ̀nà ŋa#á, tsí kpe ɛnɛ yèé ŋa kpó à rí#ɛ́, tsí à kpàɖé. Ɔ̀nyà-íbàɖí gbo, ɔ̀nyà-ire gbo, à kpérí àŋa kpó, títí ɔ̀nyà ŋa kɔ̃́ ilé yèé à wà dzɛ ɔɖɔ̃́#ɛ́ ńnɛ̀#ɛ́ kpó kpím.
11Ólú#ɛ́ wɔ ilé-ɔɖɔ̃́#ɛ́ lɔ, tsí kó rí ɛnɛ yèé ŋa à kpè#ɛ́, tsí ó rí ɔnɔkɛ̃̀ɛ̃-kã̀. Ɔnɔkɛ̃̀ɛ̃#ɛ́ kò wà náàwù-ɔɖɔ̃́, 12tsí ó wà bèrèé ní: Ɛnɛ-mi! Bí ò tse fáà, tsí wɔ̀ wá bí náàrì wɔ ìwɔ̀ra-ɔɖɔ̃́? Tsí ɛnɛ#ɛ́ kò nyáa dzɔ́ŋù afɔ̀-kã̀ kpókpó. 13Tsí ólú#ɛ́ fɔ̀ fú àtsìtsɛ́‐ɛ̀ ŋa ní: Ká ɖèé, tsí múu sɔ lɔ nóòɖe nóòkùkù sã́ŋú sã́ŋú ńbí nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á.
14Ńbɛ̀ɛ́, Yèésù ní: Ɛnɛ yèé Ɔ̀ɖáyé kpè ŋa#á kpɔ̀. Ó ɖi, ɛnɛ yèé ó tsã̀ náàŋírĩ-ŋa#á kò kpɔ̀.
À wà mú afɔ̀-owó-lómbà sísã, tsí wà ń sɔ ɔ̀kpákù fú Yèésù
(Mákò 12:13-17; Lúkà 20:20-26)
15Ɔma-ɛgbɛ́-Fàrísì† ŋa lɔ káà kpérí ara-ŋa, àtsùgbée ká wo bí ká tse fáà, tsí wo afɔ̀ nárũ-Yèésù, tsí ń sɔ ɔ̀kpákù fúu#ɛ́. 16Tsí à bɛ ɔmatsɛ́-ŋà ŋa òŋu ɔma-ɛgbɛ́-Èróɖì† kã̀ŋa lɔ fúu. À ní ká fɔ̀ fúu ní: Akɔ́nɛ! Àŋa mà ní náa fɔ òtítɔ́, tsí kíbí ká tse fáà gbo, tsí dzɔdzú-Ɔ̀ɖáyé#ɛ́, náa wà ɖíreé fúnɛ òŋu òtítɔ́. Kà rí odzú-nɛ gbo sá, tsí ɔ̀nyà-kã̀ kpókpó gbo kà nyáa kpa omi si nódzú fúu. 17Báàyí fee, ɛkpa-Ɔ̀ɖáyé† wà fú ɔ̀nà ní ká sã owó-lómbà fú ɔ̀gã́-ìdzɔba ńlɛ̀-Rómà† nàmí kò fú ɔ̀nà bɛ́ɛ̀? Àŋa kó sãã́ã̀ nàmí àŋa kó máa sãã́? Bí ó wà sére afɔ̀ yèé gbà fáà?
18Yèésù òŋu ti ma ìsérè-íbàɖí yèé à wà tse#ɛ́, tsí ó wà fɔ̀ fú ŋa ní: Ɔ̀nyà-atsendzɔdzú ŋa! Kí tse tsí à wà sɔ ɔ̀kpákù fú òŋu ná? 19Ó ɖi, ká mú owó yèé à náa ń sã owó-lómbà#á-kã̀ ɖíre fú òŋu káyí.
Tsí à mú owó-ɛyɔ-kã̀ fúu. 20Tsí ó wà bèrè ŋá ní: Éwo-nɛ̀ɛ́ à yɔ, tsí kɔ ɛ́kɔ‐ɛ̀ gbo si ńǹtá-owó#ɛ́ ná?
21Tsí à ní: Ti ɔ̀gã́-ìdzɔba ni.
Ńbɛ̀ɛ́, Yèésù fɔ̀ fú ŋa ní: Ká kɛ́ iŋɛ́ yèé dzɛ́ ti ɔ̀gã́-ìdzɔba#á, tsí ń fú ɔ̀gã́-ìdzɔba, tsí yèé dzɛ́ ti Ɔ̀ɖáyé#ɛ́, ká ń fú Ɔ̀ɖáyé.
22Afɔ̀ yèé Yèésù fɔ̀ ŋa#á, ó mu àŋa kpó, tsí à ǹɖe, tsí kɔ Yèésù dzɔ̀ɔ́, tsí lɔ.
À wà mú afɔ̀-òkú ŋa kó sɛ̃̀ dzí wá náyé, tsí wà ń sɔ ɔ̀kpákù fú Yèésù
(Mákò 12:18-27; Lúkà 20:27-40)
23Ɛgbɛ́-kã̀ gbo wà, tsí à náa kpèé ní ɛgbɛ́-Sàɖùké† ŋa. Ɔma-ɛgbɛ́#ɛ́ ŋa ní náa wà fɔ̀ ní òkú ŋa kàkó sɛ̃̀ dzí wá náyé ró#ɛ́. Tsí ó ɖi nɔ́dzɔ́ nyɛ̀ŋɛ̀#ɛ́ ké, tsí àŋa gbo, à tìmá Yèésù#ɛ́, tsí à wà bèrèé ní: 24Akɔ́nɛ! Mɔ̀ɔ́sè† fɔ̀ fú àŋa ní: Bí ɔ̀nyà-kã̀ kò bíma tã́ná ó kú, ó wà ní ìnàbí‐ɛ̀-kã̀ kó tsókpó-aya‐ɛ̀, tsí aya#á kó bíma fúu. Ńbɛ̀ɛ́, ɔma#á nákó dzɛ́ ti òkú#ɛ́.#22:24 È káà kã Ìwé-Ìkpìnkpìlɛ̀-ayé 38:8, Ìwé-Àkóro 25:5-6 (Genèse 38:8, Deutéronome 25:5-6). 25Kíbí ó dzɛ́ bɛ́ɛ̀#ɛ́ fee, ká fɔ̀ ní ìnàbí méedze kã̀ŋa gbé náàŋírĩ-àŋa bí wáa lɔ, tsí ɛnɛ-onùgbó#ɛ́ náya, tsí kú náàrìmáa bíma ńnɔ́‐ɛ̀. Tsí ɔmàná‐ɛ̀ yèé à ń tɛ̀ɛ́#ɛ́ ǹɖe, tsí tsókpó-aya#á. 26Tsí tɛ̀ɛ̀ gbo lɔ bɛ́ɛ̀ ké. Tsí ti ɛnɛ-ɛ̀kɛ́ɛta gbo lɔ bɛ́ɛ̀ ké. Tsí àŋa méedze#ɛ́, à kú kpó náàrìmáa bíma ńnɔ́-aya#á. 27Tsí ńǹtã̀ntã́‐ɛ̀#ɛ́, ɔnɔbɛ̃̀ɛ̃#ɛ́ gbo wáa kú. 28Báàyí#ɛ́ fee, nɔ́dzɔ́ yèé òkú ŋa nákó sɛ̃̀ dzí wá náyé#ɛ́, ti nɛ̀ɛ́ aya#á nákó dzɛ́ náàŋírĩ-àŋa méedze#ɛ́, kíbí ó dzɛ́ ní àŋa kpó, à náya#á wòrí#ɛ́?
29Tsí Yèésù wà dzɔ́ŋù fú ŋa ní: À nɔ̀! Iŋɛ́ yèé tse#ɛ́, à kò ma ikpá-Ɔ̀ɖáyé, tsí à kò gbɔ́ òkpì-Ìwé-Ɔ̀ɖáyé† gbo. 30Ó ɖi fee, nɔ́dzɔ́ yèé òkú ŋa nákó sɛ̃̀ dzí wá náyé#ɛ́, afɔ̀-ká náya òŋu ká nɔ́kɔ kàkó tsɛdzɔ́-ŋa ró. À nákó gbé kíbí adzítsɛ́-ɔ̀rɔ̃† ŋa náa gbé gbà#á ni. 31Ti nára-afɔ̀-òkú ŋa gbo kó sɛ̃̀ dzí wá náyé#ɛ́ fee, à kò kã afɔ̀ yèé Ɔ̀ɖáyé fɔ̀ si#ɛ́ɛ̀? Ɔ̀ɖáyé ní: 32“Èmi ní dzɛ́ Ɔ̀ɖáyé-Àbàràhámì†, tsí dzɛ́ Ɔ̀ɖáyé-Ìsákà† gbo, tsí dzɛ́ Ɔ̀ɖáyé-Yàkúbù† gbo#ɛ́.”#22:32 Ìwé-Fúfùɖá 3:6, 15-16 (Exode 3:6, 15-16)
Tsí Yèésù fɔ̀ máa ní: Ó ɖi, Ɔ̀ɖáyé kò dzɛ́ Ɔ̀ɖáyé-òkú ŋa. Ɔ̀ɖáyé ɔ̀nyà-àwáàyɛ̀ ŋa ní ó dzɛ́#ɛ́.
33Kíbí èrò#ɛ́ gbɔ́ afɔ̀#ɛ́, ɛ̀kɔ́‐ɛ̀ mù ŋá.
Ɛkpa yèésí kpã́dzú lárè náàŋírĩ-ɛkpa-Ɔ̀ɖáyé ŋa?
(Mákò 12:28-34; Lúkà 10:25-28)
34Ɔma-ɛgbɛ́-Fàrísì† ŋa gbɔ́ ní Yèésù tse tsí arũ-ɔma-ɛgbɛ́-Sàɖùké† ŋa kpa kɛɛ. Kíbí à gbɔ́ bɛ́ɛ̀#ɛ́, à kpérí ara-ŋa ńǹɖì-bɛ̀#ɛ́ ké, 35tsí ɔ̀kã̀-ŋa dzɛ́ akɔ́nɛ nɛ́kpa-Ɔ̀ɖáyé†, tsí ó wà wò ní òŋu kó sɔ ɔ̀kpákù fú Yèésù, tsí ó wà bèrèé ní: 36Akɔ́nɛ! Ɛkpa yèésí kpã́dzú lárè kpó náàŋírĩ-ɛkpa-Ɔ̀ɖáyé† ŋa?
37Tsí Yèésù dzɔ́ŋù fúu ní: “Nà nɛ́ àmúɖɔ̃̀ fú Ɔlɔ́dzɔ́ Ɔ̀ɖáyé-ɛ̀ɛ inɔ́ tã̀ã́, ànyì tã̀ã́, nà nɛ́ àmúɖɔ̃̀ fúu títí àmúɖɔ̃̀#ɛ́ kó lara-ɛ̀ɛ wɔ̀ dzálɛ̀, nà nɛ́ àmúɖɔ̃̀ fúu ńǹsérè-ɛ̀ɛ gbo kpó.”#22:37 Ìwé-Àkóro 6:5 (Deutéronome 6:5) 38Ɛkpa yèé kpã́dzú lárè, tsí kpeéwo gbo#ɛ́ ńnɛ̀ɛ́. 39Ó ɖi, ɛkpa-èkéèdzì‐ɛ̀-kã̀ gbo wà, tsí kpã́dzú bɛ́ɛ̀ ké. Òŋu ní dzɛ́: “Nà nɛ́ àmúɖɔ̃̀ fú enìkéèdzì-ɛ̀ɛ kíbí nà nɛ́ fú ara-ɛ̀ɛ#ɛ́.”#22:39 Ìwé-Orò ŋa 19:18 (Lévitique 19:18) 40Tsí ɛkpa-Mɔ̀ɔ́sè† òŋu ɛ̀kɔ́-agbáfɔ̀-Ɔ̀ɖáyé fɔ̀† ŋa kpó rɔ̀ si nára-ɛkpa méèdzì yèé ŋa nyí ni.
Kírísítò, ɔmalɔ́ma-Ɖàfíɖì dzɛ́ Ɔlá-Ɖàfíɖì gbo
(Mákò 12:35-37; Lúkà 20:41-44)
41Ɔma-ɛgbɛ́-Fàrísì† ŋa kpérí si, tsí Yèésù wà bèrè ŋá ní: 42Bí à wà sére afɔ̀-Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á gbà fáà? Ɔmalɔ́ma-nɛ̀ɛ́ ó wà ní kó dzɛ́?
Tsí à dzɔ́ŋù fúu ní: Ó wà ní kó dzɛ́ ɔmalɔ́ma-ólú Ɖàfíɖì†.
43Tsí Yèésù tɔ́ wà bèrè ŋá ró ní: Tsí bí ó dzɛ́ fáà ńǹkɛ̀ɛ́, tsí Mímí-Ɔ̀ɖáyé† gbɛ̃́ Ɖàfíɖì, tsí ó kpe Kírísítò ní Ɔlá-òŋu?
44Ɖàfíɖì fɔ̀ ní:
“Ɔlɔ́dzɔ́ wí fú Ɔlá-mi ní:
Wáa dzokó náàwóòtã́-mi,
tsí n mú ɔ̀tɛ̀-ɛ̀ɛ ŋa tsã́lɛ̀,
tsí o mú ɛsɛ̀ lé ńǹtá-ŋa.”#22:44 Ìwé-Orĩ-ŋa 110:1 (Psaumes 110:1)
45Tsí bí Ɖàfíɖì kpe Kírísítò ní Ɔlá-òŋu fe, Kírísítò nákó nyáa dzɛ́ ɔmalɔ́ma‐ɛ̀ róò? È fɔ̀ɔ́ káyí!
46Ɔ̀nyà-kã̀ kpókpó kò nyáa dzɔ́ŋù-afɔ̀-kã̀ fú Yèésù. Tsí ti nɔ́dzɔ́ nyɛ̀ŋɛ̀#ɛ́, ɔ̀nyà-kã̀ kò ɖɔ́ɔ̀rɔ̀-ɛ̀ ní òŋu kó bere Yèésù náfɔ̀-kã̀ ró.
Currently Selected:
Màtéwò 22: ngl
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
