Lúkà 22

À mú arũ ɖé si ńǹtá-Yèésù

(Màtéwò 26:1-5; Mákò 14:1-2; Yòhánà 11:45-53)

1Ɔɖɔ̃́-Kpɔ̃́nɔ́-àrìkɛ́† yèé à ná kpè ní ɔɖɔ̃́-Àɖádzɔ̀ɔ́†#ɛ́, ó sɔ́má tã́. 2Ńǹwèrè nyɛ̀ŋɛ̀#ɛ́, onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa wà tsèsérè ní bí àŋa kó tse fáà, tsí àŋa kó nyáa mú Yèésù, tsí ká sɔ́ɔ fú ikú, tsí ɔ̀nyà ŋa ká máa mà. Iŋɛ́ yèé tse#ɛ́, à wà sá ní ɔ̀nyà ŋa kàkó dzɛ́ ní ká múu.

Yúɖà ta Yèésù kpɔ̀rɔ̀ fú onùgbó-atsɛbɔ-Ɔ̀ɖáyé ŋa

(Màtéwò 26:14-16; Mákò 14:10-11)

3Náàsòkò nyɛ̀ŋɛ̀#ɛ́, Yúɖà, ɛnɛ yèé à náa ɖákì ní Sìkàrìyɔ́tì#ɛ́, òŋu gbo wà náàŋírĩ-ɔmatsɛ́-Yèésù† máàméèdzì ŋa#á si. Tsí Ètsù† wɔ̀ ńǹtá‐ɛ̀, 4tsí ó ǹɖe, tsí lɔ káà rí onùgbó-atsɛbɔ-Ɔ̀ɖáyé† ŋa òŋu àɖèlé-ilé-Ɔ̀ɖáyé† ŋa, tsí kíbí nákó tse gbà, tsí ta Yèésù fú ŋa#á, ó fɔ̀ɔ́ bá ŋa. 5Kíbí ó fɔ̀ɔ́ bá ŋa bɛ́ɛ̀#ɛ́, ó ɖɔ̃̀ fú ŋa títí à tàlé fúu ní bí nákó nyáa tse bɛ́ɛ̀, àŋa nákó fúu nówó. 6Tsí ó gbà si ńǹtá‐ɛ̀, tsí ó kpé ìwèrè yèé nákó sã̀#á wíwò, tsí kó gbɛ̃́ ŋa lɔ, tsí ká káà múu ńǹɖúkù, tsí ìlú#ɛ́ kpó kó máa mà.

Yèésù wà ɖíre ńbí à nákó gbé, tsí dzɛ dzídzɛ-ɔɖɔ̃́-Àɖádzɔ̀ɔ́#ɛ́ fú ɔmatsɛ́‐ɛ̀ ŋa

(Màtéwò 26:17-25; Mákò 14:12-21)

7Ɔdzɔ́-ɔɖɔ̃́-Kpɔ̃́nɔ́ àrìkɛ́†#ɛ́ wáa tó. Nɔ́dzɔ́#ɛ́ ké ní ó wà ní ká kpa ɔma-àgbò† ŋa fú Ɔ̀ɖáyé#ɛ́. 8Tsí Yèésù bɛ Òkúta òŋu Yòhánà† lɔ ní ká lɔ káà kpaɖí dzídzɛ-ɔɖɔ̃́-Àɖádzɔ̀ɔ́†#ɛ́ si fú àŋa, tsí àŋa kó wáa dzɛ. 9Tsí à wà bèrèé ní: Ńbisí ó wà wò ní àŋa kó lɔ káà kpaɖí dzídzɛ#ɛ́ ni?

10Tsí ó wà wí fú ŋa ní: Òŋu kó sàwé ilé#ɛ́ fú ŋa. Ó ɖi, bí à wɔ̀ ńǹlú#ɛ́ fee, à nákó kpàɖé ɔnɔkɛ̃̀ɛ̃-kã̀, tsí nákó ru omi nóògé wáa làkóò. Ká tɛ̀ náànyì‐ɛ̀, tsí ká wɔ̀ ńlé yèé nákó wɔ̀#ɛ́, 11tsí ká wí fú olílé#ɛ́ ní: Akɔ́nɛ ní ká bèrèé ní ńnɔlé yèésí òŋu ɔmatsɛ́-òŋu ŋa, àŋa nákó gbé, tsí dzɛ ɔɖɔ̃́-Àɖádzɔ̀ɔ́#ɛ́ ná? 12Tsí nákó ɖíre inɔlé lákṹ-kã̀ fú ŋa ńǹtá-ìsã́ŋú-kã̀, tsí iŋɛ́ ɔ̀kã̀lɔ́ɔ̀kã̀ kpó yèé kpã́dzú#ɛ́ gbo ti wà ńnɛ̀. Ńbɛ̀ ní à nákó kpaɖí dzídzɛ#ɛ́ si#ɛ́.

13Tsí à lɔ, tsí rí iŋɛ́ ŋa#á bɛ́ɛ̀ kpó kíbí ó ti wíi fú ŋa#á, tsí à kpaɖí dzídzɛ-ɔɖɔ̃́-Àɖádzɔ̀ɔ́#ɛ́.

Yèésù wà dzɛ dzídzɛ-ìkã́ã̀nyì bá adzítsɛ́‐ɛ̀ ŋa

(Màtéwò 26:26-29; Mákò 14:22-25; 1 Kòríntì ŋa 11:23-25)

14Kíbí àsòkò-ká dzɛŋɛ́ tó#ɛ́, Yèésù òŋu adzítsɛ́‐ɛ̀ ŋa lɔ nóòkpì-ìdzɛ#ɛ́. 15Tsí ó wà wí fú ŋa ní: Ɔɖɔ̃́-Àɖádzɔ̀ɔ́† yèé bɛ́ òŋu fee, ó wà wu òŋu tó bɛ́ɛ̀ ní òŋu kó dzɛɛ́ bá ŋa tã́ná òŋu kó dzì ńǹréré. 16Ó ɖi, òŋu wà wí fú ŋa ní fee, òŋu kàkó tɔ́ dzɛ dzídzɛ-ɔɖɔ̃́#ɛ́ bá ŋa ró títí fú ìwèrè yèé Ɔ̀ɖáyé nákó wáa dzoyè, tsí ìsérè yèé wà ńnɔ́-ɔɖɔ̃́#ɛ́ dzídzɛ#ɛ́ nákó tsɛ.

17Tsí ó kɛ́ ɔtí ńkɔ̃́ŋúkɔ̃́ŋú-kã̀, tsí ɖɔ́kpɛ́ fú Ɔ̀ɖáyé, tsí wà wí fú ŋa ní: Ká gbà, tsí ká kpɛ̃́ɛ̃ mɔ. 18Ó ɖi, òŋu wà wí fú ŋa ní fee, ti nɔ́mbɛ́#ɛ́, òŋu kàkó mɔ ɔtí ró títí fú àsòkò yèé Ɔ̀ɖáyé nákó dzoyè#ɛ́.

19Tsí ó kɛ́ kpɔ̃́nɔ́ gbo banɛ́, tsí ɖɔ́kpɛ́ fú Ɔ̀ɖáyé. Tsí ó tsɛ́ɛ, tsí ń bɔwɔ́-ŋa, tsí ní: Ara-òŋu ni. Òŋu bàkó kɛ́ɛ, tsí ń sã́ã̀bi si nárũ-ŋa.#22:19 Afɔ̀ yèé à kɔ si ńgɛ̀rɛ́kì#ɛ́ wà fɔ̀ ní: “Yèé bɛ́ ni ara-òŋu yèé òŋu ń fú ŋa#á.” Ó ɖi, ká gbà dzɛ, tsí ká wà tseé bɛ́ɛ̀, tsí wà ń tédzú-òŋu.

20Kíbí à dzɛŋɛ́ tã́#á, ó kɛ́ ɔtí gbo ńkɔ̃́ŋúkɔ̃́ŋú bɛ́ɛ̀ ké ró, tsí ń fú ŋa, tsí wà wí fú ŋa ní: Ɔtí yèé bɛ́ fee, ìmɔ̀lɛ̀ titɔ̃ yèé Ɔ̀ɖáyé wà tse bá ŋa#á ńnɛ̀ɛ́. Àmbara-òŋu ni, àmbara-ìmɔ̀lɛ̀#ɛ́ ni. Àmbara yèé òŋu bàkó ń ɖà ńlɛ̀, tsí ń tsɛbɔ néwo-ŋa#á ńnɛ̀ɛ́.

21Tsí ó ní: Ká rɛ̃tígbè! Ɛnɛ yèé wà ta òŋu#ɛ́, ó wà dzɛŋɛ́ bá òŋu bí. 22Ó ɖi, òŋu, Ɛnɛ yèé ɔ̀nyà bí#ɛ́†, òŋu kɛ́ tòŋu làkóò kíbí à ti fɔ̀ɔ́ si gbà#á. Ó ɖi, ɛnɛ yèé nákó ta òŋu#ɛ́, èhée fúu.

23Tsí à nyí, tsí wà bere ara-ŋa ní: Nɛ̀ɛ́ bòkó ɖá iŋɛ́ nyɛ̀ŋɛ̀ si náàŋírĩ-àŋa?

Yèésù wà wíìnyɛ̀ ti nára-onùgbó dzídzɛ́ fú ɔmatsɛ́‐ɛ̀ ŋa

24Náànyì-bɛ́ɛ̀#ɛ́, àrã́dzìnyà-kã̀ gbo wáa wá náàŋírĩ-ɔmatsɛ́-Yèésù† ŋa. À wà dzinya ara-ŋa ti nára-ɛnɛ yèé nákó dzɛ́ onùgbó náàŋírĩ-ŋa#á. 25Tsí Yèésù wà wí fú ŋa ní: Ólú-ìlú ŋa náa dzoyè si ńǹtá-ìlú-ŋà ŋa gbegbé, tsí ɔ̀nyà-ìdzɔba ŋa, à náa bèrè ní ká kpe àŋa ní olóore ŋa. 26Ó ɖi, kó máa lɔ bɛ́ɛ̀ fú àŋa òŋu. Kà kàa bɛ́ɛ̀, ɛnɛ yèé dzɛ́ ɔ̀gá fú ŋa#á, kó sɔ ara‐ɛ̀ ɖi maɖé tsígíɖí, tsí ɛnɛ yèé wà nárũ-ŋa#á gbo kó sɔ ara‐ɛ̀ ɖi adzítsɛ́. 27Báàyí gìɖì fee, nɛ̀ɛ́ dzɛ́ onùgbó ná? Ɛnɛ yèé dzokó si, tsí wà dzɛŋɛ́#ɛ́ nàmí ɛnɛ yèé ó wà bɛ̀ ńtsɛ́#ɛ́ ni? Ɛnɛ yèé dzokó si, tsí wà dzɛŋɛ́#ɛ́ ni nɔ̀! Ó ɖi, òŋu fee, òŋu wà náàŋírĩ-ŋa si kíbí adzítsɛ́ bɛ́ ni.

28Tsí àŋa òŋu, ara kò kú ŋa nára-òŋu, tsí à wà bá òŋu si, ńǹwèrè yèé òfò ŋa wà ńǹtá-òŋu#ɛ́. 29Tsí kíbí Ɔ̀ɖáyé Boba-òŋu fú òŋu ńkpá ní òŋu kó dzoyè bá òŋu#ɛ́, òŋu gbo, òŋu fú ŋa ńkpá ní ká dzoyè bá òŋu. 30Tsí à nákó dzɛ, tsí mɔ bá òŋu ńǹwèrè yèé òŋu nákó wà dzoyè#ɛ́, tsí à nákó dzokó náàntã̀-oyè kã̀kã̀, tsí wà kpɛdzɔ́ fú aro máàméèdzì-ɔma-Ìsàràyɛ́lì† ŋa#á.

Yèésù fɔ̀ ní Òkúta nákó sɛ̃́ ní òŋu kò ma òŋu

(Màtéwò 26:30-35; Mákò 14:26-31; Yòhánà 13:36-38)

31Tsí Yèésù wà wí fú ŋa ró ní: Sìmɔ́nì, Sìmɔ́nì, rɛ̃tígbè! Ètsù† bere ɔ̀nà ní òŋu kó ɖã́ ŋa wò, tsí gbò ŋá kíbí à náa gbo dzídzɛ bɛ́#ɛ́. 32Ó ɖi, òŋu ti wúùre fú Ɔ̀ɖáyé ní kó tse tsí àkaralé yèé ó nɛ́ si ńǹtá-òŋu#ɛ́ kó máa ɖɛ̀ bɔ̀. Bí ó sɛ̃̀ wá ńɖɔ̀-òŋu, kó ɖáàmí le enìkéèdzì‐ɛ̀ ŋa gbo.

33Tsí Òkúta fɔ̀ fú Yèésù ní: Ɔ̀gá-mi! Bí ó dzɛ́ nɛ́ɛ̀ŋà gbo, ńkú gbo, òŋu dzɛ́, òŋu nákó lɔ báa gé ni.

34Tsí Yèésù ní: Òkúta! Òŋu wà wí fúu ní àkìkɔ kàkó tì kɔ nɔ́mbɛ́ tã́ná nákó ti sɛ̃́ɛ̃̀rã̀ gbà mɛ́ɛta ní láyé òŋu kò tì mà òŋu.

35Tsí ó wà bèrè ŋá ní: Kíbí òŋu bɛ̀ ŋá lɔ dzɔ̀ɔ́ dzɔ̀ɔ́, tsí òŋu wí fú ŋa ní ká máa banɛ́ owó, ká máa banɛ́ arù òŋu kpákò#ɛ́ fee, iŋɛ́-kã̀ hã́ ŋaà?

Tsí à ní: Òò, iŋɛ́-kã̀ kpókpó kò hã́ àŋa.

36Tsí ó wà wí fú ŋa ní: Báàyí#ɛ́, ɛnɛ yèé nówó#ɛ́, kó múu banɛ́, tsí ɛnɛ yèé nɛ́ arù#ɛ́, kó kɛ́ɛ, tsí ɛnɛ yèé kò nɛ́ tàsú#ɛ́, òŋu gbo kó mú ìwɔ̀ra‐ɛ̀ tà, tsí kó ń ràá. 37Ó ɖi, oŋu wà wí fú ŋa ní fee, afɔ̀ yèé à kɔ si ńǸwé-Ɔ̀ɖáyé† ti nára-òŋu#ɛ́, àsòkò tó, tsí kó tsɛ. À kɔ si ní: “À nákó mú òŋu má ɔ̀nyà-íbàɖí ŋa.” Ó ɖi, afɔ̀ yèé à kɔ si ti nára-òŋu ŋa kpó#ɛ́, bòkó tsɛ ìɖéǹɖè.

38Tsí ɔmatsɛ́‐ɛ̀ ŋa ní: Ɔ̀gá, tàsú méèdzì kã̀ŋa ní.

Tsí ó ní: Ó tó bɛ́ɛ̀.

Yèésù lɔ káà wúùre ńǹtá-òkè-Òlífì

(Màtéwò 26:36-46; Mákò 14:32-42)

39Kíbí à dzɛŋɛ́#ɛ́ tã́#á, Yèésù ǹɖe, tsí fùɖá òŋu ɔmatsɛ́‐ɛ̀ ŋa, tsí à lɔ ńǹtá-òkè-Òlífì† kíbí náa ti lɔ#ɛ́. 40Kíbí à tó ńbɛ̀#ɛ́, ó wà wí fú ŋa ní: Ká wà wúùre, àtsùgbée ká máa dzì náàɖã́wò.

41Tsí òŋu ká‐ɛ̀ sɔ́ ǹɖe ńɖi-ŋa lɔ káà gbé nóòtèrè oɖé bɛ́. Tsí ó lɔ káà kálɛ̀, tsí kpé ìre wúwú fú Ɔ̀ɖáyé ní: 42Boba-mi, bí ò dzɛ́, òfò-ìrɔ́ yèé bàa#á, sɔ́ɔ lɔ fú mi ɖé! Ó ɖi, kó máa dzɛ́ awù tèmi ní nàa tse#ɛ́, kó dzɛ́ tìwɔ ká-ɛ̀ɛ.

[ 43Tsí adzítsɛ́-ɔ̀rɔ̃†-kã̀ wá ńɖɔ̀‐ɛ̀, tsí wáa ɖáàmí leé. 44Kíbí ìhã̀ŋù láre ɛ̀ɖɔ̃̀ si fúu tó#ɛ́, ó ɖìgírí, tsí wà wúùre kũkũ máa, tsí òógù yèé wà bɔ́ nára‐ɛ̀#ɛ́ wà dzò ɖà ńlɛ̀ kíbí àmbara bɛ́.]

45Kíbí ó wúùre tã́#á, ó sɛ̃̀ wá ńɖi-ɔmatsɛ́‐ɛ̀ ŋa#á. Ara kú ŋa, tsí à sɔ̃rũ lɔ si. 46Tsí ó wà wí fú ŋa ní: Kí tse tsí à sɔ̃rũ lɔ si bɛ́ɛ̀? Ká ǹɖe, tsí ká wúùre, àtsùgbée ká máa dzì náàɖã́wò!

À mú Yèésù

(Màtéwò 26:47-56; Mákò 14:43-52; Yòhánà 18:3-11)

47Oŋù-Yèésù kò tì dzilɛ̀ wòná, tsí ɔ̀nyà kpíkpɔ̀ kã̀ŋa wáa tó. Ɔmatsɛ́‐ɛ̀ yèé à náa kpè ní Yúɖà#á ní dzì ńwádzú fú ŋa bàa#á. Òŋu gbo wà náàŋírĩ-ɔmatsɛ́-Yèésù máàméèdzì ŋa#á. Kíbí à tó ńɖɔ̀‐ɛ̀#ɛ́, Yúɖà lɔ káà kíi, tsí fɔ̃́ɔ̃. 48Tsí Yèésù wà bèrèé ní: Ìwɔ, fífɔ̃́nɛ ní ìwɔ òŋu nàa ń ta èmi, Ɛnɛ yèé ɔ̀nyà bí#ɛ́ɛ̀?

49Tsí ɛnɛ yèé wà bá Yèésù ŋa#á rí kíbí iŋɛ́ ŋa#á bòkó lɔ gbà#á, tsí à wà bèrèé ní: Ɔ̀gá, àa kó gú ŋa ńtàsúù?

50Tsí ɔ̀nyà-kã̀ náàŋírĩ-ɛnɛ yèé wà bá Yèésù ŋa#á kpɔ tàsú‐ɛ̀ fùɖá, tsí ń tsá ɔ̀nyà-kã̀ náàŋírĩ-ŋa, tsí fá etí-àwóòtã́‐ɛ̀ ǹɖe. Ɛnɛ yèé à fa etí‐ɛ̀ nyɛ̀ŋɛ̀#ɛ́, arú-ɔ̀gã́-atsɛbɔ-Ɔ̀ɖáyé ŋa† ní ó dzɛ́#ɛ́.

51Tsí Yèésù wà rɔ́ fú tɛ̀ɛ̀ ŋa ní: Ó tó bɛ́ɛ̀, ká famí!

Tsí ó ǹɖe, tsí mɔ́wɔ́ kã etí-arú#ɛ́ gé, tsí bɔɔ́ si ńǹɖì‐ɛ̀.

52-53Ɛnɛ yèé ŋa wá, tsí bòkó wáa mú Yèésù#ɛ́, onùgbó-atsɛbɔ-Ɔ̀ɖáyé† ŋa òŋu àɖèlé-ilé-Ɔ̀ɖáyé ŋa má nára-onùgbó-ìlú ŋa ni. Tsí Yèésù nyí, tsí wà wí fú ŋa ní: Nɔ́dzɔ́ kɔ́dzɔ́ òŋu náa wà ńlé-Ɔ̀ɖáyé bá ŋa si, tsí à kò sì mɔ́wɔ́ kã òŋu wòrí. Tsí ó ɖi nóoru yèé bɛ́, tsí à ɖì gìrìdzàà wáa tó, tàsú ŋa òŋu ɔ̀kpá ŋa nɔ́wɔ́, kíbí à bòkó wáa mú olè-íbàɖí bɛ́ yí. Ó ɖi, àsòkò-ŋa tó, àsòkò-Ètsù† olí-itsɛ́-òkùkù ni.

54Tsí à múu, tsí gbɛ̃́ɛ̃ lɔ, tsí kɛ́ɛ lɔ káà ń wɔ̀ ńlé-ɔ̀gã́-atsɛbɔ-Ɔ̀ɖáyé ŋa lɔ. Ńǹwèrè nyɛ̀ŋɛ̀#ɛ́, Òkúta òŋu wà náànyì-ŋa si làkóò náàrìmáa sɔ́má ŋa.

Òkúta wà sɛ̃́ ní òŋu kò ma Yèésù

(Màtéwò 26:69-75; Mákò 14:66-72; Yòhánà 18:15-18,25-27)

55Tsí à fɛ́ná-kã̀ ńkpàtá-ɔ̀gã́-atsɛbɔ-Ɔ̀ɖáyé ŋa†#á, tsí ɔ̀nyà kã̀ŋa dzokó nára-iná#á si. Tsí Òkúta gbo lɔ káà wà náàŋírĩ-ŋa si. 56Tsí ó káà dzokó bá ŋa nára-iná#á, tsí kíbí ó dzokó nára-iná#á si#ɛ́, èkíɖã-kã̀ ríi, èkíɖã#á náa tsitsɛ́ ńkpàtá#á ni. Tsí èkíɖã#á kpalɛwo odzú‐ɛ̀ rere, tsí ní: Ɛnɛ yèé gbo wà báa.

57Tsí Òkúta sɛ̃́, tsí ní: Èkíɖã yèé! Èmi ǹ kò tì màá ti ńǹɖì-kã̀ wòrí fòò.

58Títí kó bɔ oɖé#ɛ́, ɔ̀nyà-kã̀ gbo ríi, tsí ní: Ìwɔ gbo, ò wà náàŋírĩ-ŋa.

Tsí Òkúta ní: Kpɛ́rɛ́! Ídzà yèé! Ǹ kò wà bá ŋa.

59Tsí ó tse aŋgo-kã̀ náànyì-bɛ́ɛ̀ ró, tsí ɔ̀nyà-kã̀ gbo tamá-afɔ̀#ɛ́ si, tsí dzɛ̃̀ŋù si ní: Ìɖéǹɖè#ɛ́, ɛnɛ yèé bɛ́ gbo wà báa náa. Ó ɖi, ɛnɛ-ɔwɔ́-Gàlìlé ŋa ní òŋu gbo dzɛ́#ɛ́.

60Tsí Òkúta ní: Ídzà yèé! Èmi ǹ kò tì ma afɔ̀-kã̀ náfɔ̀ yèé ò wà fɔ̀ nyɛ̀ŋɛ̀#ɛ́ oo.

Tsí ńǹɖì-bɛ̀ gbòkã́#á, oŋù‐ɛ̀ kò tì dzilɛ̀ tã́ná àkìkɔ kɔ. 61Tsí Ɔlá-wa nyí, tsí wà wòó kokoko. Gbòkã́ gé#ɛ́, Òkúta tédzú kíbí Ɔlá-wa fɔ̀ fúu ní: Àkìkɔ kàkó kɔ nɔ́mbɛ́ tã́ná nákó sɛ̃́ gbà mɛ́ɛta ní òŋu kò ma òŋu#ɛ́.

62Tsí ó ǹɖe fùɖá ńkpàtá#á, tsí ó ɖi àbámà fúu, tsí ó wà sɔkṹ hɛ̃̀hɛ̃̀hɛ̃̀.

À bú Yèésù, tsí kpaá

(Màtéwò 26:67-68; Mákò 14:65)

63Ńǹwèrè nyɛ̀ŋɛ̀#ɛ́, ɛnɛ yèé wà ɖe Yèésù ŋa#á, à wà múu tsiwɛwɛ́, tsí wà rã́ã̀rĩ́ fúu, tsí wà kpaá. 64Tsí à mú iŋɛ́-kã̀ ɖi odzú‐ɛ̀, tsí fɔ̀ fúu ní: Ɛnɛ yèé kpaá#á kó màá, tsí fɔ̀ɔ́ káyí. 65Tsí à sɛ̃̀ wà búu néèkpè kpíkpɔ̀ máa làkóò.

À gbɛ̃́ Yèésù lɔ fú ɛgbɛ́-àkpɛ̀dzɔ́-ɔma-Ìyúɖà ŋa

(Màtéwò 26:59-66; Mákò 14:53-64)

66Tsí ilɛ̀ má, tsí ɛgbɛ́-àkpɛ̀dzɔ́-ɔma-Ìyúɖà ŋa† kpàɖé kpó. Onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa, àŋa gbo, à wà náàŋírĩ-ŋa. Tsí à gbɛ̃́ Yèésù lɔ ńɖi-ɛgbɛ́-àkpɛ̀dzɔ́-ɔma-Ìyúɖà ŋa#á ní àŋa kó kpɛdzɔ́ báa, 67tsí à ní: Bí ó dzɛ́ ní òŋu ní dzɛ́ Kírísítò#ɛ́, ni kó fɔ̀ɔ́ fú àŋa.

Tsí ó wà dzɔ́ŋù fú ŋa ní: Bí òŋu fɔ̀ɔ́ gìɖì, kàkó dzɔ òtítɔ́ fú ŋa, 68tsí bí òŋu bèrè ŋá náfɔ̀-kã̀, à kàkó dzɔ́ŋù‐ɛ̀ gbo fú òŋu. 69Ó ɖi fee, ti nɔ́mbɛ́#ɛ́, òŋu, Ɛnɛ yèé ɔ̀nyà bí#ɛ́†, òŋu nákó káà dzokó náàwóòtã́-Ɔ̀ɖáyé Olíkpá.

70Tsí àŋa kpó, à ní: Ni ó dzɛ́ Ɔma bíbí-Ɔ̀ɖáyé ńnɛ̀ɛ́ nɔ̀?

Tsí ó dzɛ́ fú ŋa ní: Ɛ̃ɛ̃! Nárũ tàŋa ká-ŋa ní ó bɔ́ ti#ɛ́.

71Tsí à ní: Àyídzá-kã̀ kó lárè bɛ́ róò? Ó ɖi, àŋa ká-àŋa, àŋa ti gbɔ́ afɔ̀#ɛ́ nárũ‐ɛ̀ kpó ná.

Currently Selected:

Lúkà 22: ngl

Highlight

Copy