Lúkà 21

Okpó-kã̀ fú owó láre olówó ŋa

(Mákò 12:41-44)

1Yèésù wíìnyɛ̀ fú ɔmatsɛ́‐ɛ̀ ŋa tã́, tsí ó nyí, tsí wà rí kíbí olówó ŋa náa wá nɔ́gbà-ilé-Ɔ̀ɖáyé†#ɛ́, tsí à náa wà fú owó ɖà ńnɔ́-àɖákà-owó#ɛ́. Ńbɛ̀ ní à náa tsɔ̀yà ɖà ńlé-Ɔ̀ɖáyé#ɛ́. 2Tsí ó rí okpó-kã̀ gbo. Okpó#ɛ́, adzìyàkú ní ó dzɛ́#ɛ́. Tsí òŋu gbo mú bìyéè wíríwírí méèdzì, tsí wáa ń ɖà ńnɔ́-àɖákà#á. 3Tsí Yèésù ní: Òŋu wà wí fú ŋa ní fee, okpó yèé bɛ́#ɛ́, adzìyàkú-kã̀ ni, tsí ó sì fú owó láre ɛnɛ-àtíbɔ̀ ŋa kpó. 4Iŋɛ́ yèé tse#ɛ́, owó yèé kpèlé ńǹtá-owó fú ɛnɛ-àtíbɔ̀ ŋa#á ní àŋa òŋu, à kɛ́, tsí wáa ń tsɔ̀yà#á. Ó ɖi, okpó#ɛ́ òŋu, owó yèé wà nɔ́wɔ́‐ɛ̀ kpó ilé ilé, ɔ̀nà ɔ̀nà#á ní ó kɛ́ wáa fú#ɛ́.

Yèésù wà fɔ̀ ní ilé-Ɔ̀ɖáyé nákó wáa fɔ́ kpó

(Màtéwò 24:1-2; Mákò 13:1-2)

5Náànyì-bɛ́ɛ̀#ɛ́, ɔ̀nyà kã̀ŋa gbo wà wíìnyɛ̀ ti nára-ilé-Ɔ̀ɖáyé†, tsí wà fɔ̀ ní: Ilé#ɛ́ ɖíirí héŋú. Òkúta-àfɛ́ŋú ŋa ní à ń malé#ɛ́. Tsí ɔ̀nyà ŋa gbo kɛ́ iŋɛ́ ŋa wá, tsí ń tsɔ̀yà fú Ɔ̀ɖáyé, tsí à kɛ́ ŋa, tsí ń tɔ́tse-ilé#ɛ́ máa.

Tsí Yèésù wà wí fú ŋa ní: 6Ilé yèé à wà rí bɛ́#ɛ́, ìwèrè-kã̀ bàa, tsí à nákó wáa fɔ́ɔ kpó títí kàkó bɔ élè-kã̀ gìɖì bí ró.

7Tsí à wà bèrèé ní: Akɔ́nɛ, ńǹwèrè yèésí iŋɛ́ ŋa#á nákó wáa tse ná? Tsí kí àŋa nákó rí, tsí nákó nyà ɖíre fú àŋa ní àsòkò yèé iŋɛ́ ŋa#á kó tse#ɛ́ tó?

Yèésù wà fɔ iŋɛ́ yèé ŋa nákó wáa tse ńǹtã̀ntã́-ayé#ɛ́

(Màtéwò 24:3-14; Mákò 13:3-13)

8Tsí Yèésù wà fɔ̀ fú ŋa ní: Ká tsɔ́ éwo-ara-ŋa rere. Ká máa dzɛ́, tsí ká rú ŋa. Iŋɛ́ yèé tse#ɛ́, ɔ̀nyà kpíkpɔ̀ nákó wáa wá, tsí ɛnɛ kṹnukṹ nákó wà fɔ̀ ní òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á. Tsí à nákó wà fɔ̀ gbo ró ní ìtã̀ntã́-ayé#ɛ́ tó. Ó ɖi, ká máa tɛ̀ náànyì-ŋa. 9Ó ɖi, bí à wà gbɔ́ ìdzã̀mà-ogu òŋu kíbí ìdzà náa wɔ ìlú ŋa#á, ɛ̀ɖɔ̃̀ kó máa ɖá ŋa. Iŋɛ́ yèé tse#ɛ́, ó wà ní iŋɛ́ nyɛ̀ŋɛ̀ ŋa kó tse tsúwádzú. Ó ɖi, ìtã̀ntã́-ayé#ɛ́ kò sì tó wòná.

10Tsí ó wà wí fú ŋa ró ní: Ìlú ŋa nákó ǹɖe, tsí wà dzà bá ara-ŋa, tsí ìdzɔba ŋa gbo nákó ǹɖe, tsí wà dzà bá ara-ŋa. 11Tsí ilɛ̀ gbo nákó wà mì gìgìgì, tsí àrɔ̃̀ ŋa òŋu ebi gbo nákó wáa wɔ̀ ńǹlú ŋa ńǹɖì ńǹɖì ŋa. Iŋɛ́ kã̀ŋa gbo nákó wà tse, tsí wà nódzo fúnɛ, tsí à nákó wà rí iŋɛ́-àwùsì lákṹ lákṹ ŋa ńǹgbèrí. 12Ó ɖi, tã́ná iŋɛ́ nyɛ̀ŋɛ̀ ŋa kó wá#á, à nákó mú ŋa, tsí tsoró bá ŋa, tsí à nákó mú ŋa, tsí gbɛ̃́ ŋa lɔ ńlé-ìkpàɖé-ɔma-Ìyúɖà ŋa†, tsí kpɛdzɔ́ bá ŋa, tsí mú ŋa lɔ káà sé nɛ́ɛ̀ŋà. À nákó mú ŋa lɔ ńɖi-ólú ŋa òŋu ńɖi-kɔ̀màɖã́ã̀ ŋa náàtsùgbé-òŋu. 13Ńǹwèrè nyɛ̀ŋɛ̀#ɛ́, ɔ̀nà-kã̀ ní tsí fú ŋa bɛ́ɛ̀#ɛ́, tsí à nákó wà nya àyídzá ti nára-òŋu fú ŋa. 14Ó ɖi, kó wà ńǹsérè-ŋa si ní kò wà ní ká wà tsèsérè-kíbí à nákó káà wíìnyɛ̀-arũ-ŋa gbà fáà#á tsúwádzú. 15Òŋu ká-òŋu gìɖì, òŋu nákó fú ŋa ńfɛ̀ɛ́nɔ́ òŋu náfɔ̀ yèé à nákó wí, tsí ɔ̀tɛ̀-ŋà ŋa kàkó nyáa ɖugbã̀-ŋa, tsí dzìnyà-ŋá gbo#ɛ́.

16Ó ɖi fee, boba-ŋà ŋa òŋu ìnà-ŋà ŋa má nára-ɔ̀nyà-ara-ŋà ŋa gbo, ídza-ŋà ŋa gbo, àŋa kpó, à nákó mú ŋa fú, tsí fɔ̀ ní ká kpa ɔ̀nyà kpíkpɔ̀ náàŋírĩ-ŋa nóòkú. 17Ɔ̀nyà kpó nákó nyà ŋá kãdzú náàtsùgbé-òŋu. 18Ó ɖi, Ɔ̀ɖáyé òŋu nákó wà tsɛ́wé bò ŋá, tsí irɔ̃-éwo-ŋa ɔma-kã̀ kàkó nɔ̀. 19Ó ɖi, bí à módzúgbó, à nákó nyáa gba ara-ŋa dzɔ̀ɔ́.

Ìlú-Yèrúsàlɛ́mì nákó wáa fɔ́

(Màtéwò 24:15-28; Mákò 13:14-23)

20Tsí Yèésù wà wí fú ŋa ró ní: È nákó rí adzogu ŋa, tsí à nákó wérí ìlú-Yèrúsàlɛ́mì si kpó nyàgã̀ã̀. Bí è rí bɛ́ɛ̀#ɛ́, ni e mà ní àsòkò tó, tsí ìlú#ɛ́ kpó kó fɔ́. 21Tsí bí è rí bɛ́ɛ̀ ná, ɛnɛ yèé ŋa wà nérè-Yùɖéyà#á ká sá gu òkè ŋa lɔ. Tsí ɛnɛ yèé ŋa wà ńnɔ́-ìlú#ɛ́ si#ɛ́, ká sá fùɖá. Tsí ɛnɛ yèé ŋa nákó wà ńǹtá-oko ŋa si#ɛ́, àŋa gbo ká máa sɛ̃̀ bɔ̀ wá ńnɔ́-ìlú#ɛ́ ró. 22Iŋɛ́ yèé tse#ɛ́, nɔ́dzɔ́ nyɛ̀ŋɛ̀ ŋa ní Ɔ̀ɖáyé nákó tse àtsesã, tsí iŋɛ́ ŋa nákó tsɛ kíbí à ti kɔɔ́ si ńǸwé-Ɔ̀ɖáyé† si#ɛ́. 23Ó ɖi, nɔ́dzɔ́ nyɛ̀ŋɛ̀ ŋa#á, abefũ̀ ŋa òŋu ìnà-olɔ́ma tsígíɖí ŋa, ɛ̀rá rá ŋa! Ɔdzɔ́ nyɛ̀ŋɛ̀ ŋa#á nákó dzɛ́ ɔdzɔ́-ara kúkú lákṹ-kã̀ héŋú nérè#ɛ́, tsí Ɔ̀ɖáyé nákó nya inɔ́ bíbí‐ɛ̀ ŋa tɛ̀ɛ̀ ŋa. 24Ɔ̀nyà kã̀ŋa nákó kí nárũ-tàsú, tsí kú, tsí à nákó mú ɛnɛ-àtíbɔ̀ ŋa ńkpá lɔ ńǹlú-òmírɛ̃̀ ŋa wérí wérí kpó. Tsí ìlú-àledzò ŋa nákó dzogu bá ìlú-Yèrúsàlɛ́mì, tsí dzàdzàbɔ́‐ɛ̀, tsí wà gbɛ̃́ɛ̃ ńkpá títí fú àsòkò-ìmarũ yèé Ɔ̀ɖáyé ɖá fú ŋa#á kó tó.

Yèésù ní òŋu, Ɛnɛ yèé ɔ̀nyà bí#ɛ́, òŋu nákó wá

(Màtéwò 24:29-31; Mákò 13:24-27)

25Tsí Yèésù wà fɔ̀ ró ní: Ńǹwèrè nyɛ̀ŋɛ̀#ɛ́, è nákó wà rí iŋɛ́-àwùsì lákṹ lákṹ ŋa nódzúùrɔ̃̀ òŋu nóòtsùkpá, náàrã̀wo ŋa gbo. Tsí ɔ̀nyà-ìtalɛ̀ ŋa nákó wà gbɔ́ ìtsèntse-àhũ kíbí ɔtsã́‐ɛ̀ ŋa nákó wà kpa tó gbà#á, tsí à kàkó ma bí ká tse fáà gìɖì. Ìsérè nákó lárè ŋá si. 26Tsí odzúùrɔ̃̀ gbo, òtsùkpá gbo, àrã̀wo ŋa gbo, àŋa kpó, à nákó mì kpó dzìgìdzìgì, tsí dzidzi lákṹ-kã̀ nákó mú ɔ̀nyà ŋa, àtsùgbée iŋɛ́ yèé bòkó bá ayé#ɛ́ títí ɔ̀nyà kã̀ŋa nákó kú ikú-odzo gìɖì.

27Ńǹwèrè nyɛ̀ŋɛ̀#ɛ́, à nákó rí òŋu, Ɛnɛ yèé ɔ̀nyà bí#ɛ́†, tsí òŋu nákó tì bàa ńnɔ́-irì. Òŋu nákó wá òŋu ikpá lákṹ-kã̀ òŋu iyì lákṹ-kã̀ gbo. 28Ó ɖi, bí iŋɛ́ nyɛ̀ŋɛ̀ ŋa kpé tsítse#ɛ́, ká tsíìkpárè, tsí odzú-ŋa kó tù, iŋɛ́ yèé tse#ɛ́, ìwèrè sɔ́má, tsí Ɔ̀ɖáyé kó gbà ŋa dzɔ̀ɔ́.

Yèésù ní ɛ̀kɔ́ yèé egi-òrì ŋa wà tse fú ŋa#á, kó wà yé ŋa rere

(Màtéwò 24:32-35; Mákò 13:28-31)

29Tsí Yèésù wà kpòwe-kã̀ fú ŋa ní: Ɛ̀kɔ́ yèé egi-òrì òŋu egi-kóko-àtíbɔ̀ ŋa wà tse fú ŋa#á, kó wà yé ŋa rere. 30Bí egi ŋa#á kpé rúrú, àŋa ká-ŋa náa ti mà ní ìwèrè-òdzò ní sɔ́má#á. 31Bɛ́ɛ̀ ké ní bí iŋɛ́ nyɛ̀ŋɛ̀ ŋa wà tse, tsí à wà rí#ɛ́, ká mà ní ìwèrè sɔ́má, tsí Ɔ̀ɖáyé kó dzoyè. 32Òŋu wà wí òtítɔ́ fú ŋa ní fee, ɔma-ìsɛ̃̀ɛ̃́ ŋa kàkó kú tã́ kpó tã́ná iŋɛ́ nyɛ̀ŋɛ̀ ŋa#á kpó nákó tse. 33Ilɛ̀ gbo, ìgbèrí gbo, àŋa kpó, à nákó wáa nɔ̀ ǹɖe. Ó ɖi, afɔ̀ tòŋu ŋa nákó wà si títí lɔ.

Yèésù ní ká wà nódzúfò si

(Màtéwò 24:36-44; Mákò 13:32-37)

34Ó ɖi, ká wà tsɔ́ éwo-ara-ŋa rere! Kó máa dzɛ́ ní afɔ̀-ká wà dzɛ̀kũ, tsí wà mɔtí ŋɔ́, tsí wà ɖíìhã̀ŋù gé ní kó gba ìsérè-ŋa si#ɛ́. Bí ó dzɛ́ bɛ́ɛ̀, ɔdzɔ́#ɛ́ nákó wáa bá ŋa náàrìmódzúlé. 35Ó ɖi, ɔdzɔ́ nyɛ̀ŋɛ̀#ɛ́ nákó wáa kere ɔ̀nyà-ìtalɛ̀ ŋa ńǹɖìkíìɖì kpó, kíbí ɛyɛ náa kpa nɔ́ɔ̀kpákù náàrìmódzúlé bɛ́#ɛ́ ni. 36Ó ɖi, ká wà nódzúfò si, tsí ká wà wúùre ńǹwèrè ɔ̀kã̀lɔ́ɔ̀kã̀, tsí ká wà bere Ɔ̀ɖáyé náàmí, àtsùgbée ká nyáa bɔ́ ńnɔ́-iŋɛ́ ŋa#á, tsí ńǹwèrè-ɛdzɔ́ kpíkpè gbo, ni ká máa ɖeékoɖò ńwádzú-òŋu, Ɛnɛ yèé ɔ̀nyà bí#ɛ́†.

37Nɔ́dzɔ́ kɔ́dzɔ́, Yèésù náa wà lɔ ńlé-Ɔ̀ɖáyé, tsí káà tsɛ̀kɔ́ fú ɔ̀nyà ŋa, tsí nalɛ́ nalɛ́, náa wà lɔ káà kí ńǹtá-òkè-Òlífì†. 38Tsí náàwúrɔ̀ kã̀kã̀#á, ɔ̀nyà ŋa náa tsɛ́ kì, tsí wà lɔ ńɖɔ̀‐ɛ̀ ńlé-Ɔ̀ɖáyé, tsí káà rɛ̃tígbè-afɔ̀‐ɛ̀ ŋa.

Currently Selected:

Lúkà 21: ngl

Highlight

Copy