Lúkà 20

À bere Yèésù ní nɛ̀ɛ́ fúu ńkpá‐ɛ̀?

(Màtéwò 21:23-27; Mákò 11:27-33)

1Ó ɖi nɔ́dzɔ́-kã̀, tsí Yèésù wà nɔ́gbà-ilé-Ɔ̀ɖáyé† si, tsí wà tsɛ̀kɔ́ fú ɔ̀nyà ŋa, tsí wà dzíkɔ̀ ɖíɖɔ̃̀ ti nára-Ɔ̀ɖáyé fú ŋa. Tsí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa má nára-onùgbó-ìlú ŋa gbo, à wáa tó, 2tsí wà bèrèé ní: Ikpá mɛ̀ɛ́ wà fúu, tsí ó wà ń tse iŋɛ́ nyɛ̀ŋɛ̀ ŋa ná? Nɛ̀ɛ́ tútú fúu ńkpá-ìrɔ́-bɛ́ɛ̀ ná? Kó fɔ̀ɔ́ fú àŋa.

3Tsí Yèésù wà dzɔ́ŋù fú ŋa ní: Òŋu bàkó bèrè ŋá náfɔ̀ ɔ̀kã̀ntso bɛ́ gé, tsí ká dzɔ́ŋù‐ɛ̀ fú òŋu fòò. 4Nɛ̀ɛ́ bɛ Yòhánà† Awɛ̀fúnɛ wá ní kó wáa wɛ̀† fú ɔ̀nyà ŋa ná? Ɔ̀ɖáyé nàmí ɔ̀nyà ŋa ni?

5Tsí à nyí, tsí wà ɖìkpá fú ara-ŋa ní: Bí à náa fɔ̀ yèé fáà? Bí àŋa dzɛ́ fúu báàyí ní Ɔ̀ɖáyé ni, nákó bere àŋa ní, tsí kí tse tsí àŋa kò gba afɔ̀‐ɛ̀ gbɔ́? 6Tsí bí àŋa sì fɔ̀ gbo ní ɔ̀nyà ŋa ni, ɔ̀nyà kpó yèé wà bɛ̀#ɛ́ nákó ta àŋa nóòkúta kpa, iŋɛ́ yèé tse#ɛ́, à karalé ní Yòhánà ni agbáfɔ̀-Ɔ̀ɖáyé fɔ̀† ni. 7Tsí à tédzú fɔ̀ fú Yèésù ní: Àŋa kò ma ɛnɛ yèé bɛ̀ɛ́ wá#á.

8Tsí Yèésù gbo ní: Ó sã̀! Ó ɖi, òŋu gbo, òŋu kàkó ɖíre ɛnɛ yèé fú òŋu ńkpá, tsí òŋu wà ń tse iŋɛ́ ŋa#á fú ŋa.

Yèésù mú àtsìtsɛ́ yíyàábàɖí kã̀ŋa kpòwe

(Màtéwò 21:33-46; Mákò 12:1-12)

9Yèésù tɔ́ wà kpòwe fú ɔ̀nyà ŋa ró. Tsí ó ní: Olóko-kã̀ wà, tsí ó tsoko-egi-ɔtí† si. Tsí ó mú oko#ɛ́, tsí ń fú ɔ̀nyà kã̀ŋa ní ká wà tseé, tsí wà fú òŋu nákpálà tòŋu wá, tsí òŋu ká‐ɛ̀ ǹɖe lɔ nɔ́ɔ̀nà. Nákó kpɛ̃́ bɛ̀ tã́ná kó bɔ̀ wá.

10Kíbí ɔɖɔ̃́ ɖɔ̃#ɛ́, ó bɛ arú‐ɛ̀-kã̀ lɔ fú àtsìtsɛ́ ŋa#á ní ká fú òŋu nákpálà tòŋu wá. Ó ɖi, kíbí arú‐ɛ̀#ɛ́ wáa tó#ɛ́, àtsìtsɛ́ ŋa#á kpaá, tsí lée lɔ nɔ́wɔ́ nákpo. 11Tsí olóko#ɛ́ sɛ̃̀ bɛ arú‐ɛ̀-kã̀ wá ró, tsí à kpa òŋu gbo, tsí tsoró báa, tsí à lé òŋu gbo lɔ nɔ́wɔ́ nákpo. 12Tsí olóko#ɛ́ tɔ́ bɛ arú-ɛ̀kɛ́ɛta wá, tsí à kpa òŋu gbo títí ɖáàkpà si nára‐ɛ̀, tsí à lée fùɖá nóko#ɛ́.

13Tsí olóko#ɛ́ tsèsérè, tsí ní: Bí òŋu kó tse fáà báàyí? Òŋu kó tédzú bɛ ɔma bíbí-òŋu, àrínódzú-òŋu lɔ fú ŋa. Bóyá, à nákó nɛ́ àrísá fú òŋu.

14Tsí ó bɛ̀ɛ́ lɔ. Kíbí ɔma#á káà tó#ɛ́, ɛnɛ ŋa#á ríi, tsí à wà wí fú ara-ŋa ní: Ɛ̀hɛ̃́ɛ̃̀ɛ̃̀, ɔma-olóko#ɛ́ gìɖì ní. Òŋu ní bàkó wáa dzogú-oko#ɛ́. Ó ɖi, àŋa kó kpaá nóòkú gbòkã́, tsí oko#ɛ́ kó kí fú àŋa.

15Tsí à múu, tsí fàá fùɖá nóko-egi-ɔtí#ɛ́, tsí kpaá nóòkú.

Tsí Yèésù fɔ̀ ní: Báàyí#ɛ́ fe, à ma iŋɛ́ yèé olóko-egi-ɔtí#ɛ́ nákó wáa tse fú àtsìtsɛ́ ŋa#áà? 16Nákó wáa mú ŋa, tsí kpa ŋá nóòkú kpó, tsí nákó mú oko-egi-ɔtí#ɛ́, tsí ń bɔwɔ́-olòmírɛ̃̀ ŋa.

Kíbí ɔ̀nyà ŋa gbɔ́ afɔ̀ nyɛ̀ŋɛ̀#ɛ́, à ní: Kpɛ́rɛ́! Kàkó dzɛ́ bɛ́ɛ̀ láyé!

17Tsí Yèésù nyí, tsí wà wo odzú-ŋa kã̀kã̀, tsí wà wí fú ŋa ní: Bí kò tsi bɛ́ɛ̀ fee, kí tse tsí à kpòwe-kã̀ si ńǸwé-Ɔ̀ɖáyé† ní:

“Òkúta yèé amalé ŋa kɛ́ sɔ taánù#ɛ́,

òŋu#ɛ́ ní wáa kpã́dzú lárè, tsí gbé négo-ilé#ɛ́,

àtsùgbée ilé#ɛ́ kó máa ɖíwó#ɛ́”?#20:17 Ìwé-Orĩ ŋa 118:22 (Psaumes 118:22)

18Ó ɖi, bí ɔ̀nyà-kã̀ tsubú dzì ńǹtá-òkúta#á, ɛnɛ nyɛ̀ŋɛ̀ nákó tsɛ́ kpó wíríwírí, tsí bí òkúta#á sì dzì ńǹtá-ɔ̀nyà-kã̀, nákó tɛ̀ ɛnɛ nyɛ̀ŋɛ̀ má kpó kpɛ̀nlɛ̀ɛ̀.

19Kíbí Yèésù wí bɛ́ɛ̀#ɛ́, akɔ́nɛ nɛ́kpa-Ɔ̀ɖáyé† ŋa òŋu onùgbó-atsɛbɔ-Ɔ̀ɖáyé† ŋa, à wò ní àŋa kó múu. Iŋɛ́ yèé tse#ɛ́, à mà rere ní àŋa ní ó kpòwe nyɛ̀ŋɛ̀ fú#ɛ́. Ó ɖi, à sì wà sá fú ɛnɛ yèé ŋa kpérí si bɛ̀#ɛ́.

À wà mú afɔ̀-owó-lómbà sísã, tsí wà ń sɔ ɔ̀kpákù fú Yèésù

(Màtéwò 22:15-22; Mákò 12:13-17)

20Báàyí#ɛ́, à kpé Yèésù tsítsɔ́, tsí à bɛ ɔ̀nyà ŋa lɔ ńɖɔ̀‐ɛ̀ ní ká lɔ káà sɔ ɔ̀kpákù fúu. Ɛnɛ nyɛ̀ŋɛ̀ ŋa náa tse kíbí à dzɛ́ atsòtítɔ́ ŋa bɛ́, tsí à náa wà bèrèé náfɔ̀ àtóoríi ká gbɔ́ oŋù-íbàɖí-kã̀ nárũ‐ɛ̀ gé, tsí ká múu lɔ fú kɔ̀màɖã́ã̀. Òŋu ní nɛ́kpá, tsí kó nyáa kpɛdzɔ́ báa, tsí fɔ̀ ní ká kpaá nóòkú#ɛ́.

21Tsí ɛnɛ nyɛ̀ŋɛ̀ ŋa káà tó, tsí wà wí fúu ní: Akɔ́nɛ, àŋa mà ní náa wà wíìnyɛ̀, tsí wà kɔ́nɛ nóòtítɔ́. Kà wo odzú-nɛ gbo. Tsí kíbí ká tse fáà gbo, tsí dzɔdzú-Ɔ̀ɖáyé#ɛ́, náa wà ɖíreé fúnɛ òŋu òtítɔ́. 22Báàyí fee, ɛkpa-Ɔ̀ɖáyé† wà fú ɔ̀nà ní ká sã owó-lómbà fú ɔ̀gã́-ìdzɔba ńlɛ̀-Rómà† nàmí kò fú ɔ̀nà bɛ́ɛ̀? Àŋa kó sãã́ã̀ nàmí àŋa kó máa sãã́?

23Tsí Yèésù rí ɔgbɔ̃́ yèé à wà ɖá#á mà, tsí ó wà wí fú ŋa ní: 24Ká kɛ́ owó-ɛyɔ-kã̀ wá káyí!

Tsí à kɛ́ɛ wá. Tsí ó wà bèrè ŋá ní: Éwo-nɛ̀ɛ́ òŋu ɛ́kɔ-nɛ̀ɛ́ wà ńǹtá‐ɛ̀?

Tsí à dzɔ́ŋù fúu ní: Ti ɔ̀gã́-ìdzɔba ni.

25Tsí Yèésù ní: Ó sã̀! Ó ɖi, ká kɛ́ iŋɛ́ yèé dzɛ́ ti ɔ̀gã́-ìdzɔba#á, tsí ń fú ɔ̀gã́-ìdzɔba, tsí yèé dzɛ́ ti Ɔ̀ɖáyé#ɛ́, ká ń fú Ɔ̀ɖáyé.

26Tsí à kò rí ɔ̀nà-kã̀ kpókpó, tsí ká nyáa múu nódzú-ɔ̀nyà ŋa nóŋù-afɔ̀ yèé ŋa ó wà fɔ̀#ɛ́. Tsí kíbí náa dzɔ́ŋù fú ŋa gbà#á, ó mù ŋá, tsí à tédzú tsikó.

À wà mú afɔ̀-òkú ŋa kó sɛ̃̀ dzí wá náyé, tsí wà ń sɔ ɔ̀kpákù fú Yèésù

(Màtéwò 22:23-33; Mákò 12:18-27)

27Ɛgbɛ́-kã̀ gbo wà, tsí à náa kpèé ní ɛgbɛ́-Sàɖùké† ŋa. Ɔma-ɛgbɛ́ ŋa#á ní náa wà fɔ̀ ní òkú ŋa kàkó sɛ̃̀ dzí wá náyé ró#ɛ́. Tsí ɔ̀nyà kã̀ŋa ǹɖe náàŋírĩ-ŋa, tsí sɔ́ tìmá-Yèésù, tsí wà bèrèé ní: 28Akɔ́nɛ, Mɔ̀ɔ́sè kɔ ɛkpa-Ɔ̀ɖáyé† si fú àŋa ní: Bí ɔ̀nyà-kã̀ wà, tsí ó náya, tsí kò bíma tã́ná ó kú, bí ɛnɛ nyɛ̀ŋɛ̀ nɛ́ ìnàbí, ó wà ní ìnàbí‐ɛ̀-kã̀ kó tsókpó-aya#á, tsí aya#á kó bíma fúu. Ńbɛ̀ɛ́, ɔma#á nákó dzɛ́ ti òkú#ɛ́.#20:28 È káà kã Ìwé-Ìkpìnkpìlɛ̀-ayé 38:8, Ìwé-Àkóro 25:5-6 (Genèse 38:8, Deutéronome 25:5-6). 29Kíbí ó dzɛ́ bɛ́ɛ̀#ɛ́ fee, ká fɔ̀ ní ìnàbí méedze kã̀ŋa wà, tsí ɛnɛ-onùgbó#ɛ́ náya, tsí kú náàrìmáa bíma. 30Tsí ɔmàná‐ɛ̀ tsókpó-aya#á, tsí tɛ̀ɛ̀ gbo lɔ bɛ́ɛ̀. 31Tsí ɛnɛ-ɛ̀kɛ́ɛta gbo tsókpó-aya#á, tsí tɛ̀ɛ̀ gbo lɔ bɛ́ɛ̀ ké. Tsí àŋa méedze#ɛ́ kpó, à náya#á, tsí kú kɔ̀ɔ́ dzɔ̀ɔ́ náàrì bíma. 32Tsí ńǹtã̀ntã́‐ɛ̀#ɛ́, ɔnɔbɛ̃̀ɛ̃#ɛ́ gbo wáa kú. 33Báàyí fee, nɔ́dzɔ́ yèé òkú ŋa nákó sɛ̃̀ dzí wá náyé#ɛ́, ti nɛ̀ɛ́ aya#á nákó dzɛ́ náàŋírĩ-ŋa, kíbí ó dzɛ́ ní àŋa méedze#ɛ́ kpó, à náya#á wòrí#ɛ́?

34Tsí Yèésù wà dzɔ́ŋù fú ŋa ní: Ɔ̀nyà-ìtalɛ̀ bí ŋa, à náa náya, tsí nɔ́kɔ gbo. 35Ó ɖi, ɛnɛ yèé ŋa dzɔ ní Ɔ̀ɖáyé kó sɛ̃̀ dzí ti náàŋírĩ-òkú ŋa wá náyé, tsí ká wáa gbé náyé yèé bàa náànyìwà#á, àŋa òŋu, afɔ̀-ká náya òŋu ká nɔ́kɔ kàkó tsɛdzɔ́-ŋa ró. 36Tsí à kàkó kú láyé ró, iŋɛ́ yèé tse#ɛ́, à wà kíbí adzítsɛ́-ɔ̀rɔ̃† ŋa bɛ́, tsí kíbí à sɛ̃̀ dzí ti náàŋírĩ-òkú ŋa wá náyé#ɛ́, à dzɛ́ ɔma-Ɔ̀ɖáyé ŋa. 37Mɔ̀ɔ́sè† gìɖì gbo ti wí wáa lɔ ní òkú ŋa nákó sɛ̃̀ dzí wá náyé. Ó kɔ si ńǸwé-Ɔ̀ɖáyé† ní Ɔ̀ɖáyé mú ara‐ɛ̀ ŋa òŋu ńsùyɛ̀-kã̀ yèé wà gbã̀ bìlàbìlà#á. Tsí ó wíìnyɛ̀ ti nára-Ɔ̀ɖáyé Ɔlɔ́dzɔ́, tsí wà fɔ̀ ní Ɔ̀ɖáyé ní dzɛ́ Ɔ̀ɖáyé-Àbàràhámì†, tsí dzɛ́ Ɔ̀ɖáyé-Ìsákà† gbo, tsí dzɛ́ Ɔ̀ɖáyé-Yàkúbù† gbo#ɛ́.

38Tsí Yèésù fɔ̀ máa ní: Ó ɖi, Ɔ̀ɖáyé kò dzɛ́ Ɔ̀ɖáyé-òkú ŋa. Ɔ̀ɖáyé ɔ̀nyà-àwáàyɛ̀ ŋa ní ó dzɛ́#ɛ́. Òkpì‐ɛ̀ ní dzɛ́ ní ɔ̀nyà ɔ̀kã̀lɔ́ɔ̀kã̀, ni ɔ̀nyà-àwáàyɛ̀ nódzú-Ɔ̀ɖáyé ni.

39Tsí akɔ́nɛ nɛ́kpa-Ɔ̀ɖáyé† kã̀ŋa ní: Akɔ́nɛ, ò fɔ̀ɔ́ rere héŋú.

40Ó ɖi, à wà sá, tsí à kò ɖɔ́ɔ̀rɔ̀-ká bèrèé náfɔ̀-kã̀ kpókpó sɔ ró.

Kírísítò, ɔmalɔ́ma-Ɖàfíɖì dzɛ́ Ɔlá-Ɖàfíɖì gbo

(Màtéwò 22:41-46; Mákò 12:35-37)

41Tsí Yèésù wà bèrè ŋá ní: Kí tse tsí à náa fɔ̀ ní Kírísítò Agbanɛlà yèé Ɔ̀ɖáyé nákó tsã̀, tsí bɛ̀ wá#á ni ɔmalɔ́ma-Ɖàfíɖì† ní ó dzɛ́#ɛ́ ná? 42Ó ɖi, Ɖàfíɖì òŋu ká‐ɛ̀ fɔ̀ si ńnɔ́-Ìwé-Orĩ ŋa ní:

“Ɔlɔ́dzɔ́ wí fú Ɔlá-mi ní:

Wáa dzokó náàwóòtã́-mi,

43tsí n mú ɔ̀tɛ̀-ɛ̀ɛ ŋa tsã́lɛ̀,

tsí o mú ɛsɛ̀ lé ńǹtá-ŋa.”#20:43 Ìwé-Orĩ ŋa 110:1 (Psaumes 110:1)

44Ńbɛ̀ɛ́, Ɖàfíɖì wà kpe Kírísítò ní Ɔlá-òŋu. Báàyí#ɛ́ fe, kíbí Kírísítò dzɛ́ Ɔlá‐ɛ̀#ɛ́ fe, nákó nyáa dzɛ́ ɔmalɔ́ma‐ɛ̀ róò? È fɔ̀ɔ́ káyí!

Yèésù wà fɔ̀ ní ká máa wére akɔ́nɛ nɛ́kpa-Ɔ̀ɖáyé ŋa

(Màtéwò 23:1-12; Mákò 12:37-40)

45Ɛnɛ yèé wà bɛ̀ ŋa#á wà rɛ̃tígbè-Yèésù, tsí ó wà wí fú ɔmatsɛ́‐ɛ̀ ŋa ní: 46Ká tsɔ́ éwo-ara-ŋa rere ti nára-akɔ́nɛ nɛ́kpa-Ɔ̀ɖáyé† ŋa. Àŋa òŋu, à náa wɔ ìwɔ̀ra gúgù ŋa si, tsí wà rɛ̃̀ wérí, tsí à náa wò gbo ní ɔ̀nyà ŋa kó wà rɔlɛ̀ kí àŋa náàbɔ̀ɔ́mɛ̀ ŋa. Bí à lɔ ńlé-ìkpàɖé-ɔma-Ìyúɖà ŋa†, à náa wo ká dzokó ńwádzú, tsí nóòkpì-dzídzɛ gbo, à náa wo ìɖì-onùgbó. 47À náa gbó okpó ŋa gbo kpó ilé ilé, ɔ̀nà ɔ̀nà, tsí à náa wà wúùre kpíkpɛ̃́ gbo, tsí ká wà ń tsìké ní àŋa dzɛ́ atsòtítɔ́ ŋa. Ńnɛ̀ ní Ɔ̀ɖáyé nákó fɛtí fú ŋa líle líle lárè#ɛ́.

Currently Selected:

Lúkà 20: ngl

Highlight

Copy