Lúkà 18

Yèésù mú okpó-kã̀, tsí ń kpòwe ti nára-kíbí ó wà ní ká wúùre gbà#á

1Náànyì-bɛ́ɛ̀#ɛ́, Yèésù wà tse ìsàwé-kã̀, tsí wà ń ɖíre fú ŋa ní ó wà ní ká wà wúùre ńǹwèrè kíìwèrè, tsí ara kó máa kú ŋa gbo. 2Ó wà fɔ̀ fú ŋa ní: Àkpɛ̀dzɔ́-kã̀ wà ńǹlú-kã̀, tsí kà nɛ́ àrísá fú Ɔ̀ɖáyé, tsí kà múnɛ kpe iŋɛ́-kã̀ gbo. 3Tsí okpó ɔnɔbɛ̃̀ɛ̃-kã̀ gbo wà ńnɔ́-ìlú#ɛ́ bɛ̀, tsí okpó#ɛ́ náa wà lɔ ńɖi-àkpɛ̀dzɔ́#ɛ́, tsí wà fɔ̀ fúu ní: Kó kpɛdzɔ́ fú òŋu, tsí kó gba òŋu nɔ́wɔ́-ɔ̀tɛ̀-òŋu ɖé.

4Tsí àkpɛ̀dzɔ́#ɛ́ wà kɔ̀ títí wáa fú ìwèrè-kã̀. Tsí ńǹtã̀ntã́‐ɛ̀#ɛ́, ó wà fɔ̀ ńnɔ́-ara‐ɛ̀ ní: Ìɖéǹɖè#ɛ́, òŋu kà nɛ́ àrísá fú Ɔ̀ɖáyé, tsí òŋu kà múnɛ kpe iŋɛ́-kã̀ gbo. 5Ó ɖi, kíbí ó dzɛ́ ní okpó#ɛ́ wà ɖɔ́kpɔ fú òŋu tó bɛ́ɛ̀#ɛ́, òŋu nákó kpɛdzɔ́#ɛ́ ǹɖe fúu. Bí kò tsi bɛ́ɛ̀, bí ó wà ńnɛ̀ si làkóò#ɛ́, afɔ̀‐ɛ̀ nákó wáa sú òŋu.

6Tsí Ɔlá-wa wà wí fú ŋa ró ní: Àkpɛ̀dzɔ́#ɛ́, atsòkṹnù ní ó dzɛ́#ɛ́ tã́ná ó sì wà fɔ̀ bɛ́ɛ̀#ɛ́. Ó ɖi, ká rɛ̃tígbè afɔ̀‐ɛ̀ káyí! 7Bí òŋu yèé dzɛ́ atsòkṹnù#ɛ́ wà fɔ̀ bɛ́ɛ̀#ɛ́, ti Ɔ̀ɖáyé òŋu nákó yɔ. Ɔ̀ɖáyé nákó kpɛdzɔ́ fú ɛnɛ́ dzɛ́ tɛ̀ɛ̀ ŋa, tsí à náa wà ɖúgbe kpèé òsã́-kã̀, òru-kã̀#á, tsí afɔ̀-ŋa nákó dzàre gbo gé ni. Nákó yára, tsí wáa mɔ́wɔ́ gbè fú ŋa. 8Ìɖéǹɖè#ɛ́, nákó yára ɖáàre fú ŋa. Ó ɖi òŋu, Ɛnɛ yèé ɔ̀nyà bí#ɛ́†, bí òŋu wá fee, òŋu nákó nyáa rí ɔ̀nyà ńǹtalɛ̀#ɛ́, tsí kó nɛ́ àkaralé-ìrɔ́ nyɛ̀ŋɛ̀ si yáà?

Kò wà ní ká wà kɛ́ ara-nɛ

9Náànyì-bɛ́ɛ̀ ró#ɛ́, Yèésù tɔ́ kpòwe-kã̀ ró fú ɛnɛ yèé ŋa náa wà kɛ́ ara-ŋa ní àŋa dzɛ́ ɔ̀nyà-atsòtítɔ́, tsí à náa nya enìkéèdzì-ŋà ŋa kãdzú si#ɛ́. 10Ó wà fɔ̀ fú ŋa ní: Ó ɖi nɔ́dzɔ́-kã̀, tsí ɔ̀nyà méèdzì-kã̀ lɔ nɔ́gbà-ilé-Ɔ̀ɖáyé†, tsí ká lɔ káà wúùre. Ɔ̀nyà-kã̀ ni ɔma-ɛgbɛ́-Fàrísì† ŋa, tsí enìkéèdzì‐ɛ̀ òŋu ni agbalómbà. 11Tsí ɔma-ɛgbɛ́-Fàrísì#ɛ́ ǹɖe, tsí sɔ́ lɔ ńwádzú, tsí wà wúùre ní: Óò! Ɔ̀ɖáyé, ǹ wà ɖɔ́kpɛ́ fɛ́ɛ ní ǹ kò wà kíbí ɛnɛ-àtíbɔ̀ ŋa. Ǹ kà gba iŋɛ́ ńkpá nɔ́wɔ́-nɛ, ǹ kà tsòkṹnù-nɛ, ǹ kà gbaya gbo. Ǹ kò wà kíbí agbalómbà yèé bɛ́ gìɖì. 12Ńnɔ́-adzà-kã̀#á, gbà méèdzì ní mà ɖi arũ#ɛ́, tsí ìɖì-ɛ̀kɛ́ɛwá-èrè yèé mà dzɛ#ɛ́, mà mú òŋu gbo fɛ́ɛ kpó.

13Ńǹwèrè nyɛ̀ŋɛ̀#ɛ́, agbalómbà#á òŋu lɔ káà ɖóro nóòtèrè, tsí mú odzú bɔlɛ̀ si. Kò tì wò ní òŋu kó kɛ́ odzú fú ìgbèrí gìɖì. Tsí ó mɔ́wɔ́ fɔ̃́ ɛ̀ɖɔ̃̀, tsí wà fɔ̀ ní: Óò! Ɔ̀ɖáyé, rí ànyínɔ́ fú mi ɖé! Ɔ̀nyà-íbàɖí ní ǹ dzɛ́#ɛ́.

14Tsí Yèésù ní: Òŋu wà wí fú ŋa ní fee, agbalómbà yèé bɛ́#ɛ́ nákó lɔ káà tó ńlé‐ɛ̀, tsí wà rere bá Ɔ̀ɖáyé si. Ó ɖi, kàkó wà bɛ́ɛ̀ fú enìkéèdzì‐ɛ̀ òŋu. Ó ɖi, ɔ̀nyà kpó yèé wà kɛ́ ara‐ɛ̀#ɛ́, Ɔ̀ɖáyé nákó ɖɛ̀ɛ́ bɔ̀, tsí ɔ̀nyà kpó yèé wà tɛ ara‐ɛ̀ bɔlɛ̀#ɛ́, Ɔ̀ɖáyé nákó kɛ́ɛ si ńǹɖì lákṹ.

Yèésù wà tu kùsɛ̀ɛ̀ fú ɔma tsígíɖí ŋa

(Màtéwò 19:13-15; Mákò 10:13-16)

15Náànyì-bɛ́ɛ̀#ɛ́, ɔ̀nyà ŋa wà kɛ́ ɔma nɔ́wɔ́ ŋa gìɖì gbo wáa lɔ fú Yèésù ní kó mɔ́wɔ́ lé ńǹtá-ŋa, tsí tu kùsɛ̀ɛ̀ fú ŋa. Ó ɖi, kíbí ɔmatsɛ́‐ɛ̀ ŋa wà rí bɛ́ɛ̀#ɛ́, à wà kɔ̀ fú ɔ̀nyà ŋa ní ká máa kɛ́ ɔma-ŋa wá ró. 16Tsí Yèésù fa maɖé ŋa#á tìmá-ara‐ɛ̀, tsí wà fɔ̀ ní: Ká kɔ̀ ŋá dzɔ̀ɔ́, tsí ká wá ńɖɔ̀-òŋu. Ká máa ɖí ɔ̀nà fú ŋa. Iŋɛ́ yèé tse#ɛ́, ɛnɛ yèé ŋa wà kíbí maɖé ŋa#á, àŋa ní nákó gbé nóyè-Ɔ̀ɖáyé†#ɛ́. 17Ó ɖi, òŋu wà wí fú ŋa ní fee, ɛnɛ yèé kò dzɛ́ ní Ɔ̀ɖáyé kó dzoyè si ńǹtá-òŋu kíbí ɔma tsígíɖí náa dzɛ́, tsí gba iŋɛ́ bɛ́#ɛ́, Ɔ̀ɖáyé kàkó gbàá si nóyè‐ɛ̀.

Ó le fú olówó ŋa ní Ɔ̀ɖáyé kó dzoyè si ńǹtá-ŋa

(Màtéwò 19:16-30; Mákò 10:17-31)

18Tsí ó ɖi nɔ́dzɔ́-kã̀, tsí onùgbó-ìlú-kã̀ wà bere Yèésù ní: Akɔ́nɛ ɔ̀nyà-ire! Kí wà ní òŋu kó tse, tsí rí àyɛ̀-àrìtã́ ná? Kó fɔ̀ɔ́ fú òŋu.

19Tsí Yèésù wà wí fúu ní: Kí tse tsí ó wà kpe òŋu ní ɔ̀nyà-ire? Ó ɖi, ɔ̀nyà-kã̀ kpókpó kò wà, tsí dzɛ́ ɔ̀nyà-ire. Ɔ̀ɖáyé òŋu níìkã̀ntso gé ni. 20Ó ɖi, ó ti ma ɛkpa-Ɔ̀ɖáyé† ná nɔ̀! Ɛkpa#á wà fɔ̀ ní: “Ò kàa gbaya. Ò kàa gbɔkɔ. Ò kàa kpa ɔ̀nyà nóòkú. Ò kàa tsolè. Ò kàa tsòɖòbò má ɔ̀nyà-kã̀. Nà nɛ́ àrísá fú boba-ɛ̀ɛ òŋu ìnà-ɛ̀ɛ.”#18:20 Ìwé-Fúfùɖá 20:12-16, Ìwé-Àkóro 5:16-20 (Exode 20:12-16, Deutéronome 5:16-20)

21Tsí onùgbó-ìlú#ɛ́ wà fɔ̀ ní: Òŋu ti wà rɛ̃̀ si nɛ́kpa nyɛ̀ŋɛ̀ ŋa kpó títí nɔ́mɔ̀tsɔ́-òŋu ni.

22Kíbí Yèésù gbɔ́ bɛ́ɛ̀#ɛ́, ó wà wí fúu ní: Ó bɔ iŋɛ́-kã̀ fúu ró. Ó ɖi, kó ta iŋɛ́‐ɛ̀ ŋa kpó, tsí kó kpɛ̃́ owó‐ɛ̀ fú adzìyàkú ŋa. Ńbɛ̀ɛ́, nákó kpaɖí iŋɛ́-ɛ̀fɛ́ ŋa si fú ara‐ɛ̀ nɔ́ɔ̀rɔ̃. Tsí bí ó tse bɛ́ɛ̀ tã́, ni kó wáa tɛ̀ náànyì-òŋu.

23Kíbí onùgbó-ìlú#ɛ́ gbɔ́ afɔ̀ nyɛ̀ŋɛ̀#ɛ́, ara kúu kpó. Iŋɛ́ yèé tse#ɛ́, olówó lákṹ-kã̀ ní ó dzɛ́#ɛ́.

24Tsí Yèésù rí mà ní ara kúu, tsí ó ní: Ó le fú olówó ŋa héŋú ní Ɔ̀ɖáyé kó wáa dzoyè si ńǹtá-ŋa. 25Atsĩ kó gbà ńfò-abɛ́rɛ́#ɛ́ kò le tó olówó-kã̀ kó wɔ̀ lɔ nóyè-Ɔ̀ɖáyé†.

26Tsí ɛnɛ yèé ŋa wà bɛ̀, tsí wà gbɔ́ afɔ̀‐ɛ̀ ŋa#á wà fɔ̀ ní: Kpɔ́ dza! Bí ó dzɛ́ bɛ́ɛ̀ ní afɔ̀#ɛ́ dzɛ́#ɛ́, nɛ̀ɛ́ gìɖì nákó nyáa rí ɔlà ńǹkɛ̀ɛ́?

27Tsí ó wà dzɔ́ŋù fú ŋa ní: Iŋɛ́ yèé ɔ̀nyà kàkó nyáa tse#ɛ́, Ɔ̀ɖáyé òŋu nákó nyáa tseé.

28Tsí Òkúta wà fɔ̀ fúu ní: Kó rɛ̃tígbè! Àŋa òŋu, iŋɛ́ yèé àŋa nɛ́ ŋa kpó#ɛ́, àŋa kɔ̀ ŋá dzɔ̀ɔ́, tsí waà tɛ̀ náànyì‐ɛ̀.

29Tsí ó wà dzɔ́ŋù fúu ní: Òŋu wà wí òtítɔ́ fú ŋa ní fee, bí ɔ̀nyà-kã̀ kɔ ilé òŋu aya dzɔ̀ɔ́, tsí kɔ ɔma òŋu ìnàbí dzɔ̀ɔ́, tsí kɔ ínà òŋu boba gbo dzɔ̀ɔ́ náàtsùgbé-Ɔ̀ɖáyé kó nyáa dzoyè si ńǹtá‐ɛ̀#ɛ́, 30ɛnɛ nyɛ̀ŋɛ̀ nákó rí iŋɛ́-òlárèbɛ́ɛ̀ ńǹwèrè yèé àa wà si báàyí#ɛ́, tsí náànyìwà#á, nákó wáa rí àyɛ̀-àrìtã́ gbo máa.

Yèésù tɔ́ wà fɔ̀ nóláànkɛ́ɛta‐ɛ̀ ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé

(Màtéwò 20:17-19; Mákò 10:17-31)

31Náànyì-bɛ́ɛ̀#ɛ́, Yèésù kpe ɔmatsɛ́‐ɛ̀ máàméèdzì ŋa#á, tsí à lɔ nákpálà-kã̀, tsí ó wà wí fú ŋa ní: Ká rɛ̃tígbè! Ó ɖi, àŋa làkóò ńYèrúsàlɛ́mì, tsí afɔ̀ yèé agbáfɔ̀-Ɔ̀ɖáyé fɔ̀† ŋa ti kɔ si ti nára-òŋu, Ɛnɛ yèé ɔ̀nyà bí#ɛ́†, ńbɛ̀ ní afɔ̀ ŋa#á kpó nákó tsɛ#ɛ́. 32Ó ɖi, à nákó mú òŋu bɔwɔ́-ɛnɛ yèé kò dzɛ́ ɔma-Ìyúɖà ŋa#á, tsí à nákó mú òŋu tse, tsí à nákó bú òŋu, tsí titɔ́ ɖàbo òŋu, 33tsí à nákó tsɔ òŋu náàtàmì, tsí kpa òŋu nóòkú, tsí nɔ́dzɔ́-ɛ̀kɛ́ɛta‐ɛ̀, òŋu nákó sɛ̃̀ dzí ti náàŋírĩ-òkú ŋa wá náyé.

34Kíbí Yèésù wà wí bɛ́ɛ̀#ɛ́, ɔmatsɛ́‐ɛ̀ ŋa kò tì wà gbɔ́ òkpì‐ɛ̀ gìɖì. Òkpì-afɔ̀#ɛ́ kí ńǹɖúkù fú ŋa, kò yé ŋa.

Yèésù tsí odzú fú afɔ́dzú-kã̀

(Màtéwò 20:29-34; Mákò 10:46-52)

35Náànyìwà#á, Yèésù wáa làkóò, tsí tó sɔ́má-ìlú-Yèríkò. Kíbí ó sɔ́má-ìlú#ɛ́, afɔ́dzú-kã̀ dzokó si nétí-ɔ̀nà, tsí wà bere iŋɛ́. 36Tsí afɔ́dzú#ɛ́ wà gbɔ́ ìtsèntse-ɔ̀nyà kpíkpɔ̀ wáa làkóò hũ̀nyà hũ̀nyà, tsí ó wà bèrè ní: Kí wà tse ná?

37Tsí à wà fɔ̀ fúu ní: Yèésù ti Nàsàrɛ́tì ní wáa làkóò#ɛ́.

38Tsí ó ɖúgbe kũkũ ní: Yèésù! Ɔmalɔ́ma-Ɖàfíɖì†! Kó rí ànyínɔ́ fú òŋu ɖé ooò!

39Tsí ɛnɛ yèé dzì ńwádzú-Yèésù làkóò ŋa#á wà gírí ɖíi ní kó famí igbe#ɛ́ bɛ́ɛ̀. Ó ɖi, àríkɛ̀ɛ́ yèé ó wà ɖúgbe#ɛ́ máa gìɖì#ɛ́ ńnɛ̀ɛ́. Ó wà ɖúgbe ní: Ɔmalɔ́ma-Ɖàfíɖì ééè! Kó rí ànyínɔ́ fú òŋu ɖé ooò!

40Tsí Yèésù ɖóro, tsí fɔ̀ ní: Ká gbɛ̃́ɛ̃ wá fú òŋu!

Tsí à lɔ káà gbɛ̃́ɛ̃ wá fúu. Kíbí afɔ́dzú#ɛ́ tó ńɖɔ̀‐ɛ̀#ɛ́, ó wà bèrèé ní: 41Kí ó wà wò ní òŋu kó tse fúu báàyí?

Tsí afɔ́dzú#ɛ́ ní: Ɔ̀gá! Òŋu wà wò ní òŋu kó sɛ̃̀ rírã ni.

42Tsí Yèésù fɔ̀ fúu ní: Rírã! Ó ɖi, Ɔ̀ɖáyé bɔɔ́, iŋɛ́ yèé tse#ɛ́, ò nɛ́ àkaralé si ńǹtá‐ɛ̀.

43Ńǹɖì-bɛ̀ gbòkã́#á, odzú‐ɛ̀ tsí kpó, tsí ó kpé ìrã rírí, tsí ó tɛ̀ náànyì-Yèésù lɔ, tsí wà ɖɔ́kpɛ́ fú Ɔ̀ɖáyé làkóò. Náàsòkò nyɛ̀ŋɛ̀#ɛ́, ɛnɛ yèé wà bɛ̀ ŋa, tsí rí iŋɛ́ yèé tse ŋa#á, àŋa gbo, à kpé ɔkpɛ́ ɖíɖá fú Ɔ̀ɖáyé.

Currently Selected:

Lúkà 18: ngl

Highlight

Copy