មារកោស 12

នាវងើយនតឹតមាមពោលម៝ត់អ្វាញ់មីរព្លៃយុងយារប៝ន

(មថ ២១:៣៣-៤៦; លក ២០:៩-១៩)

1ជេសរីឞ្រាសយេឆូ ងើយនាវនតឹតមាខាន់ពាង់លាស៖ “គែសទូហ្វេឞូក្លោតាម់តើមព្លៃយុងយារប៝នទូលោកមីរ។ ពាង់ជានងគារជុមមីរនៃ ជានទូនតុកមាឞូញជ៝តព្លៃអីនៃ#១២:១៖ នតុកឞូញជ៝តព្លៃយុងយារប៝ន ឞូញជ៝តគៃមាលោសទាកជាននទ្រាញ់។ នទ្រែលមាជានទូមល៝ម់ច្វាញងកើងដ៝ង់គៃមាញជ្រាង់។ ជេសរីអ៝ន់ឞូម៝ត់មីរអីនៃ ដាៈឞូពាៈព្លៃមាពាង់អាប់នាម់ អីពាង់នើមរីហាន់គុឞ្រីអេង។#អេឆា ៥:១-៧ 2ត៝ត់ទីខៃទុមព្លៃយុងយារប៝នរី ពាង់ដាៈទូហ្វេទឹកពាង់ហាន់តឹមម៝ប់មាមពោលម៝ត់មីរអីនៃ គៃមាឆ៝ៈព្លៃអីឞូពាៈនៃ។#យេរ ៧:២៥-២៦ 3បេងមាឞូទែញុបលើសអោឞាល់ ជេសរីមព្រើសអោឞាល់អ៝ន់ឆឹតទើម។ 4ពាង់អីនើមតើមមីរនៃ ដាៈទូហ្វេទឹកជឹតហាន់ដ៝ង់ មពោលអីម៝ត់មីរនៃមឞាងឞោកអោឞាល់នៃ នហ៝មារាកឆ្វាយអោឞាល់ជឹត។ 5ជេសរីពាង់ដាៈទូហ្វេទឹកជឹតហាន់។ មពោលអីម៝ត់មីរអីនៃងខឹតអោឞាល់នៃ។ ជេសរីទឹកពាង់អាបាៈអេងជឹតឞូទែលើសកើតនៃដ៝ង់ អាបាៈឞូទែមឞាង អាបាៈឞូទែងខឹតលើយ។ 6ពាង់អីនើមតើមមីរនៃហោមគែសទូហ្វេឞូនុយ្សអេងជឹតគុនទ្រែលពាង់ ជេងទូហ្វេក៝នឞូក្លោអីពាង់នើមរ៝ង់ហោងាន់។ កេងមាទុតពាង់ដាៈអីក៝ននៃហាន់ឞើសកើយឞូ ពាង់មឹនអេងលាស៖ «ឞូក្លាចយើកមាក៝នគ៝ប់រ៝»។#មក ១:១១; ៩:៧ 7តីសមាមពោលអីម៝ត់មីរនៃតឹមលាសនទ្រាង់ខាន់ពាង់នើម៖ «ពាង់អីនៃរ៝នត្រ៝ៈនទើនមីរអីអ្យានារជឹតនាប់តៃ ហាន់ឞ៝ន់ងខឹតលើយពាង់អីនៃទោស នទ្រីមើមីរអីអ្យានហ៝គែសមាឞ៝ន់រ៝»។ 8ជេសរីឞូទែញុបអីក៝នពាង់នើមអីតើមមីរនៃ ងខឹតលើយអោឞាល់មអារ់ឞើសទីសមីរអីនៃ។ 9នទ្រីមើមពាង់អីតើមមីរនៃជាន? ពាង់ហាន់ងខឹតលើយមពោលអីម៝ត់មីរនៃរ៝ ជេសរីជាវមីរតើមព្លៃយុងយារប៝នអីនៃអ៝ន់មាឞូអេងជឹត។ 10នទ្រីខាន់មៃមោគែសរ៝ៈឆ៝ម់បុតនាវកោរាញឞ្រាសងើយលែៈគែសញចីសលាស៖

«ឞូនុយ្សឞ្លាវជានជៃលុឞ្ល៝នលែៈមអារ់លើយទូមល៝ម់លុឞ្ល៝ន‌

យើនមាលុឞ្ល៝នអីនៃជេងលុឞ្ល៝នទុតន៝ប់ខ្លៃរាលាវឞូច្រាវមាជានជៃ។

11កោរាញឞ្រាសនើមជាននាវអីនៃលែៈនាវងាន់‌

ជានអ៝ន់ឞ៝ន់នទ្រ៝ត់ញហីសហោងាន់»”#នម ១១៨:២២-២៣។

12ត៝ត់មាមពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាផូងកោរាញឞ្រីយូដា គឹតលាសពាង់ងើយនតឹតនាវអីនៃលាសមាឆាក់ខាន់ពាង់នើម ជេសរីខាន់ពាង់អុចញុបឞ្រាសយេឆូ តីសមាខាន់ពាង់ក្លាចមាផូងប៝នលាន នទ្រីខាន់ពាង់លោសទូឞើសពាង់នៃទើម។#មក ១១:១៨; ១៤:១-២

នាវអ៝ន់ព្រាក់មាកោរាញកាដាច់

(មថ ២២:១៥-២២; លក ២០:២០-២៦)

13ជេសរីខាន់ពាង់ដាៈផូងផារីឆី បាបាៈ នទ្រែលមាមពោលអីតឹងកោរាញម៝ត់អ្វាញ់ហេរោត-អ៝ន់តីពាស ហាន់គុទាច់កេងឞ្រាសយេឆូ គៃមាតាង់នាវពាង់ងើយនទើតីស នទ្រីទឹងខាន់ពាង់ជ៝យនាវមានតោនពាង់។#មក ៣:២ 14ជេសរីខាន់ពាង់ហាន់ត៝ត់តានៃអោបពាង់៖ “ហើយនើមនតី! ហេនគឹតមៃឞូនុយ្សឆ៝ង់ងាន់ មៃមោអោសក្លាចមាឞូនុយ្ស មោអោសកើយ្សឞូនុយ្ស មៃនតីនាវកោរាញឞ្រាសអ៝ន់ទី។ ទាន់មឞើសមាហេនតឹងនាវវៃឞ៝ន់ ទីដ៝ង់អ៝ន់ព្រាក់អីកោរាញកាដាច់តាប៝នរោមដាៈឞ៝ន់អ៝ន់នៃមោលាសមោ? 15ទីមាឞ៝ន់អ៝ន់មោលាសមោ?#១២:១៥៖ ឆ៝ម់បុតអើមអីញចីសមាតីតានាវងើយគ្រែក អាបាៈតេៈនាវអោបអ្យាតាត្រ៝ង ១៤។” យើនមាឞ្រាសយេឆូ លែៈគឹតនូយ្សនហ៝ម់នទ៝ប់មពោនខាន់ពាង់ ពាង់លាស៖ “ម៝សនាវខាន់មៃអុចអោបរាល៝ងមាគ៝ប់កើតនៃមេស? ល៝ង់ឆ៝ៈព្រាក់អីអ៝ន់មាកាដាច់អីនៃទូមល៝ម់#១២:១៥៖ «ព្រាក់អីអ៝ន់មាកាដាច់អីនៃទូមល៝ម់» មោលាស «ទូដេនារី »។អ៝ន់គ៝ប់អ្វាញ់”។ 16ជេសរីឞូឆ៝ៈព្រាក់ទូកាក់នទឹអ៝ន់ឞ្រាសយេឆូ ។ ពាង់អោបមាខាន់ពាង់៖ “នទ្រីតាកាលើព្រាក់កាក់អ្យាឞូម៝សរូប ឞូម៝សរាញា?” ខាន់ពាង់អើសលាស៖ “រូប នទ្រែលមារាញាកោរាញកាដាច់តាប៝នរោម !” 17ឞ្រាសយេឆូ លាសមាខាន់ពាង់៖ “លាសនទ្រីនទើកោរាញកាដាច់តាប៝នរោម មព្លឹអ៝ន់មាពាង់ នទើកោរាញឞ្រាសមព្លឹអ៝ន់មាកោរាញឞ្រាសនើម”។ ខាន់ពាង់នទ្រ៝ត់ហីសរាហ៝ល់ហោងាន់មានាវឞ្រាសយេឆូ អើស។#រម ១៣:៧

នាវឞូនុយ្សខឹតទ៝ក់រេសតៃ

(មថ ២២:២៣-៣៣; លក ២០:២៧-៤០)

18ជេសរីគែសផូងឆាដោឆី ហាន់ម៝ប់ពាង់ ផូងអីនៃជានកោរាញតាឞ្រីយូដា ដ៝ង់ តីសមាខាន់ពាង់មោអ្យាត់អោសឞូនុយ្សលែៈខឹតហោមទ៝ក់រេសជឹត។ ខាន់ពាង់គែសទូនាវអោបមាឞ្រាសយេឆូ ៖#ការ ២៣:៦-៨ 19“ហើយនើមនតី មោឆេ កាល់អែនើសលែៈញចីសជេសតាឆ៝ម់បុតអ៝ន់មាឞ៝ន់ផូងអីឆ្រាអែល លាសកើតនអា៖ «លាសឞូក្លោឆ៝ៈអូរ ជេសរីពាង់ខឹត លាសពាង់មោគែសក៝ន ដាៈអីអ៝សៗពាង់រីនត្រ៝ៈឆ៝ៈអូរពាង់គៃមាគែសក៝នមាពាង់»។#នវ ២៥:៥-៦ 20នតឹតលាសគែសពើសនុយ្សអ៝សនោឞូក្លោ។ អីនោឞោកទាកនៃឆ៝ៈអូរ ជេសរីខឹតមោឞាៈក៝នអោស។ 21ជេសរីអីអ៝សគ្រ៝យឞើសកើយពាង់នៃនត្រ៝ៈឆ៝ៈអីមីនៃ ជេសរីខឹតមោឞាៈក៝នដ៝ង់។ អីអ៝សត៝ល់ពែឞើសកើយឆ៝ៈអីមីនៃខឹតកើតរីដ៝ង់។ 22ទឹងលែៈពើសនុយ្សអ៝សនោខាន់ពាង់នៃមោឞាៈក៝នទាទេ។ ទុតមាទេលឞូអូរអីនៃខឹតដ៝ង់។ 23ត៝ត់នារឞូនុយ្សទ៝ក់រេសតៃ នទ្រីឞូម៝សអោបពាង់«អូរ»? យ៝រលាសលែៈពើសនុយ្សខាន់ពាង់នើសលែៈតាៈឆ៝ៈពាង់ទាទេ”។ 24ឞ្រាសយេឆូ អើសមាខាន់ពាង់៖ “ខាន់មៃមោវ៝ត់អោសនាវកោរាញឞ្រាសងើយ នអ៝ប់មាមោវ៝ត់ដ៝ង់នាវទើយកោរាញឞ្រាស នទ្រីទឹងនាវមឹនខាន់មៃមោទីអោស។ 25នោកឞូនុយ្សខឹត ជេសរីទ៝ក់រេសតៃ ខាន់ពាង់មោហោមអោសឆ៝ៈអូរឆ៝ៈឆាយជឹត។ ខាន់ពាង់ជេងតឹមឞានមាតោងពារ់កោរាញឞ្រាសគុតាប៝នអ្វែសកាលើ”។#១កោ ១៥:៣៥-៤៤

26“ល៝ង់មានាវឞូនុយ្សខឹតទ៝ក់រេសតៃ មោឆេ លែៈញចីសលាសតាព្លាង់ត្រ៝ងពុមល៝កអីគែសហីតអុញ នទ្រីខាន់មៃវៃរ៝ៈដ៝ង់លាសមោ? តានៃកោរាញឞ្រាសលាសមាពាង់៖ «គ៝ប់ជេងឞ្រាសអាឞ្រាហាម់ យើកមឞាស ជេងឞ្រាសអីឆាក់ យើកមឞាស ជេងឞ្រាសយាកោប យើកមឞាស»#នង ៣:៦។ 27នោកកោរាញឞ្រាសងើយនាវអីនៃ ខាន់ពាង់ពែនុយ្សអីនៃលែៈខឹតអ៝ក់នាម់ជេស។ យើនមាឞើសនាវកោរាញឞ្រាសងើយអីនៃគឹតនាល់ខាន់ពាង់ហោមរេសមាកោរាញឞ្រាស។ កោរាញឞ្រាសមោអោសទីឞ្រាសមាឞូនុយ្សខឹត ពាង់ឞ្រាសមាឞូនុយ្សរេស។ តីសងាន់នាវខាន់មៃមឹននៃ!”

នាវវៃអីខ្លៃរាលាវឞូ

(មថ ២២:៣៤-៤០; លក ២០:៣៩-៤០)

28ជេសរីត៝ត់ឞ្រោៈទូហ្វេនើមនតីនាវវៃផូងអីឆ្រាអែល តាង់ខាន់ពាង់តឹមរាលាច់ដាសឞ្រាសយេឆូ ជេសរីតាង់នាវឞ្រាសយេឆូ អើសនៃទីងាន់ ពាង់ហាន់ទាច់អោបឞ្រាសយេឆូ ៖ “ទឹងលែៈនាវវៃឞ៝ន់ ម៝សនាវវៃអីខ្លៃរាលាវឞូមេស?” 29ឞ្រាសយេឆូ អើស៖ “«ហើយផូងអីឆ្រាអែល អ្យាត់ហ៝ម់! គែសកោរាញឞ្រាសអីឞ្រាសឞ៝ន់ទូហ្វេទើមអីកោរាញឞ្រាសងាន់ងេន។ 30អ៝ន់រ៝ង់មាកោរាញឞ្រាសអីឞ្រាសខាន់អៃមៃនើម មាលែៈនូយ្សនហ៝ម់ មាលែៈហ្វេង មាលែៈនហ៝ម់ឆ្វាន នទ្រែលមាលែៈនាវមឹន»#នវ ៦:៤-៥ អ្យានាវវៃនតីលង្វាយ។ 31នាវវៃនតីលឞារ «អ៝ន់រ៝ង់មាឞូច្យៅមែងកើតរ៝ង់មាឆាក់ខាន់អៃមៃនើមដ៝ង់»#កល ១៩:១៨។ មោគែសអោសនាវវៃអីខ្លៃរាលាវមាឞារអឹនាវវៃអ្យា”។#មថ ២២:៣៩ 32នើមនតីនាវវៃនៃលាសមាពាង់៖ “អើនើមនតី ទីងាន់នាវមៃលាសនៃមេស។ គែសទូហ្វេកោរាញឞ្រាសទើម មោហោមគែសអោសឞ្រាសអេងជឹត។ 33ឞ៝ន់រ៝ង់មាពាង់អ៝ន់លែៈនូយ្សនហ៝ម់ អ៝ន់លែៈមានាវមឹនគឹតឞ្លាវ នទ្រែលមាអ៝ន់លែៈឞ្រាត់ឆ្វាន ជេសរីរ៝ង់មាឞូច្យៅមែងកើតរ៝ង់មាឆាក់ឞ៝ន់នើមដ៝ង់ នាវអីនៃខ្លៃរាលាវងាន់មាលែៈរាងោចនទើឞូញហើរ នអ៝ប់មាលែៈមពោមពា(ឆ្យុម)គុចមាជានឞ្រាសអីនៃ”។#នម ៤០:៧-៩ 34ត៝ត់ឞ្រាសយេឆូ តាង់ពាង់អើសគឹតឞ្លាវកើតនៃ ឞ្រាសយេឆូ លាស៖ “មៃមោគែសគុងាយដាសនាវកោរាញឞ្រាសម៝ត់អ្វាញ់មៃ”។ ឞើសកើយនៃមោហោមគែសអោសទូហ្វេឞូនុយ្សឞាញ់អោបឞ្រាសយេឆូ នាវអេងជឹត។

ឞ្រាសក្រីស អីកោរាញមាកាដាច់ដាវីត

(មថ ២២:៤១-៤៦; លក ២០:៤១-៤៤)

35 ឞ្រាសយេឆូ ហោមនតុមនតីឞូតាជ៝ង់គូងញីសជានឞ្រាស ពាង់លាស៖ “មើមទឹងផូងនើមនតីនាវវៃផូងឞ៝ន់ក្វាល់ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់រីលាសក៝នឆៅកាដាច់ដាវីត ទើម?#មថ ២០:៣០-៣១ 36ល៝ង់កាដាច់ដាវីត ឞ្រាសហ្វេងអ្វែសអីក្ល៝សអ្វែសអ៝ន់ពាង់ងក៝ច៖

«កោរាញឞ្រាសលាសមាកោរាញគ៝ប់៖

«គុមពែសឞើសមាគ៝ប់ហ៝ម់

ក៝ប់ត៝ត់គ៝ប់អ៝ន់ផូងរាលាង់ដាសមៃជេងនតុករាកើលជ៝ង់មៃប៝ត់»»#នម ១១០:១។#ការ ២:៣៤-៣៦; ហេឞ ១:១៣

37លាសលែៈកាដាច់ដាវីត នើមក្វាល់ឞ្រាសក្រីស លាសកោរាញពាង់នើមកើតនៃ យើនមាក៝នឆៅមោគែសក្វ៝ង់រាលាវមាអូចែ លាសនទ្រីឞ្រាសក្រីស មើមហោមឞ្លាវក៝នឆៅដាវីត ជឹត?”

ឞ្រាសយេឆូ ដាៈប៝នលានញជ្រាង់មាផូងនើមនតី

(មថ ២៣:១-៣៦; លក ២០:៤៥-៤៧)

អ៝ក់ផូងប៝នលានគុតានៃ ខាន់ពាង់គែសនូយ្សនហ៝ម់រាម់ហោងាន់តាង់នាវឞ្រាសយេឆូ នតី។ 38ឞ្រាសយេឆូ នតុមនតីមាខាន់ពាង់៖ “អ៝ន់ខាន់អៃមៃញជ្រាង់ដាសផូងនើមនតីនាវវៃផូងឞ៝ន់នៃ យ៝រលាសខាន់ពាង់អុចញឆ៝សអាវជ៝ងអីអ្វែស ជេសរីឞ្រោៈរាឆ៝ង គៃមាអ៝ន់ឞូគឹតលាសខាន់ពាង់គែសនាវខ្លៃងាន់ អុចអ៝ន់ឞូមឞាសកុញឞោកមាខាន់ពាង់រ៝ៈនតុកឞូតាច់រាគ៝ល់ទ្រាប់នទើ មោលាសរ៝ៈត្រ៝ងក្វ៝ង់។#លក ១១:៤៣; ១៤:៧-១១ 39ខាន់ពាង់អុចគុឞើសនាប់ឞូតានតុកឞូលឺតាញីសរាបុនផូងឞ៝ន់ ជេសរីលាសញេតក្វ៝ង់ឆោងក្វ៝ង់នៃអុចគុតានតុកឞូយើកដ៝ង់។ 40តីសមាខាន់ពាង់មរោសឞូអូរនទ្រោលែៈខឹតឆាយ គៃមាឆ៝ៈពីតទ្រាប់នទើញីសជៃខាន់ពាង់។ ជេសរីខាន់ពាង់ជានមឞើសឆើមទុតជ៝ៈងាន់អ៝ន់ឞូអេងតាង់ គៃមាញហើខាន់ពាង់នើមជេងឞូនុយ្សរ៝ង់មាកោរាញឞ្រាសងាន់។ ផូងអីនៃកោរាញឞ្រាសតេៈទោយ្សទុតជ្រូរ៝តានារជឹតនាប់តៃ”។#នង ២២:២១-២២

ឞូអូរនទ្រោតេៈញហើរ

(លក ២១:១-៤)

41ជេសរីឞ្រាសយេឆូ ហាន់គុឞើសនាប់ហុបតេៈញហើរមាកោរាញឞ្រាសតាជ៝ង់គូងញីសជានឞ្រាស ពាង់អ្វាញ់ផូងប៝នលានឆ៝ៈព្រាក់តេៈតាត្រោមហុបនៃ។ ពាង់ឆៃអ៝ក់ឞូនុយ្សនទ្រ៝ង់តេៈព្រាក់អ៝ក់ៗងាន់។ 42ជេសរីឆៃទូហ្វេឞូអូរនទ្រោខឹតឆាយអ៝អាច។ ត៝ត់តានៃឞូនទ្រោអីនៃឆ៝ៈព្រាក់ឞារមល៝ម់កាក់ជេៈ#១២:៤២៖ «ឞារមល៝ម់កាក់ជេៈ» មោលាស «ឞារលែបតា »។ ១០០ កាក់ជេៈអ្យាជេងខ្លៃងខោមមាឞូជានការទូនារ។ទើមអីមោលាង់គែសខ្លៃអោសតេៈតាត្រោមហុបនៃដ៝ង់។ 43ឞ្រាសយេឆូ ក្វាល់មពោលអ៝សម៝នពាង់ ជេសរីលាសមាខាន់ពាង់៖ “គ៝ប់លាសនហេលនានេៈងាន់មាខាន់មៃ កោរាញឞ្រាសកើបឞូអូរនទ្រោអ៝អាចអ្យាតេៈព្រាក់អ៝ក់រាលាវទឹងលែៈឞូអីតេៈព្រាក់តាហុបអ្យា‌ 44យ៝រលាសទឹងលែៈមពោលអីនៃ ព្រាក់អីខាន់ពាង់តេៈតាត្រោមហុបនើស ឆ៝ៈព្រាក់រាមែសឞើសឆាក់ខាន់ពាង់នើម។ ល៝ង់អីឞូអូរនទ្រោទែនៃ ពាង់ឞូនុយ្សអ៝អាចហោងាន់ ឞ៝លលាសព្រាក់អីនៃគៃមាឆ្យាម់នាវរេសពាង់នើមកាដោយលែៈ ពាង់ហោមឆ៝ៈលែៈផ្យៅតេៈញហើរមាកោរាញឞ្រាសដ៝ង់”។#២កោ ៨:១២

Currently Selected:

មារកោស 12: cmoK

Highlight

Copy