មារកោស 13

នាវលើសហេងញីសជានឞ្រាស

(មថ ២៤:១-២; លក ២១:៥-៦)

1នោកឞ្រាសយេឆូ លោសឞើសជ៝ង់គូងញីសជានឞ្រាសមាកោរាញឞ្រាស គែសទូហ្វេអ៝សម៝នមឞើសមាពាង់៖ “ហើយនើមនតី ល៝ង់មៃអ្វាញ់ញីសជានឞ្រាសត៝ទុតអ្វែសទុតក្វ៝ង់ងាន់ អីលុឞ្ល៝នពាង់ត៝ក្វ៝ង់ដ៝ង់!” 2ឞ្រាសយេឆូ លាសមាអ៝សម៝នពាង់នៃ៖ “នារជឹតនាប់តៃ លែៈជៃក្វ៝ង់ៗអីមៃឆៃនៃឞូមរាលើសរាល៝ម់លែៈផ្យៅរ៝ មោហោមអោសគែសទូមល៝ម់លុឞ្ល៝នតឹមរាទាប់ជឹត”។#លក ១៩:៤៤; យេរ ៧:១៤

នាវត៝ត់នារងគ្លែៈទុត

(មថ ២៤:៣-១៤; លក ២១:៧-១៩)

3ជេសរីឞ្រាសយេឆូ គុតាយោកតើមអោលីវ តឹមឆ៝ង់មាញីសជានឞ្រាស។ ពេត្រោស យាកើ យោហាន នទ្រែលមាអ៝ន់ទ្រេ គុងាយដាសឞូអោបអេងពាង់៖ 4“ហើយនើមនតី ល៝ង់មៃមឞើសអ៝ន់មាហេនគឹតដ៝ង់ ទាសហោមជ៝ៈនារត៝ត់នាវអីនៃមេស? លាសនទ្រីម៝សនទើមឞេនអ៝ន់មាហេនគឹតលាសនាវអីនៃលែៈឞើយត៝ត់ងាន់?” 5ឞ្រាសយេឆូ អើសមាខាន់ពាង់៖ “អ៝ន់ខាន់មៃញជ្រាង់ងាន់ហ៝ៈ លើយទឹងអ៝ន់ឞូមរោសរាលាម់ខាន់មៃអ៝ន់ញហើតលាៈលេង។ 6យ៝រមានារជឹតនាប់តៃគែសអ៝ក់ឞូនតូបរាញាគ៝ប់លាស៖ «គ៝ប់អ្យាឞ្រាសក្រីស ហែស!» ខាន់ពាង់លែវញហើតឞូនុយ្សអ៝ក់ងាន់។ 7ត៝ត់ខាន់មៃតាង់នាវមហែមានាវតឹមលើសតឹមឆ្រែស នទ្រែលមាតាង់ឞូងក៝ចញច្រ៝សមានាវតឹមលើសតឹមឆ្រែស លើយអោសក្លាច យ៝រលាសលែៈនាវអីនៃពាង់គែសងាន់រ៝ យើនមានារងគ្លែៈទុតនែសនតូអេហ៝ៈត៝ត់អោស។ 8ទូមពោលតឹមលើសដាសទូមពោលអេងជឹត ទូឞ្រីទាកតឹមលើសដាសទូឞ្រីទាកអេងជឹត នតុកបាបាៈគែសនាវងគារ់នែស នទ្រែលមាគែសនាវជីឆ៝ត់ជីង៝តក្វ៝ង់តានតុកអេងៗ។ យើនមានាវជេរអីនៃជេងនតើមនាវជេរទើម តឹមឞានមានាវឞូអូរនតើមត៝ត់ជីនទុលគុអ៝ស។#អេឆា ១៩:២ 9នទ្រីខាន់មៃញជ្រាង់ឆាក់ហ៝ម់ យ៝រមាឞូញជុនខាន់មៃតានតុកតេៈទោយ្ស ឞូឆ៝ៈម៝ង់រាពាត់ខាន់មៃតាត្រោមញីសរាបុនផូងឞ៝ន់ នទ្រែលមាឞូលែវខាន់មៃឞើសនាប់កោរាញក្វ៝ង់ ឞើសនាប់កាដាច់ដ៝ង់ យ៝រមាខាន់មៃតឹងគ៝ប់។ ជេសរីខាន់មៃទើយងក៝ចនាវញឆីងមាគ៝ប់អ៝ន់ឞូគឹតឞូតាង់។#ការ ៥:៤០; ៧:៥៧-៥៨; ២កោ ១១:២៤ 10អេល៝រមានារងគ្លែៈទុតគែសឞូនុយ្សមឞើសនាវមហែមហានអ្វែសអ៝ន់មាប៝នលានអាប់ងគ៝រឞ្រីតាង់ល៝រប៝ត់។#មក ១៦:១៥

11ត៝ត់ឞូញុបខាន់មៃញជុនតានតុកផាតទោយ្ស នោកនៃលើយអោសរាវៃល៝រមានាវអីខាន់មៃងើយនៃ អ៝ន់ខាន់មៃងើយតឹងនាវឞ្រាសហ្វេងអ្វែសអ៝ន់មាខាន់មៃ យ៝រមានាវងើយអីនៃមោអោសលោសតាៈឞើសឆាក់ខាន់មៃនើម តាៈឞើសឞ្រាសហ្វេងអ្វែសអីក្ល៝សអ្វែសរី។#លក ១២:១១-១២; ការ ៤:៨ 12អ៝សមានោ ឞឹមាក៝នមរាតឹមរាលាម់ញុបញជុនអ៝ន់ឞូងខឹត នទ្រែលមាអីក៝នៗលែវឞាល់តឹមរាទ៝ង់ដាសអីមេៈឞឹ នហ៝មាញជុនអ៝ន់ឞូងខឹតលើយដ៝ង់។#លក ១២:៥២-៥៣; មកា ៧:៦ 13យ៝រមាខាន់មៃញឆីងមាគ៝ប់ នទ្រីអ៝ក់ឞូមរាឞ្យាញ់មាខាន់មៃ។ យើនមាឞូម៝សអីទើយអ៝ត់ នហ៝មាត៝ត់លោច កោរាញឞ្រាសមរារាក្លាយ្សពាង់អីនៃ”។#យហ ១៥:១៨-២១

នាវត៝ត់ជេរក្វ៝ង់

(មថ ២៤:១៥-២៨; លក ២១:២០-២៤)

14“ត៝ត់ខាន់មៃឆៃនទើទុតបឹបើចឞូតេៈតានតុកក្ល៝សអ្វែសអីនតុកឞូមោអ៝ន់តេៈ - ឞូម៝សអីរ៝ៈនាវអីនៃអ៝ន់ពាង់គឹតវ៝ត់នាវអីនៃ - ជេសឆៃនទើអីនៃឞូនុយ្សអីគុតាឞ្រីយូដា រីអ៝ន់ទូញច្វាត់នទែតាយោក។#ដាន ៩:២៧; ១១:៣១; ១២:១១; មថ ២៤:១៥ 15ឞូម៝សអីគុកាលើច៝រជៃល៝ង់#១៣:១៥៖ តាឞ្រីអីឆ្រាអែល ជៃគែសច៝រល៝ង់ គៃមាជានការ គុរាលូ មោលាសអីសនទើ ជេសរីគូងហាវឞើសទីសជៃ។ លើយហោមអោសជុរលាប់តាត្រោមឆ៝ៈទ្រាប់នទើ។ 16ឞូម៝សអីគុតាមីរ លើយហោមព្លឹតាជៃឆ៝ៈអាវក្វ៝ង់ដ៝ង់។ 17នោកនៃឞូអូរនត្រែវ ឞូអូរមពូត៝សក៝នគែសនាវរេសរាញាល់ហោងាន់។ 18មឞើសឆើមទាន់មាកោរាញឞ្រាសហ៝ម់ លើយអោសអ៝ន់គែសនាវត៝ត់អ្យាតាខៃជីកាត់។ 19តានោកនៃគែសនាវជេរជ៝ត់ហោងាន់។ នតើមឞើសរានោកកោរាញឞ្រាសញជេងទឹងលែៈនតីលនទើត៝ត់អាបៃអ្យា នហ៝មានារជឹតនាប់តៃ មោព្រ៝តដ៝ង់គែសនាវទុតជេរកើតនៃ។#ដាន ១២:១ 20លាសកោរាញឞ្រាសមោនហុចលើយទឹងលែៈនារនៃ នទ្រីមោហោមគែសអោសទូហ្វេឞូនុយ្សរេស ខឹតលែៈផ្យៅ យើនមាកោរាញឞ្រាសនហុចលើយនារអីនៃ យ៝រមាពាង់យោៈមពោលអីលែៈពាង់កើយ្ស។ 21តានោកនៃលាសគែសឞូមឞើសមាខាន់មៃ៖ «ល៝ង់មៃអ្វាញ់ឞ្រាសក្រីស គុតាអ្យា» មោលាស «គុតាត៝» លើយអោសអ្យាត់ឞូ។ 22យ៝រមាគែសឞូនុយ្សនតូបលាសឆាក់ពាង់ឞ្រាសក្រីស នទ្រែលមាគែសឞូនុយ្សនតូបលាសឆាក់ពាង់ឞូនុយ្សនតើយ្សនាវងើយកោរាញឞ្រាស។ ខាន់ពាង់អីនៃជាននាវមឞេនអីខ្លៃអេងៗដ៝ង់ គៃមាលែវឞូនុយ្សអ៝ន់ញហើតលាៈលេង ងខេបលាសទើយលែវញហើតផូងអីកោរាញឞ្រាសលែៈកើយ្សដ៝ង់ យើនមាមោទើយអោស។#២តេ ២:៩; ២ពេ ២:១; នតម ១៣:១៣-១៤ 23អ៝ន់ញជ្រាង់ងាន់ហ៝ៈ! គ៝ប់លែៈងក៝ចល៝រអ៝ន់មាខាន់មៃនាវអីនៃ”។

នាវក៝នឞូនុយ្សព្លឹវាច់

(មថ ២៤:២៩-៤៤; លក ២១:២៥-៣៣)

24“លោចជេសនារជេរជ៝ត់អីនៃ

តានោកនៃនារជេងង៝‌

ខៃមោហោមអោសអាង‌

25មាញ់មឞីងដុសឞើសត្រោក‌

លែៈនទើអីតេសក្វ៝ង់កាលើត្រោកគែសងគើទាទេ។#អេឆា ១៣:១០; ៣៤:៤; ២ពេ ៣:១០; នតម ៦:១២-១៣

26នោកនៃទឹងលែៈឞូនុយ្សឆៃគ៝ប់អីក៝នឞូនុយ្សតាៈឞើសកោរាញឞ្រាស ហាន់រ៝ៈនទ៝រ់តុកនអ៝ប់មាគែសនាវទើយ នទ្រែលមានាវច្រេកលើបទុតហោ។#ដាន ៧:១៣-១៤; នតម ១:៧ 27ជេសរីគ៝ប់ញជ្វាល់ផូងតោងពារ់គ៝ប់ហាន់អាប់ព្វាន់ញជោញឞ្រីលាមនែសនតូ នតើមមពែសឞើសលោសនារត៝ត់មពែសឞើសញ៝ប់នារ គៃមារាគូមលែៈមពោលអីកោរាញឞ្រាសនើមលែៈកើយ្សនើស។#១តេ ៤:១៧ 28អ៝ន់ខាន់មៃងក្ល៝ន់រាវៃទោ នាវនតឹតមាតើមរាវី ។ លាសងគីងពាង់គែសចាត់នហាញឆែនអឹរ ខាន់មៃគឹតលាសខៃតាមីសឞើយត៝ត់ហើយ្ស។ 29នទ្រីលាសខាន់មៃឆៃនាវអីនៃលែៈត៝ត់ គឹតរ៝គ៝ប់អីក៝នឞូនុយ្សតាៈឞើសកោរាញឞ្រាសឞើយត៝ត់ដ៝ង់។ 30គ៝ប់លាសនហេលនានេៈងាន់មាខាន់មៃ លែៈនាវអ្យាពាង់ត៝ត់ទោលឞូនុយ្សតារានោកអាបៃរីហោមរេស។ 31ត្រោកនែសនតូមរារ៝សលេករ៝ យើនមានាវគ៝ប់ងើយមោអោសឞ្លាវរ៝សលេក ហោមគែសទឹងលែៈងាន់”។#អេឆា ៤០:៨

32“ម៝ងនារអីនៃមោគែសអោសទូហ្វេឞូនុយ្សទើយគឹត ឞ៝លលាសតោងពារ់អីគុតាកាលើត្រោកអីនតុកកោរាញឞ្រាស មោលាសគ៝ប់អីក៝នកោរាញឞ្រាសមោទើយគឹតដ៝ង់ គែសទូហ្វេឞឹគ៝ប់ទើមទើយគឹត។#ការ ១:៧ 33ខាន់មៃមោអោសទើយគឹតម៝ងនារត៝ត់ល៝រ នទ្រីអ៝ន់ញជ្រាង់ឆាក់ជាន់ងាន់‌ 34យ៝រមានោកម៝ងនារអីនៃត៝ត់តឹមឞានមាទូហ្វេឞូក្លោអីលោសឞើសជៃហាន់នតុកអេង។ ពាង់ដាៈមពោលទឹកម៝ត់អ្វាញ់ជៃ នហ៝មាពាៈនាវជានការអ៝ន់មាទូហ្វេទូហ្វេ ជេសរីពាង់ដាៈឞូនុយ្សអីចាម់ជៃនៃញជ្រាង់ងាន់។#លក ១២:៣៥-៤០ 35លាសនទ្រីអ៝ន់ខាន់មៃគុរាងែសញជ្រាង់ងាន់កើតនៃដ៝ង់ យ៝រលាសខាន់មៃមោគឹតអោសម៝ងនារអីនៃ តឹមឞានមាទឹកអីនៃមោគឹតអោសម៝ងនារតើមជៃនៃព្លឹឆឹត គឹតមាង់គឹតងគូលមាង់គឹតនទ្រាវអ្យារ់ មោលាសអើមអោយ។ 36ក្លាចលាសត៝ត់ពាង់ព្លឹឆឹតមោគែសមឞើសល៝រ ជេសរីឆៃខាន់មៃហាក់ឞិច។#មថ ២៥:១-១៣ 37នាវអីគ៝ប់មឞើសមាខាន់មៃអ្យា គ៝ប់អុចមឞើសមាទឹងលែៈឞូនុយ្សដ៝ង់៖ អ៝ន់គុរាងែសញជ្រាង់ឆាក់!”

Currently Selected:

មារកោស 13: cmoK

Highlight

Copy