Mako 14

(Mat 26:1-5; Luk 22:1-2; Yoa 11:45-53)

1 # Kuf 12:1 Kwasile manda yaili kufika pa wanda wa kuzevya Cimulo ca Ucilo nga ni Cimulo ca Mukate usi na Citutumusi. Yasimapepo akalamba na yakasambilizya ya Masunde yalondanga inzila yakuti yalemelemo Yesu munkama nu kumukoma. 2Lelo yatile, “Tutalinzile kucita cii pa wanda wa kuzevya Cimulo ca Ucilo, pano antu yangacita mpanzela.”

Mwanaci umwi Wapongolwela Yesu Mafuta ku Betaniya

(Mat 26:6-13; Yoa 12:1-8)

3 # Luk 7:37 Yesu wali mu Betaniya mu ng'anda yakwe Simoni, wino uwalwile tembwe. Lino walyanga, umwanaci umwi aiiza kunoli nu musazi uwazilemo amafuta ya nadi acinunu cisuma nupya amutengo ukome cuze. Alino atama mulomo wa musazi nu kupongolwela amafuta pa mutwe wakwe Yesu. 4Lelo yamwi yasoka cuze yavwanzyanya yati, “Uzye icani cino ononela amafuta vii? 5Yange yakaziwe pa mutengo wa mpiya myanda itatu nu kuluta, nga ni mpiya zipelwe ku apina.” Lyene yang'wing'wintika yatumfya umwanaci.

6Lelo Yesu avwanga ati, “Mulekini! Pacani mukumutumfya? Watacita cintu cisuma cuze kunondi. 7#Malg 15:11 Apina mukaya nao pe, nupya mungayazwa nsita yonsi ndi mukulonda. Lelo nemo mutalaya nani pe. 8Umwanaci wii watacita cino angacita! Watapongolwela amafuta yaa acinunu cisuma pa mwili wane, kuti auteyanye inkolelo ya nsita ya kunzika. 9Cumi, namunena vino, konsi kuno Ilandwe Lisuma lilakosolwa mu nsi yonsi, cii cino umwanaci wii wacita cilalandwa kuti antu yamwiusya.”

Yuda wazumila kukoopa Yesu

(Mat 26:14-16; Luk 22:3-6)

10Lyene Yuda Iskalyoti, wenga uwamu alondezi ikumi na yaili, waile kuli yasimapepo akalamba kuti ayakoopele Yesu. 11Yazanga pakuuvwa vino wayanena, nga yamulaya kumupeela impiya. Caleka Yuda atandika ukulonda inzila iya kukoopelamo Yesu kunoyali.

Yesu walya Cimulo ca Ucilo pamwi na alondezi yakwe

(Mat 26:17-25; Luk 22:7-14, 21-23; Yoa 13:21-30)

12Pa wanda wakutandika kuzevya Cimulo ca Mukate usi na Citutumusi, lino ana ya mfwele a Ucilo yakakomwa, alondezi yakwe yamuzya yati, “Uzye aukwi kuno ukulonda kuti tuye tukakuteyanyizizye Cimulo ca Ucilo?”

13Alino Yesu atuma yaili amu alondezi yakwe ayanena ati, “Yangini mu musumba, amuno mumakomanya umonsi asenzile insembo ya manzi. Namwe mumulondele nu mu ng'anda kwene muno 14amaingila. Alino munene mwine wa ng'anda muti, ‘Kasambilizya wati, uzye muputule ulikwi kuno alondezi yane pamwi nani tumalila Cimulo ca Ucilo?’ 15Lyene amaya kamulange muputule ukulu cuze uwa ng'anda ya papela, muno vyonsi vyati viteyanyiziwa ningo. Amuno mututeyanyizizye vyonsi.”

16Lyene alondezi yapita, yaya ku musumba yazana vyonsi wakwe vino Yesu wayanenyile. Alino nao yateyanya Cimulo ca Ucilo.

17Lyene lino kwaya manguzi, Yesu aiiza na alondezi yakwe ikumi na yaili. 18#Mas 41:9 Lino yali pa cipango yakulya, Yesu ayanena ati, “Wenga uwa munomuli amankoopa, wiyo akulya pamwi nani.”

19Alondezi yasakamikwa nga yatandika kumuuzya wenga wenga yati, “Uzye anene ukunena?”

20Yesu nawe aasuka ati, “Awenga uwa mwi kumi na yaili, wino amateela umukate pali pamwi nani mu lweso. 21Mwana wa Muntu alafwa wakwe vino calembwa pali aliwe, lelo kalanda ku muntu wino amakoopa Mwana wa Muntu! Cange cizipe umuntu wiyo ndi atavilwe!”

Cimulo ca Mwene

(Mat 26:26-30; Luk 22:14-20; 1Kol 11:23-25)

22Walanga yacili yakulya, Yesu atoola mukate, ataizya Leza, aumokoola, alino aupela ku alondezi yakwe. Lyene avwanga ati, “Tolini, uu uli mwili wane.”

23Lyene atoola ulwako, ataizya Leza, ayapeela, alino nao yamwamo. 24#Kuf 24:8; Yel 31:31 Yesu avwanga ati, “Uu uwazi wane, uno Leza watamapo insimbi pa upangano, uno wapongololwa pamulandu wa antu aingi. 25#Kuf 24:8; Yel 31:31-34 Cumi, namunena vino, ntalamwa nupya vifenwa vya vizao vya matingi kufika ku wanda uno ndamwa ivipya mu Wene wakwe Leza.”

26Lyene lino iimba ulwimbo lwa kulumbanya Leza, yafuma yaya ku Mwamba wa Olivi.

Yesu wasowela vino Petulo amamukana

(Mat 26:31-35; Luk 22:31-34; Yoa 13:36-38)

27 # Zak 13:7 Yesu nawe ayanena ati, “Mwensi kwene mumamfutatila nu kunsya nenga, pano calembwa cati, ‘Ndakoma kacema, ni mfwele zilasalangana.’ 28#Mat 28:16 Lelo lino ndazyukuka, ndamukolelela ku Galile”

29Petulo avwanga ati, “Nanti yonsi yalakufutatila nemo ntalacicita.”

30Yesu anena Petulo ati, “Cumi nakunena vino usiku kwene uu, lino mukolwe atacili alamule maila yaili, wemo umankana maila yatatu ale ukuvwanga vino utamanyile.”

31Lelo Petulo avwanga na maka ati, “Nemo nanti cingaya cakuti imfwe pamwi nawe, ntangankukane inti ntakumanyile.” Na alondezi yonsi yavwanga cili conga.

Yesu wapepa mu Getesemani

(Mat 26:36-46; Luk 22:39-46)

32Lyene yaya ku cifulo cino camwangwa Getesemani, alino Yesu anena alondezi ati, “Ikalini paa, lino nkupepa” 33Alino asenda Petulo, Yakobo na Yoane, nga atandika kunyunguluka nu kusakamikwa. 34Alino ayanena ati, “Umwenzo wane wanyomelwa nu ulanda pipi ni mfwa. Syalini pano nu kupempula.”

35Apita katalamukila panono, afukama pansi nga apepa ukuti, “Ndi cingaya, kasita ka ucuzi kasisiwe kunondi.” 36Apepa ati, “Tata, vintu vyonsi ivyangupale kunuli. Sisya ulwako luu lwa ucuzi kunondi. Kusi kulonda kwane, lelo kulonda kwako kucitike.”

37Lyene awela azana alondezi yatatu yakaswile. Alino anena Petulo ati, “Simoni, uzye nawe ukaswile? Uzye usi na maka akupempula nanti aawa wenga?” 38Alino nawe ayanena ati, “Pempulini, nu kupepa kuti mutaponela mu matunko. Umwenzo ukulondesya lelo umwili uutonte.”

39Nupya aswilila ku kupepa, ala akuvwanga mazwi ali yamwi kwene. 40Lyene lino wawela ku alondezi nupya kwene azana yakaswile, pano manso yao ala yati yanyoma nu tulo. Lelo yatali na cakuvwanga.

41Lyene lino wiza iila lyakwe citatu, ayanena ati, “Uzye mucili mukaswile nu kupuza? Icilingana! Kasita kati kafika! Lolini, Mwana wa Muntu akupelwa mu makasa yakwe yakaifya. 42Katukini, tuini twapita. Lolini, umuntu amankoopa wapalama!”

Kulemwa kwakwe Yesu

(Mat 26:47-56; Luk 22:47-53; Yoa 18:3-12)

43Walanga lino Yesu acili vwanga, Yuda, wenga uwamu alondezi ikumi na yaili, afika. Wali ni umba ilyasenzile mpanga ni zya ntuwa, ala yatumilwe na yasimapepo akalamba, na yakasambilizya ya Masunde, na aikolo amu Ayuda. 44Kakoopa wapile iumba cimanyililo ati, “Muntu wino namatonsola ale ali wiyo kwene wino mukulonda. Mumuleme mumusende nu kumulinda ningo.”

45Lilyo kwene lino Yuda wafika, aya kuli Yesu amunena ati, “Kasambilizya!” Lyene amutonsola. 46Alino yalema Yesu yamusenda. 47Lelo wenga wamuli yano aimi pipi asomola lupanga lwakwe, asempa ikutwi lya muzya wakwe Simapepo Mukulu. 48Lyene Yesu ayanena ati, “Uzye mwizile kuli nene ni mpaanga ni zya ntuwa pa kundema, ungati nene cipondo? 49#Luk 19:47; 21:37 Nali namwe manda aingi ala nkusambilizya mu Ng'anda ikulu yakwe Leza, nga namwe mutandemile. Lelo pano amalembelo yalinzile yafikiliziwe.”

50Alino alondezi yonsi yutuka yamusya.

51Lelo kwali umulumendo umwi, wino wazwite sile insalu itiswe, uwalondile Yesu. Yezizye kuti yamuleme, 52lelo yamulema mu nsalu, afyumbutuka, autuka tupu.

Yesu mwi Tengo lya Ayuda

(Mat 26:57-68; Luk 22:54-55, 63-71; Yoa 18:13-14, 19-24)

53Lyene yasenda Yesu ku ng'anda yakwe Simapepo Mukulu, kuko kuno yasimapepo akalamba, aikolo Ayuda na yakasambilizya ya Masunde yakongine pamwi. 54Lelo Petulo wene amulondela katalamukila, apita mpaka nu mu musolo wa ng'anda yakwe Simapepo Mukulu. Aya aikala pali pamwi na yakalinda amu Ng'anda ikulu yakwe Leza, aota umoto. 55Yasimapepo akalamba ni nkombe zyonsi zya mwi Tengo yezya kulonda umboni waufi pali Yesu kuti yamukome, lelo yatazanyile nanti umwi. 56Pano antu aingi yapezile umboni pali aliwe, lelo umboni wao uleyana.

57Lyene antu yamwi yakatwike nu kupeela umboni waufi pali Yesu, yati, 58#Yoa 2:19 “Tuvwile akuti, ‘Ndomoola Ng'anda Ikulu yakwe Leza ino antu yakuuzile, nga nani ndakuula yuze mu manda yatatu, ino itangakuulwa na antu’” 59Nalyo kwene umboni wao uleyana.

60Simapepo Mukulu aimilila nkolelo yao, auzya Yesu ati, “Uzye usi na cakuvwanga pali vino yakukulongwela?”

61Lelo Yesu aya cele, atavwanzile nanti cimwi. Nupya Simapepo Mukulu amuuzya ati, “Uzye wewe uli Katuula uwalavilwe, Mwana wakwe Leza Mupolelelwe?”

62 # Dan 7:13 Yesu nawe aasuka ati, “Anene kwene, nga mulalola Mwana wa Muntu atenzi kwi kasa lilunji lyakwe Leza Wamaka yonsi nu kwiza mu makumbi mwiyulu!”

63Lyene Simapepo Mukulu alepula vizwalo vyakwe avwanga ati, “Tusikulonda umboni nauze! 64#Levi 24:16 Mwati muvwa mazwi ya misuli apali Leza. Uzye mukwelenganya uli?”

Onsi yaasuka ukuti alinzile kukomwa.

65Alino yamwi yatandika kumuswila mati, nu kumuvimba pa manso nu kumuma yavwanga yati, “Ale tunganya! Uzye aweni uwakuma?” Lyene asilika nao yamusenda yamuma.

Petulo wakana Yesu

(Mat 26:69-75; Luk 22:56-62; Yoa 18:15-18, 25-27)

66Lino Petulo watenzi mu musolo wi Tengo, kwiza umukazyana wenga uwamu yaomvi yakwe Simapepo Mukulu. 67Lino walola Petulo akoota moto, amulolekesya, alino avwanga ati, “Nawe kwene wali pamwi na Yesu uwaku Nazaleti.”

68Lelo Petulo akana ati, “Nemo vivyo ntavimanyile. Nupya ntamanyile muno walozya.” Alino afumapo aya ku mulyango. Papo kwene na mukolwe alamula.

69Lyene mukazyana muomvi amulola nga nupya atandika kunena yano aimi pipi, ati, “Muntu wii, nawe kwene uwa munoyali.” 70Lelo Petulo akana nupya.

Lino papita kasita kanono yano aimi pipi nupya yanena Petulo yati, “Cumi, nawe kwene wewe uwa munoyali, pano wewe waku Galile.”

71Alino Petulo alapa avwanga ati, “Ntamanyile umuntu wino mukulandapo. Ndi nkutumpoka Leza andye.”

72Lilyo kwene mukolwe alamula iila lyakwe ciili, na Petulo aiusya vino Yesu wamunenyile ati, “Lino mukolwe atacili alamule maila yaili, wemo umankana maila yatatu ale ukuvwanga vino utamanyile.” Lyene apongomoka, alila.

Currently Selected:

Mako 14: MamL13

Highlight

Copy