Mateo 2
2
Antu yamano yafuma ku Ufumondaka
1Pacisila lino Yesu wavyalwa mu musumba wa Betelemu mu Yudeya, mu manda yalya lino Helodi wali umwene, antu yamano amanyanga vintu mu kusambilila pa ntanda yafuma ku ufumondaka, iiza ku Yelusalemu. 2Alino yuzya yati, “Uzye wino watavyalwa nupya wino alaya Mwene wa Ayuda ali kwi? Pano twaweni lutanda ku ufumondaka, lwatumanyisya kuvyalwa kwakwe, nga twiza ku kumupepa.” 3Lino mwene Helodi wacuvwa, wene pali pamwi na amu Yelusalemu yonsi yasakamikwa. 4Lyene akonganika yasimapepo akalamba yonsi na yakasambilizya ya Masunde, ayauzya ati, “Aukwi kuno Katuula uwalavilwe ali nu kuvyalilwa?” 5Nao yamwasuka yati, “Mu Betelemu musumba uwamu Yudeya, pano avino kasema walemvile ati,
6 #
Mik 5:2
‘Nawe Betelemu, mu mpanga yakwe Yuda,
Usi munono muli yakateeka yakwe Yuda.
Pano munuli mulafuma intunguluzi,
ino ilaya akateeka wa antu yane aina Izlaeli.’ ”
7Lyene Helodi aama antu yamano yalya kumbali ayauzya ningo mu nkama insita lino lutanda lwalolike. 8Alino ayanena ati, “Yangini ku Betelemu mukalondelezye ningo pamulandu wa mwana wilya. Lino mwamuzana mwize munene zuwazuwa kuti nani kwene nkaye nkamupepe.”
9Pacisila lino antu yamano yuvwa ku mwene yapita. Nu lutanda luno yaweni ku ufumondaka luyakolelela luya lwimilila papela pano mwana wali. 10Lyene lino yalola lutanda, yazanga cuze. 11Alino iingila mu ng'anda, yalola mwana wilya na nyina Maliya, yamufukamila yamupepa. Alino yasapula vyuma vyao, nga yamupeela mawila yakwe zaabu, ubani nga ni vyamununko usuma, Mule. 12Lyene lino yacelulwa na Leza mu ciloto kuti yataswilila kuli Helodi, yapita museo uze kuya ku mpanga ya kumwao.
Yutusizya Yesu ku Eguputo
13Lino antu yamano yaswilila kumwao, mungeli wa Mwene aloleka kuli Yosefu mu ciloto amunena ati, “Katuka, senda mwana na nyina utukila ku Eguputo. Kikale kweneko kufika lino ndakunena, pano Helodi amalondelezya ukuli mwana wiyo kuti amukome.” 14Caleka Yosefu akatuka usiku atoola mwana na nyina, nga apita ku Eguputo. 15#Ose 11:1 Aikala kweneko kufika lino Helodi wafwa, kuti cifikiliziwe cino Mwene wavwanzile kupitila muli kasema ati, “Namile mwanane umonsi kufuma ku Eguputo.”
Helodi wakoma Ana
16Lyene Helodi lino wamanya vino antu yamano yamutumpoka asoka cuze, atuma asilika yamwi ku kukoma ana yonsi aonsi ali ni myaka iili ya kuvyalwa nu kwiza pansi, ali mu Betelemu nu mu ncende izyapalime. Cii cali kulingana na vino antu yamano yamunenyile pamulandu na kasita, lino yaweni lutanda. 17Lyene cafikiliziwe cino kasema Yelemiya wavwanzile ati,
18 #
Yel 31:15
“Izwi lyuvwika mu Lama,
ilya kulila nu kulosya cuze.
Lakeli akulila ana yakwe
nupya wakana ukutekeziwa pano yalowa.”
Akwasi yakwe Yesu yawela nawe kufuma ku Eguputo
19Lino Helodi wafwa, mungeli wa Mwene aloleka kuli Yosefu mu ciloto ku Eguputo. 20Amunena ati, “Katuka, senda mwana na nyina, pita ku mpanga ya Izlaeli pano yao alondanga kukoma mwana yati yafwa.” 21Caleka Yosefu akatuka, asenda mwana na nyina yaya ku mpanga ya Izlaeli. 22Lelo lino uvwa vino Akelao akuteeka mu Yudeya mu cifulo cakwe isi Helodi, aoopa kuyako, lino yamusoka mu ciloto, apita aya ku muputule wa mpanga ya Galile. 23#Mk 1:24; Luk 2:39; Yoa 1:45 Alino aya ikala mu musumba wa Nazaleti, kuti cifikiliziwe cino Leza wavwanzile kupitila muli yakasema, ati, “Alaamwa mwikazi uwamu Nazaleti.”
Currently Selected:
Mateo 2: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
