Mateo 3
3
Kukosola kwakwe Yoane Kawatizya
(Mk 1:1-8; Luk 3:1-18; Yoa 1:19-28)
1Mu manda yalya Yoane Kawatizya aloleka, ala akukosola mu lwanga lwamu Yudeya, 2#Mat 4:17; Mk 1:15 akuti, “Zenzukini, pano Wene wa mwiyulu wati upalama pipi.” 3#Eza 40:3 Pano Yoane ali wino kasema Ezaya wavwanzile ati,
“Umwi akulaizya mu lwanga ati,
‘Zifini museo mwakupita Mwene,
olololini inzila mwakupita aliwe.’ ”
4 #
2Yam 1:18
Vizwalo vyakwe Yoane vyapanzilwe ku mavumbu ya ngamila, nupya wazwalanga musipi wa mpapa mu musana. Vyakulya vyakwe vyali a makanta nu uci uwamu mpanga. 5Lyene antu amu Yelusalemu, na amu muputule wa mpanga ya Yudeya yonsi na amu mpanga yapalime na Yodani yaya kunoli. 6Yene yailongwelanga maifyo yao, nga nawe ayawatizya mu luzi lwa Yodani.
7 #
Mat 12:34; 23:33 Lelo lino walola Afaliseo na Asaduki aingi yakwiza kuno wawatizyanga, ayanena ati, “Mwe ana ya nzoka mwe! Uzye aweni uwamucelula kuti muutuke ukali wakwe Leza uno ukwiza? 8Mwaomba imilimo isuma yakulanga vino mwati muzenzuka. 9#Yoa 8:33 Nupya mutaelenganya ukuti muluutuka kuvunukwa kuno kukwiza, apa kulanda ukuti Abulaamu ali cikolwe cinu. Nkumunena vino Leza angasenula amawe yaa ukuya ana yakwe Abulaamu. 10Na ndakai kwene impasa iteyanyiziwe kusinda imiti pa visinte. Umuti onsi uno usiseeka vizao visuma ulakomwa nu kusumbwa mu moto. 11Nemo nkumuwatizya na manzi kulanga ukuti mwati muzenzuka, lelo wino akwiza pacisila cane wene uwa maka kunduta. Ntaine kusenda ndyatu zyakwe. Wene alamuwatizya na Mupasi Wamuzilo nu moto. 12Akweti ulupe ulwakwelela kuti aele ingano zyakwe zyonsi, azikolonganike nu kuzisezya mu nkoma. Lelo mapumbu alayoca mu moto usyazimiwa.”
Kuwatiziwa kwakwe Yesu
(Mk 1:9-11; Luk 3:21-22)
13Lyene Yesu afuma mu Galile aiiza ku Yodani, kuti Yoane amuwatizye. 14Lelo Yoane alonda akane ati, “Wewe ulinzile kuwatizya nene. Uzye pacani wanena kuti nkuwatizye?” 15Lelo Yesu amunena ati, “Ndakai leka cicitike vikwene, pano catuzipila kuti tucite ivyawololoke vyonsi vino Leza akalonda.” Alino Yoane azumila. 16Lyene lino Yesu wawatiziwa, lilyo kwene afuma mu manzi. Lyene iyulu lilekuka, nga alola Mupasi Wamuzilo akwika panoli mu musango wa nkunda. 17#Uta 22:2; Mas 2:7; Eza 42:1; Mat 12:18; 17:5; Mk 1:11 Ni zwi lyuvwika kufuma mwiyulu liti, “Wii Umwanane mukundwe, munoli nkuzanga cuze.”
Currently Selected:
Mateo 3: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
