Mateo 1
1
Vikolwe vyakwe Yesu Klistu
(Luk 3:23-38)
1Kuu kuli kulondolola kwa mupanda wa vikolwe vyakwe Yesu Klistu, mwana wakwe Davidi, mwana wakwe Abulaamu.
2Abulaamu wali a isi wakwe Isaki, Isaki wali a isi wakwe Yakobo, Yakobo wali a isi wakwe Yuda na ina yakwe, 3Yuda wali a isi wakwe Pelezi na Zala yano avilwe muli Tamala, Pelezi wali a isi wakwe Esiloni, Esiloni wali a isi wakwe Lamu, 4Lamu wali a isi wakwe Aminadabu, Aminadabu wali a isi wakwe Nasoni, Nasoni wali a isi wakwe Salimoni, 5Salimoni wali a isi wakwe Boazi wino wavilwe muli Laabu, Boazi wali a isi wakwe Obedi wino wavilwe muli Luti, Obedi wali a isi wakwe Yese, 6Yese wali a isi wa Mwene Davidi.
Davidi wali a isi wakwe Solomoni wino wavilwe muli wino uwali muci wakwe Uliya, 7Solomoni wali a isi wakwe Leoboamu, Leoboamu wali a isi wakwe Abiya, Abiya wali a isi wakwe Asa, 8Asa wali a isi wakwe Yosafati, Yosafati wali a isi wakwe Yolamu, Yolamu wali a isi wakwe Uziya, 9Uziya wali a isi wakwe Yotamu, Yotamu wali a isi wakwe Akazi, Akazi wali a isi wakwe Hezekiya, 10Hezekiya wali a isi wakwe Manase, Manase wali a isi wakwe Amoni, Amoni wali a isi wakwe Yosiya, 11#2Yam 24:14; 2Mil 36:10; Yel 27:20 Yosiya wali a isi wakwe Yekoniya na ina yakwe, mu manda ya kusendwa uzya ku Babiloni.
12Lino yasendwa mu uzya ku Babiloni Yekoniya wali a isi wakwe Salatieli, Salatieli wali a isi wakwe Zelubabeli, 13Zelubabeli wali a isi wakwe Abiudi, Abiudi wali a isi wakwe Eliakimu, Eliakimu wali a isi wakwe Azoli, 14Azoli wali a isi wakwe Sadoki, Sadoki wali a isi wakwe Akimu, Akimu wali a isi wakwe Eliudi, 15Eliudi wali a isi wakwe Eleaza, Eleaza wali a isi wakwe Matani, Matani wali a isi wakwe Yakobo, 16Yakobo wali a isi wakwe Yosefu, iya wakwe Maliya u waviile Yesu wino akaamwa ukuti a Klistu.
17Caleka mikulo yonsi kufuma kuli Abulaamu kufika kuli Davidi yali ikumi na ini, nu kufuma kuli Davidi kufika ku kusendwa mu uzya ku Babiloni yali ikumi na ini, nga kufuma mu uzya mu Babiloni kufika ku kuvyalwa kwakwe Katuula uwalavilwe mikulo nayo yali ikumi na ini.
Kuvyalwa kwakwe Yesu Klistu
(Luk 2:1-7)
18 #
Luk 1:27
Kuvyalwa kwakwe Yesu Klistu kwali ndi vii. Maliya uwali nyina, wataisiwe na Yosefu, lelo lino yatali ikale nawe, wazanyilwe ni ndilwa iyacisilwe kupitila mu maka ya Mupasi Wamuzilo. 19Yosefu, wino uwamutaisye wene wali umuntu wa cumi, nupya atalondanga kuti amuzewanye paswe. Wakasi kuti amukane kumbali. 20Lelo lino acili akwetetwila cii, mungeli wa Mwene aloleka kunoli mu ciloto amunena ati, “Yosefu, uwamu mupanda wakwe Davidi, utaya na ntete zya kutwala Maliya ukuya muci wako. Pano watasenda indilwa kupitila mu maka yakwe Mupasi Wamuzilo. 21#Luk 1:31 Wene alavyala umwana umonsi nawe uce umutemele izina uti a Yesu, pano wene alatuula antu yakwe kufuma ku maifyo yao.”
22Vintu vii vyonsi vyacitike kuti cifikiliziwe cino Mwene walanzile kupitila muli kasema ati, 23#Eza 7:14 “Umukazyana atamanya umonsi alasenda indilwa nupya alavyala umwana umonsi, nga yalamutemela izina yati a Emanueli,” (kuli kuti, “Leza ali naswe”).
24Lino Yosefu wazyuka mu tulo, acita vino mungeli wa Mwene wamunenyile, nga atwala Maliya. 25#Luk 2:21 Lelo Yosefu atamumanyile suka pacisila ca kuvyala mwana umonsi, nga nawe amutemela zina ati a Yesu.
Currently Selected:
Mateo 1: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
