Luka 12

Ukusokwa pa usomvi

(Mat 10:26-27)

1 # Mat 16:6; Mk 8:15 Lino antu mazimbi na mazimbi yakongana pali pamwi, cakuti yalyatana, Yesu anena alondezi yakwe ati, “Cenjelini nu kutaluka ku citutumusi ca Afaliseo, kuli kuti usomvi wao. 2#Mk 4:22; Luk 8:17 Kusi cimwi icafisama icitalasokololwa paswe, nanti cimwi cino icafiswa icitalaumbulwa. 3Caleka consi cino mulavwanga mu mfinzi, ciluvwika paswe, na consi cino mulatotoza antu mu nkama mu muputule, ciluvwika mu misolo.

Wino tungoopa

(Mat 10:28-31)

4“Namunena, yacuza yane, mutaoopa yano akakoma umwili, lelo pacisila kusi na cuze cino yangacita. 5Nkamunene uwakoopa. Oopini Leza, wino pacisila ca kukoma wakwata maka akusumba mu Gehena. Mutaile cino namunena, moopini wiyo kwene.

6“Uzye utunyi tusano tusikalwa pa makowili yaili? Lelo pasi akunyi nanti konga kano Leza wilila. 7Ni nyele zyaku mitwe inu nazyo kwene wazipenda zyonsi. Caleka mutoopa, pano mwemwe yamutengo kuluta utunyi utwingi.

Kukaana Yesu pa manso ya antu

(Mat 10:32-33; 12:32; 10:19-20)

8“Cumi, namunena vino wino wensi walanda paswe ukuti uwakwane, Mwana wa Muntu nawe alacita cili conga panoli pa manso ya angeli yakwe Leza. 9Lelo wino wensi uwankana pa manso ya antu, nu Mwana wa Muntu kwene alamukana pa manso ya angeli yakwe Leza ukuti atamumanyile.

10 # Mat 12:32; Mk 3:29 “Wensi wino alavwanga izwi liipe pa Mwana wa Muntu Leza alamwelela, lelo wino wensi alavwanga mazwi ya misuli pali Mupasi Wamuzilo wene Leza atalamwelela.

11 # Mat 10:19; Mk 13:11; Luk 21:14 “Lino mwemo yamuleta ku mang'anda ya mapepo nu ku yalasi, nga na kuli yakateeka, mutakasakamale pali vino mungaipokolola nanti pali vino mulavwanga. 12Pano Mupasi Wamuzilo alamumanyisya pa nsita ilya pali vino muli nu kuvwanga.”

Mulumbe wa mukama muwelewele

13Muntu umwi uwa mwi umba avwanga kuli Yesu ati, “Kasambilizya, nena mwina wane angankanyeko ivyuma vino tata watusilile.”

14Yesu nawe aasuka ati, “Muntu we, aweni wampeela maka akupingula nanti kwankanya ivyuma panomuli mweili?” 15Lyene watwalilile kuvwanga kuli onsi ati, “Mucenjele nu kuicingilila ku lwiswa lonsi. Pano umi wa muntu utaya mu wingi wa vintu vino wakwata, usi mulandu nanti angaya ni vyuma vingi.”

16Lyene Yesu ayanena mulumbe uu ati, “Kwali calo ca mukama umwi icamezyanga ivyakulya ivingi. 17Lyene mukama atandika kuivwanzya mu mwenzo wakwe ati, ‘Ntakweti incende mwakusezya ivyakulya vyane. Uzye namacita uli?’ 18Alino aivwanzya ati, ‘Ndacita cii, ndomolola inkoma zyane zyonsi nu kukuula zyuze zikulu, muno ndiika ivyakulya vyane ni vyuma vyane vyonsi.’ 19Alino ndainena nemwisikulu nti, ‘Nene musyuke! Nakwata vintu vyonsi vino nalondanga pa myaka iingi. Kanapuza, nalya, namwa, nu kuzanga.’ 20Lelo Leza amunena ati, ‘We ciwelewele we! Usiku kwene uu umi wako nkuulonda. Uzye lyene aweni alatola vintu vyonsi vino waisungila?’” 21Yesu amalilila kuvwanga ati, “Vii, avino cilaya na kuli wino wensi akaitulikila ivyuma umwisikulu, lelo asi mukama pa manso yakwe Leza.”

Kutaila muli Leza

(Mat 6:25-34)

22Lyene Yesu anena alondezi yakwe ati, “Caleka namunena ukuti mutasakamala pali vino mumalya pakuti muye nu umi, nanti pa vizwalo vyakuzwika imili inu. 23Umi ulusile ivyakulya, nu mwili ulusile vizwalo. 24Lolini yamwankole! Yene yasyakomela imbezu nanti kuzombola. Yene yatakwata incende nanti inkoma mwakusezya vilyo. Leza akayalisya! Lelo mwemo muyalusile kutali. 25Uzye aweni uwa munomuli, pa kusakamikwa kwakwe, angalundako wanda ku umi wakwe? 26Ndi mutangacita nanti akantu kanono wakwe kako, pacani cino mungasakamikwa pa vintu vyuze?

27 # 1Yam 10:4; 2Mil 9:3 “Lolini vino maluwa yakakula. Yene yasyaomba nanti kupikula vizwalo. Lelo namunena vino mwene Solomoni, mukuyemba kwa kuzwala kwakwe konsi, wene atafisile nanti kukuyemba kwi luwa lyonga wakwe yaa. 28Leza akazwika isote lyamu mpanga, ililipo ilelo na mutondo lisontekwa umoto. Uzye wene atalalusya kuzwika mwemwe, mwe ya utailo unono?

29“Acino mutasakamala nanti ukwaziwa pali vino mumalya nanti kumwa. 30Pano antu atataila Leza alio yakasakamala pa vintu vii vyonsi. So wamanya vino mukalonda vintu vii. 31Mu cifulo cakwe vii, inkolelo mutale mulonde Uwene wakwe Leza, nga nawe alamupeela vintu vii vyonsi.

Kwika vyuma mwiyulu

(Mat 6:19-21)

32“Mutoopa, mwe ufyo unono wa mfwele, pano So camuzanzya kuti amupeele Uwene wakwe. 33Kazyini vyonsi vino mukweti, mupele impiya ku apina. Ilondelini vikwama visyapunguka. Nu kusunga vyuma vinu mwiyulu muno vitalatala vipunguke, pano aiivi yatangafikako nu kwiya, nu wonyi nao utangalya vyuma vivyo. 34Pano ukuli vyuma vinu ukuli ni myenzo inu kwene.

Kupempula

35 # Mat 25:1 “Pimpini kuomba nu kuleka inyali zinu zitwalilile ukwaka. 36#Mk 13:34 Nupya mukolane wa yaomvi akalolela mwene wao kuwela kufuma ku cimulo ca winga, pakuti yangamuyulila mulyango lilyo kwene lino wafika nu kukonkonsya. 37Alongo aomvi yano mwene wao alazana yakupempula pa kwiza kwakwe! Namunena vino, wene alazula mwingila wakwe, nu kuyalenga kuti ikale pansi, nga ayapeele ivyakulya. 38Alongo ayao yano alazana aiteyanye, nanti angala angiza usiku pakasi, nanti pa macaca! 39#Mat 24:43 Nupya manyini ukuti mwine ng'anda ndi amanyile insita ino aivi yakwiza, atangaleka yatame ing'anda yakwe. 40Namwe kwene mulinzile kuiteyanya, pano Mwana wa Muntu aliza pa nsita ino mutenekile.”

Muomvi mutailwe na asi mutailwe

(Mat 24:45-51)

41Petulo amuuzya ati, “Mwene, uzye mulumbe uu uli pali sweswe, nanti uli pali onsi?”

42Mwene nawe amwaasuka ati, “Uzye lyene, muomvi mutailwe nu wamano aweni? Awiyo wino mwene alamucita kangalila, uwakulolela ing'anda nu kupeela aomvi yauze vyakulya vyao pa nsita ilinge. 43Walongo umuomvi wiyo wino mwene wakwe alazana akucita wakwe vii lino aliza. 44Cumi, namunena vino mwene alamucita kangalila wa vintu vyonsi vino akweti. 45Lelo muomvi wiyo ndi alelenganya mu mwenzo wakwe ati, ‘Mwene wane walengela kwiza,’ lyene atandika kuuma aomvi yauze aonsi na anaci, aalya nu kumwa nu kukoleka, 46lyene mwene wiyo aliza pa wanda uno asikwenekela, na pa kasita kano atamanyile. Wene alamuvunuka cuze, nupya alamusumbila ukunzi ku antu atataila.

47“Muomvi wino uwamanyile vino mwene wakwe akasi, lelo ataiteinye nanti kucita kulonda kwakwe, wene alumwa vikoti vingi. 48Lelo wino atamanyile vino mwene wakwe akasi, ndi waomba milimo ingamulenga kuvunukwa, wene alumwa vikoti vinono. Pano kuli wino wapelwa vingi, ni vingi vilalondwa kufuma kunoli. Na kuli wino yaseekela vingi, ni vingi kuluta vilalondwa kufuma kunoli.

Yalapusana pamulandu wakwe Yesu

(Mat 10:34-36)

49“Niiza aasya umoto mu nsi. Endi, cange ciye ale umoto watandika mpiti ukwaka! 50#Mk 10:38 Lelo indi nu kucula cuze, nupya mwenzo wane ulikala kufika lino vilacitika. 51Uzye mukwelenganya vino niiza ku kuleta mutende muno nsi? Awe! Usi mutende lelo ukupusana. 52Pano kufuma ndakai yasano amu ng'anda yalapusana, yatatu yalakatukila yaili na yaili nao yalakatukila yatatu. 53#Mik 7:6 Umwana umonsi alapusana na isi, isi nawe alapusana nu mwana. Umwana kaci alapusana na nyina, nyina nawe alapusana nu mwana kaci. Nyinavyala alapusana nu muci wa mwana, muci wa mwana nawe alapusana na nyinavyala.”

Vyakumanyila kasita

(Mat 16:2-3)

54Lyene anena antu ati, “Lino mukalola ikumbi lyafutika ku uwondaka, lilyo kwene mukati, ‘Imvula imatonya,’ nu kutonya ikatonya. 55Lino muvwa muza ukupunga kufuma ku kaeya mukati, ‘Ilelo kumakaya,’ nu kukaya ikukaya. 56Mwe asomvi mwe! Mukalola milolekele ya pansi ni yulu alino mukalanda vino umuza ulaya. Lelo pacani mutamanyile kulola nu kwilula vya pa kasita ka ndakai?

Muvwane nu mwanisi wako

(Mat 5:25-26)

57“Uzye pacani mwemo musisolola kucita cisuma? 58Pano lino mukuya ku kuvwangilwa milandu nu muzo, cingazipa kuti mulanzyanye na similandu muzo lino mucili mu nzila. Pano lino amakutwala kuli kapingula wa milandu, kapingula alaya akakupeele ku musilika. Musilika nawe alakuyalila mu ng'anda yaminyololo. 59Nkukunena vino utalafumamo, suka lino wamala kulipa kalikowili kakusyalikizya.”

Currently Selected:

Luka 12: MamL13

Highlight

Copy