Yoane 9
9
Yesu wapozya umuntu uwavilwe impafu
1Lino Yesu akupita, alola umuntu wino wavilwe impafu. 2Alino alondezi yakwe yamuzya yati, “Kasambilizya, uzye amaifyo yakwe weni alenzile kuti umuntu wii avyalwe impafu? Uzye amaifyo yakwe wenga nanti amaifyo ya akwasi yakwe?” 3Yesu aasuka ati, “Umuntu wii, atapafula pamulandu wa maifyo yakwe nanti pamulandu wa maifyo ya akwasi yakwe. Wene wavilwe impafu pakuti maka yakwe Leza yalolekele munoli. 4Lino ucili musanya, katule tuombe milimo yakwe wino uwantuma. Usiku ukwiza lino umuntu atangaomba. 5#Mat 5:14; Yoa 8:12 Lino ncili mu nsi, nene luswepo pakasi ka antu amu nsi.”
6Pacisila cakuvwanga cii, Yesu aswa mati pansi akanda ivu, nga apaka mu manso ya muntu ni ivu, 7nga amunena ati, “Yanga kafulale mu ciziya ca Siloamu.” Izina lii likasenula ukuti (“Waatumwa”.) Caleka umuntu apita, aya fulala pa manso, nga awela akulola.
8Alino ainipamba nga na yao aweni vino wali akalenga yati, “Uzye wii asi muntu wikalanga ala akulenga?”
9Yamwi nao yati, “Aliwe kwene.” Alino wene ati, “Anene kwene.” Yauze nao yati, “Awe asi aliwe, lelo wakolana sile nawe.”
10Nao yamuzya yati, “Uzye wali watandika kulola uli?”
11Nawe ayaasuka ati, “Umuntu wino akaamwa ukuti Yesu wali wakanda ivu na mati, wampaka mu manso, nga wanena kuya ku ciziya ca Siloamu ku kufulala pa manso. Acino nali nayako, nga lino nafulalamo, lilyo kwene natandika ukulola.” 12Alino yamuzya yati, “Uzye umuntu wii alikwi?” Nawe aasuka ati, “Ntamanyile.”
Afaliseo yalondelezya vino muntu wapoziwe
13Lyene yaleta umuntu uwali impafu ku Afaliseo. 14Wali uwanda wi Sabata lino Yesu wakanzile ivu nu kupozya umuntu ku upafu wakwe. 15Nupya Afaliseo yamuzya yati, “Uzye wali watandika kulola uli?” Nawe aasuka ati, “Wali wampaka ivu mu manso, alino nali naya nafulalamo nga ndakai nkulola.” 16Yamwi amu Afaliseo yavwanga yati, “Umuntu uwali wacita cii atafuma kuli Leza, pano asyayela isunde li Sabata.”
Lelo yauze yati, “Uzye kaifya angacita uli vilangililo wakwe vii?” Alino mukasi kao yapalukana.
17Caleka nupya kwene Afaliseo yuzya umuntu uwali mpafu yati, “Wemo wavwanga vino wali wakupozya ku upafu wako. Uzye lyene wemo ukuti uli pa muntu wii?” Nawe aasuka ati, “A kasema.”
18Lelo intunguluzi zya Ciyuda nalyo kwene zitakasi kutaila vino umuntu wii wavilwe impafu nga ndakai akulola. Suka kufika lino zyama akwasi yakwe, 19zyuzya ziti, “Uzye wii umwana winu? Mukati wavilwe impafu. Uzye lyene ndakai akulola uli?”
20Akwasi yakwe yaasuka yati, “Twamanya vino wii umwana witu, na vino wavilwe impafu. 21Lelo ndakai tutamanyile cati cilenga kuti alola, nanti umuntu uwali wapozya upafu wakwe. Muzyini, pano wene uwikolo amaivwangila.” 22Akwasi yakwe yavwanzile cii pano yoofile intunguluzi zya Ciyuda pano ala zyazumilizyanya ukuti, wensi amataila vino Yesu ali Katuula, wene amazingwa mu ng'anda ya mapepo. 23Caleka akwasi yakwe yayanena yati, “Wene uwikolo angaivwangila.”
24Afaliseo nupya yaama umuntu iila lyakwe ciili, wino uwali impafu, alino yamunena yati, “Lumbanya Leza! Twati tumanya vino umuntu wino watakupozya wene akaifya.”
25Umuntu nawe avwanga ati, “Nda kaifya, nemo ntamanyile. Manyile cintu conga. Nali mpafu, lelo ndakai nkulola.”
26Caleka yamuzya yati, “Uzye icani cino wene wacisile kunuli? Uzye upafu wako waupozizye uli?”
27Nawe ayanena ati, “Nati munena, nga namwe mutuvwile. Uzye pacani mukulonda kuvwa nupya pali cii? Uzye namwe kwene mukasi kuya alondezi yakwe?”
28Nao yamutuka, nu kuti, “Wewe uli mulondezi wakwe, lelo swemo sweswe alondezi yakwe Mose. 29Twamanya vino Leza wavwanzile kuli Mose. Lelo umuntu wii, tutamanyile kuno wafuma!”
30Umuntu ayanena ati, “Awe cii icakuzunguka! Mwemo mutamanyile kuno wafuma, lelo wene watampozya ku upafu! 31Twamanya vino Leza asyauvwa yakaifya. Wene akauvwa antu yano akamucindika nu kucita kulonda kwakwe. 32Kufuma ku utandiko lino insi yacisilwe citatala cuvwika ukuti umwi wapozya umuntu impafu. 33Umuntu wii atangacita cimwi, suka ndi wafuma kuli Leza.”
34Nao yamunena yati, “We muno wavyalwa nu kukula mu maifyo, uzye ukwelenganya vino ungasambilizya sweswe?” Alino yamuzinga mu ng'anda ya mapepo.
Upafu wamu mwenzo
35Lino Yesu uvwa cati cicitika, nga azana umuntu uwapoziwe amuuzya ati, “Uzye wataila mu Mwana wa muntu?”
36Muntu nawe aasuka ati, “Mwene, unene umuntu wiyo kuti nani mutaile!”
37Yesu amunena ati, “Watumulola, na ndakai ali wino mukuvwanga nawe.”
38Lyene umuntu avwanga ati, “Mwene, nataila!” Alino afukamila Yesu.
39Yesu avwanga ati, “Nizile mu nsi ku kupingula milandu ya antu onsi, kuti yao asyalola yalole, na yao akalola nao yaye impafu.”
40Afaliseo yamwi yano ali nawe yuvwa vintu vii, nga yamuzya yati, “Uzye naswe kwene sweswe mpafu?”
41Yesu ati, “Ndi mwali mwemwe mpafu, nga musi nu mulandu. Lelo pano mukuti mukulola, caleka mucili nu mulandu.”
Currently Selected:
Yoane 9: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
