Yoane 10
10
Mulumbe wa citata ca mfwele
1Yesu avwanga ati, “Cumi namunena vino umuntu asyaingilila pa mulyango wa citata ca mfwele, lelo akakwela nu kwingilila pauze, wene umwivi nupya cipondo. 2Lelo umuntu akaingilila pa mulyango, wene mucemi wa mfwele. 3Awino na kalolela wa mulyango akayulila. Ni mfwele zyakwe zikauvwa izwi lyakwe lino akuzyama mazina nga nu kuzitungulula kunzi. 4Lino wafumya mfwele zyakwe zyonsi, azikolelela, nga nazyo zimulondela pano zyamanya izwi lyakwe. 5Mfwele zisyalondela umuntu muze. Zyene zikautuka umuntu muze pano zitamanya izwi lyakwe.”
6Yesu wayanenyile mulumbe uu lelo yatilwike vino ukusenula.
Yesu ali mucemi musuma
7Nupya Yesu ati, “Cumi namunena vino nemo nene mulyango wakwingililapo mfwele. 8Yauze ankolelile yene aivi nupya vipondo, nga ni mfwele zitayuvwile. 9Nene mulyango! Wino wensi uwingila pali nene, alatuulwa. Wene alingila, alafuma nu kuzana vyakulya. 10Mwivi akaizila sile kwiya, kukoma, nu konona. Nemo nizile kuti muye nu umi, umusi ukuulilwa.
11“Nene mucemi musuma. Mucemi musuma akapeela umi wakwe pamulandu wa mfwele. 12Lelo wino walembwa sile incito, asi mucemi, nga ni mfwele zisi zyakwakwe, lino walola mumbulu ukwiza, amasya mfwele autuke. Nu mumbulu wize uleme yonga nga ni zyuze zipasike. 13Wino uwalembwa sile incito wene akautuka pano wene walembwa sile incito nupya asyasakamala mfwele. 14Nene mucemi musuma. Namanya mfwele zyane nga nazyo zyamanya. 15#Mat 11:27; Luk 10:22 Ndi vino Tata wamanya, nani namanya Tata, nga naipela kufwila mfwele. 16Nkweti mfwele nazyuze zino zisi zyamu citata cii. Nazyo kwene namala nde nzilete. Ziluvwa izwi lyane nga zilaya ufyo onga nu mucemi wenga.
17“Acino Tata wantemelwa, pano naipela ukufwa kwaula kupatikiziwa, kuti ince nje umumi nupya. 18Pasi umwi angankoma suka naleka kuti acite cico. Nene indi ni nsambu yakuleka kuti nkomwe nga nupya ningakatuka nje umumi. Ilamulo lii nafumya kuli Tata.”
19Antu nupya yapalukana pa mazwi yaa. 20Na aingi munoyali yavwanga yati, “Ali nu mupasi wa nkota! Wene wapena! Uzye pacani mukumuvwa?”
21Lelo yauze nao yavwanga yati, “Umuntu wino ali nu mupasi wankota atangavwanga mu musango uu! Uzye mupasi wankota ungalenga uli impafu kulola?”
Ayuda yakana Yesu
22Mu Yelusalemu mwali Cimulo ca kuzevya kwa kupeela Ng'anda ikulu yakwe Leza kunoli. Yali nsita ya mpepo. 23Yesu wapitananga mu Ng'anda ikulu yakwe Leza, mu lukungu lwakwe Solomoni. 24Caleka Ayuda yamuunganila nga yamuzya yati, “Uzye umatusya muli sisi manda yanga? Ndi wewe uli Katuula uwalavilwe tunene paswe.”
25Yesu aasuka ati, “Nati munena, lelo mutataile vicitwa vino nkacita mwi zina lyakwe Tata. Vyene vikapeela umboni pali nene. 26Lelo mwemo mutantaila pano musi amu ufyo wa mfwele zyane. 27Mfwele zyane zikauvwa izwi lyane. Nazimanya nga nazyo zikandondela. 28Nemo nazipela umi wapee nga nazyo zitalalowa. Pasi umuntu alazisompola mwi kasa lyane. 29Tata wino wazimpela waluta onsi. Acino pasi umuntu nanti umwi angazisompola mwi kasa lyakwe Tata. 30Nemo na Tata twaya wenga.”
31Nupya kwene Ayuda yatoola mawe kuti yamutame. 32Yesu ayanena ati, “Nati ncita vicitwa vingi visuma vino Tata wampile kuti ncite. Uzye apa vicitwa vii pano mukulonda kuntama na mawe?” 33#Levi 24:16 Ayuda yaasuka yati, “Pasi apa vicitwa visuma pano tukulonda tukutame na mawe, lelo apa mazwi yako a misuli kuli Leza! Wewe muntu sile nga ukwezya ukuicita kwati wewe Leza.”
34 #
Mas 82:6
Yesu avwanga ati, “Uzye citalembwa mu Masunde inu vino Leza wati, ‘Mwemwe tuleza.’ 35Twamanya ukuti vino malembelo yalanda vyene ivya cumi manda pe. Antu yaya yamilwe na Leza ukuti a tuleza, antu yano Ilandwe lyakwe Leza lyapilwe kunoyali. 36Nemo Tata wansolola nu kuntuma mu nsi. Uzye lyene mungati uli nkuvwanga mazwi ya misuli kuli Leza, pano inavwanga vino nene Mwana wakwe Leza? 37Ndi nsyakucita vintu vino Tata akasi kuti nacita, lyene mutantaila. 38Lelo ndi nkuvicita, nanti mutantaile, mulinzile kutaila nanti vicitwa vyane, kuti mumanyile limwi vino Tata nani twaya wenga.”
39Nupya kwene yalonda kulema Yesu, lelo aongoloka pano yali.
40 #
Yoa 1:28
Yesu apita nupya ku mbalama yuze ya luzi lwa Yodani, ku cifulo cino Yoane watandikile kuwatizya, akuno aya aikala. 41Antu aingi iiza kunoli yamunena yati, “Yoane atacisile cilangililo. Lelo vintu vyonsi vino Yoane wavwanzile pamulandu nu muntu wii vyali vya cumi.” 42Antu aingi kuku yamutaila.
Currently Selected:
Yoane 10: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
