Milimo 5
5
1Kwali umuntu umwi izina lyakwe Ananiya, nu muci wakwe Safila. Wene wakazizye calo cino yakweti. 2Lelo wene pamwi nu muci wakwe, yapangana kupaatulapo impiya zimwi yatole, nga zyasyala yapeele atumwa. 3Lelo Petulo amuuzya ati, “We Ananiya, uzye pacani wazumilizya kuti Ciwa akutunke mu mwenzo kuti usombe Mupasi Wamuzilo apa kupaatula impiya zimwi pali zino wakweti lino wakazizye calo? 4Lino utali ukazye calo, uzye citali icakwako? Na lino wakazizye calo, uzye impiya zitali zyakwako? Uzye pacani wasolola kucita cintu camusango uu? Utatumposile antu, lelo watutumpoka kuli Leza.” 5Lilyo kwene lino Ananiya uvwa mazwi yaa, apona pansi, afwa. Lyene antu yonsi auvwile cii, yuvwa intete cuze. 6Alino alumendo iiza iingila mu ng'anda, yapomba icala cakwe mu nsalu, yafumya yaya yazika.
7Lino papisile manye ama aawa yatatu, umuci nawe aingila. Lelo atamanyile icacitike. 8Petulo amuuzya ati, “Nena! Uzye zii zili mpiya zyonsi zino wemo nu wako mwakazizye calo?” Nawe aasuka ati, “Ee apano zipezile.”
9Caleka Petulo amuuzya ati, “Uzye pacani wemo nu wako mwati musolola kwezya Mupasi wa Mwene?#5:9 Mupasi wa Mwene: Kuli kuti Mupasi Wamuzilo. Antu yano yafuma kukuzika uwako ndakai yali pa mulyango, nga nawe kwene yamakufumya yakusende!” 10Lilyo kwene Safila apona pansi pipi ni ngazo zyakwe Petulo, afwa. Lino alumendo iingila yazana afwile mpiti. Caleka yamusenda, yaya yamuzika pipi niya. 11Lino iuvi lyonsi nga na antu yauze yonsi yuvwa cii, yuvwile intete cuze.
Atumwa yacita vinjelengwe ni vizungusyo
12Atumwa yacita vinjelengwe nga ni vizungusyo ivingi pakasi ka antu. Alondezi yonsi yakongana pamwi ni lango lyonga mu Lukungu lwakwe Solomoni. 13Pa antu atali ataile patali wakuilinga kuti ailundanye nao, nanti angala yatasyanga alondezi. 14Lelo antu nayauze ataile mu Mwene, yailundanyanga kwi umba nu kuluta. Lyali iumba likulu lya onsi na anaci kwene. 15Pamulandu wa milimo ino atumwa yacitanga, antu yaleta alwale yao mu miseo yayalalika pa vitala na pa vintamba pakuti lino Petulo akupita, cinzingwa cakwe ciwile pali yamwi. 16Alino maumba kufuma ku misumba izingulwike Yelusalemu, yaleta alwale yao nga na yano acuziwanga ni mipasi yankota. Lyene yonsi yapoziwa.
Atumwa yatandika kuzunyiwa
17Lyene Simapepo Mukulu na yano wali nao nga na yao amwi umba lya Asaduki yaya nu uzuwa cuze pa atumwa. Caleka yelenganya kucitapo cimwi. 18Lyene yalema atumwa yayayalila mu ng'anda yaminyololo. 19Lelo usiku kwene ulya mungeli wa Mwene ayula visasa vya ng'anda yaminyololo, nu kufumya atumwa, ayanena ati, 20“Yangini mu Ng'anda ikulu yakwe Leza, munene antu mazwi pamulandu wa umi upya.” 21Lino atumwa yuvwa cii, pa macaca iingila mu Ng'anda ikulu yakwe Leza, yatandika kusambilizya.
Simapepo mukulu na yano ali nawe yaama aikolo ya Ayuda yonsi pamwi kwi Tengo. Lyene yatuma antu ku ng'anda yaminyololo kuti yakalete atumwa kwi Tengo. 22Lelo lino asilika yafikako, yatazanyilemo umuntu mu ng'anda yaminyololo. Caleka yaswilila ku nkombe yavwanga yati, 23“Twazana ng'anda yaminyololo itiyalwa ningo, na yakalinda yaimi pipi ni visasa. Lelo lino twali twayula tutazanyile umuntu nanti umwi mukasi.” 24Lino musika wa Ng'anda ikulu yakwe Leza na yasimapepo akalamba yuvwa mazwi yaa, yazunguka. 25Lyene umuntu umwi aiiza ayanena ati, “Uvwini! Antu yano mwayalile mu ng'anda yaminyololo yali mu Ng'anda ikulu yakwe Leza, yakusambilizya antu.” 26Lyene musika na asilika yakwe yapita, yaya yaleta alondezi kwaula kuyakunkizya, pano asilika yoopa ukuti antu yangayatama na mawe.
27Lino yafika pamwi nao, iingizya atumwa mwi Tengo, yaimika nkolelo yakwe yano ali mwi Tengo. Lyene Simapepo Mukulu ayauzya ati, 28#Mat 27:25 “Twamupile ilamulo nu kukonkomezya kuti kutaya umuntu umwi uwakusambilizya mwi zina lya muntu wii,” lelo “Lolini cino mwati mwacita! Mwati musalanganya usambilizyo winu mu Yelusalemu monsi, nga mukasi kuti sweswe tuye nu mulandu wa kukoma muntu kwene wii?”
29Petulo na alondezi yauze yaasuka yati, “Tulinzile ukuyela Leza, kuluta kuyela antu. 30Yesu wazyukwike kufuma ku afwe ku maka yakwe Leza wa vikolwe vitu, pacisila lino mwamukoma pa kumupampamila pa lupanda. 31Lelo leza wazyukwile Yesu alino amwika kwi kasa lyakwe lilunji, ukuya intunguluzi na katuula, kuti apeele aina Izlaeli longo lwakuzenzuka nu kwelelwa maifyo yao. 32Naswe sweswe yakambone ya vintu vii, na Mupasi Wamuzilo kwene, wino Leza watapela kuli yano akamuyela.”
Gamalieli waceula amwi Tengo lya Ayuda
33Lino amwi Tengo yuvwa cii, yasoka cuze, cakuti yasolola kuti atumwa yakomwe. 34Lelo wenga uwa munoyali, Mufaliseo izina lyakwe Gamalieli, uwali a kasambilizya wa Masunde wino antu yonsi yacindike cuze, aimilila mwi Tengo. Alino apeela ilamulo kuti yatale yafumye atumwa panzi. 35Lyene anena amwi Tengo ati, “Mwe ina Izlaeli, mutekele pali cino mukulonda kucita ku antu yaa. 36Mu nsita zyampiti Teudasi walolike, nu kuitaka vino wene wali mukulu. Alino antu manye myanda ini yamulondile. Lelo yamukomile na antu yonsi amulondile yasalangana, nga pazima. 37Pacisila cakwe cii, Yuda umwina Galile, walolike mu nsita yakupenda antu. Nawe kwene waongwile iumba. Lelo nawe kwene yamukomile nga na amulondile yonsi yasalangana. 38Alino na pamulandu kwene uu, namunena vino mutacita nanti cimwi pa antu yaa. Yatini! Pano ndi pange lii, nga ni milimo yao ivya untunze, ale vili nukusila. 39Lelo ndi lyafuma kuli Leza, ale lyene mutangayacimvya, limwi mungazanwa vino mukulwisya Leza!” Alino amwi Tengo yazumila mazwi yakwe Gamalieli. 40Lyene yaama atumwa kwingila nga, yayuma vikoti, yayapeela ni lamulo kuti yatakezye nupya kuvwanga mwi zina lyakwe Yesu. Alino yaleka yapita. 41Atumwa nao yafuma mwi Tengo, yazanga cuze, pano Leza wayapendile kuya alinge kusulwa pamulandu wi zina lyakwe Yesu.
42Cila wanda atumwa yatwalilile kusambilizya mu mang'anda ya antu nu mu Ng'anda ikulu yakwe Leza, nga nu kukosola Ilandwe Lisuma ilyakuti Yesu ali Katuula.
Yasola yakazwa cinimbali
Currently Selected:
Milimo 5: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
