Milimo 4
4
1Walanga Petulo na Yoane yacili vwanga ku antu yaa, yasimapepo, musika wakwe yakalinda ya Ng'anda ikulu yakwe Leza, nga na Asaduki iiza kunoyali. 2Yene yali asoke cuze pano atumwa yaa yasambilizyanga antu yayanena yati Yesu watazyukuka kufuma ku afwe. Na cii cikusininkizya vino afwe yalazyukuka kufuma ku afwe. 3Caleka yayalema yayayalila mu ng'anda yaminyololo kufika katondo, pano cali amanguzi lino ilanzi lyatemba. 4Lelo antu aingi auvwile Ilandwe lilya yataile, ni mpendwa ya alondezi ikulilako kufika manye mazimbi yasano.
5Lyene katondo lino waca intunguluzi zya Ayuda, aikolo, na yakasambilizya ya Masunde yakongana mu Yelusalemu. 6Yakongine pamwi na Anasi uwali Simapepo Mukulu na Kayafa, Yoane, Alekizanda, nga na akazi kakwe Simapepo Mukulu. 7Alino iimika atumwa pakasi yayuzya yati, “Uzye uku maka cii nanti mwi zina lyakwe weni muno mwacitila ca musango uu?”
8Petulo azuziwa na Mupasi Wamuzilo, nga aasuka ati, “Mwe ntunguluzi na mwe ikolo, 9ndi cakuti ilelo alino mukuuzya sweswe pa cisuma cino twacitila umuntu uwali cilema nga na vino watapoziwa, 10lyene mulinzile kumanya, nga na antu yonsi aina Izlaeli nao kwene yamanye vino umuntu wii wino aimi nkolelo inu watapola ningo ku maka aya mwi zina lyakwe Yesu Klistu uwaku Nazaleti. Yesu wino mwatanyile pa lupanda, wino Leza wazyukwile kufuma ku afwe. 11#Mas 118:22 Yesu ali wino malembelo yakati,
‘Iwe lino mwe yakakuula mwakanyile
lyene lyacisilwe iwe lya pitungi lya ng'anda.’
12Kusi umuntu nanti wenga muno antu yangazana ufyusi, pano muno nsi yonsi kusi zina na lyuze lino Leza wapela kunotuli lyakuti tutuulilwemo.”
13Lyene ali mwi Tengo yazunguka pa kuposya kwakwe Petulo na Yoane, antu atali asambilile, nga yamanya vino yali alondezi apitanga na Yesu. 14Lelo yatali na cakuvwanga, pano ala yakulola umuntu wino wapoziwe aimi na Petulo na Yoane. 15Caleka yayanena kuti yatale yafume mwi Tengo. Alino nao yasyala yakulanzyanya yati, 16“Uzye tumacita uli na antu yaa? Umuntu wensi mu Yelusalemu watamanya vino alio yati yacita cinjelengwe cakuzunguka cino tutange tukane. 17Lelo apakulenga kuti umulandu uu utasalangana konsi, lekini toofye antu yaa kuti yatakonkowezya kulanda ku muntu ali wensi mwi zina lyakwe Yesu.”
18Caleka yayaama nupya yayapeela ilamulo yati, “Mutaezya kuvwanga nanti kusambilizya mwi zina lyakwe Yesu.” 19Lelo Petulo na Yoane yaasuka yati, “Mwemwe pingulini icilungame pa manso yakwe Leza, ukuyela mwemwe nanti Leza. 20Pano swemo tutangata kulanda pali vino twalola nu kuvwa.”
21Alino amwi Tengo yayofya nu kuyasoka, nga yayata yapita. Yatazanyile mulandu uwa kuyavunuka, pano antu yonsi yatasyanga Leza pali cino icacitike. 22Umuntu wino icinjelengwe cakupoziwa cacitikile wali ni myaka ukuluta makumi yani.
Alondezi yapepa kuti yaye aposye
23Lilyo kwene lino yasapulwa, Petulo na Yoane yaswilila kwi umba lya alondezi, yayalandila na vyonsi vino ya Simapepo akalamba na ikolo yayanenyile. 24#Kuf 20:11; Nee 9:6; Mas 146:6 Lino alondezi yacuvwa, yonsi yasanzika izwi, yapepa kuli Leza yati, “Mwene we muno waumvile iyulu, insi, na yemba na vyonsi ivyayamo, 25#Mas 2:1 kupitila muli Mupasi Wamuzilo watungulwile Davidi cikolwe citu, nupya muomvi wako avwanga ati,
‘Pacani Akulukuwa yuvwa cipyu?
Pacani cino antu yumana kapi mu walanganyi?
26Ya mwene ya nsi yaiteinye,
nga na yakateeka yakongana pali pamwi
kuti yalwisye Mwene Leza nga na Klistu wino wasolola.’
27 #
Mat 27:1; Mk 15:1; Luk 23:1, 7 Pano cumi Helodi na Pontio Pilato yakongine mu musumba pamwi na Akulukuwa nga na ina Izlaeli kuti yalwisye Yesu, umuomvi wako uwamuzilo, wino wasolwile. Yoa 18:28 28Yakongine kuti yacite vino wewe wemwisikulu wateyinye mpiti ku maka na mano yako, kuti vicitike. 29Na ndakai, Mwene, lola ingofyo zino yacisile, utuzumilizye swe aomvi yako, kuti tukosole ilandwe lyako nu kuposya konsi. 30Ololola ikasa lyako nu kupozya alwale, zumilizya kuti vizungusyo ni vinjelengwe vyacitika kupitila mwi zina lya muomvi wako Yesu uwamuzilo.” 31Lino yamala kupepa, ng'anda ino yakonganilemo itenta. Onsi yazuziwa na Mupasi Wamuzilo, alino yatandika kukosola ilandwe lyakwe Leza nu kuposya.
Vintu vya alondezi vyali vyakwe wensi munoyali
32 #
Mil 2:44
Iumba lya antu azumile lyali nu mwenzo onga ni lango lyonga. Kutali wakuti ati vintu vii ivyakwane nenga sile, lelo yonsi yankananga vintu vyao vyonsi. 33Lyene atumwa yatwalilila ukupeela umboni pamulandu wa kuzyukuka kwa Mwene Yesu, nga ni cikuku cakwe Leza cali panoyali onsi. 34Kutali nanti umwi uwa munoyali wino ulilwe cimwi. Pano yao akweti vyalo nanti mang'anda, yakazizye, alino yatoola ni mpiya zino zyafumile muli vino yakazizye 35yaleta nu kuzipela ku atumwa, nga nao yankanya kuli cila muntu kulingana nu kuulilwa.
36Alino Yosefu mwina Levi uwavyalilwe ku Kupulo, wino atumwa yatemile izina yati Banaba (Cikusenula ukuti, “Wino akacincizya.”) 37Nawe akazya calo cino wakweti, atoola ni mpiya azileta ku atumwa, nga ayapeela.
Ananiya na Safila
Currently Selected:
Milimo 4: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
