Milimo 2

1 # Levi 23:15; Malg 16:9 Lino wanda wa Pentekosti wafisile, alondezi ala yati yakongana pali pamwi pa cifulo conga. 2Mukupumikizya ciunda cikoline wa cipupu cikulu cuvwika kufuma kwiyulu, nga cilimba ng'anda yonsi muno yatenzi. 3Lyene yalola cimbilimbili ca moto ciputokele, cikuloleka wa lulimi, ciikala pali cila muntu. 4Alino yonsi yazuziwa na Mupasi Wamuzilo nga cila muntu atandika kuvwanga mu lulimi lwa cilendo kulingana na vino Mupasi wamupeela maka yakuvwanga.

5Mu Yelusalemu mwali Ayuda, yakapepa acindike Leza, yao afumile ku mpanga zyonsi zya muno nsi. 6Lino yuvwa congo, iumba likulu likongana nu kusamwa pano umuntu wensi uvwile ya kuvwanga mu lulimi lwakwe. 7Lyene yonsi yazunguka ciyapezya mano, yati, “Uzye antu yaa yonsi akuvwanga asi aina Galile? 8Uzye caya uli pakuti cila muntu munotuli auvwe yakuvwanga mu lulimi lwa kumwao? 9Yamwi munotuli yafuma ku Patiya, ku Medya, ku Elamu, ku Mesopotamya, ku Yudeya, nga nu ku Kapadokiya. Yamwi nao yafuma ku Ponto nu ku Asiya, 10ku Fulugiya nu ku Pamfuliya, nu ku Eguputo nga nu mu mpanga ya Libya pipi nu ku Kuleni. Yamwi munotuli aenyi afuma ku Loma, 11Ayuda nga na Akulukuwa yao asenukile ku mipepele ya Ciyuda. Yamwi munotuli aina Kulete nga na ina Alabya. Lelo swensi tukuvwa yakuvwanga mu ndimi zitu pamulandu ni vintu vikulu vino Leza wacita.” 12Onsi kwene yazunguka yapeziwa mano nga yauzyanya yati, “Uzye cii, cikusenula cani?”

13Yamwi nao yavwanga misowe misowe yati, “Antu ya, yatiyakoleka.”

Petulo wasambilizya antu

14Alino Petulo akatuka pamwi na atumwa ikumi na wenga. Lyene asanzika izwi avwanga kwi umba ati, “Mwe Ayuda yanji, na mwensi mwe muno mwikala mu Yelusalemu, uvwini kuno vino cii cikusenula. 15Antu yaa yatakolike wakwe vino mukutunganya. Ndakai a 9 koloko nupya kacili a katondo. 16Lelo cii cino mwalola acili cino kasema Yoeli wasemile lino wavwanzile ati,

Leza wavwanga wati,

17 # Yow 2:28 ‘Umu manda yampelelekezyo

ndapongolwela Mupasi wane pa antu onsi.

Ana inu aonsi na anaci yalasema,

ana inu alumendo yalalola vilolwa, na ikolo

yalalota viloto.

18Endi, na pa yaomvi yane kwene,

aonsi pali pamwi na anaci,

ndapongolwela Mupasi wane mu manda yao,

nga nao yalasema.

19Ndacita vinjelengwe mwiyulu

papela nga ni vilangililo pano pansi,

kulaya wazi, moto, ni cifutika ca cunsi.

20Ilanzi lilasanguka mfinzi,

nu mwezi nao ulayenza wa wazi,

lino uwanda ukulu wa lulumbi

uwa Mwene utacili ufike.

21Lyene alino wensi wino alaama pi

zina lya Mwene alatuulwa.’

22“Mwe ina Izlaeli, uvwini mazwi yaa. Yesu uwaku Nazaleti umuntu wino Leza watumile kuli mwemwe, walangililwe mu vinjelengwe, mu vizungusyo, nga nu mu vilangililo vino Leza wacisile kupitila munoli. Mumanyile vii vyonsi, ukuti ivya cumi pano vyacitike. 23#Mat 27:35; Mk 15:24; Luk 23:33; Yoa 19:18 Leza, ukulingana nu kulonda nga nu kumanya kwakwe, wasolwile mpiti kuti Yesu apelwe kunomuli, nga namwe mwamukomile apakuleka antu yankota yamutane pa lupanda. 24#Mat 28:5; Mk 16:6; Luk 24:5 Lelo Leza wamusapwile ku kuwaika kwa mfwa, wamuzyukwile kufuma ku afwe, pano imfwa yaposiwe kumucimvya. 25#Mas 16:8 Davidi wavwanzile pamulandu na aliwe ati,

‘Nalolanga Mwene pipi nani nsita zyonsi

pasi angansungutizya pano

wene ali kwi kasa lyane lilunji.

26Caleka mwenzo wane uli ni nsansa,

na mazwi yane aluzango

pano nanti angala nene mwina kufwa

lelo ndi nu upaalilo,

27pano we Mwene Leza utalansya ku Gehena,

nanti kuleka muomvi wako Wamuzilo aole mwi lindi.

28Wandanga inzila zyakuntwala ku umi,

nga nani ndazanga cuze lino wemo waya pipi nani.’

29“Inane, lekini munene paswe pamulandu wa cikolwe citu Davidi. Wene wafwile, azikwa, ni lindi lyakwe licilipo pakasi kitu ni lelo kwene. 30#2Sam 7:12; Mas 132:11 Wali akasema nupya wamanyile na cino Leza wamulavile. Leza walavile nu mulapo ukuti alimika umwi uwamu mupanda wakwe ukuya mwene, ndi vino Davidi wali.

31Davidi waweni calimwi cino Leza wali nu kucita, acino

wavwanzile pamulandu wa kuzyukuka kwakwe Klistu lino wavwanzile ati,

‘Leza atamutazyezile asyale kuzimo,

umwili wakwe utaozile mwi lindi.’

32Lelo Leza wazyukwile Yesu kufuma ku afwe, naswe sweswe yakambone ya vintu vii. 33Wene wakwela nu kwikala kwi kasa lilunji lyakwe Leza, nga wapokelile Mupasi Wamuzilo, kufuma kuli Isi, wakwe vino wamulavile. Na ndakai vii vino mukulola nu kuvwa, uwila wakwe Yesu uno watatuma panotuli. 34#Mas 110:1 Pano Davidi umwisikulu atakwezile kwiyulu, lelo wavwanzile ati,

‘Umwene wanenyile Umwene wane ati,

Ikala kwi kasa lyane lilunji

35kufika lino ndakucimvizya anisi yako yaye wa cilimba ca ngazo zyako!’

36“Caleka aina Izlaeli yonsi yalinzile kumanya ningo vino Yesu wii wino mwatanyile pa lupanda awino Leza watacita kuya Umwene na Klistu.” 37Lino antu yuvwa cii, yasakamala cuze, nga yavwanga kuli Petulo na atumwa yauze, yati, “Mwe ina itu uzye tumacita uli?” 38Petulo ayanena ati, “Zenzukini, cila muntu, muwatiziwe mwi zina lyakwe Yesu, pakuti maifyo inu yelelwe. Alino mulapokelela uwila uno Leza walaya. 39Pano ulayo uno Leza walavile uli pali mwemwe na pa ana inu, na pali yano yonsi ali kutali, yano Umwene Leza witu alaama kunoli.”

40Petulo ayasoka mu mazwi nayauze aingi nga nu kupapata ati, “Ituulini mweisikulu ku uvunuko uli nu kwiza pa antu aipe amu mukulo uu ukowele!” 41Lino aingi yuvwa ilandwe lyakwe, yalipokelela, nga yawatiziwa. Uwanda kwene ulya antu kulingana na mazimbi yatatu yailundanya kwi umba.

Mwata wa Ina Klistu Ankolelo

42Mu nsita zingi antu yakonkowizye kusambilila ku atumwa, nu kutoola imbali mu utandano nga nu mukumokoola umukate wa wina nga nu mu mapepo.

43Atumwa yacitanga vinjelengwe ni vizungusyo ivingi icakuti cileta ni ntete ku muntu wensi. 44#Mil 4:32 Lyene ataile yonsi yakonkowezya kuya pamwi mu utandano nu kwankanya vintu vino yakweti kuli cila muntu. 45Yakazyanga vyuma vyao nu kwankanya impiya kuli yonsi kulingana na vino cila muntu ulilwe. 46Uwanda nu wanda yakongananga ku kupepa mu Ng'anda ikulu yakwe Leza. Yalyanga apali pamwi mu mang'anda yao, ukulya cakulya ni myenzo ya luzango ifuke, 47ala yakulumbanya Leza, nu kutemwikwa na antu onsi. Na cila wanda Umwene walundangako kwi umba lyao antu nayauze yano atuulwangwa.

Petulo wapozya cite

Currently Selected:

Milimo 2: MamL13

Highlight

Copy