Mata 11

1 Chuir Eòin a dheisciobail a dh’ionnsaidh Chrìosd. 7 Fianais Chrìosd mu thimcheall Eòin. 18 Barail an t‑sluaigh mu thimcheall Eòin agus mu thimcheall Chrìosd. 20 Chronaich Crìosd muinntir Bhetsaida, etc. 28 A ghairm thròcaireach don t‑sluagh a tha fo throm uallach.

1Agus thàrladh, nuair a chrìochnaich Iosa a àitheantan a thabhairt da dhà‐dheisciobal‐deug, gun d’imich e as a sin a theagasg agus a shearmonachadh nam bailtean.

2A‑nis nuair a chuala Eòin anns a’ phrìosan#Lùc 7:18, etc. gnìomharan Chrìosd, chuir e dithis de a dheisciobail da ionnsaigh,

3Agus thubhairt e ris, An tusa an tì ud a bha ri teachd, no am bi sùil againn ri neach eile?

4Fhreagair Iosa agus thubhairt e riu, Imichibh agus innsibh do Eòin na nithean a tha sibh a’ cluinntinn agus a’ faicinn:

5Tha na doill a’ faotainn am fradhairc, agus na bacaich ag imeachd, tha na lobhair air an glanadh, agus na bodhair a’ cluinntinn, tha na mairbh air an dùsgadh, agus an soisgeul air a shearmonachadh do na bochdan.

6Agus is beannaichte an tì nach faigh oilbheum annamsa#Isa 8:14, 15; 1 Cor 1:22, 23; 1 Pead 2:8.

7Agus air imeachd dhaibhsan air falbh, thòisich Iosa air labhairt ris an t‑sluagh mu thimcheall Eòin, ag ràdh, Ciod e an nì a chaidh sibh a‑mach don fhàsach a dh’fhaicinn#Lùc 7:24‐30? An i cuilc air a crathadh le gaoith#Eph 4:14; Seum 1:6?

8Ach ciod e an nì a chaidh sibh a‑mach a dh’fhaicinn? An e duine air a sgeadachadh ann an aodach mìn? Feuch, a’ mhuinntir a chaitheas aodach mìn, is ann an taighean nan rìghrean a tha iad.

9Ach ciod e an nì a chaidh sibh a‑mach a dh’fhaicinn? An e fàidh? Seadh, tha mi ag ràdh ribh, agus nas mò na fàidh.

10Oir is e seo an tì mum bheil e sgrìobhte, Feuch#Isa 40:3; Mal 3:1; Lùc 1:76, cuiridh mise mo theachdaire rod ghnùis, a dh’ullaicheas do shlighe romhad.

11Gu deimhinn tha mi ag ràdh ribh, nam measg‐san a rugadh le mnathan, nach d’èirich neach as mò na Eòin Baistidh: gidheadh, an tì sin as lugha ann an rìoghachd nèimh, is mò e na esan.

12Agus o làithean Eòin Baistidh gus a‑nis, tha rìoghachd nèimh a’ fulang ainneirt#Lùc 16:16, agus luchd na h‑ainneirt ga glacadh le làmhachas‐làidir.

13Oir rinn na fàidhean uile agus an lagh fàidheadaireachd gu àm Eòin.

14Agus mas toigh leibh a ghabhail, is e seo Elias a bha ri teachd#Mat 17:12; Mal 4:5.

15Ge bè aig a bheil cluasan a‑chum èisdeachd#Tais 2:7, etc., èisdeadh e.

16Ach cò ris a shamhlaicheas mise an ginealach seo? Is cosmhail e ri cloinn a shuidheas anns a’ mhargadh, agus ag èigheach rin companaich,

17Agus ag ràdh, Rinn sinne pìobaireachd dhuibhse, ach cha do rinn sibhse dannsa: rinn sinne tuireadh dhuibhse, ach cha do rinn sibhse gul.

18Oir thàinig Eòin chan ann ag ithe no ag òl#Mat 3:4; Lùc 1:15, agus tha iad ag ràdh, Tha deamhan aige#Mat 10:25; Eòin 7:20.

19Thàinig Mac an Duine ag ithe agus ag òl#Mat 9:10; Eòin 2:2; 12:2, agus tha iad ag ràdh, Feuch, duine geòcach agus pòitear fìona, caraid chìs‐mhaor agus pheacach#Lùc 15:2; 19:7: ach tha gliocas air a fìreanachadh le a cloinn#Salm 92:5, 6; Gnà 17:24.

20An sin thòisich e air achmhasan a thabhairt do na bailtean anns am mò an do rinneadh de a obraichean cumhachdach, airson nach do rinn iad aithreachas.

21Is an‑aoibhinn dhut, a Chorasin; is an‑aoibhinn dhut, a Bhetsaida#Eòin 12:21: oir nan robh na h‑obraichean cumhachdach a rinneadh annaibhse air an dèanamh ann an Tìrus agus ann an Sìdon, is fada on a rinn iad aithreachas ann an sac‐aodach agus an luaithre.

22Ach tha mi ag ràdh ribh gum bi staid Thìruis agus Shìdoin nas so‑iomchaire ann an là a’ bhreitheanais#Lùc 10:13, etc. na bhios ur staid‐se.

23Agus thusa, a Chapernàum, a tha air do thogail suas gu nèamh#Isa 14:13‐15; Tuir 2:1, tilgear sìos gu ifrinn thu: oir nan robh na h‑obraichean cumhachdach a rinneadh annadsa air an dèanamh ann an Sòdom, dh’fhan e gun a sgrios gus an‑diugh.

24Ach tha mi ag ràdh ribh gur so‑iomchaire a bhios e do fhearann Shòdoim ann an là a’ bhreitheanais#Mat 11:22 na dhutsa.

25Anns an àm sin fhreagair Iosa agus thubhairt e#Lùc 10:21, etc., Tha mi a’ toirt buidheachais dhut, O Athair, a Thighearna nèimh agus na talmhainn, airson gun d’fhalaich thu na nithean seo o dhaoine eagnaidh agus tuigseach, agus gun d’fhoillsich thu iad do leanaban#Salm 8:2; Ier 1:7, 8; 1 Cor 1:27.

26Seadh, Athair, do bhrìgh gum b’ann mar sin a bha do dheagh thoil‐sa.

27Tha na h‑uile nithean air an tabhairt thairis dhòmhsa lem Athair#Mat 28:18; Lùc 10:22; Eòin 3:35; 17:2; 1 Cor 15:27: agus chan aithne do neach air bith am Mac, ach don Athair: cha mhò as aithne do neach air bith an t‑Athair, ach don Mhac#Eòin 1:18; 1 Eòin 5:20, agus do gach aon don àill leis a’ Mhac a fhoillseachadh.

28Thigibh am ionnsaigh‐sa, sibhse uile a tha ri saothair#Isa 55:1‐4, agus fo throm uallaich, agus bheir mise suaimhneas dhuibh.

29Gabhaibh mo chuing oirbh, agus fòghlamaibh uam#Philip 2:5‐8; 1 Pead 2:21, oir tha mise macanta agus iriosal ann an cridhe#Sech 9:9: agus gheibh sibh fois dur n‑anaman#Ier 6:16.

30Oir tha mo chuing‐sa so‑iomchair#1 Eòin 5:3, agus tha m’uallach aotrom.

Currently Selected:

Mata 11: ABIG

Highlight

Copy