Mark 15

Faŋ vɨ nə kɔ̀ Yeso tɨ́ goməna Pilate

(Matiu 27.1-2,11-26; Lukas 22.66–23.25; Jɔn 18.28–19.16)

1Fu kɨ lee ŋkee taa nshia-ndoo-mbisɨ, vɨɨ kwalə məfeꞌ Nwi nə vɨɨ taa fɨ taa ŋii Nwi nə vɨɨ mədeesə ŋwaꞌlə Nwi, ghɔ vɨ vɨɨ məshia nsɔꞌ vənshə, faynə shəŋ muꞌ, kà nu kɔ́, kɨ nii kà Yeso, gə̀ nə ŋwə, gə̀ kɔ̀ tɨ́ goməna Pilate maa nsɔꞌ. 2Goməna Pilate bitə tɨ́ Yeso laa, «A luu fwàŋ vɨɨ Jus mu?» Yeso bəŋsə tɨ́ ŋwə laa, «A gì ŋkee nu.» 3Vɨɨ kwalə məfeꞌ Nwi jwi gì vənu vəbwəvə tɔ Yeso vəyaŋ. 4Pilate baa kɨ bìtə tɨ̀ ŋwə laa, «A kee kɔ bəŋsə yimu? Zɔ faŋ vɨ gisə vənu vəyaŋ tɔ ghɔ.» 5Yeso kee baa bə̀ŋsə tuu nu kəmuꞌ me. Shuu Pilate yɔŋ.

6Yaa kɨ luu maa shi Pasa, goməna Pilate fuusə wuu ŋii mfiŋ muꞌ faŋ vɨɨ Jus bìtə tɨ́ ŋwə, ŋwə kɔ̀ tɨ́ vəŋ. 7Maa yighee yɔ́, nwaa vɨɨ nə luu shɔ taa ŋii mfiŋ faŋ vəŋ nə bùulə shɨ, zwì wə. Wə mɔ́ꞌ fɨ taa ŋwaa vɨɨ vɔ́ lùu Barabas. 8Nə luu sheꞌ maa yighee yɔ́ faŋ vɨ nə shìa nsɔꞌ tɔ Yeso nə, vɨɨ koꞌ jwì ye Pilate, gì tɨ́ ŋwə laa ŋwə yɨ sheꞌ faŋ ŋwə yaa kɨ teꞌsə yɨsə nə. 9Ŋwə bəŋsə tɨ́ vəŋ laa, «Viŋ kəə laa mə fuusə fwàŋ vɨɨ Jus, kɔ̀ tɨ́ viŋ mu?» 10Ŋwə nə bìtə nɨniŋ, buꞌ laa ŋwə nə kɔꞌ kɨɨ laa vɨɨ kwalə məfeꞌ Nwi ghɨꞌ Yeso ghɨghɨꞌ, buu kɔ ŋwə maa nsɔꞌ. 11Luu nə, vɨɨ kwalə məfeꞌ Nwi vɔ́ ŋwia yisɨ tɨ́ nwaa vɨɨ vɔ́ laa vəŋ bitə Barabas, meꞌtə Yeso. 12Pilate baa kɨ bìtə tɨ́ vəŋ laa, «Mə kɨ yɨ̀, kɔ̀ Barabas tɨ́ viŋ, buu mə yɨ̀ kə nə wə ŋwə̀ faŋ viŋ tii ŋwə nə fwàŋ vɨɨ Jus nə?» 13Vəŋ yumə, bə̀ŋsə laa vɨ bey ŋwə fuu fəŋkɔꞌ fə ŋkɨꞌsə. 14Pilate bitə tɨ́ vəŋ laa, «Ŋwə sii yɨ̀ kə bwə?» Vəŋ baa mètə kɨ yɨyumə laa vɨ bey ŋwə fuu fəŋkɔꞌ fə ŋkɨꞌsə. 15Goməna Pilate nəə kəə yɨ̀ nu ŋkɨə faŋ ŋkə taa baw tɨ́ vəŋ, fùusə Barabas, kɔ̀ tɨ́ vəŋ, sàŋ Yeso nə vəmfa, kɔ̀ ŋwə laa vɨ bey ŋwə fuu fəŋkɔꞌ fə ŋkɨꞌsə.

Faŋ vəsogeꞌ nə taw Yeso

(Matiu 27.27-31; 19.2-3)

16Vəsogeꞌ kɨ nii ndì Yeso, gə̀ nə ŋwə, ŋìi ntoꞌ goməna, faŋ vɨ nəə tii ntoꞌ yɔ́ nə Praytorion, tìi vəsogeꞌ vənshə fɨ taa ntoꞌ goməna. Vəŋ faynə, tey kɨ taw ŋwə, 17ndì njwi yibay, mɔ̀ꞌ maa ŋwə, bèe yisɔꞌ nyawsə laməŋkwi tɔ ŋwə, laa lùu yisɔꞌ vəfwàŋ, 18kɨ nii tey kɨ shɔꞌtə ŋwə laa, «Yia tuŋ nsəꞌ tɨ́ ghɔ, mɔɔ fwàŋ vɨɨ Jus,» 19sàŋ ŋwə fɨ tɔ ŋwə nə vəmfa, ndɔ̀ shèꞌ mənti maa ŋwə, jə̀ vətɔ vəyəə vəvəŋ nsi, lwìasə ŋwə. 20Faŋ vəŋ bwàsə tàw ŋwə, ndɔ̀ shòꞌ njwi yibay yɔ́ fɨ maa ŋwə, baa kɨ nii mɔ̀ꞌ ŋkee nsii njwisə maa ŋwə, ndì ŋwə, fùu, gə̀ nə ŋwə maa məbey ŋwə fuu fəŋkɔꞌ fə ŋkɨꞌsə.

Faŋ vɨ nə bey Yeso fuu fəŋkɔꞌ fə ŋkɨꞌsə

(Matiu 27.32-44; Lukas 23.26-43; Jɔn 19.16-27)

21Faŋ vəŋ nəə gə nə Yeso nɨniŋ nə, wə mɔ́ꞌ jwi shɔ̀ɔ vəŋ, kɨ kuunə fɨ taa biisə. Yizii wə ghɔ́ luu Saymon. Ŋwə nə luu wuu Kirene, tɨɨ Alesanda nə Rufɔs. Vəsogeꞌ vɔ́ jia ŋwə laa ŋwə biꞌ fəŋkɔꞌ fə ŋkɨꞌsə fə Yeso. 22Vəŋ gə nə Yeso, gə̀ zìꞌ shəŋ ŋkɨə faŋ vɨ tii nə Golgota, faŋ ŋiꞌ yizii kɔ́ lùu laa «Shəŋ ghutə tɔ wə». 23Vəŋ ziꞌ shɔ, vɨ kɔ məluꞌ tɨ́ Yeso faŋ vɨ wàsə fɔ taa tey yi. Ŋwə kee bee nu me. 24Vəŋ bey ŋwə fuu fəŋkɔꞌ fə ŋkɨꞌsə, gàatə njwi si vəŋ vəŋ, tùŋ beꞌ shɔ laa vɨ ye njyə faŋ wə taa tuŋ zɨ ndì.

25Nə luu maa yighee njyə faŋ shɨshwi tɔŋ bee, faŋ vɨ bèy Yeso. 26Ŋwaꞌlə nsɔꞌ yi faŋ vɨ nə nyɔ̀ꞌ fuu fəŋkɔꞌ fə ŋkɨꞌsə fi nə luu laa «Fwàŋ vɨɨ Jus.» 27Vɨ nə baa bèy vəndɔꞌ vəmɔ́ꞌ vəbɔɔ, wuu mɔ́ꞌ maa kwiŋ maꞌ Yeso, wuu mɔ́ꞌ maa kwiŋ ŋkwii. [ 28Nu kɔ́ fàynə maa nu ŋkɨə faŋ ŋkə lùu taa ŋwaꞌlə Nwi laa, «Vɨ nùŋsə ŋwə taa ŋwaa vəyɨ-kəbwə.» #Aysaya 53.12.] 29Vɨɨ mbɨə faŋ vəŋ nə shɔ̀ɔ fɨ yifi, ndasə ŋwə, nə̀ꞌsə tɔ vəŋ, tàw ŋwə, gisə laa, «Aŋ ghɔ, faŋ a gì laa kaꞌ a sɔ̀ꞌ ŋii Nwi yikwalə, baa bɔ̀ŋ maa vəshi vətia, 30bweysə ŋwaa wə, sìꞌ fɨ fuu fəŋkɔꞌ fə ŋkɨꞌsə fə̀!» 31Vɨɨ kwalə məfeꞌ Nwi ghɔ vɨ vɨɨ mədeesə ŋwaꞌlə Nwi shɨꞌ ŋwə nɨzi, gisə vəŋ vəŋ laa, «Ŋwə nəə bweysə vɨɨ day, kee kɨɨ bweysə ŋwaa wi me. 32Bàw wə ntɨə faŋ ŋwə gì laa yi lùu wuu məbweysə ŋwaa-nsiŋ, fwàŋ vɨɨ Isirayl, siꞌ fɨ fuu fəŋkɔꞌ fə ŋkɨꞌsə ndwə, tɨ́ kaꞌ nsiŋ yè, ndɔ̀ bìŋ ŋwə.» Ŋkee vɨɨ mbɨə faŋ vɨ nii bèy ŋwə ghɔ vɨ vəŋ mɔ́ꞌ nə, ndasə ŋwə nɨzi.

Faŋ Yeso nə kù

(Matiu 27.45-56; Lukas 23.44-49; Jɔn 19.28-30)

33Kɨ lùu maa yizɔ buꞌtə, fu fəŋ yaa mfiŋsə vətuꞌ vəshəŋ vənshə, gə ziꞌ maa vəshɨshwi vətia. 34Kɨ lùu maa vəshɨshwi vətia, Yeso yumə nəŋay laa, «Eloi, eloi, lama sabatani.» Ŋiꞌ yigi yɔ́ lùu laa, «Nwi ŋwaa, Nwi ŋwaa, a sii mèꞌtə mə buꞌ kə?» #Sam 22.2. 35Vɨɨ mɔ́ꞌ faŋ vəŋ nə tɨ̀ŋnə yifi, zɔ, gì laa, «Viŋ zɔ! Ŋwə tii Elias.» 36Wə mɔ́ꞌ nyɨŋ gə̀ kwaŋ kushaa taa kəŋ məluꞌ məshəsə, mbə ŋii, ŋwə sɔ tɔ fəntɨ, jwì kɔ̀ tɨ́ Yeso laa ŋwə nyɔŋ, ndɔ̀ gì laa vɨ naꞌ, nsiŋ taa ye faŋ Elias taa jwi suꞌsə ŋwə nsi. 37Yeso baa yùmə nəŋay, kɨ nii yishɨnə. 38Ŋwə ku nɨniŋ, sheꞌ yighee muꞌ, ŋkee njwi yikwalə njyə faŋ vɨ nə shianə shəŋ ley Nwi fɨ ghɔ shəŋ məduꞌ vɨɨ taa ŋii Nwi yikwalə, seenə vəway vəbɔɔ, shu fɨ tɔ yi, kɔ ŋiꞌ yi. 39Tɨɨ vəsogeꞌ faŋ ŋwə nə tɨ̀ŋnə vɨsɨ Yeso, ye faŋ ŋwə kù, ŋwə gi laa, «Yinsəŋ, wə ŋwə̀ lùu Wee Nwi.»

40Vəki vəmɔ́ꞌ nə luu shɔ nɨzi, tɨ̀ŋ ntaŋ, kɨ ye. Vəki vəmɔ́ꞌ fɨ taa ŋwaa vəŋ nə luu Meri Madalin, nə Salomi, nə Meri nshu Jeyms bwa ghɔ Josef. 41Luu vəŋ faŋ vəŋ nəə toꞌ ghɔ vɨ Yeso yighee njyə faŋ ŋwə nə luu shɨ Galilii, faꞌ tɨ́ ŋwə. Vəki vəmɔ́ꞌ vəyaŋ nə luu shɔ nɨzi, faŋ Yeso ghɔ vɨ vəŋ nə koꞌ jwì ntɨꞌ Jerusalem mɔ́ꞌ.

Faŋ Josef, wuu Arimatia, nə tə̀ə Yeso

(Matiu 27.57-61; Lukas 23.50-56; Jɔn 19.38-42)

42Kɨ lùu laynəfu shi kɔ́, faŋ nə luu shi məlootə ŋii. Shi kɔ́ nə luu shi faŋ fu taa lee kɨ nii lùu shi zwisə Nwi. 43Josef, wuu Arimatia, ka fwi, gə̀ yè goməna Pilate, ndwàŋ ŋku Yeso. Josef ghɔ́ nə luu fɨ taa nwaa vɨɨ məshia nsɔꞌ. Vɨɨ nəə gwenə ŋwə. Nshɨ-tɔ wi nəə kɨkɨꞌ nu yifwàŋ Nwi. 44Ŋwə ndwaŋ ŋku Yeso, shuu Pilate yɔŋ laa Yeso duꞌtə ŋwə kɔ yiku mu? Ŋwə tii tɨɨ vəsogeꞌ, bìtə tɨ́ ŋwə laa Yeso duꞌtə ŋwə ku mu? 45Faŋ ŋwə zɔ̀ fɨ ghɔ tɨɨ vəsogeꞌ ghɔ́ laa Yeso duꞌtə ŋwə ku, ŋwə biŋ tɨ́ Josef laa ŋwə gə ndì ŋku Yeso. 46Josef gə ywàŋ njwi yifusə, shɔ̀ɔ gə̀ sùꞌsə ŋku Yeso fɨ fuu fəŋkɔꞌ fə ŋkɨꞌsə, kà taa njwi yifusə yɔ́, kwàŋ taa swi faŋ nə luu ŋoꞌ faŋ vɨ nə tàw, ndɔ̀ bɨ̀ŋsə ŋoꞌ, nùŋ shuu yi. 47Meri Madalin nə Meri nshu Joses [Josef] nə yè shəŋ ŋkɨə faŋ vɨ nə nùŋsə Yeso shɔ.

Currently Selected:

Mark 15: bav

Highlight

Copy