Mark 16

Faŋ Yeso nə ywèy fɨ shɨ yiku

(Matiu 28.1-8; Lukas 24.1-12; Jɔn 20.1-10)

1Fu lee Meri Madalin nə Salomi, baa nə Meri nshu Jeyms nə kəə gə zwisə ŋku Yeso nə məŋgwə, kee kìi jɨɨ maa məywaŋ məŋgwə me, buꞌ laa nə luu shi zwisə Nwi. Kɨ luu vətuꞌ, vəŋ gə ywàŋ məŋgwə mə lamenda, tɨ́ kɨ kaꞌ vəŋ gə wìŋsə ŋku Yeso shɔ.

2Fu kɨ lee, ŋkee taa nshia-ndoo-mbisɨ, faŋ nə luu shi vɨsɨ fɨ maa yiwiŋ, vəŋ gə shəŋ swi Yeso, 3toꞌ gisə laa, «Sii taa bɨŋsə ndə bɨŋsə ŋoꞌ tɨ́ nsoo fɨ shuu swi?» 4Vəŋ kɨ shaꞌsə tɔ vəŋ, ndeynə, ye laa vɨ nə duꞌtə vɨ bɨŋsə ŋoꞌ yɔ́ fɨ shuu swi yɔ́, tɨ́ nyə nə luu ŋkee yikwalə. 5Vəŋ ŋii taa swi yɔ́, yè wəndɔŋ shɔ faŋ ŋwə nə dùꞌ maa kwiŋ maꞌnə, nə njwisə fusə maa ŋwə. Shuu vəŋ yɔŋ. 6Wə ghɔ́ gi tɨ́ vəŋ laa, «Kɨ viŋ baa fee me. Maa viŋ kəə Yeso, wuu Nazaret, faŋ vɨ nə bèy ŋwə fuu fəŋkɔꞌ fə ŋkɨꞌsə nə. Ŋwə kee baa lùu feenə me. Ŋwə ywèy. Ye shəŋ ŋkɨə faŋ vɨ yaa nùŋsə ŋwə shɔ nə. 7Baw viŋ gə naysə tɨ́ vɨɨ məzwetə nu ki nə Pita laa Yeso ndɔ gə vɨsɨ shɨ Galilii. Viŋ taa gə ye ŋwə yifi, yuu ŋwə nə nàysə tɨ́ viŋ nə.» 8Vəŋ fuu fɨ taa swi yɔ́, nyɨ̀ŋkə, kɨ laꞌ, ndɔ fèe ŋkee dɨdɨꞌ. Vəŋ kee bee nàysə tɨ́ wə me, buꞌ laa vəŋ nəə fɨfee. #16.8 Vəŋwaꞌlə və Nwi vəmɔ́ꞌ kee kii vəkuŋtə 9 gə ziꞌ 20 me.

Faŋ Yeso nə fùu yikəꞌ Meri Madalin

(Matiu 28.9-10; Jɔn 20.11-18)

9[Nə luu maa mfɔŋ shi fɨ taa yiwiŋ, ŋkee taa nshia-ndoo-mbisɨ, faŋ Yeso nə ywèy fɨ shɨ yiku. Ŋwə kɨ nii fùu yikəꞌ Meri Madalin vɨsɨ. Lùu ŋwə faŋ Yeso nə fùusə vəzwitə vəbwəvə kwatia fɨ maa ŋwə. 10Meri Madalin kɨ nii ndɔ̀ gə̀ nàysə tɨ́ vɨɨ mbɨə faŋ ghɔ vɨ Yeso nəə duꞌ mɔ́ꞌ nə. Ŋwə ziꞌ yɨ vəŋ, ye vəŋ nə mənsɨ sɨ vəŋ, faŋ vəŋ gwia. Ŋwə naysə tɨ́ vəŋ laa yi yè Yeso. 11Faŋ vəŋ nə zɔ̀ nɨniŋ, laa Yeso ywèy kɨ toꞌ, baa nə laa Meri Madalin nii ye ŋwə, vəŋ kee biŋ me.

Faŋ Yeso nə fùu yikəꞌ vɨɨ məzwetə nu ki vəbɔɔ

(Lukas 24.13-35)

12Yiŋkii kɨ shɔɔ, Yeso baa fùu yikəꞌ vəŋ vəbɔɔ maa ŋkɨꞌnə yiday, yighee faŋ vəŋ nəə tɨtoꞌ fɨ taa məndɨɨ. 13Vəŋ bəŋ gə̀ nàysə tɨ́ vəliŋ vəvəŋ, vəliŋ vəvəŋ kee biŋ nu ŋkɨə faŋ vəŋ naysə nə me.

Faŋ Yeso nə fùu yikəꞌ vɨɨ məzwetə nu ki njɔ-yimuꞌ

(Matiu 28.16-20; Lukas 24.36-49; Jɔn 20.19-23; Akts 1.6-8)

14Kɨ lùu fɨ yiba, ŋwə baa kɨ fùu yikəꞌ vɨɨ məzwetə nu ki njɔ-yimuꞌ nə, faŋ vəŋ nə duꞌ kɨ zɨ. Ŋwə shə tɨ́ vəŋ buꞌ laa fwisə vəŋ nə luu səshii, faŋ vəŋ nə kee biŋ nu ŋkɨə faŋ vɨ mfɔŋ nàysə tɨ́ vəŋ nə me, laa Yeso ywèy, vɨ ye ŋwə. 15Ŋwə kɨ nii nàysə tɨ́ vəŋ laa, «Viŋ ndɔ, gə̀ taa mbi yinshə, kɨ toꞌ fɨꞌtə ntɔŋ yijəə Nwi tɨ́ vɨɨ vənshə fɨ taa mbi. 16Wə ntɨə faŋ ŋwə taa biŋ ntɔŋ yɔ́, fì muu mə Nwi, buu ŋwə ndɔ zɨ məbwey vəlwaŋ. Wə ntɨə faŋ ŋwə kee yibiŋ me, ndɔ ŋii taa nsɔꞌ Nwi. 17Vəshwenə ndɔ luu shɔ ghɔ vɨɨ mbɨə faŋ vəŋ bìŋ ntɔŋ yɔ́. Vəshwenə vɔ́ luu laa vəŋ ndɔ kɨ fuusə vəzwitə vəbwəvə fɨ maa vɨɨ maa yizii nyaa, gisə təghaŋ təfinə, 18jia zɔsə nə ghɔ, nsə kee yɨ̀ nu maa vəŋ me. Kɨ ghaŋ wə fɨ vəŋ zɨ ndɨꞌ, ŋwə kee bee yɨ̀ nu me. Vəŋ kɨ mɔꞌ ghɔ vəŋ maa vɨɨ vəza, vəza vɔ́ kɨ bwaŋnə.»

Faŋ Yeso nə kòꞌ gə̀ taa yizɔ

(Lukas 24.50-53; Akts 1.9-11)

19Faŋ tɨta Yeso nə gì yigi yɔ́ tɨ́ vəŋ metə, Nwi yɨsə ŋwə koꞌ gə̀ taa yizɔ, gə̀ dùꞌnə maa kwiŋ maꞌnə Nwi. 20Vɨɨ məzwetə nu ki kɨ nii ndɔ̀, kɨ toꞌ fɨꞌtə nu Nwi maa vəshəŋ vənshə. Tɨta Yeso gaŋtə vəŋ shɔ, yɨsə yigisə vəŋ fuu nə wutə faŋ ŋwə nə kɔ̀ vəshwenə vɔ́ tɨ́ vəŋ.]

Currently Selected:

Mark 16: bav

Highlight

Copy