Mark 14

Faŋ vɨ nə kà yighaw tɔ Yeso

(Matiu 26.1-5; Lukas 22.1-2; Jɔn 11.45-53)

1Nə goꞌ sheꞌ vəshi vəbɔɔ, kɔ tɨ́ shi kwalə vɨɨ Jus, faŋ vɨ tii nə Pasa, baa nə vəshi məkwə ba faŋ vɨ kee kwàŋ fənsɨŋ taa tey yi me. Nə lùu maa yighee yɔ́ vɨɨ kwalə məfeꞌ Nwi nə vɨɨ mədeesə ŋwaꞌlə Nwi nəə kəə jɨɨ maa məshɔɔ fɨ fuŋ, jia Yeso fɨ taa mənay, zwi ŋwə. 2Nɨniŋ, vəŋ nəə gisə laa, «Kɨ nsiŋ yɨ nu kɔ́ faŋ vɨ zɨ vəshi vəkwalə vɔ́ me, buꞌ vɨɨ taa buulə shɨ.»

Faŋ wəzwi mɔ́ꞌ nə tùtə məŋgwə məluŋsə tɔ Yeso

(Matiu 26.6-13; Jɔn 12.1-8)

3Nə luu maa yighee yɔ́, Yeso gə duꞌ taa ŋii Saymon, wuu zatə bwə wì, ntɨꞌ Betani, kɨ zɨ fazɨ. Faŋ ŋwə nə luu yifi, wəzwi mɔ́ꞌ jwi nə kəŋ ŋkwiŋ yimɔ́ꞌ nee, faŋ vɨ tii nə alabasta, nə kəŋ məŋgwə məluŋsə jəə taa tey yi faŋ vɨ tii nə nardo, ŋkee mbə shwaŋ ndɔŋnə, jwì ŋàꞌsə ŋkwiŋ yɔ́, tùtə məŋgwə mbɔ́ tɔ Yeso. 4Vɨɨ mɔ́ꞌ ye, fwisə vəŋ bɨ. Vəŋ gi vəŋ vəŋ laa, «Vɨ sii bɨ̀sə məŋgwə mbə̀ tɨ́ kə? 5Nə kɨ kaꞌ vɨ fìŋ məŋgwə mbɔ́ yaa ŋkaŋsə muu-ntɔfə shɔ̀ɔ, yuu kɔ ka ghɔ́ tɨ́ mbəəsə.» Vəŋ shə tɨ́ wəzwi ghɔ́. 6Yeso zɔ, gì laa, «Viŋ meꞌtə ŋwə! Viŋ sii ghaysə ŋwə buꞌ kə? Ŋwə yɨ̀ ŋkee nu jəə shee. 7Maa viŋ vɨ mbəəsə lùu ghee nshə. Yighee njyə faŋ viŋ kəə yɨ̀ nu jəə maa mbəəsə, kaꞌ viŋ yɨ̀sə. Gə fɨ maa mə, nsiŋ kee taa baa luu mɔ́ꞌ ghee nshə me. 8Wəzwi ŋwə̀ yɨ̀ nu ŋkɨə faŋ kɨ kaꞌ ŋwə yɨ̀. Ŋwə zwìsə mə nə məŋgwə buu vɨ taa təə mə. 9Mə gì tɨ́ viŋ yinsəŋ laa, shəŋ tɨ̀ me shəŋ faŋ vɨ ndɔ kɨ fɨꞌtə ntɔŋ yijəə Nwi mbi, vɨ ndɔ fɨꞌtə nu ŋkɨə faŋ ŋwə yɨ̀sə nə nɨzi. Vɨ ndɔ lumə ŋwə tɨ́ nee.»

Faŋ Judas Iskariot nə fìŋ Yeso

(Matiu 26.14-16; Lukas 22.3-6)

10Judas Iskariot, faŋ nə luu fɨ maa vɨɨ məzwetə nu Yeso njɔsə-bɔɔ nə, kɨ nii ndɔ̀ gə̀ yè vɨɨ kwalə məfeꞌ Nwi maa məfiŋ Yeso tɨ́ vəŋ. 11Vɨɨ kwalə məfeꞌ Nwi vɔ́ zɔ, ŋàytə, kɔ̀ꞌnə maa məkɔ ka tɨ́ ŋwə. Ŋwə kɨ nii kə̀ə jɨɨ faŋ nyə kùꞌnə yuu shɔ̀ɔ fuŋ, fìŋ Yeso.

Faŋ Yeso nə zɨ̀ Pasa ghɔ vɨ vɨɨ məzwetə nu ki

(Matiu 26.17-25; Lukas 22.7-14,21-23; Jɔn 13.21-30)

12Kɨ lùu maa shi vɨsɨ fɨ maa vəshi mbɨə faŋ vɨ yaa kɨ zɨ bee faŋ vɨ kee kwàŋ fənsɨŋ taa tey yi me. Nə luu shi ŋkɨə faŋ vɨ yaa kɨ sɨɨ bi-njɨɨ Pasa maa məlumə yighee njyə faŋ vɨɨ Isirayl nə fùu fɨ shɨ Ijip. Maa yighee yɔ́ vɨɨ məzwetə nu Yeso jwi, bìtə tɨ́ ŋwə laa, «A kəə laa yia gə fə, gə̀ lòotə maa məzɨ Pasa?» 13Yeso tɔŋ fɨ maa vɨɨ məzwetə nu ki vəbɔɔ, nàysə tɨ́ vəŋ laa, «Viŋ gə taa shɨ. Viŋ vɨ wəndɔŋ mɔ́ꞌ faŋ ŋwə shàꞌ ŋkwiŋ muu taa faynə. Viŋ beꞌsə wə ghɔ́! 14Shəŋ ŋkɨə faŋ ŋwə taa ŋii shɔ, viŋ gə gì tɨ́ tɨɨ fu ghɔ́ laa, tɨta wiŋ gì laa, njɨɨ ŋii vəkuusə yi faŋ yi taa zɨ Pasa shɔ ghɔ vɨ vɨɨ məzwetə nu ki bə? 15Tɨɨ fu ghɔ́ taa də njɨɨ ŋii yikwalə tɨ́ viŋ, tɨ́ vɨ nuŋsə vətɔ vənshə taa tey yi. Yifi viŋ kɨ lootə fazɨ kɔ́ tɨ́ nsiŋ.» 16Vɨɨ vɔ́ vəbɔɔ zɔ, ndɔ̀ fɨ nsi, gə̀ taa shɨ, ye sheꞌ faŋ ŋwə nii nàysə tɨ́ vəŋ nə. Vəŋ kɨ nii ŋii, lòotə fazɨ Pasa.

17Kɨ lùu laynəfu, Yeso jwi shɔ ghɔ vɨ vɨɨ məzwetə nu ki njɔsə-bɔɔ nə. 18Vəŋ duꞌnə nsi, kɨ zɨ. Faŋ vəŋ nə dùꞌ, kɨ zɨ, Yeso gi laa, «Viŋ zɔ! Mə gì tɨ́ viŋ yinsəŋ laa wə mɔ́ꞌ fɨ taa ŋwaa viŋ taa fiŋ mə, wə mɔ́ꞌ faŋ nsiŋ vɨ vəŋ zɨ mɔ́ꞌ.» 19Vəŋ tey kɨ luŋ, gisə tɨ́ ŋwə wə nə muꞌ nə muꞌ laa, «Nə kee lùu mə yimu?» 20Ŋwə gi tɨ́ vəŋ laa, «Lùu wə muꞌ fɨ taa ŋwaa viŋ njɔsə-bɔɔ. Lùu wə ntɨə faŋ yia ŋwə shu bee taa kay kəmuꞌ. 21Viŋ kɔꞌ kɨɨ laa, Wuu yinsəŋ Nwi taa ghaa gə ndì, yuu vɨ nə nyɔ̀ꞌ taa ŋwaꞌlə Nwi kɔ̀ŋ ŋwə. Luu nə, wə ntɨə faŋ ŋwə ndɔ fiŋ Wuu yinsəŋ Nwi ghɔ́, ndɔ ye ŋɨꞌ yiyaŋ. Ŋkə nə bàw tɨ́ wə ghɔ́ laa kɨ vɨ bi ŋwə me.»

Faŋ Yeso nə tə̀ nu fazɨ Mbɔŋ

(Matiu 26.26-29; Lukas 22.15-20; 1 Kɔrintian 11.23-25)

22Nə luu maa yighee yɔ́, faŋ vəŋ nə duꞌ kɨ zɨ nə, Yeso ndi bee, bə̀ŋsə Nwi shɔ, bɨꞌ, kɔ̀ tɨ́ vəŋ, gì laa, «Kɔ̀, lùu ŋwaa ŋwaa.» 23Ŋwə baa ndì ndaw, kɔ bwaŋ-wee tɨ́ Nwi, ndɔ̀ kɔ̀ tɨ́ vəŋ, vəŋ vənshə nu fɨ tey yi. 24Ŋwə gi tɨ́ vəŋ laa, «Lùu mənshi maa faŋ mə taa tutə tɔ vɨɨ vəyaŋ. Mə ndɔ ku tɔ vəŋ, tɨ́ kɨ kaꞌ vəŋ gwia məkee məfimə ghɔ vɨ Nwi. 25Viŋ zɔ! Mə gì tɨ́ viŋ yinsəŋ laa, mə kee ndɔ baa nu məluꞌ me, ziꞌ tɨ́ shi ŋkɨə faŋ nu yifwàŋ Nwi ndɔ jwi. Mə ndɔ baa kii nu sheꞌ maa yighee yɔ́.»

Faŋ Yeso nə nàysə tɨ́ vɨɨ məzwetə nu ki laa vəŋ ndɔ suꞌtə ghuu vəŋ fɨ yiba jɨŋ yi

(Matiu 26.30-35; Lukas 22.31-34; Jɔn 13.36-38)

26Yeso ghɔ vɨ vɨɨ məzwetə nu ki kɨ nii zwà nyay məbəŋsə Nwi, ndɔ̀ fùu fu, gə̀ fuu baŋ Vətɨ-və-Məŋgwə. 27Vəŋ ziꞌ yifi, Yeso gi tɨ́ vəŋ laa, «Viŋ vənshə taa suꞌtə ghuu ghiŋ fɨ yiba mə, yuu vɨ nə nyɔ̀ꞌ taa ŋwaꞌlə Nwi laa, Nwi ndɔ zwi wuu məshii bisə, bisə saykə. #Zakaraya 13.7. 28Luu nə, yighee njyə faŋ Nwi ndɔ yweysə mə fɨ shɨ yiku, mə gə shɨ Galilii. Bàw viŋ taa beꞌsə mə yifi!» 29Pita zɔ, gì laa, «Vəŋ kɔlə taa suꞌtə ghuu vəŋ vənshə, mə kee sùꞌtə me.» 30Yeso gi tɨ́ ŋwə laa, «Mə gì tɨ́ ghɔ yinsəŋ laa, sheꞌ vətuꞌ ndee, ŋkɨꞌ taa kee taw ghee bɔɔ me, a twey mə ghee tia.» 31Ŋwə baa kii gi nəŋay laa, «Nsoo kɔlə taa kukə mɔ́ꞌ, mə kee bee twèy ghɔ me.» Vəŋ vənshə gi sheꞌ nɨniŋ.

Faŋ Yeso nə gə shɔ̀ꞌtə Nwi maa shəŋ Gesemani

(Matiu 26.36-46; Lukas 22.39-46)

32Yeso ghɔ vɨ vɨɨ məzwetə nu ki kɨ nii gə̀ shəŋ mɔ́ꞌ faŋ vɨ tii nə Gesemani. Vəŋ gə zìꞌ shɔ, ŋwə gi tɨ́ vəŋ laa, «Viŋ duꞌ feenə, naꞌ, mə gə shɔ̀ꞌtə Nwi.» 33Ŋwə gi nɨniŋ, ndì Pita nə Jeyms baa nə Jɔn, ghɔ vɨ vəŋ gə. Vəŋ gə nɨniŋ, fwi yi tey kɨ laꞌ, ŋwə fee, 34gì tɨ́ vəŋ laa, «Mə kìi məluŋ taa fwi mə yaŋ, tɨ́ kɨ kaꞌ ŋwə zwì mə. Viŋ duꞌ feenə, kɨ kɨꞌ mə!» 35Ŋwə shəŋtə gə vɨsɨ tɨtiꞌ, nɔ̀ŋ nsi, bùꞌ ghɔ tɨ́ Nwi laa, kɨ ghaŋ jɨɨ yiday luu shɔ, Nwi yɨ̀sə yighee ŋɨꞌ yì shɔ̀ɔ fɨ maa yi. 36Ŋwə nə gì laa lee, «Tii ŋwaa, a kìi wutə maa məyɨ vənu vənshə. Baꞌsə ndaw ŋɨꞌ fɨ maa mə! Luu nə, kɨ ghɔ yɨ nu faŋ kàw mə me, yɨ sheꞌ ŋkɨə faŋ kàw ghɔ!»

37Ŋwə bəŋ jwì, ye vəŋ nə bɨbwey. Ŋwə gi tɨ́ Pita laa, «Saymon, a bɨbwey mu? Nə kaꞌ a kee dùꞌ, kee kɨ bwey me, tày yaa ləə kəmuꞌ yimu? 38Viŋ shi nə yikɨꞌ, kɨ shɔꞌtə Nwi laa kɨ viŋ ŋii məmɔŋ maa məyɨ nu bwə me! Maa fwi siŋ biŋ; bəə yiŋwaa yiŋ bə̀ə ŋay.» 39Ŋwə baa kii gə shɔꞌtə Nwi, baa kɨ gi sheꞌ faŋ ŋwə nii gì nə, 40bəŋ jwì, ye vəŋ sheꞌ mbweysə, buꞌ laa sɨ vəŋ nəə kɨ bii nə mbweysə. Vəŋ kee kɨ̀ɨ nə nu, bə̀ŋsə tɨ́ ŋwə me. 41Ŋwə gə bə̀ŋ jwì lwesə ghee tia, gi tɨ́ vəŋ laa, «Viŋ kɨ bii bwey, shəŋ ŋwaa wiŋ mu? - Ŋkə kùꞌ; yighee kùꞌnə faŋ vɨ fìŋ mə, kɔ̀ mə ghɔ vɨɨ bwənə. 42Viŋ ndɔ, nsiŋ kɨ gə! Viŋ ye! Wə ntɨə faŋ ŋwə fìŋ mə, lùu nshənə.»

Faŋ vɨ nə jìa Yeso

(Matiu 26.47-56; Lukas 22.47-53; Jɔn 18.3-12)

43Sheꞌ faŋ Yeso nəə kɨ bii gisə, Judas, faŋ nə luu wə fɨ taa ŋwaa vɨɨ məzwetə nu Yeso njɔsə-bɔɔ nə, jwi ghɔ vɨ nwaa vɨɨ nə vəbaꞌ nə mbaysə. Vəŋ nə ndɔ̀ fɨ ghɔ vɨɨ kwalə məfeꞌ Nwi nə vɨɨ mədeesə ŋwaꞌlə Nwi nə vɨɨ taa fɨ taa ŋii Nwi, 44tɨ́ wuu məfiŋ Yeso nə naysə shwenə tɨ́ vəŋ laa wə ntɨə faŋ yi taa gə shɔ̀ꞌtə ŋwə, nyɔ̀ŋ fəə ghi, buu lùu Yeso. Nɨniŋ laa vəŋ jia ŋwə, gə̀ nə ŋwə fɨ taa yitɔfə. 45Ŋwə ziꞌ yifi, yasə gə̀ yɨ Yeso, gì laa, «Tɨta ŋwaa», kɨ nii nyɔ̀ŋ fəə ghi. 46Vɨɨ vɔ́ kɨ nii jìa Yeso. 47Wə mɔ́ꞌ fɨ taa ŋwaa vɨɨ mbɨə faŋ vəŋ nə tɨŋnə yifi, shoꞌ baꞌ yighaw ki, shìa tuulə buꞌ wuu kwalə məfeꞌ Nwi. 48Yeso gi tɨ́ vɨɨ vɔ́ laa, «Viŋ jwì nə vəbaꞌ nə mbaysə, jwi jia mə, yaa viŋ jwi jia ndɔꞌ lee? 49Vəshi vəshi nsiŋ nə lùu taa ŋii Nwi yikwalə mɔ́ꞌ, mə deesə shɔ, viŋ kee jìa mə me. Luu nə, ŋkə gày nɨniŋ laa nu ŋkɨə faŋ vɨ nə nyɔ̀ꞌ taa ŋwaꞌlə Nwi faynə.» 50Vɨɨ vɔ́ kɨ nii gə̀ nə ŋwə. Vɨɨ məzwetə nu ki meꞌtə ŋwə, nyɨ̀ŋkə vənshə. 51Wuu zawə mɔ́ꞌ beꞌsə Yeso sheꞌ nə njwi yindiŋ maa ŋwə. Vɨɨ vɔ́ jia ŋwə, 52ŋwə shoꞌtə fɨ maa njwi yi yɔ́, nyɨŋ sheꞌ nə ntɨŋ, gə̀.

Faŋ vɨ nə shìa nsɔꞌ tɔ Yeso

(Matiu 26.57-68; Lukas 22.54-55,63-71; Jɔn 18.12-14,19-24)

53Vɨɨ vɔ́ gə kɔ̀ Yeso tɨ́ wuu kwalə məfeꞌ Nwi. Vɨɨ kwalə məfeꞌ Nwi nə vɨɨ mədeesə ŋwaꞌlə Nwi nə vɨɨ taa fɨ taa ŋii Nwi faynə shɔ maa nsɔꞌ. 54Pita nəə beꞌsə Yeso fɨ ntaŋ, jwì dùꞌ ŋkee fu wuu kwalə məfeꞌ Nwi, kɨ zwasə wisə ghɔ vɨ vɨɨ faꞌ vɨɨ məfeꞌ Nwi.

55Vɨɨ kwalə məfeꞌ Nwi nə vɨɨ mbɨə faŋ vəŋ yaa kɨ shia nsɔꞌ vənshə kəə vɨɨ tɨ́ kaꞌ vəŋ gì nu faŋ Yeso nə yɨ̀sə kəbwə, yuu vəŋ zwi ŋwə, kee ye me. 56Vɨɨ vəyaŋ sɨɨ təba tɔ ŋwə. Təba tɔ́ kee bee fàynə me. 57Vɨɨ mɔ́ꞌ ndɔ fɨ nsi, bìŋ mbee tɔ ŋwə, gì laa, 58«Yia nə zɔ̀ faŋ ŋwə nə gì laa yi taa dɔŋsə ŋii Nwi yikwalə nyə̀, faŋ vɨ nə fianə nə ghɔ, baa bɔŋ yiday, kee nə ghɔ me, maa vəshi vətia.» 59Luu nə, yigisə vəŋ yɔ́ kee bee faynə maa nu kɔ́ me. 60Wuu kwalə məfeꞌ Nwi kɨ nii tɨ̀ŋnə yizɔ, tɨ̀ŋnə nɨntəŋ, bìtə tɨ́ Yeso laa, «A kee bəŋsə vənu mbɨə faŋ vɨɨ və̀ gisə kɔ̀ŋ ghɔ yimu?» 61Ŋwə gay, kee bee bə̀ŋsə tuu nu me. Wuu kwalə məfeꞌ Nwi bitə tɨ́ ŋwə laa, «Naysə tɨ́ yia, a luu wə ntɨə faŋ Nwi nə shoꞌ maa wuu məbweysə vɨɨ vi mu? A lùu Wee Nwi, faŋ vɨ bəŋsə ŋwə Nwi nə mu?» 62Yeso bəŋsə tɨ́ ŋwə laa, «Ɔŋ, luu mə. Viŋ ndɔ ye Wuu yinsəŋ Nwi faŋ ŋwə ndɔ duꞌnə ŋkee fuu ŋkaw kwi maa kwiŋ maꞌnə Nwi faŋ ŋwə kìi wutə kənshə. Viŋ ndɔ baa ye ŋwə, faŋ ŋwə ndɔ jwi taa mbɔꞌ fɨ yizɔ.» 63Wuu kwalə məfeꞌ Nwi ghɔ́ zɔ nu kɔ́, sètə njwi yi, ndɔ̀ gì laa, «Nsiŋ sii baa kəə vɨɨ məbiŋ kɔ̀ŋ ŋwə tɨ́ kə? 64Maa viŋ zɔ̀ faŋ ŋwə ndà Nwi! Mbɨꞌtə yiŋ lùu laa kə?» Vəŋ vənshə shia laa vɨ zwi ŋwə, ŋwə ku. 65Vɨɨ mɔ́ꞌ kɨ nii tey kɨ sheꞌ mənti maa ŋwə, shìtə sɨ ghi, fwàŋnə ŋwə, ndɔ̀ bìtə tɨ́ ŋwə laa, «Kɨɨ nə wə ntɨə faŋ ŋwə fwàŋnə ghɔ fɨ maa Zwitə Nwi.» Vɨɨ faꞌ vɨɨ məfeꞌ Nwi kɨ nii ndì ŋwə, sàŋ fəə ghi nɨzi.

Faŋ Pita nə twèy Yeso

(Matiu 26.69-75; Lukas 22.56-62; Jɔn 18.15-18,25-27)

66Faŋ Pita nə dùꞌ fu wuu kwalə məfeꞌ Nwi nə, wəzwi mɔ́ꞌ fɨ taa ŋwaa vɨɨ faꞌ wuu kwalə məfeꞌ Nwi jwi, yè Pita faŋ ŋwə zwasə wisə. 67Ŋwə ndeynə Pita, gì laa, «Maa a luu fɨ maa vɨɨ Yeso, wə wì fɨ ntɨꞌ Nazaret.» 68Ŋwə twey, gì laa, «Mə kee kɨ̀ɨ nə nu ŋkɨə faŋ a gì nə me, kee bee zɔ̀ nu kɔ́ me.» Ŋwə gi nɨniŋ, ndɔ̀ fùu gə̀ njɨɨ fu. 69Wəzwi ghɔ́ baa kɨ ye ŋwə yifi, tey kɨ gisə tɨ́ vɨɨ mbɨə faŋ vəŋ nə tɨŋnə yifi laa, «Wə ŋwə̀ lùu fɨ maa vɨɨ Yeso vì.» 70Pita baa kii twey. Fɨkɨꞌ nee, vɨɨ mbɨə faŋ vəŋ nə tɨ̀ŋnə yifi, gi tɨ́ ŋwə laa, «Ŋkee yinsəŋ, a lùu fɨ maa vɨɨ vɔ́. Yia kɔꞌ kɨɨ buꞌ laa a lùu wə fɨ shɨ Galilii.» 71Ŋwə nda ŋwaa wi, kèe laa, «Mə kee kɨ̀ɨ nə wə ntɨə faŋ viŋ gisə kɔ̀ŋ ŋwə nə me.» 72Sheꞌ fɨkɨꞌ nee, ŋkɨꞌ taw lwesə ghee bɔɔ. Pita lumə nu ŋkɨə faŋ Yeso nii gì tɨ́ ŋwə nə laa, «Ŋkɨꞌ taa kee taw ghee bɔɔ me, a twey mə ghee tia.» Ŋwə lumə nɨniŋ, gù nsi nə yigwia.

Currently Selected:

Mark 14: bav

Highlight

Copy