Lukas 9
9
Faŋ Yeso nə tɔ̀ŋ vɨɨ ntɔŋ vi laa vəŋ gə kɨ fɨꞌtə nu Nwi, baa shuꞌ vəza fɨ maa vɨɨ
(Matiu 10.1,5-15; Mark 6.7-13)
1Shi mɔ́ꞌ Yeso shəŋtə vɨɨ ntɔŋ vi njɔsə-bɔɔ, kɔ̀ wutə tɨ́ vəŋ, ŋkee wutə maa məfuusə vəzwitə vəbwəvə vənshə fɨ maa vɨɨ, baa nə wutə maa məshuꞌ vəza, 2kɨ nii tɔŋ vəŋ laa vəŋ gə, kɨ toꞌ, fɨꞌtə nu yifwàŋ Nwi tɨ́ vɨɨ, baa shùꞌ vəza fɨ maa vɨɨ. 3Ŋwə nə gì tɨ́ vəŋ laa, «Kɨ viŋ gə nə fa me, tɨꞌnə me ndì mbay nə mba jɨŋ nə bee nə ka me, tɨꞌnə me ndì njwisə səbɔɔ, gə̀ nə nsə me. 4Viŋ gə nɨniŋ, gə̀ maa shəŋ kəmɔ́ꞌ, ŋìi fu wə mɔ́ꞌ, shi sheꞌ fu wə ghɔ́, zìꞌ tɨ́ shi ŋkɨə faŋ viŋ taa ndɔ fɨ maa shəŋ kɔ́. 5Viŋ kɨ luu zìꞌ maa shəŋ kəmɔ́ꞌ, vɨɨ kee jìa viŋ jəə me, viŋ fùu fɨ taa ntɨꞌ yinjii, tɔ̀ŋsə shɔꞌ fɨ ghuu viŋ nsi, kɨ nii lùu shwenə nsɔꞌ tɔ vɨɨ vɔ́.» 6Ŋwə gi nɨniŋ mètə, vəŋ fuu, kɨ toꞌ fɨ taa məshɨ məshɨ, toꞌ wày nu ntɔŋ yijəə Nwi, fuusə vəza fɨ maa vɨɨ vəza maa vəshəŋ vənshə.
Tɔ fwàŋ Herod shii buꞌ nu Yeso
(Matiu 14.1-12; Mark 6.14-29)
7Fwàŋ Herod nə zɔ̀ vənu vənshə faŋ mbə nəə gay, faŋ Yeso nəə yɨsə nə, tɔ ki kwə gay, buꞌ laa vɨɨ mɔ́ꞌ nə gì laa lùu Jɔn faŋ ŋwə ywèy fɨ shɨ yiku. 8Vəmɔ́ꞌ gi laa, lùu nshiiŋii-sɔghɔ Elias faŋ ŋwə nə ndì fɨshi nə, faŋ ŋwə baa fùu ndwə. Vəmɔ́ꞌ laa lùu wə fɨ taa ŋwaa nshiisə-ŋii sɔghɔ, mbə ywaŋ-vɨsɨ, faŋ ŋwə ywey. 9Herod gi laa, «Mə nə shìa tɔ Jɔn. Gə fɨ maa wə wì faŋ mə zɔ kɔ̀ŋ kwiŋ vənu vi vɔ́ nə, ŋwə sii lùu ndə?» Ŋwə gi nɨniŋ, kɨ kəə ye ŋwə.
Faŋ Yeso nə zə̀ vɨɨ ŋkaŋsə tee
(Matiu 14.13-21; Mark 6.30-44; Jɔn 6.1-14)
10Vɨɨ ntɔŋ Yeso vɔ́ bəŋ jwì, fɨ̀ꞌtə vənu vənshə faŋ vəŋ nəə yɨsə tɨ́ ŋwə. Ŋwə ndi vəŋ, ghɔ vɨ vəŋ bɨɨ gə̀ sheꞌ vəŋ vəŋ maa shəŋ ndenə, gə̀ zìꞌ maa ntɨꞌ yimɔ́ꞌ, yizii ntɨꞌ yɔ́ luu Betsayda. 11Vɨɨ vəyaŋ zɔ, bèꞌsə ŋwə. Ŋwə biŋ laa vəŋ ziꞌ yɨ ŋwə, gì tɨ́ vəŋ kɔ̀ŋ nu yifwàŋ Nwi, fùusə vəza fɨ maa vɨɨ mbɨə faŋ vəŋ nəə zɨzasə. 12Fu kɨ laynə vɨɨ vi njɔsə-bɔɔ jwi yɨ ŋwə, gì tɨ́ ŋwə laa ŋwə yɨsə nwaa vɨɨ vɔ́ saykə, gə̀ taa ntɨꞌsə faŋ nsə kìa shəŋ kɔ́, tɨꞌnə me taa təfu tə tɔɔ, gə kə̀ə vəshəŋ vəshivə nə fazɨ, buꞌ laa shəŋ kɔ́ nə luu shəŋ nɔŋ-nɔŋ. 13Ŋwə gi tɨ́ vəŋ laa, ŋkə bàw laa vəŋ kɔ fazɨ tɨ́ vɨɨ vɔ́. Vəŋ bəŋsə tɨ́ ŋwə laa, «Yia kii sheꞌ yighɨsə bee tee, nə susə səbɔɔ. A kəə laa yia gə ywàŋ fazɨ tɨ́ vɨɨ və̀ vənshə lee?» 14Vɨɨ vɔ́ vənshə faŋ vəŋ nə bàytə yifi nə, nə luu yaa ŋkaŋsə tee. Yeso kɨ nii gì tɨ́ vɨɨ məzwetə nu ki laa vəŋ yɨsə vɨɨ duꞌ nsi maa yiley maa wə muu-ntee muu-ntee. 15Vəŋ yɨsə nɨniŋ, vɨɨ vənshə duꞌ nsi. 16Ŋwə kɨ nii ndì yighɨsə bee yɔ́ tee, nə susə sɔ́ səbɔɔ nə, ndèynə yizɔ, bwàŋ Nwi maa vətɔ vɔ́, bɨ̀ꞌtə, kɔ̀ tɨ́ vɨɨ məzwetə nu ki laa vəŋ gaatə tɨ́ vɨɨ vɔ́. 17Vɨɨ vənshə zɨ zwə̀kə. Vɨ kɨ nii bàytə vəbɨꞌ və bee faŋ mbə bə nə, mbə lwaŋkə taa ŋkɔɔsə njɔsə-bɔɔ.
Faŋ Pita nə bìŋ Yeso
(Matiu 16.13-19; Mark 8.27–9.1)
18Shi mɔ́ꞌ Yeso nə dùꞌ shəŋ mɔ́ꞌ sheꞌ ghɔ vɨ vɨɨ məzwetə nu ki, shɔꞌtə Nwi. Ŋwə shɔꞌtə Nwi mètə, bìtə tɨ́ vəŋ laa, «Vɨɨ sii gisə laa mə lùu ndə?» 19Vəŋ bəŋsə tɨ́ ŋwə laa, «Vɨɨ mɔ́ꞌ gisə laa a luu Jɔn, wuu məkɔ muu mə Nwi. Vəmɔ́ꞌ laa a luu Elias. Vəmɔ́ꞌ laa a lùu fɨ maa nshiisə-ŋii sɔghɔ mbə ywaŋ-vɨsɨ, faŋ ŋwə ywèy fɨ shɨ yiku.» 20Ŋwə baa bìtə tɨ́ vəŋ laa, «Gə fɨ maa viŋ, viŋ gì ŋkiŋ laa mə lùu ndə?» Pita gi laa, «A luu Kristo, Wee Nwi.» 21Ŋwə lɨꞌtə tɨ́ vəŋ nəŋay laa kɨ vəŋ naysə nu kɔ́ tɨ́ wə me, 22baa gì tɨ́ vəŋ laa, «Viŋ kɔꞌ kɨɨ laa nu Wuu yinsəŋ Nwi lùu laa ŋwə ndɔ ye ŋɨꞌ yiyaŋ. Vəshɨꞌ vaŋ-nsiŋ nə vɨɨ kwalə məfeꞌ Nwi, nə vɨɨ mədeesə ŋwaꞌlə Nwi ndɔ twey ŋwə, zwì ŋwə. Vəshi kɨ shɔ̀ɔ vətia, ŋwə ywey fɨ shɨ yiku.»
Nu məbeꞌsə Yeso
(Matiu 10.33,39; 16.20-28; Jɔn 12.25)
23Yeso baa gì tɨ́ vɨɨ vənshə laa, «Wə kɨ luu kəə kɨ beꞌsə mə, bàw ŋwə shaꞌ fəŋkɔꞌ fə ŋkɨꞌsə fi shi shi, beꞌsə mə (ŋkee maa shəŋ ŋkɨə faŋ kaꞌ vɨ zwi ŋwə shɔ nə). 24Wə ntɨə faŋ ŋwə kəə bweysə ŋwaa wi, ndɔ ndisə ŋwaa wi. Wə ntɨə faŋ ŋwə ndisə ŋwaa wi buꞌ mə, ndɔ bweysə ŋwaa wi. 25Wə mɔ́ꞌ kɨ luu ndì shɨ nsi kənshə maa ŋkii, ndìsə ŋwaa wi, tɨꞌnə me bɨ̀sə ŋwaa wi, ŋkə sii taa gaŋtə ŋwə nə kə? 26Viŋ zɔ! Wə ntɨə faŋ tɔ ki dɨɨ buꞌ mə, baa nə yigisə nyaa, buu tɔ kaŋ ndɔ dɨɨ maa ŋwə nɨzi, maa yighee njyə faŋ mə ndɔ jwi nə yikwalə nyaa nə njyə Tii ŋwaa, baa nə njyə nshiisə-ŋiisə Nwi səleysə. 27Mə gì tɨ́ viŋ ŋkee maa yinsəŋ laa vɨɨ mɔ́ꞌ taa ŋwaa viŋ faŋ viŋ dùꞌ feenə nə, kee ndɔ kukə, buu ye nu yifwàŋ Nwi me.»
Faŋ Yeso nə kìasə kɨ ndwaꞌlə
(Matiu 17.1-9; Mark 9.2-9)
28Faŋ Yeso nə gì təgi tɔ́, vəshi ziꞌ yaa yifɔŋ, ŋwə ndi Pita ghɔ Jɔn nə Jeyms, ghɔ vɨ vəŋ koꞌ gə̀ fuu baŋ maa məshɔꞌtə Nwi. 29Ŋwə kɨ shɔꞌtə Nwi, yikəꞌ yi kiasə gu kəŋ mɔ́ꞌ nee, njwi si fu laa buu, nɨndwaꞌlə. 30Vɨɨ vəbɔɔ gwəkə lùu shɔ yɨ ŋwə, ghɔ vɨ vəŋ nə gisə. Vɨɨ vɔ́ nə luu nshiisə-ŋii sɔghɔ, mbə ywaŋ-vɨsɨ, təzii təvəŋ luu Mose nə Elias. 31Vəŋ jwi kɨ nɨndwaꞌlə, məley Nwi lùu maa vəŋ. Vəŋ gisə tɨ́ Yeso kɔ̀ŋ jɨɨ njyə faŋ ŋwə ndɔ metə vəfaꞌ vi, ku ntɨꞌ Jerusalem. 32Mbweysə koo Pita ghɔ vəliŋ vi. Luu nə, vəŋ kee bwey me, yè faŋ məley Nwi bee, kia Yeso nə vɨɨ vɔ́ vəbɔɔ faŋ vəŋ nə tɨ̀ŋnə yɨ ŋwə nə. 33Vɨɨ vɔ́ nə kəə ndɔ fɨ yɨ ŋwə, Pita gi tɨ́ ŋwə laa, «Tɨta, ŋkə bàw faŋ yia lùu feenə; yia taa fianə təta tətia, ŋgwɨɨ muꞌ, nə ngwə Mose muꞌ, nə ŋgwə Elias muꞌ.» Pita nə gì nɨniŋ, kee kɨ̀ɨ nə nu ŋkɨə faŋ ŋwə gì me. 34Sheꞌ faŋ ŋwə nə gì nɨniŋ nə, mbɔꞌ jwi shìtə vəŋ. Vəŋ fee faŋ vəŋ nə luu taa mbɔꞌ nə. 35Gɨ Nwi fuu taa mbɔꞌ yɔ́ laa, «Lùu ŋwiŋ ŋwaa nə, faŋ mə nə shoꞌ. Viŋ kɨ zɔnə ŋwə!» 36Gɨ yɔ́ gi nɨniŋ, Yeso kɨ nii tɨ̀ŋnə shɔ sheꞌ nɨnɔŋ. Vɨɨ məzwetə nu Yeso vɔ́ gay, kee gì tuu nu faŋ vəŋ nə ye nə, tɨ́ wə maa vəshi vɔ́ me.
Faŋ Yeso nə shùꞌ wuu kəŋgu
(Matiu 17.14-20; Mark 9.14-29)
37Fu kɨ lee, vəŋ siꞌ fɨ fuu baŋ yɔ́, vɨɨ vəyaŋ jwi fàynə ghɔ vɨ vəŋ. 38Wə mɔ́ꞌ fɨ taa ŋwaa vɨɨ vɔ́ tii ŋwə nəŋay, gì laa, «Tɨta, mə bùꞌ ghɔ tɨ́ ghɔ laa a ndeynə ŋwiŋ ŋwaa, buꞌ laa luu sheꞌ yigɨꞌ wee ghɔ́ ghɔ mə. 39Zwitə bwə mɔ́ꞌ yaa kɨ jia ŋwə, ŋwə gwəkə yumə, ndɔ gu nsi, təfwi fuu fɨ shuu ŋwə. Ŋkə yaa kɨ tay maa ŋwə, ŋwə bwa bwa. 40Mə nii bùꞌ ghɔ tɨ́ vɨɨ məzwetə nu kə laa vəŋ fuusə zwitə kɔ́, vəŋ kee kìi wutə məfuusə me.» 41Yeso gi laa, «Aŋ viŋ, vɨɨ tɔ shiinə, nə ŋgwisə vɨɨ faŋ viŋ kee nùŋ fwi maa Nwi me. Nsiŋ sii ndɔ mwəsə ndəəkə?» Ŋwə nə gì nɨniŋ, kìasə gì tɨ́ wə ghɔ́ laa ŋwə jwi nə ŋwiŋ wi ghɔ́ tɨ́ ŋwə. 42Wee ghɔ́ kɨ jwi, zwitə bwə kɔ́ suŋ ŋwə, kəŋgu mɔꞌ ŋwə. Yeso shə tɨ́ zwitə bwə kɔ́, shùꞌ wee ghɔ́, kɔ̀ tɨ́ tii wi. 43Shuu vɨɨ vənshə yɔŋ buꞌ wutə Nwi, faŋ ŋkə luu ŋkee kəkwalə.
Faŋ Yeso nə baa lèsə nu ŋɨꞌ ki
(Matiu 17.22-23; Mark 9.30-32)
Maa yighee yɔ́ faŋ shuu vɨɨ vənshə nə yɔ̀ŋ maa vənu vənshə faŋ Yeso nəə yɨsə nə, ŋwə gi tɨ́ vɨɨ məzwetə nu ki laa, 44«Viŋ ndi yigi nyaa faŋ mə kəə gi tɨ́ viŋ ndwə, nùŋ taa fwisə viŋ. Viŋ zɔ! Vɨ ndɔ kɔ Wuu yinsəŋ Nwi taa ghɔ vɨɨ, vəŋ zwi ŋwə.» 45Vəŋ kee jia ŋiꞌ yigi yɔ́ me. Ŋkə nə ndènə fɨ yikəꞌ vəŋ maa məkɨɨ nə ŋkee ŋiꞌ ki. Luu nə, vəŋ fee fɨ bitə tɨ́ ŋwə.
Wuu kwalə lùu ndə?
(Matiu 18.1-5; Mark 9.33-37)
46Nu mɔ́ꞌ ŋii taa fwisə vɨɨ məzwetə nu Yeso, vəŋ nə kwaꞌtə fɨ tɔ vəŋ laa, wuu kwalə fɨ taa ŋwaa vəŋ lùu ndə? 47Yeso kɨɨ nə nu ŋkɨə faŋ vəŋ bɨꞌtə fɨ taa fwisə vəŋ nə, ndì weembwa wuubwa, nùŋ yɨ ŋwə, 48gì tɨ́ vəŋ laa, «Wə ntɨə faŋ ŋwə ndì wee ŋwə̀, kɨ gaŋtə maa yizii nyaa, buu ŋwə gàŋtə luu mə. Wə ntɨə faŋ ŋwə gàŋtə mə, gàŋtə wə ntɨə faŋ ŋwə nə tɔ̀ŋ mə nə. Wə faŋ luu ŋkee wuu tɨtiꞌ fɨ taa ŋwaa viŋ, buu lùu wuu kwalə.»
Nu wə faŋ ŋwə nə bìŋ Yeso, kee bèꞌsə vɨɨ vi me
(Mark 9.38-40)
49Jɔn bəŋsə, gì laa, «Tɨta, yia yè wə mɔ́ꞌ faŋ ŋwə fuusə vəzwitə vəbwəvə maa yizii yə. Yia twey tɨ́ ŋwə, buꞌ laa nsiŋ vɨ vəŋ kee toꞌ mɔ́ꞌ me.» 50Yeso gi tɨ́ ŋwə laa, «Kɨ viŋ twey tɨ́ ŋwə me. Wə faŋ ŋwə kee twèy viŋ me, buu ŋwə bìŋ viŋ.»
Faŋ ntɨꞌ yimɔ́ꞌ fɨ shɨ Samaria nə twèy maa məndi Yeso
51Yighee njyə faŋ Nwi nəə kəə ndì Yeso, koꞌsə ŋwə yizɔ, nə luu nshənə, Yeso tə sɨ maa məgə ntɨꞌ Jerusalem. 52Ŋwə tɔŋ vɨɨ laa vəŋ gə vɨsɨ, gə̀ kə̀ə shəŋ shi shɔ. Vɨɨ ntɔŋ vɔ́ gə zìꞌ maa ntɨꞌ yimɔ́ꞌ fɨ shɨ Samaria laa vəŋ naysə shəŋ shi, nùŋsə tɨ́ ŋwə. 53Vɨɨ fɨ ntɨꞌ yɔ́ kee biŋ laa ghɔ vɨ vəŋ shi me, buꞌ laa ŋwə nəə kəə gə Jerusalem. 54Jeyms nə Jɔn, faŋ nə luu vɨɨ məzwetə nu Yeso nə, ye nu kɔ́, gì tɨ́ ŋwə laa, «Tɨta, a kəə laa yia gi wisə fuu fɨ taa yizɔ, twàŋ vəŋ mu?» 55Ŋwə kiasə ŋwaa wi, shə̀ tɨ́ vəŋ, [twey, gì laa, «Viŋ kee kɨɨ nə kəŋ zwitə ŋkɨə faŋ viŋ kii me. Wuu yinsəŋ Nwi nə kee jwì maa məndisə vɨɨ me. Ŋwə nə jwì maa məbweysə vɨɨ.»] 56Vəŋ kɨ nii ndɔ̀ gə̀ maa ntɨꞌ yiday.
Nu vɨɨ vətia faŋ vəŋ nəə kəə beꞌsə Yeso
(Matiu 8.19-22)
57Vəŋ baa kii gə fɨ jɨɨ, wə mɔ́ꞌ jwi gì tɨ́ Yeso laa, «Mə taa kɨ beꞌsə ghɔ maa vəshəŋ vənshə faŋ a gə shɔ.» 58Yeso gi tɨ́ ŋwə laa, «Fəsə kìi təŋɔŋ maa məshi shɔ. Mənwə fɨ taa yizɔ kii təzi. Gə fɨ maa Wuu yinsəŋ Nwi, ŋwə kee kìi shəŋ nùŋ tɔ ki shɔ me.»
59Vəŋ baa kii gə̀, Yeso gi tɨ́ wə mɔ́ꞌ laa ŋwə beꞌsə yi. Wə ghɔ́ gi laa, «Tɨta, naꞌ, mə gə tə̀ə tii ŋwaa ŋkəə.» 60Ŋwə gi tɨ́ wə ghɔ́ laa, «Meꞌtə vəŋku və vɨɨ kɨ təə ŋku wə. Gə fɨ maa ghɔ, gə kɨ fɨꞌtə nu yifwàŋ Nwi!»
61Wə mɔ́ꞌ baa jwi, gì laa, «Mə taa beꞌsə ghɔ», bùꞌ ghɔ tɨ́ Yeso laa ŋwə meꞌtə yi, yi gə kɔ̀ bwey-jəə tɨ́ vɨɨ mbɨə faŋ vəŋ lùu taa ŋii yi. 62Yeso gi tɨ́ ŋwə laa, «Wə faŋ ŋwə jìa soo faꞌ ghɔ ŋwə, baa ndèynə yiba, buu ŋwə kee kùꞌ maa nu yifwàŋ Nwi me.»
Currently Selected:
Lukas 9: bav
Highlight
Share
Copy
Want to have your highlights saved across all your devices? Sign up or sign in
© 1993, Wycliffe Bible Translators, Inc. All rights reserved.
