Akts 7

1Wuu kwalə məfeꞌ Nwi bitə tɨ́ ŋwə laa ŋkə lùu nɨniŋ mu? 2Stefen gi laa, «Vaŋ-nshwi vaŋ nə vətɨɨ vaŋ, viŋ zɔ! Nwi faŋ ŋwə bàw shɨlə, nə fùu yikəꞌ tii ŋwaa-nsiŋ Abraham yighee njyə faŋ ŋwə nəə kɨ bii nsi Mesopoteymia, kee ta gə̀ shi ntɨꞌ Haran me. 3Nwi gi tɨ́ Abraham laa ŋwə ndɔ fɨ shɨ ŋwə nə fɨ maa yikuu yi, gə̀ maa nsi njyə faŋ Nwi taa də tɨ́ ŋwə. 4Nɨniŋ, ŋwə ndɔ fɨ shɨ Kaldia, gə̀ fìa fu wi ntɨꞌ Haran. Tii wi ku, Nwi fuusə ŋwə fɨ fuŋ, ŋwə jwi maa nsi nyə̀, faŋ viŋ shi shɔ ndwə nə. 5Luu nə, Nwi nə kee ta kɔ̀ shəŋ nsi mɔ́ꞌ tɨ́ ŋwə laa lùu ŋkii me, tuu kee ntaŋ ghɔ maa shəŋ nsi me. Nwi nə kɔ̀ꞌnə maa məkɔ nsi nyə̀ tɨ́ ŋwə nə tɨ́ yikuu yi. Nwi nə kɔ̀ꞌnə nɨniŋ, faŋ Abraham nə kee bee ta kìi wee me. 6Nwi baa gì tɨ́ ŋwə laa, «Yikuu yə ndɔ gə kɨ shi tɔmə day, vɨ ndi vəŋ yaa vəbuꞌ, vəŋ ye ŋɨꞌ maa ŋuꞌ muu-yinshwe.» 7Luu nə, Nwi baa gì laa yi ndɔ kwaŋ nsɔꞌ tɔ vɨɨ mbɨə faŋ vɨɨ yikuu Abraham vɔ́ faꞌ tɨ́ vəŋ nə, buu vəŋ ndɔ fuu fɨ maa shɨ kɔ́, jwì kɨ bəŋsə Nwi maa shəŋ kə̀. 8Nɨniŋ, Nwi nə gwìa məkee ghɔ Abraham. Shwenə məkee kɔ́ luu məsɨɨtə vaŋ. Ŋwə bi Isak, vəshi kɨ ziꞌ yifɔŋ, ŋwə sɨɨtə ŋwə. Isak bi Jeykob, sɨ̀ɨtə ŋwə. Jeykob bi vətɨɨ vaŋ-nsiŋ njɔsə-bɔɔ nə, sɨ̀ɨtə vəŋ. 9Vətɨɨ vaŋ-nsiŋ vɔ́ bee weenshu vəŋ Josef, fìŋ ŋwə shɨ Ijip. Luu nə, Nwi nə luu yiba jɨŋ ŋwə, 10bwèysə ŋwə fɨ taa ŋɨꞌ ŋwə yinshə, yɨ̀ laa fwàŋ Farao, faŋ nə luu fwàŋ fɨ shɨ Ijip, kaw ŋwə. Nwi kɔ tɔ ley tɨ́ ŋwə vɨsɨ fwàŋ Farao. Fwàŋ Farao nuŋ ŋwə laa ŋwə sɔ̀ꞌ shɨ nə ntoꞌ yi yinshə. 11Jɨŋ kɨ nii kòo shɨ Ijip nə shɨ Kanahan, ŋɨꞌ luu yiyaŋ, vətɨɨ vaŋ-nsiŋ kee kìi fazɨ me. 12Jeykob zɔ laa say shɨ Ijip, ŋwə tɔŋ vaŋ vi, faŋ lùu vətɨɨ vaŋ-nsiŋ nə, maa mfɔŋ yitoꞌ vəŋ shɔ. 13Vəŋ baa kɨ bəŋ gə̀ shɨ Ijip beꞌsə ghee bɔɔ, Josef yɨsə vaŋ-nshwi vi kɨɨ nə ŋwə. Fwàŋ Farao kɨ nii kɨ̀ɨ nə ŋiꞌ ŋii Josef. 14Josef tɔŋ ntɔŋ tɨ́ tii wi Jeykob, naysə tɨ́ ŋwə laa ŋwə jwi shɨ Ijip ghɔ vɨ vɨɨ vi vənshə. Vəŋ vənshə nə luu wə njɔsə-tee muu-ŋkwatia. 15Nɨniŋ, Jeykob gə shɨ Ijip, shəŋ ŋkɨə faŋ ghɔ vətɨɨ vaŋ-nsiŋ nə kùkə shɔ. 16Vɨ nə ndi vəŋ, gə̀ nə vəŋ ntɨꞌ Shekem, təə vəŋ shɔ taa swi njyə faŋ Abraham nə ywàŋ fɨ ghɔ vɨɨ Hamor nə ka.

17Faŋ yighee nə luu nshənə tɨ́ Nwi maa məyɨ nu ŋkɨə faŋ Nwi nə kɔ̀ꞌnə tɨ́ Abraham nə, nwaa vɨɨ vaŋ-nsiŋ nə duꞌtə ŋwə luu ŋkee yaŋ shɨ Ijip. 18Kɨ luu fɨ yiba fwàŋ mɔ́ꞌ tey kɨ sɔꞌ shɨ Ijip faŋ ŋwə nə kee kɨ̀ɨ nə Josef me. 19Fwàŋ ghɔ́ ka mənay tɔ vətɨɨ vaŋ-nsiŋ, dɔ̀ɔ vəŋ laa vəŋ kɨ meꞌ vaŋ vəŋ fu, tɨ́ kɨ kaꞌ vəŋ kùkə, kee bwèy me. 20Kɨ luu sheꞌ maa yighee yɔ́, vɨ bi Mose. Ŋwə baw vɨsɨ Nwi, vɨ kɨꞌ ŋwə taa ŋii tii wi yiŋuu yitia. 21Vɨ meꞌ ŋwə, wee Farao wəzwi ndi ŋwə yaa ŋwiŋ wi, kɨ̀ꞌ ŋwə, ŋwə ta. 22Vɨ deesə ŋwə nə vənu və yitɔfə və vɨɨ Ijip vənshə. Ŋwə kɨ nii luu ŋkee wə maa yigisə yi nə vənu vəyɨvə vi. 23Faŋ Mose ghɔ́ nə luu ŋuꞌ muu-yinshwe, kàw laa yi gə yè vaŋ-nshwi vi vɨɨ Isirayl. 24Ŋwə yè wuu Isirayl mɔ́ꞌ faŋ wuu Ijip yɨ nə ŋwə, Mose gaŋtə wə Isirayl ghɔ́, ndɔ̀ꞌ ntwi, zwì wə Ijip ghɔ́. 25Ŋwə nə yɨ̀ nɨniŋ, bɨ̀ꞌtə laa vɨɨ vi taa kɨɨ laa Nwi taa yɨsə yi fuusə vəŋ fɨ taa ŋɨꞌ. Luu nə, vəŋ kee biŋ me. 26Fu kɨ lee ŋwə baa toꞌ taa ŋwaa vɨɨ Isirayl, ye vəŋ faŋ vəŋ nywenə. Ŋwə nəə kəə gaasə vəŋ, gi tɨ́ vəŋ laa, «Viŋ zɔ! Viŋ kee lùu vaŋ-nshwi yimu? Kɨ viŋ baa kɨ yɨnə yiŋwaa yiŋ me!» 27Wə ntɨə faŋ ŋwə nii yɨ̀nə liŋ wi nə, dɔŋsə Mose, bìtə tɨ́ ŋwə laa, «Sii nùŋsə ndə nùŋsə ghɔ laa a luu tii wia, kɨ sɔꞌ yia? 28A kəə zwi mə faŋ a sɨ zwì wə Ijip wì ywaŋ nə mu?» 29Mose zɔ nɨniŋ, fùu fɨ shɨ Ijip, nyɨŋ gə̀ kɨ shi shɨ Media. Ŋwə gə shɔ, bì vaŋ vəbɔɔ.

30Ŋuꞌsə muu-yinshwe baa shɔ̀ɔ, nshiiŋii Nwi fuu yikəꞌ Mose taa wi, faŋ shuꞌ-gay nəə kɨɨ taa tɔɔ waꞌsə nə, yɨ baŋ Sinai. 31Shuu Mose yɔŋ maa nu ŋkɨə faŋ ŋwə nə ye nə. Ŋwə shəŋtə gə̀ yɨ yi maa məye jəə, zɔ̀ gɨ Nwi sheꞌ yighee yɔ́. 32Nwi gi tɨ́ ŋwə laa, «Lùu mə, Nwi vətɨɨ və. Lùu mə, Nwi Abraham nə Isak nə Jeykob.» Mose tey kɨ lɔꞌ, fèe maa məndeynə. 33Nwi gi tɨ́ ŋwə laa ŋwə shoꞌtə gɔ si fɨ ghuu ŋwə, buꞌ laa shəŋ ŋkɨə faŋ a tɨ̀ŋ shɔ, lùu shəŋ ley tɨ́ Nwi. 34Zɔ mɔɔ! Mə duꞌtə mə ndeynə, yè ŋɨꞌ njyə faŋ vɨɨ vaŋ ye shɨ Ijip. Mə zɔ̀ faŋ vəŋ sɔŋ. Nɨniŋ, mə siꞌ jwì laa mə jwi bwèysə vəŋ. Mə taa tɔŋ ghɔ shɨ Ijip.» 35Nɨniŋ nə, Nwi nə shòꞌ ŋkee Mose ŋgwə faŋ vɨɨ Isirayl yaa kee kàw ŋwə nə me, faŋ vəŋ nə gì laa, «Sii nùŋsə ndə nùŋsə ghɔ yaa tii wia laa a kɨ sɔꞌ yia.» Nwi shoꞌ Mose ghɔ́, tɔŋ ŋwə ŋkee yaa wuu məsɔꞌ vəŋ, nə yaa wuu məbweysə vəŋ, faŋ nshiiŋii Nwi fùu yikəꞌ ŋwə taa wee-shuꞌ-gay faŋ ŋwə nəə kɨɨ nə. 36Mose ghɔ́ fùusə vəŋ fɨ shɨ Ijip, faŋ ŋwə nə yɨ̀ vənu və shuu yɔŋvə shɨ Ijip, nə taa mamuu bay, baa yɨ̀sə vəmɔ́ꞌ faŋ vəŋ nə luu taa tɔɔ waꞌsə maa ŋuꞌ muu-yinshwe. 37Mose ghɔ́ baa lùu wə ntɨə faŋ ŋwə nə gì tɨ́ vɨɨ Isirayl laa Nwi ndɔ baa shoꞌ nshiiŋii-sɔghɔ mɔ́ꞌ fɨ taa ŋwaa vəŋ, sheꞌ faŋ ŋwə nə shòꞌ Mose nə. 38Luu sheꞌ Mose ghɔ́ faŋ ŋwə nə luu ghɔ vɨɨ Isirayl taa tɔɔ waꞌsə, shəŋtə vəŋ nə, faŋ ŋwə nə kòꞌ fuu baŋ Sinai, nshiiŋii Nwi gi tɨ́ ŋwə, ŋwə bəŋ siꞌ gə̀ nàysə tɨ́ vətɨɨ vaŋ-nsiŋ. Ŋwə nə fì yigisə Nwi kɔ̀ŋ məbwey, shɔ̀ɔsə tɨ́ nsiŋ. 39Luu nə, vətɨɨ vaŋ-nsiŋ twey fɨ zɔnə ŋwə, twèy ŋwə, fwisə vəŋ kwiinə, kɨ kəə sheꞌ vənu və shɨ Ijip. 40Nɨniŋ, vəŋ gi tɨ́ Aarɔn laa ŋwə naysə vənwi, kɔ̀ tɨ́ vəŋ, mbə shɔɔ vɨsɨ vəŋ, buꞌ faŋ vəŋ kee kɨ̀ɨ nə nu ŋkɨə faŋ ŋkə gày maa Mose me. 41Maa yighee yɔ́ vəŋ tu fənyia yaa wee-nyaa, kɨ feꞌ fənyia fɔ́, ŋaytə maa fa ŋkɨə faŋ ghɔ vəŋ nə fàꞌ nə. 42Faŋ vəŋ nə yɨ nɨniŋ nə, Nwi kiasə sɨ fɨ maa vəŋ, mèꞌtə vəŋ laa vəŋ kɨ bəŋsə luu məjwiŋ fɨ taa yizɔ, yuu vɨ nə nyɔ̀ꞌ taa ŋwaꞌlə nshiisə-ŋii sɔghɔ. Taa ŋwaꞌlə ghɔ́ vɨ nə nyɔ̀ꞌ laa Nwi gì laa,

«Aŋ viŋ, vɨɨ Isirayl, viŋ nəə sɨɨtə nyaasə,

fèꞌ tɨ́ mə maa ŋuꞌ muu-yinshwe taa tɔɔ waꞌsə mu?

43Bey, viŋ nə shàꞌ luu vəbee və nwi Molek

nə fənyia fə Refan, nwi məjwiŋ wiŋ.

Viŋ nə fèꞌ luu mənyia faŋ viŋ nə nàysə nə ghɔ ghiŋ.

Nɨniŋ, mə taa yɨsə laa vɨ jia viŋ,

gə̀ nə viŋ yiba shɨ Babilɔn.» #Amɔs 5.25-27.

44Gə fɨ maa bèe Nwi faŋ vətɨɨ vaŋ-nsiŋ nə kìi taa tɔɔ waꞌsə nə, vɨ nə nàysə sheꞌ faŋ Nwi nə gì tɨ́ Mose laa ŋwə naysə. Vɨ nə nàysə sheꞌ faŋ Mose nə yè yaa ndɨɨlə fɨ ghɔ Nwi. 45Kɨ luu fɨ yiba, vətɨɨ vaŋ-nsiŋ fi bèe ghɔ́, shàꞌsə, gə̀ maa shəŋ nsi ŋkɨə faŋ vɨ yaa fi fɨ ghɔ vətɔŋ. Nwi nə fùusə vɨɨ vɔ́ maa yighee njyə faŋ vətɨɨ vaŋ-nsiŋ vɔ́ jwi nə. Jɔshwa nə shɔ̀ɔ vɨsɨ fɨ ghɔ vəŋ. Bèe ghɔ́ goꞌ taa ŋwaa vəŋ, zìꞌ tɨ́ yighee fwàŋ Deyvid. 46Yikəꞌ fwàŋ Deyvid nə ley vɨsɨ Nwi. Ŋwə buꞌ ghɔ tɨ́ Nwi laa Nwi biŋ laa yi fia ŋii tɨ́ Nwi, faŋ luu Nwi tii ŋwaa-nsiŋ Jeykob. 47Luu nə, nə fia fwàŋ Solomon fìa ŋii tɨ́ Nwi. 48Faŋ ŋkə nə kɔlə lùu nɨniŋ nə, Nwi fɨ taa yizɔ kee yaa kɨ shi taa ndɔꞌ faŋ fìa vɨɨ me, yuu nshiiŋii-sɔghɔ nə naysə. 49Ŋwə nə nàysə laa, Nwi gì laa,

«Yizɔ lùu kenə kaŋ;

nsi luu ŋkaw mətəsə ghuu ŋaa.

Sii lùu kəŋ ŋii njyə, tɨ́ kaꞌ viŋ fìanə shee?

Shəŋ məshəŋ ŋwaa kaŋ sii bə?

50Maa nə bɔ̀ŋ nshɨ-tɔ ŋwaa bɔ̀ŋ vətɔ və̀ vənshə.»

# Aysaya 66.1-2.

51(Stefen nə gì yigi yɔ́ tɨ́ vəŋ, baa gi laa lee,) «Aŋ viŋ, vɨɨ tɔ shii faŋ vɨ nə kee sɨ̀ɨtə fwi yiŋ nə tuulə ghiŋ me. Viŋ twey nu Zwitə Ley Nwi sheꞌ faŋ vətɨɨ viŋ nə yɨ̀sə nə. 52Nshiiŋii-sɔghɔ lùu shɔ, faŋ vətɨɨ viŋ kee shòꞌ ghuu ghi yimu? Vəŋ nə zwìlə vɨɨ mbɨə faŋ vəŋ nə bɨ fɔŋ gì laa wuu ley Nwi ndɔ jwi fɨ yiba. Lùu ndwə, viŋ fìŋ wuu ley Nwi ghɔ́, zwi ŋwə. 53Nə luu nshiisə-ŋiisə Nwi faŋ vəŋ nə kɔ̀ ntɨsə Nwi tɨ́ viŋ. Luu nə, viŋ zɔ, kee bee yɨ nu kɔ́ me.»

54Vɨɨ məshia nsɔꞌ zɔ nɨniŋ, fwisə vəŋ shə. Vəŋ kwə gɨꞌ vəŋ tɨ́ Stefen. 55Luu nə, Zwitə Ley Nwi lwaŋ taa fwi Stefen, ŋwə ndeynə yizɔ, yè yikwalə Nwi nə Yeso, faŋ ŋwə tɨŋ maa kwiŋ maꞌnə Nwi. 56Ŋwə gi laa, «Mə ye yizɔ ŋaꞌnə, yè Wuu yinsəŋ Nwi faŋ ŋwə tɨ̀ŋ maa kwiŋ maꞌnə Nwi.» 57Vəŋ yumə ŋkee nəŋay, shìtə tuulə vəŋ, shə̀ŋtə gə̀ maa Stefen yighee muꞌ, 58jia ŋwə, gə̀ nə ŋwə yiba, tùmə ŋwə nə ŋoꞌsə. Vɨɨ mbɨə faŋ vəŋ nə zɔ̀ nu kɔ́ taa ŋii nsɔꞌ, nuŋsə njwisə vəŋ ghuu wuu zawə mɔ́ꞌ, yizii yi luu Sɔɔl, 59buu vəŋ tumə Stefen. Stefen yumə laa, «Tɨta Yeso, fi zwitə kaŋ,» 60kɨ nii tùŋ vətɔ vəyəə vi nsi, yùmə ŋkee nəŋay laa, «Tɨta Nwi, ndenə nu bwə vəŋ kə̀,» kɨ nii yiku nɨniŋ.

Currently Selected:

Akts 7: bav

Highlight

Copy