Akts 6

Faŋ vɨ nə shòꞌ vɨɨ kwatia maa məgaŋtə vɨɨ ŋɨꞌ

1Nə luu maa yighee yɔ́, faŋ nwaa vɨɨ Yeso nə yàŋ, ntay fuu taa ŋwaa vɨɨ Jus faŋ vəŋ nəə gisə ghaŋ Griik, nə ŋkee vɨɨ Jus faŋ vəŋ gisə ghaŋ Jus. Vɨɨ faŋ vəŋ nəə gisə ghaŋ Griik lulə laa vɨ shiasə vəki ŋkusə vəŋ, kee kɔ vəŋ nə vətɔ mbɨə faŋ vɨ kɔ tɨ́ vɨɨ ŋɨꞌ vəmɔ́ꞌ nə me. 2Vɨɨ ntɔŋ Yeso njɔsə-bɔɔ nə, tii vɨɨ Yeso vənshə shəŋ muꞌ, gì laa, «Kee bàw laa yia shia nu məfɨꞌtə yigisə Nwi, tɨ́ kaꞌ yia jìa nu məgaa vətɔ me. 3Nɨniŋ, vaŋ-nshwi, viŋ shoꞌ vɨɨ fɨ taa ŋwaa viŋ kwatia, faŋ vɨ kɨɨ laa Zwitə Ley Nwi lwàŋ taa fwisə vəŋ, baa nə yitɔfə; yia taa kɔ nu məgaasə vətɔ tɨ́ vəŋ. 4Gə fɨ maa yia, yia taa ndi yighee yia yinshə maa məshɔꞌtə Nwi, baa nə maa məswiŋnə nu Nwi.» 5Nwaa vɨɨ vɔ́ vənshə nə kàw nu ŋkɨə faŋ vɨɨ ntɔŋ Yeso nə gì nə. Vəŋ kɨ nii shòꞌ Stefen, wə faŋ ŋwə nə bìŋ Kristo nə fwi yimuꞌ, Zwitə Ley Nwi lwàŋ taa fwi ŋwə. Vɨ baa shòꞌ Filip, nə Prokorɔs nə Nikanor nə Timon nə Parminas nə Nikolaws, wuu Antiɔk faŋ ŋwə nə ŋìi nu Nwi vɨɨ Jus. 6Vɨ nuŋsə vɨɨ vɔ́ vɨsɨ vɨɨ ntɔŋ Yeso. Vɨɨ ntɔŋ Yeso shɔꞌtə Nwi, mɔ̀ꞌ ghɔ vəŋ tɔ vɨɨ vɔ́ kwatia nə. 7Nɨniŋ, nu Nwi kɨ nii baa sàynə. Vɨɨ vəyaŋ kuꞌsə taa nwaa vɨɨ Yeso ntɨꞌ Jerusalem. Ŋkee vɨɨ məfeꞌ Nwi vəyaŋ nuŋ fwisə vəŋ maa nu Yeso.

Faŋ vɨ nə zwì Stefen

8Stefen nə luu wə faŋ Nwi nə tù mənɔŋ-bwaŋnə tɔ ŋwə, wutə Nwi nə luu yiba jɨŋ ŋwə. Ŋwə yɨ vənu vəkwalə nə vənu və shuu yɔŋvə taa ŋwaa vɨɨ. 9Luu nə, vɨɨ mɔ́ꞌ nə luu shɔ faŋ vəŋ kee kàw Stefen me. Nə luu vɨɨ Jus fɨ taa ŋii məshɔꞌtə Nwi yimɔ́ꞌ, faŋ vɨ nəə tii vəŋ laa vəbuꞌ faŋ vɨ shòꞌtə fɨ maa vəŋ. Vɨɨ Kirene nə vɨɨ Alesandria nə vəmɔ́ꞌ fɨ Saylisia, nə fɨ Asia nə luu taa ŋwaa vəŋ. Vəŋ ndɔ kɨ suŋnə ghɔ vɨ Stefen. 10Luu nə, Zwitə Ley Nwi kɔ wutə nə yitɔfə tɨ́ Stefen, ŋwə gi, vəŋ kee kɨ̀ɨ nə nu bəŋsə tɨ́ ŋwə me. 11Nɨniŋ, vəŋ ka mənay laa vɨɨ gi laa, vəŋ yaa zɔ faŋ Stefen gì bwə kɔ̀ŋ ntɨsə Nwi faŋ Mose nə kɔ̀ tɨ́ vɨɨ nə, baa kɔ̀ŋ nshɨ-tɔ Nwi. 12Nɨniŋ, vəŋ jwi nə ntwaŋnə, bùulə tɔ vɨɨ vəyaŋ, nə vɨɨ taanə nə vɨɨ mədeesə ŋwaꞌlə Nwi, ghɔ vɨ vəŋ shɔɔ jwì maa Stefen, jìa ŋwə, shɔ̀ɔ gə̀ nə ŋwə vɨsɨ vɨɨ məshia nsɔꞌ, 13tìi vɨɨ mɔ́ꞌ laa vəŋ ŋii, sɨ̀ɨ təba tɔ ŋwə. Vɨɨ vɔ́ gi laa Stefen yaa kɨ gisə bwə kɔ̀ŋ ŋii Nwi yikwalə nyə̀, baa kɔ̀ŋ ntɨsə Mose ghee nshə. 14Vəŋ baa gì laa vəŋ nə zɔ̀ faŋ ŋwə gì laa Yeso, wuu Nazaret taa sɔꞌ ŋii Nwi yɔ́, ndɔ baa kwiinə nuŋsə nyaa-nsiŋ faŋ Mose nə kɔ̀ tɨ́ nsiŋ nə. 15Vɨɨ məshia nsɔꞌ vənshə shaꞌsə sɨ vəŋ, ndèynə Stefen, ye laa yikəꞌ yi lùu yaa yikəꞌ nshiiŋii Nwi.

Currently Selected:

Akts 6: bav

Highlight

Copy