Akts 5

Faŋ Nwi nə shia nsɔꞌ tɔ Ananias nə Safira

1Wə mɔ́ꞌ nə baa lùu shɔ, yizii yi luu Ananias, yizii zu wi luu Safira. Ŋwə nə fìŋ yindɨɨ yi nɨzi, zu wi kɨɨ. 2Ŋwə kɨ nii ndì sheꞌ way ka ghɔ́ faŋ ŋwə nə fìŋ yindɨɨ yi yɔ́ nə, jwì nə ŋwə vɨsɨ vɨɨ ntɔŋ Yeso, faŋ ghɔ zu wi shə̀ŋtə, ndɨ̀ə way. 3Ŋwə jwi nɨniŋ, Pita gi tɨ́ ŋwə laa, «Ananias, sii yɨ̀ kə laa tɨɨ vəzwitə vəbwəvə bweꞌsə ghɔ laa a fiŋ yindɨɨ yə, ndɨ̀ə way ka, jwì kɨ dəsə way laa lùu faŋ a fìŋ yindɨɨ yɔ́? A sɨ̀ɨ ba lùu tɨ́ Zwitə Ley Nwi. 4A nə kɨ fìŋ yindɨɨ yə, luu njɨɨ yindɨɨ. A baa fìŋ, ka kɨ lùu ka wə. Sii yɨ̀ kə laa a kɔꞌnə fɨ taa fwi ghɔ, laa a taa mɔŋ kəŋ nu kə̀ nee? A kee sɨ̀ɨ ba tɨ́ wə me, a sɨ̀ɨ ba lùu tɨ́ Nwi.» 5Ananias zɔ nu kɔ́, gù nsi ku. Vɨɨ vənshə zɔ, nduŋ sɨɨ vəŋ, vəŋ fee ŋkee dɨdɨꞌ. 6Zawə vəndɔŋ ndɔ fɨ nsi, gə̀ kà ŋwə, shàꞌ ŋwə, fùu fu, gə̀ təə ŋwə.

7Vəshɨshwi kɨ shɔ̀ɔ vətia, zu wi Safira ŋii, kee ta kɨ̀ɨ nə nu ŋkɨə faŋ ŋkə gày me. 8Pita bitə tɨ́ ŋwə laa, «Naysə shee, lùu shwaŋ ŋgwə faŋ viŋ ndəə wə fìŋ yindɨɨ yɔ́ shɔ nə mu? Ŋwə gi laa, «Ɔŋ, lùu nɨniŋ. Lùu ka ghɔ́ nshə.» 9Pita gi tɨ́ ŋwə laa, «Sii yɨ̀ kə buu viŋ ndəə wə biŋ maa məmɔŋ Zwitə Ley Nwi? - Ye mɔɔ, vɨɨ mbɨə faŋ vəŋ nii tə̀ə ndəə wə luu shuu fwə; vəŋ taa shaꞌ ghɔ, fùusə fu nɨzi.» 10Sheꞌ yighee muꞌ ŋwə gu ghuu Pita ku. Zawə vəndɔŋ vɔ́ ŋii, ye laa ŋwə ku. Vəŋ shaꞌ ŋwə, fùu nə ŋwə, gə̀ təə ŋwə yɨ ndəə wi. 11Vɨɨ Nwi vənshə nə vɨɨ vənshə faŋ vəŋ nə zɔ̀ nu kɔ́, fee ŋkee dɨdɨꞌ.

Faŋ vɨɨ ntɔŋ Yeso Kristo nə yɨ̀ vənu və shuu yɔŋvə

12Vɨɨ ntɔŋ Yeso Kristo baa yɨsə vənu və shuu yɔŋvə vəyaŋ taa ŋwaa vɨɨ. Vɨɨ məbiŋ Yeso Kristo vənshə baytə taa ndii Solomon fɨ taa ŋii Nwi yikwalə ghee ghee nə fwi vəŋ yimuꞌ. 13Tuu wə muꞌ fɨ taa ŋwaa vɨɨ day kee fàynə shəŋ muꞌ ghɔ vəŋ me. Vɨɨ vənshə nə gisə yigisə yijəə kɔ̀ŋ vəŋ. 14Vɨɨ vəmɔ́ꞌ vəyaŋ nə baa biŋ, kùꞌsə nwaa vɨɨ məbiŋ Kristo ghɔ́, vəndɔŋ nə vəki biŋ Kristo. 15Vɨ nəə shaꞌ vɨɨ vəza, fuusə, nuŋ vəŋ jɨɨsə fuu vəmɔ̀ꞌ nə vəfwaŋ, laa yighee njyə faŋ Pita taa kii shɔɔ, kaꞌ sheꞌ ndɨɨlə ki shìtə vəmɔ̀ꞌ fɨ taa ŋwaa vɨɨ vəza vɔ́. 16Vɨɨ faŋ vəŋ nəə shi taa ntɨꞌsə faŋ nsə nə kìa ntɨꞌ Jerusalem nə bàytə shɔ nɨzi, jwì nə vɨɨ vəza baa nə vɨɨ faŋ vəzwitə vəbwəvə nəə kɔ ŋɨꞌ tɨ́ vəŋ. Vɨɨ vəza vɔ́ vənshə bwaŋnə.

Faŋ vɨ nə kwàŋ vɨɨ ntɔŋ Yeso taa ŋii mfiŋ

17Wuu kwalə məfeꞌ Nwi nə vɨɨ vi vənshə, faŋ nə luu vɨɨ fɨ taa nshəŋtə vɨɨ Sadusii, ndɔ tɨŋ kɨ səsə vɨɨ ntɔŋ Yeso. 18Nɨniŋ, vəŋ jiatə fɨ maa vɨɨ ntɔŋ Yeso vɔ́, kwàŋ taa ŋii mfiŋ. 19Kɨ luu vətuꞌ nshiiŋii Nwi jwi, ŋàꞌsə shuu ŋii mfiŋ ghɔ́, fùusə vəŋ, gì laa, 20«Viŋ gə tɨŋnə taa ŋii Nwi yikwalə, kɨ naysə vənu və məbwey vənshə tɨ́ vɨɨ.» 21Vəŋ zɔ nɨniŋ, kɨ luu leefu, vəŋ gə taa ŋii Nwi yikwalə, kɨ deesə nu Nwi shɔ. Wuu kwalə məfeꞌ Nwi nə vɨɨ vi tii vɨɨ taanə nə vəshɨꞌ vənshə maa nshəŋtə yikwalə vɨɨ Isirayl, tɔŋ ntɔŋ laa vɨ jwi nə vɨɨ ntɔŋ Yeso vɔ́ vɨsɨ vəŋ. 22Vɨɨ faꞌ vɨɨ kwalə vɔ́ gə zìꞌ taa ŋii mfiŋ, kee yè wə shɔ me, bə̀ŋ jwì nàysə tɨ́ nshəŋtə yɔ́ laa, 23«Yia gə̀ zìꞌ taa ŋii mfiŋ, yè shuu ŋii mfiŋ sheꞌ shɔ, tɨ́ vɨ fəŋ. Vəsogeꞌ tɨŋ maa vəshəŋ vəvəŋ yɨ shuufɔ ghɔ́. Yia ŋaꞌsə shuufɔ ghɔ́, kee yè wə taa ŋii yɔ́ me.» 24Vɨɨ kwalə məfeꞌ Nwi ghɔ tɨɨ vɨɨ məshii ŋii Nwi zɔ nu kɔ́, tɔ vəŋ shii maa nu ŋkɨə faŋ ŋkə gày maa vɨɨ ntɔŋ Yeso vɔ́. 25Wə mɔ́ꞌ jwi nàysə tɨ́ vəŋ laa, «Vɨɨ mbɨə faŋ viŋ sɨ kwàŋ mfiŋ nə, vəŋ taa ŋii Nwi yikwalə, tɨŋ kɨ deesə nu Nwi shɔ.» 26Tɨɨ vɨɨ məshii ŋii Nwi, ghɔ vɨ vɨɨ vi gə ndì vəŋ, kee ndì vəŋ nə wutə me, buꞌ laa vəŋ nəə fee laa vɨɨ taa tumə vəŋ nə ŋoꞌsə.

27Vəŋ jwi nə vəŋ, nùŋsə vəŋ taa ŋii məshia nsɔꞌ, wuu kwalə məfeꞌ Nwi gi tɨ́ vəŋ laa, 28«Maa yia nə shɨ laa kɨ viŋ baa kɨ deesə nu maa yizii nyə̀ me! Luu nə, mədeesə wiŋ maa yizii yɔ́ duꞌtə ŋwə saynə taa ntɨꞌ Jerusalem nshə. Viŋ kəə yɨ laa mənshi mə wə wì ndɔ koꞌ tɔ yia mu?» 29Pita ghɔ vɨ vɨɨ ntɔŋ Yeso bəŋsə laa, «Bàw yia kɨ zɔnə Nwi fɨ ghɔ kɨ zɔnə wə. 30Nwi faŋ lùu Nwi vətɨɨ vaŋ-nsiŋ, ywèysə Yeso fɨ shɨ yiku, ŋkee Yeso ŋgwə faŋ viŋ nə bèy ŋwə fuu fəŋkɔꞌ, ŋwə ku. 31Nwi yweysə ŋwə fɨ shɨ yiku maa wutə ki, yɨ̀ laa ŋwə luu tɔ, baa luu wuu məbweysə vɨɨ, maa məkɔ jɨɨ tɨ́ vɨɨ Isirayl, tɨ́ kɨ kaꞌ vəŋ bìŋ nu bwə vəŋ, kwìinə fwisə vəŋ, Nwi ndenə yibɨsə vəŋ. 32Yia nə yè vənu vɔ́ nə sɨ, yia vɨ Zwitə Ley Nwi, faŋ Nwi kɔ tɨ́ vɨɨ mbɨə faŋ vəŋ zɔnə ŋwə.» 33Vɨɨ kwalə vɔ́ zɔ nɨniŋ, nu kɔ́ shə fwi vəŋ, vəŋ kɨ nii kəə jɨɨ maa məzwilə vɨɨ ntɔŋ Yeso.

34Luu nə, wə mɔ́ꞌ nə luu shɔ, yizii yi luu Gamaliel. Ŋwə nə luu wuu Farisii nə wuu mədeesə ŋwaꞌlə Nwi kwalə. Vɨɨ vənshə fee ŋwə. Ŋwə ndɔ fɨ nsi taa məshəŋtə ghɔ́, gì laa vɨ meꞌtə vɨɨ və̀, vəŋ fuu fu maa kuŋtə yighee. 35Ŋwə kɨ nii gì tɨ́ vəŋ laa, «Viŋ zɔ, viŋ vɨɨ Isirayl, viŋ ndɨɨnə maa vɨɨ və̀ kɔ̀ŋ nu ŋkɨə faŋ viŋ kəə yɨsə maa vəŋ nə. 36Nə luu maa yighee yimɔ́ꞌ, Tiudas nə ndɔ̀, gì laa yi lùu wuu wutə. Vɨɨ yaa yiwa yishwe beꞌsə ŋwə. Vɨ zwi ŋwə, vɨɨ vənshə faŋ vəŋ nəə beꞌsə ŋwə nə, saykə, nu ki kɔ́ baa me sheꞌ nɨniŋ. 37Yiŋkii kɨ shɔɔ, Judas, wuu Galilii, ndɔ yizɔ maa yighee məsay vɨɨ, ŋwə baytə vɨɨ vəyaŋ. Vɨ baa kɨ zwi ŋwə, vɨɨ vi vɔ́ vənshə saykə. 38Nɨniŋ, viŋ zɔ nu ŋkɨə faŋ mə naysə tɨ́ viŋ! Kɨ viŋ kɔŋ nu maa vɨɨ və̀ me. Viŋ meꞌtə vəŋ buꞌ laa faꞌ vəŋ ŋwə̀ taa kɨ luu lùu nu vɨɨ shɨ nsi, buu ŋkə kee ndɔ tay me. 39Kɨ ghaŋ laa ŋkə ndɔ̀ fɨ ghɔ Nwi, kaꞌ viŋ kee ghɔꞌ vəŋ me. Kɨ kɨɨ kɨ viŋ taa ye laa nywenə viŋ vɨ Nwi!» Vəŋ zɔ ntɨ Gamaliel yɔ́, 40baa tìi vɨɨ ntɔŋ Yeso taa ŋii, saŋ vəŋ nə vəmfa, gì tɨ́ vəŋ laa kɨ vəŋ baa kɨ deesə nu kɔ̀ŋ yizii Yeso me, kɨ nii mèꞌtə vəŋ. 41Vɨɨ ntɔŋ Yeso vɔ́ ndɔ fɨ vɨsɨ vəŋ, kɨ ŋaytə dɨdɨꞌ laa Nwi ndì vəŋ laa vəŋ kùꞌnə maa məye ŋɨꞌ buꞌ yizii Yeso. 42Vəŋ kee mèꞌtə fɨ kɨ deesə ntɔŋ yijəə Nwi shi shi taa ŋii Nwi yikwalə nə taa ndɔꞌ vɨɨ me. Vəŋ nəə fɨꞌtə laa Yeso luu Kristo, wuu məbweysə vɨɨ.

Currently Selected:

Akts 5: bav

Highlight

Copy