Akts 2

Faŋ Nwi nə tù Zwitə Ley Nwi tɔ vɨɨ ntɔŋsə Yeso

1Shi zwisə Pentekos kuꞌ, vɨɨ Yeso vɔ́ vənshə baa baytə shəŋ muꞌ. 2Sheꞌ fɨkɨꞌ nee, gɨ yimɔ́ꞌ jwi fɨ yizɔ yaa ŋkee fɨŋ kwalə, ŋii taa ŋii njyə faŋ vəŋ nə luu shɔ nə, lwaŋ taa ŋii. 3Vətɔ vəmɔ́ꞌ fuu yaa təkiꞌ tə wi, gàasə, tɨ̀ŋ tɔ wə tɔ wə. 4Vəŋ vənshə lwaŋ nə Zwitə Ley Nwi, tey kɨ gisə təghaŋ nɨŋkwiŋ nɨŋkwiŋ, faŋ yɨ̀sə Zwitə Ley Nwi kɔ́ laa vəŋ kɨ gisə. 5Maa yighee yɔ́ vɨɨ Jus faŋ vəŋ nəə bəŋsə Nwi, nə shi Jerusalem, faŋ vəŋ nə ndɔ̀ fɨ maa məshɨ fɨ mbi mənshə. 6Faŋ gɨ yikwalə yɔ́ nə fuu nə, nwaa vɨɨ vɔ́ baytə ŋkee vəyaŋ maa shəŋ kɔ́. Shuu vəŋ yɔŋ, buꞌ laa wə tɨ̀ me wə zɔ yigisə vɨɨ Yeso vɔ́ sheꞌ maa ghaŋ shɨ wi. 7Shuu vəŋ yɔŋ, tɔ vəŋ shii, vəŋ gi laa, «Vɨɨ və̀ faŋ vəŋ gisə nee nə, kee lùu vɨɨ Galilii vənshə yimu? 8Sii yɨ kə laa nsiŋ vənshə zɔ faŋ vəŋ gisə ŋkee maa təghaŋ taŋ-nsiŋ, faŋ nsiŋ nə ta kɨ gisə. 9Maa nsiŋ lùu vɨɨ Partia nə vɨɨ Media, nə vɨɨ Elam, nə vɨɨ Mesopoteymia, nə vɨɨ Jus, nə vɨɨ Kapadosia, nə vɨɨ fɨ Pɔntɔs, nə fɨ Asia, 10nə fɨ Frigia, nə fɨ Pamfilia, nə fɨ Ijip, nə fɨ nsi Libia yɨ Kirene, nə vɨɨ Rom faŋ vəŋ shi shɨ nyə̀. 11Nsiŋ lùu vɨɨ Jus mbinə mbinə nə vənjwinjwi faŋ vəŋ biŋ nu Nwi kaŋ-nsiŋ, nə vɨɨ Kriit, nə vɨɨ Areybia. Nɨniŋ, nsiŋ vənshə zɔ maa təghaŋ taŋ-nsiŋ faŋ vəŋ gisə kɔ̀ŋ vənu vəkwalə mbɨə faŋ Nwi yɨsə nə.» 12Shuu vəŋ vənshə yɔŋ, tɔ vəŋ shii, vəŋ bitə vəŋ vəŋ laa, «Kəŋ nu ŋwə̀ sii də̀ kə?» 13Luu nə, vɨɨ mɔ́ꞌ tɨtaw, gì laa shɔ̀ɔ məluꞌ sɨ vəŋ.

Faŋ Pita nə fɨ̀ꞌtə nu Nwi tɨ́ vɨɨ shi Pentekos

14Pita tɨŋnə yizɔ ghɔ vɨ vɨɨ ntɔŋ Yeso njɔ-yimuꞌ, gì nə gɨ yishaꞌsə laa, «Vɨɨ Jus, nə vɨɨ vənshə faŋ viŋ shì ntɨꞌ Jerusalem, viŋ ŋaꞌ tuulə ghiŋ, kɨ zɔ nu ŋkɨə faŋ mə taa naysə tɨ́ viŋ. 15Vɨɨ və̀ kee bee nù məluꞌ me, faŋ viŋ bɨꞌtə ndwə. Maa luu sheꞌ vəshɨshwi buumuꞌ. 16Nu ŋkɨə faŋ viŋ ye ndwə, fàynə nu ŋkɨə faŋ nshiiŋii-sɔghɔ Joel, nə nyɔ̀ꞌ taa ŋwaꞌlə Nwi fɨshi. Ŋwə nə ŋwàꞌlə laa lee,

17«Nwi gì laa, yi ndɔ tu Zwitə Ley Nwi

tɔ vɨɨ vənshə maa vəshi vəndwə,

laa vaŋ viŋ, mbə vəndɔŋ nə mbə vəki,

ndɔ kɨ naysə yigisə shuu Nwi.

Zawə wiŋ ndɔ kɨ ye vəshwenə və Nwi.

Gə fɨ maa vɨɨ taa viŋ, njyəəsə ndɔ kɨ shi vəŋ,

laa vəŋ ye ŋiꞌ nu Nwi shɔ.

18Mə Nwi ndɔ tu Zwitə Ley kaŋ tɔ vəbuꞌ vaŋ,

mbə vəndɔŋ nə mbə vəki, maa vəshi vɔ́,

laa vəŋ naysə yigisə shuu Nwi.

19Mə ndɔ də vənu və shuu yɔŋvə yizɔ,

baa nə vəshwenə shɨ nsi,

vəshwenə yaa mənshi nə wisə nə fəndɨꞌ.

20Shɨshwi ndɔ kiasə maa mfiŋsə,

ŋuu kiasə maa mənshi, buu shi tɨta Nwi kùꞌ,

faŋ luu ŋkee shi kwalə nə shi jəə.

21Ŋkə ndɔ luu maa yighee yɔ́ laa,

wə ntɨə faŋ ŋwə ndɔ tii yizii Tɨta ŋwaa-nsiŋ,

ndɔ bwey.» #Joel 3.1-5.

22Nɨniŋ, vɨɨ Isirayl, viŋ zɔ nu ŋkɨə faŋ mə gì tɨ́ viŋ. Viŋ kɨɨ laa Nwi nə kɔ̀ vənu vəkwalə nə vənu vəshuu yɔŋvə nə vəshwenə tɨ́ Yeso, wuu Nazaret, ŋwə nə yɨ̀sə taa ŋwaa viŋ, tɨ́ kaꞌ vɨ ye laa tɔ̀ŋ Nwi tɔ̀ŋ ŋwə yinsəŋ. 23Nwi nə duꞌtə Nwi nuŋsə taa ŋkɨɨ Nwi laa, vɨ kɔ̀ Yeso tɨ́ viŋ, viŋ yɨ laa vɨɨ faŋ vəŋ kee kɨɨ nə ntɨsə Nwi me, bey ŋwə fuu fəŋkɔꞌ fə ŋkɨꞌsə, zwi ŋwə shɔ. 24Luu nə, Nwi yweysə ŋwə fɨ shɨ yiku, fùusə ŋwə fɨ taa ghɔ yiku, buꞌ laa wutə yiku nə kee kùꞌ maa məjia ŋwə me. 25Maa fwàŋ Deyvid nə gì kɔ̀ŋ ŋwə fɨshi laa,

«Mə ye tɨta ŋwaa ghee nshə;

ŋwə lùu maa kwiŋ maꞌnə ŋwaa,

tɨ́ kaꞌ mə kee baa lɔꞌ me.

26Fwi nyaa ŋaytə, yigisə nyaa lwaŋ nə məŋaytə,

ŋwaa ŋwaa ndɔ ku, nɔ̀ŋ kɨ kɨꞌ məbwey,

27buꞌ laa a kee ndɔ biŋ laa zwitə kaŋ goꞌ shɨ yiku me,

tɨꞌnə me laa wuu ley wə ndɔ shuu me.

28A də̀ fɔꞌ shee faŋ lùu fɔꞌ məbwey.

A taa yɨ laa fwi nyaa lwaŋ nə məŋaytə ghee nshə

faŋ mə lùu yɨ ghɔ.» #Sam 16.8-11.

29Vaŋ-nshwi vaŋ, kaꞌ mə gì tɨ́ viŋ ntee kɔ̀ŋ tɨta ŋwaa-nsiŋ kwalə Deyvid ghɔ́. Maa ŋwə nə ku, vɨ təə ŋwə taa swi, swi wi kɨ bii kɔ tɔ və-ndee yɨ nsiŋ. 30Ŋwə nə lùu nshiiŋii-sɔghɔ, ndɔ kɨɨ laa, Nwi nə lɨ̀ꞌtə tɨ́ ŋwə laa ŋkee wee wee ŋwiŋ wi bi ndɔ duꞌ fuu ŋkaw yifwàŋ ki. 31Nɨniŋ nə, ŋwə nə gi kɔ̀ŋ nu məywey Yeso Kristo fɨ shɨ yiku, laa vɨ kee gày ŋwə shɨ yiku me, mbasə ŋwaa wi kee shuu me. 32Nɨniŋ, Nwi nə ywèysə Yeso fɨ shɨ yiku, yia vənshə ye ŋwə nə sɨ ghia. 33Nwi fuusə ŋwə fɨ shɨ yiku, nùŋ ŋwə maa kwiŋ maꞌnə Nwi, kɔ̀ Zwitə Ley Nwi tɨ́ ŋwə, faŋ Nwi nə kɔ̀ꞌnə nə. Ŋwə tù Zwitə Ley kɔ́ feenə ndwə, faŋ viŋ ye baa zɔ. 34Ŋkee nshɨ-tɔ fwàŋ Deyvid nə kee koꞌ gə̀ yizɔ me, luu nə, gì laa,

«Tɨta Nwi gì tɨ́ tɨta ŋwaa laa

ŋwə duꞌ maa kwiŋ maꞌnə Nwi,

35ziꞌ maa yighee njyə faŋ

Nwi ndɔ nuŋsə vɨɨ mbeenə vi,

yaa vəbuꞌ və yighaw vi ŋiꞌ ŋkaw ki,

laa ŋwə tə ghuu ghi fuu ŋwaa vəŋ.» #Sam 110.1.

36Nɨniŋ nə, bàw vɨɨ vənshə fɨ shɨ Isirayl kɨɨ yinsəŋ laa Nwi nùŋsə sheꞌ Yeso ghɔ́ faŋ viŋ nə bèy fuu fəŋkɔꞌ fə ŋkɨꞌsə nə, laa ŋwə luu tɨta ŋwaa-nsiŋ, baa luu wuu məbweysə ŋwaa-nsiŋ.»

37Vɨɨ vɔ́ zɔ nɨniŋ, ŋkə sɔ fwi vəŋ. Vəŋ bitə tɨ́ Pita nə vɨɨ ntɔŋ Yeso vəmɔ́ꞌ laa, «Bàw yia yɨ kə ndwə, vaŋ-nshwi via?» 38Pita gi tɨ́ vəŋ laa, «Viŋ kwiinə fwi siŋ, fì muu mə Nwi tɔ tɔ, maa yizii Yeso Kristo, laa Nwi ndenə vənu vəbwəvə viŋ faŋ viŋ nə yɨ̀sə, buu viŋ fi Zwitə Ley Nwi, faŋ Nwi taa key viŋ shɔ nə, 39fɔnə nu kɔ́, faŋ Nwi nə kɔ̀ꞌnə maa məyɨ, lùu tɨ́ viŋ, ghɔ vɨ vaŋ viŋ, baa lùu nu vɨɨ vənshə fɨ ntaŋ, faŋ Mɔꞌmbi, Nwi ŋwaa-nsiŋ, taa shoꞌ laa vəŋ lùu mbii vɨɨ.» 40Pita baa gì təgi təmɔ́ꞌ təyaŋ tɨ́ vəŋ, bùꞌ ghɔ dɨdɨꞌ laa vəŋ biŋ laa Nwi bweysə vəŋ fɨ taa ŋgwi nyə̀, faŋ vənu vəvəŋ lùu vəbwə. 41Vɨɨ mbɨə faŋ vəŋ nə bìŋ yigi yɔ́, fi muu mə Nwi. Nɨniŋ, vɨɨ yaa ŋkaŋsə sətia kùꞌsə maa nwaa vəŋ sheꞌ maa shi kɔ́.

42Vəŋ kɨ nii yiduꞌ, kɨ zɔ nu ŋkɨə faŋ vɨɨ ntɔŋ Yeso deesə tɨ́ vəŋ, baa luu biŋ, ndɔ zɨ fazɨ Mbɔŋ, ndɔ shɔꞌtə Nwi. 43Vɨɨ vənshə fee Nwi, vɨɨ ntɔŋ Yeso yɨsə vənu və shuu yɔŋvə vəyaŋ. 44Vɨɨ vənshə faŋ vəŋ nə nùŋ fwi vəŋ maa Yeso Kristo, shəŋtə shəŋ muꞌ, fa vəŋ luu kəmuꞌ. 45Vəŋ fiŋ ndɨɨsə vəŋ nə vətɔ vəvəŋ, ndì ka ghɔ́, gàasə tɨ́ vɨɨ vənshə faŋ vəŋ kee yikii me. 46Shi shi vəŋ gə taa ŋii Nwi yikwalə nə fwi yimuꞌ, ndɔ bɨꞌtə bee taa ndɔꞌ vəŋ, zɨ fazɨ nə məŋaytə, baa nə fwi yiley, 47bəŋsə Nwi. Vɨɨ vənshə ŋaytə maa vəŋ. Nwi baa kùꞌsə nwaa vəŋ shi shi nə vɨɨ faŋ Nwi bwèysə vəŋ nɨzi.

Currently Selected:

Akts 2: bav

Highlight

Copy