Akts 12

Faŋ vɨ nə zwì Jeyms, kwàŋ Pita taa ŋii mfiŋ, Nwi fuusə ŋwə fɨ fuŋ

1Kɨ luu sheꞌ maa yighee yɔ́ fwàŋ Herod jiatə vɨɨ vəmɔ́ꞌ fɨ taa nwaa vɨɨ məbiŋ Kristo, kɨ kɔ ŋɨꞌ tɨ́ vəŋ. 2Ŋwə nə jìa Jeyms, weenshu Jɔn, zwi ŋwə nə baꞌ yighaw. 3Faŋ ŋwə nə ye laa ŋkə bàw tɨ́ vɨɨ Jus, ŋwə shɔɔ vɨsɨ, baa jìa Pita. Nə luu maa yighee yitianə yimɔ́ꞌ faŋ vɨɨ Jus yaa kɨ zɨ bee faŋ vɨ kee kwàŋ fənsɨŋ taa tey yi me. 4Faŋ vɨ nə jìa Pita nɨniŋ nə, kwàŋ ŋwə mfiŋ, kɔ̀ ŋwə tɨ́ vəsogeꞌ faŋ vəŋ lùu təley yishwe, wə yishwe maa yiley, laa vəŋ kɨ shii ŋwə. Fwàŋ Herod nəə bɨꞌtə laa, yighee məzɨ Pasa ndɔ mè, yi taa shia nsɔꞌ tɔ Pita, vɨɨ vənshə ye. 5Faŋ vɨ nəə shii Pita nɨniŋ fɨ taa ŋii mfiŋ, məshəŋtə vɨɨ məbiŋ Yeso shɔꞌtə Nwi tɔ ŋwə, kee bwa me.

6Sheꞌ vətuꞌ shi kɔ́ faŋ fwàŋ Herod taa fuusə ŋwə, Pita nɔŋ nɨntəŋ ŋwaa vəsogeꞌ vəbɔɔ, kɨ bwey, tɨ́ vɨ shuŋ ŋwə nə mfiŋsə səbɔɔ, vɨɨ məshii vədɨꞌ luu shuu ŋii, shii ŋii mfiŋ yɔ́. 7Nshiiŋii Nwi gwəkə fùu, məley Nwi bee taa ŋii mfiŋ yɔ́. Nshiiŋii Nwi yɔ́ buꞌtə Pita fɨ yiŋii ŋwə, yə̀ŋ ŋwə, gì tɨ́ ŋwə laa, «Yasə ndɔ yizɔ!» Sheꞌ yighee yɔ́ mfiŋsə sɔ́ shiakə fɨ kwiŋ ŋwə, fìŋkə nsi. 8Nshiiŋii Nwi yɔ́ gi laa, «La ŋwaa wə, shùŋ gɔsə sə!» Pita yɨ nɨniŋ. Nshiiŋii Nwi yɔ́ gi tɨ́ ŋwə laa, «Wasə njwi yə, bèꞌsə mə!» 9Ŋwə ndɔ fɨ nsi, fùu fu, bèꞌsə nshiiŋii Nwi yɔ́, kee kɨɨ laa nu kɔ́ faŋ nshiiŋii Nwi yɔ́ nəə yɨsə nə, lùu nu yinsəŋ me. Ŋwə nəə bɨꞌtə laa lùu njyəə, faŋ nyə shi yi. 10Vəŋ shɔɔ vəshəŋ vəbɔɔ faŋ vɨɨ dùꞌ shɔ, kɨ shii ŋkɔꞌ mfiŋ, kɨ nii zìꞌ shuu ŋkɔꞌ ŋgwə faŋ ŋwə lùu jɨɨ nə. Shuu ŋkɔꞌ ghɔ́ nə kii bwey kwalə. Vəŋ ziꞌ shɔ, ŋwə ŋaꞌnə sheꞌ ŋgɨɨ-ŋwə. Vəŋ shɔɔ, kɨ nii zìꞌ jɨɨ, shɔ̀ɔ gə̀ zìꞌ maa jɨɨ yimɔ́ꞌ. Sheꞌ yighee yɔ́, nshiiŋii Nwi yɔ́ meꞌtə ŋwə. 11Sɨ Pita ley maa nu ŋkɨə faŋ ŋkə gày maa ŋwə, ŋwə gi laa yi kɔꞌ kɨɨ jəə ndwə laa lùu nu yinsəŋ, laa tɨta Yeso nə tɔŋ nshiiŋii Nwi, ŋwə fi yi fɨ ghɔ fwàŋ Herod, nə fɨ ghɔ vɨɨ Jus maa nu ŋkɨə faŋ vəŋ bɨꞌtə maa məyɨsə maa yi. 12Faŋ ŋwə nə kɨ̀ɨ nə nu kɔ́, ŋwə ndɔ gə̀ taa ŋii Meri, nshu Jɔn, faŋ yizii yi yimɔ́ꞌ nə luu Mark, buꞌ laa vɨɨ vəyaŋ nə shə̀ŋtə yifi, kɨ shɔꞌtə Nwi. 13Ŋwə buꞌtə shuufɔ, wuu faꞌ mɔ́ꞌ, faŋ yizii yi nə luu Roda, jwi ywìitə. 14Faŋ ŋwə nə zɔ laa lùu gɨ Pita, bə̀ŋ gə̀ nə məŋaytə, kee ŋaꞌsə me, ŋii nàysə laa Pita luu fu shuufɔ. 15Vəŋ kee biŋ me, gi tɨ́ ŋwə laa, tɔ ki bɨbuulə. Ŋwə baa kɨ bəŋsə gì laa lùu nɨniŋ. Vəŋ gi laa, luu ndɨɨlə ki. 16Pita baa mètə kɨ bɨbuꞌtə shuufɔ, vəŋ ŋaꞌsə, ye ŋwə, shuu vəŋ yɔŋ. 17Ŋwə shitə vəŋ nə ghɔ ki, ndɔ nàysə tɨ́ vəŋ, faŋ Nwi nii fùusə yi fɨ taa ŋii mfiŋ, kɨ nii gì laa vəŋ naysə tɨ́ Jeyms nə tɨ́ vaŋ-nshwi vəmɔ́ꞌ, kɨ nii ndɔ, nyɨŋ gə shəŋ day.

18Fu kɨ lee, tɔ vəsogeꞌ shii dɨdɨꞌ, vəŋ kee kɨ̀ɨ nə nu ŋkɨə faŋ ŋkə gày maa Pita me. 19Fwàŋ Herod bitə ŋwə, kee kii ŋwə me, tə̀əmə fɨ ghɔ vəsogeꞌ, gì laa vɨ jia vəŋ, kwàŋ taa ŋii mfiŋ. Fwàŋ Herod kɨ nii ndɔ̀ fɨ shɨ Judia, siꞌ gə ntɨꞌ Sisaria, gòꞌ yifi.

Faŋ Nwi nə sɔꞌ fwàŋ Herod

20Nə luu maa yighee yɔ́, fwàŋ Herod nə shəsə maa vɨɨ Tayra nə vɨɨ Sidon, vəŋ ka shuu muꞌ jwì ye Bəlastɔs, faŋ nə luu nshiiŋii fwàŋ yishi, tɔŋ ŋwə laa ŋwə gə buꞌ ghɔ tɨ́ fwàŋ, laa ghɔ vɨ fwàŋ metə nu ntay vəŋ bwaŋnə, buꞌ laa vɨɨ shɨ vəŋ yaa kɨ ywaŋ fazɨ vəŋ fɨ shɨ fwàŋ Herod. 21Vɨ tə shi. Shi kɔ́ kɨ kuꞌ, fwàŋ Herod mɔꞌ njwi yifwàŋ yi, dùꞌ fuu kenə, kɔ̀ yigi tɨ́ vəŋ. 22Vɨɨ mbɨə faŋ vəŋ nə luu yifi, yumə, gì laa, «Lùu gɨ Nwi, kee lùu gɨ wə nə me.» 23Sheꞌ yighee tii-njii, nshiiŋii Nwi saŋ ŋwə, buꞌ laa ŋwə nə kee gwènə Nwi me, vəmbii vənsaysə kwə ŋwə, ŋwə ku.

24Nɨniŋ, yigisə Nwi baa sèe, sàynə maa vəshəŋ vəyaŋ. 25Barnabas ghɔ Sɔɔl bəŋ fɨ ntɨꞌ Jerusalem, tɨ́ vəŋ faꞌ faꞌ vəŋ shɔ ŋwə kùꞌnə, kii jwi, jwì ghɔ vɨ Jɔn faŋ yizii yi yimɔ́ꞌ nə luu Mark. Vəŋ bəŋ gə̀ ntɨꞌ Antiɔk (fɨ shɨ Siria).

Currently Selected:

Akts 12: bav

Highlight

Copy