Akts 11

Faŋ Pita nə gi laa bàw vɨ biŋ vɨɨ tətɔŋ fu taa ŋwaa vɨɨ Kristo

1Vɨɨ ntɔŋ Yeso ghɔ vɨ vɨɨ məbiŋ nu Yeso fɨ shɨ Judia, zɔ laa vɨɨ tɔmə day bìŋ nu Nwi nɨzi. 2Pita bəŋ koꞌ gə Jerusalem, vɨɨ mbɨə faŋ vɨ nə sɨ̀ɨtə vəŋ, yaa vɨ yaa kɨ sɨɨtə vɨɨ Jus nə, jia Pita nə ntay, 3gì tɨ́ ŋwə laa, «Sii yɨ̀ kə a yaa ŋii taa ŋii tənswia, kɨ zɨ viŋ vɨ vəŋ?» 4Pita naysə vənu mbɨə faŋ mbə nə gày tɨ́ vəŋ, shù fɨ maa vənzi. Ŋwə nə gì laa lee, 5«Viŋ zɔ! Mə yaa luu Jɔpa, shɔꞌtə Nwi, njyəə shi mə. Mə ye fa mɔ́ꞌ siꞌ fɨ taa yizɔ. Ŋkə nə luu yaa njwi yikwalə, faŋ vɨ jia fɨ maa buu ghi shwe, kɨ suꞌsə fɨ yizɔ, nyə jwi tɨ̀ŋnə yɨ mə. 6Mə ndeynə yè taa tey wi, yè nyaasə fɨ shiŋii nə nsə taa gay, nə vətɔ mbɨə faŋ mbə toꞌ suu fɨ nsi, nə mənwə fɨ taa yizɔ. 7Mə zɔ gɨ yimɔ́ꞌ nə gisə shee laa mə ndɔ yizɔ, zwi, kwə. 8Mə twey, gì laa, «Tɨta, tuu fa bwə nə fa faŋ ŋkə kee lùu kəley me, kee ta ŋìi shuu mə me.» 9Gɨ yɔ́ baa kii gi fɨ yizɔ laa kɨ mə tii fa nə fa bwə, faŋ Nwi yɨ̀sə laa lùu fa ley me. 10Ŋkə nə gày nee ghee tia, vɨ baa kɨ nii sùŋ kənshə, ŋkə ŋii taa yizɔ. 11Sheꞌ maa yighee yɔ́, vɨɨ vətia ziꞌ shuufɔ maa ŋii njyə faŋ yia lùu shɔ nə, faŋ vɨ nə tɔŋ vəŋ tɨ́ mə fɨ ntɨꞌ Sisaria. 12Zwitə Ley Nwi naysə shee laa yia vɨ vəŋ gə mɔ́ꞌ, kɨ mə betə me. Vaŋ-nshwi vaŋ-nsiŋ və̀ ntɔfə, yia vəŋ gə mɔ́ꞌ, gə̀ ŋìi taa ŋii wə ghɔ́. 13Wə ghɔ́ naysə tɨ́ yia faŋ ŋwə nə yè nshiiŋii Nwi, faŋ ŋwə nə tɨ̀ŋnə taa ŋii yi, gì tɨ́ yi laa, yi tɔŋ ntɔŋ Jɔpa maa mətii mə Saymon Pita, 14laa mə taa naysə ntɔŋ yijəə tɨ́ yi faŋ yi taa bwey shɔ, nə ŋii yi yinshə. 15Mə gə shɔ, tey kɨ gisə tɨ́ vəŋ, Zwitə Ley Nwi siꞌ tɔ vəŋ sheꞌ faŋ ŋkə nə siꞌ tɔ nsiŋ maa vənzi. 16Mə ye nɨniŋ, lùmə yigi yimɔ́ꞌ faŋ tɨta ŋwaa-nsiŋ nə gì tɨ́ nsiŋ laa, vɨɨ nəə fi muu mə Nwi fɨ ghɔ Jɔn, gə̀ fɨ maa nsiŋ, nsiŋ taa fi lùu Zwitə Ley Nwi. 17Faŋ Nwi nə kèy vɨɨ vɔ́ sheꞌ nɨndɨŋ yaa nsiŋ, faŋ nsiŋ nə nùŋ fwi saŋ-nsiŋ maa Yeso Kristo nə, mə sii lùu ndə, tɨ́ kaꞌ mə fə̀ŋ Nwi.» 18Vɨɨ Jus vɔ́ zɔ nɨniŋ, gày, kɨ bəŋsə Nwi, gi laa, «Yinsəŋ, Nwi kɔ̀ jɨɨ tɨ́ vɨɨ tɔmə day nɨzi, laa vəŋ kwiinə fwisə vəŋ, zɨ̀ məbwey vəlwaŋ nɨzi.

Faŋ nu Nwi nə ziꞌ ntɨꞌ Antiɔk fɨ shɨ Siria

19Yighee njyə faŋ vɨ nə zwì Stefen nə, vɨ tey kɨ kɔ ŋɨꞌ tɨ́ vɨɨ məbiŋ nu Yeso vəmɔ́ꞌ nɨzi, vəŋ saykə. Vɨɨ vəmɔ́ꞌ fɨ taa ŋwaa vəŋ gə ŋkee taa məshɨ mə Fənishia nə Sayprɔs nə Antiɔk. Vəŋ nəə toꞌ fɨꞌtə nu Kristo vəshəŋ vəshəŋ, fɨꞌtə sheꞌ tɨ́ vɨɨ Jus. 20Luu nə, vɨɨ mɔ́ꞌ fɨ taa ŋwaa vəŋ, faŋ vəŋ nə ndɔ̀ fɨ shɨ Sayprɔs nə fɨ Kirene, gə ntɨꞌ Antiɔk (fɨ shɨ Siria), toꞌ fɨꞌtə ntɔŋ yijəə buꞌ tɨta Yeso tɨ́ vɨɨ faŋ vəŋ nə kee lùu vɨɨ Jus me. 21Wutə Nwi nə luu taa ŋwaa vəŋ, yɨsə laa vɨɨ vəyaŋ kwìinə fwisə vəŋ, nùŋ fwisə vəŋ maa tɨta Yeso. 22Sɔꞌkə buꞌ nu kɔ́ ziꞌ maa vɨɨ Kristo fɨ ntɨꞌ Jerusalem. Vəŋ zɔ nu kɔ́, tɔ̀ŋ Barnabas ntɨꞌ Antiɔk (fɨ shɨ Siria). 23Barnabas gə ziꞌ Antiɔk, yè faŋ Nwi nə tu mənɔŋ-bwaŋnə maa vɨɨ vɔ́, ŋàytə, tɨ vɨɨ vɔ́ vənshə laa vəŋ nuŋ fwisə vəŋ sheꞌ maa tɨta Yeso, goꞌsə ghɔ vɨ tɨta Yeso ghee nshə. 24Barnabas nə luu ŋkee wuu jəə, Zwitə Ley Nwi lwaŋ taa fwi ŋwə. Ŋwə nuŋ fwi yi yinshə maa Kristo. Nɨniŋ, vɨɨ vəyaŋ kuꞌsə maa nwaa vɨɨ məbiŋ Kristo. 25Barnabas kɨ nii ndɔ̀ gə ntɨꞌ Tarsɔs (fɨ shɨ Saylisia) maa məkəə Sɔɔl. 26Ŋwə kəə Sɔɔl, yè ŋwə, ndì ŋwə, ghɔ ŋwə bəŋ gə Antiɔk. Vəŋ vəbɔɔ duꞌ tày ghɔ vɨ vɨɨ məbiŋ Kristo fɨ Antiɔk yaa ŋuꞌ ŋkwəŋ, deesə nu Nwi tɨ́ vɨɨ vəyaŋ. Nə luu ntɨꞌ Antiɔk faŋ vɨ nə fɔŋ tey kɨ tii vɨɨ məbiŋ nu Kristo laa vɨɨ Kristo.

27Sheꞌ maa yighee yɔ́ nshiisə-ŋii sɔghɔ vəmɔ́ꞌ ndɔ fɨ ntɨꞌ Jerusalem, gə Antiɔk. 28Wə mɔ́ꞌ fɨ taa ŋwaa vəŋ luu Agabɔs. Ŋwə ndɔ fɨ nsi, gì faŋ Zwitə Ley Nwi nàysə tɨ́ ŋwə laa, ŋkee jɨŋ yiweꞌ taa koo shɨ nsi. Jɨŋ yɔ́ kɨ nii kòo shɨ nsi maa yighee fwàŋ Klɔɔdiɔs. 29Vɨɨ məbiŋ Kristo zɔ yigi Agabɔs yɔ́, gì laa, bàw vəŋ vənshə kɔ fa tɔ tɔ, wə kɔ ki fa faŋ ŋwə kìi, wə kɔ ki fa faŋ ŋwə kìi, tɨ́ kaꞌ vɨ tɔŋ gàŋtə vaŋ-nshwi shɔ fɨ shɨ Judia. 30Vəŋ yɨsə nɨniŋ, kɔ̀ vətɔ vɔ́ tɨ́ Barnabas ghɔ Sɔɔl, tɔŋ vəŋ, vəŋ gə kɔ̀ tɨ́ vɨɨ taa fɨ taa nshəŋtə vɨɨ Kristo ntɨꞌ Jerusalem.

Currently Selected:

Akts 11: bav

Highlight

Copy